Job 17
17
1Eekuna aghuḍum mọ ạmi mẹebeeph. Mị útue mun upooghu;
ịyaar ịmi ísughanaan mun emuton oḍi phọ.
2Mị ạmiin ni ịpe awe rụnmoghoghoom bọ ịmi.
3Mị ụ́booghi ịyaar, Ẹnaan. Sịghe ni ikpo ọnhu phọ ạmi.
Ọnon oye ólho dị kạnaghan ọghaaph phọ ạmi.
4Nạ mạsighe iloghi phọ ạbidi esi ịitughian;
kámeera bịdi ọkpar upu ịmi nyịidipho phọ.
5Esi aḍidogh ageedi phọ oye ạtuan ikpoki kụ abool ọyaghiri ọdi,
kụ ạnmuny ọdi ọmiinom loor ịduon phọ.
6Kụ nyịidipho awe rudoghonaan ghan ịmi ḍidogh phọ aḍien phọ;
bịdi otu kụ ọsinom ịghor risigh ạmi.
7Okururu ạmi maḍighi ịdi mị rạ́kar mun kạmiin eten;
ạraghaagh phọ rꞌaruwol phọ ạmi memunonom ịdipho oogho.
8Awe dị ọḅem mọ ạbuno igey awe okperenom ni,
kụ oomo ạbidi mosoph ọoruen uphume ịmi mọ mị úlegheri Ẹnaan.
9Awe dị ọḅem mọ ạbuno ọkpe oghueni
mọkaraghi bịn kụ omeeraam mọ ạbuno odi ni elhiom.
10Kụ ọlo eḍighi ịyaar dị oomo ạbidi oru kụ ọmeera risigh ạmi,
mị kạ́miin rꞌoniin ọnyo ạbidi dị ạsu ologhi.
11Asiḍughul-otu phọ ạmi meten; igbiighi phọ ạmi mibi ịmi;
oḍuom ologhi phọ ạmi maphe.
12Kụ ọlo ạrighiri phọ ạmi rọḅem ghan mọ aḍughul pọ ootaany;
bịdi ọḅem mọ ạḍiḅaal mẹebeeph
kụ ọlo mị alegheri ni mọ mị odi ufiri.
13Oḍuom ologhi ạmi ọmar iḍim bịn.
Ẹpe kụ ekpisi dị mị kạmina ạnaani esi ufiri.
14Mị kakol oḍi phọ mọ ọde ạmi.
Ḅịle kẹn ạsileegbem mọ kạang bọ ịmi,
mị kakol mọ onhiin ạmi rꞌabumarani ạmi.
15Ẹghen kụ ẹdi oḍuom ologhi udianaan ịmi?
Ạnhian kụ ạmiin rꞌoniin.
16Oḍuom ologhi ịmi kụ́daph
mem dị mị rakeel ọmar iḍim.
Currently Selected:
Job 17: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
