Job 27

Job

1-2Mị akunya esi aḍien Ẹnaan Oomo Ịikpo phọ ẹpe edi ghan bọ bịn,

ọpo úmeera bọ usophonaan ịmi iiḅi ịiruen kụ aḍighi bọ ịdi aghuḍum ạmi rakiḍim —

3ịduon Ẹnaan rịngo bọ ni ịmi ḍiphooghu,

4ịidoronhu ạmi ịkaraph kẹ́kaaph, anem ạmi ọkpe kẹ́gba.

5Mị kátue ạḅem mọ nyina edi ni elhiom.

Mị kạpamanam ni mọ mị ịyaar ụ́piom tụtu mị amugh.

6Mị kạ́bile ọghaaph ghan mọ mị odi ni elhiom;

ịitu-ologhi ạmi ịkaraph ílho.

7Ẹnaan ẹliom ịdipho ịkaraph awe dị úlho dọl aruukuan oomo awe lọ úmeeraam

ịphen ạmi kụ ọḅile ruruphiom ịmi ẹgham!

8Eeghe oḍuom ologhi kụ odianaan weye dị Ẹnaan úlegheri

mem mọ ọpo Ẹnaan kẹmagh bọ ẹsighe ghuḍum mọ ạbidi?

9Mem dị ịiḅaghami eru,

Ẹnaan Oomo Ịikpo phọ kẹnaghan ni emoghi ạbidi ḍụghum?

10Ịkpe ni dị bịdi mụwa ọmoogh aani iboh phọ ọdi rạngo ghan bọ;

ịkpe ni dị bịdi mụuḅereghi ghan nyọdi oomo amem.

11Mị kịtughemi inyina ịdi ịikpo phọ Ẹnaan ẹbugh,

ạḅile ạkaaph amitiom ịpe Ẹnaan Oomo Ịikpo phọ magbiighi bọ.

12Kụ ọlo, ọmaar ogbi, nyina rꞌaloor mẹmiin ni;

eeghe kụ iḍighi bọ kụ nyina rẹkaaph bọ ọghaaph arolologhi?

[Zofar]

13Ịduon phọ kụ ịdi Ẹnaan Oomo Ịikpo phọ

rạliom ghan ịkaraph awe dị oḍighi rọokom-enu.

14Bịdi ọmoogh ịbadi ạnmuny,

kụ ọlo kọze ni oomo ạbidi erugh ẹgham;

ạnmuny ạbidi rọ́moogh ghan ẹlo olhe dị ẹkasian.

15Bụlo okpetenaan komughom ẹzegh,

kụ ghạlamo arukpukele ạnmariir phọ ạbidi bịn kómoghi ḍuugh phọ ạbidi.

16Ọkaraph oye ạmoogh oboom asilva dị kótue ogbi

rꞌạrusuoma dị epel oniin oye ọmoogh;

17kụ ọlo oniin ogey oye kụ kạkpologhian rụsuoma phọ ịpe phọ,

ḅịle oniin oye aghuḍuul kụ kạmoogh silva phọ ọpo phọ.

18Ạbukaraph awe rodoghoḍi ghan ruutu ịdipho ọseki-ụbeku

rꞌịdipho ogbogo ẹbene dị rakori ghan iizo.

19Ọony ekulha amem bịdi kọmina ni ude rꞌeboom ẹelha,

kụ mem dị bịdi oḅerenu, bịdi kọmiin mọ ẹelha phọ ạbuno mephe.

20Aruugu kasiph bịdi ịdipho ạmuum-aḍigho dị aru ekperenom;

ookuugh aḍughul kụ kapula bịdi ạsighiogh.

21Ookuugh kꞌẹpe erumuḍio phọ remite ghan bọ kaḅeer bịdi sịphe aruutu phọ ạbidi,

22kaḅoor bịdi reten dị igbiririph kẹ́tol,

ghạlamo bịdi eenaan ni ịlo osuma.

23Oghim mọ kaporogh ni bịdi ịdipho bịdi oghiil bọ rọki,

kụ ạsighe ịikpo ọphueghiom ạraraar kụ asiphe bịdi ruugu.

Currently Selected:

Job 27: ẠḌI

Highlight

Copy

Want to have your highlights saved across all your devices? Sign up or sign in

Abuan Language Development and Literacy Society

Ayama-Abua, Rivers State, Nigeria

Published by

NBTT

Nigeria Bible Translation Trust

No. 7 Old Airport Road

P.O. Box 790, Jos Plateau State, Nigeria

ISBN: 978-978-966-354-5

In cooperation with

MIDI BIBLE

Ch. de Praz-Roussy 4b, 1032 Romanel-sur-Lausanne, Switzerland

The New Testament in Abuan was originally published

in 1978 by The Bible Society of Nigeria with © UBS

Learn More About Ạḍinya Iigbia