Job 18
18
Bịldad
1-2Job, awe dị ọrol ịduon ạna kótue oḅoorian ḍụghum?
Eḍighi ịyaar dị nạ aḅoorian kụ aler rụru, yoor mutue ni ọḅaanaan nyịna.
3Eeghe kụ inyuughiom bọ nyịna ọotughian mọ yoor mạar úlegheri ịdipho ạsinam?
4Nạ kaḍighima ịyaar loor ạna bịn loor ọghagh ologhi phọ ạna.
Awe kọḍuaghu sịen ade phọ loor esi ọghagh ologhi phọ ạna ḍụghum?
Ẹnaan kẹḅeni rạaḅaraph mọ ẹḍuaghu kụ ẹgbaanyan nyịna ḍụghum?
5 #
Job 21.17
Ọtozi ọkaraph oye phọ koḍime ni;
anem ọtozi phọ kéemor mun.
6Ọtozi phọ ọsu bọ sịphe otu phọ ọdi koḍime ni.
7Aruwol phọ ọdi ọbo ịmeera ni, kụ ọlo nyịidipho ọdi raakpeteghaan;
ọdi mameel — igbiighi phọ ọdi memeel epum nyọdi.
8Ọdi marelhe ạki ameel ọseki, ḅịle maghinighi ruwol phọ ọdi;
9aḍiphil mesiph riighim ọdi kụ ẹpam nyọdi.
10Sịen ade phọ ọbooghi ni ḍiphil;
mọkpami ḍiphil sịphe eten phọ ọdi.
11Aḍiigu ekoom nyọdi;
rạdaph ghan nyọdi tọrotoro ekpisi lọ ọdi rạki.
12Ọdi aḍighi ghan ni ọdaam, kụ ọlo nyịidipho ọdi odi ghan ọkoony;
amabi ạmeera kụ rakori ghan nyọdi.
13Ẹzegh aḍuugh-aḍuugh melheeny loor phọ ọdi
kụ meḍighi ịdi ạraghaagh rꞌaruwol phọ ọdi mẹḅor.
14Mọghogh nyọdi omitiom sịphe ogbogo phọ ọdi ạmaar ghan bọ ạrol,
mọghogh nyọdi ọki ọmeremi risigh Ọdaam Ḍuugh.
15Nyịidipho tọro oye katue ni atugh sịphe ogbogo phọ ọdi —
mem lọ oodu ọogho.
16Ạsini phọ rꞌịla phọ ọdi mẹgharaghar.
17Aḍien phọ ọdi emite ghan bọ meḍim sịen otu phọ ḅịle rꞌẹpe erugh.
Oye nyọdi kạ́atughian mun.
18Koporogh ni bịdi sịen ade awe phọ,
koporogh bịdi esi ạḍiḅaal osumeeny esi ufiri.
19Ọdi ọ́moogh ẹemara ẹemara, kꞌọdi oye ósugha.
20Emiigh ẹpe emitenom erumuḍio phọ kụ esi ẹpe emeelom mọ,
oomo awe lọ ọnaghan ịpe emitenaan bọ bịdi
ukpereghaan ni kụ ọmoogh oghiilaan.
21Ọpo kụ ọda ịkaraph awe,
ọda awe dị ụ́maghami Ẹnaan ịyaar.
Currently Selected:
Job 18: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
