Job 14
14
1Oomo awe rodughogh ghan ni mem lọ ọmar ḅịle kẹn kótue ọloghonaan ḍịghaagh loor ạbidi.
Oomo awe rọtol ghan ekulha amem bịn kụ rịiḅaghami.
2Yira roogborion ghan kophoph ọḅile ọgharaghar ịdipho ạsifalaway;
yira rope ghan ịdipho ạroogho.
3Nạ kuphogh kẹn ni ịmi, Ẹnaan,
ạḅile kẹn ụmeremi ịmi esi ịiruen kụ usophonaan ịmi ọoruen ḍụghum?
4Ịyaar dị eseleman kétue ẹḍua emite
esi ịyaar dị eḍigh ẹenir ịdipho oye.
5Ḍịdoony aghuḍum mọ ọdi mọto ni kụ oseere —
ọnhu ạrunwanyu lọ ọdi kạtol.
Nạ magbiighi ni kụ aseere, oye kátue anme.
6Pogh bịn ạḅitonaan ạwile nyọdi;
bịle ọdi ạghelom ọgbagara aghuḍum ọdi — mụghumo ọdi atue.
7Oḍuom ologhi odianaan ni oreeny dị molher;
katue ni ạḅile asi ạmoogh ghuḍum.
8Ghạlamo ạsini phọ iḍighi ni igbaany,
ḅịle kẹn azin phọ ạḅor ẹpe ade phọ,
9ạmuum ạrol, ọdi kasi ni ịdipho ọbam oreeny.
10Kụ ọlo oye ramugh ghan, bịn ịlo ọdi memuneen;
ọdi romugh, bịn ạḅile ghan odi ẹghen?
11Ịdipho ọphiiny lọ rákil mun
rꞌạruudu dị ạmuum mamuneen,
12kụ ịdi awe romugh ghan, róḅetenu ghan mun.
Bịdi kóḅetenu mun sịen okuaḍio phọ odi bọ ni;
bịdi kóḅetenu mun esi ạralha phọ ạbidi.
13Ḅẹlee mọ nạ kạaghi ni ịmi ẹpe ọmar iḍim;
mị ụbooghian tụtu ạghelhe phọ ạna aten,
kụ agbi nụun ọsaḅar amem ọotughian ạmi.
14Eḍighi ịyaar dị oye amugh, ọdi katue ni ạḅile amite ḍụghum?
Kụ ọlo mị kakori ni ogey amem,
akori tụtu amem ịiḅaghami phọ eten esi eekuna.
15Pọ kụ amem dị nạ kạmagh kụ mị amegheron,
kụ nạ agbi ọmoogh ạḍiḅeeraan ạmi, ọlem mọ ạna.
16Kụ nạ agon ịgbaranuom aruwol phọ ạmi,
kụ ọlo nạ kátue ạgba ịkaraph phọ ạmi.
17Nạ kạsar ri ạbilenaan bịdi ạsighe atoḅologhi;
nạ kagbuurogh ni oomo ọpioman lọ mị maḍighi ghan.
18Amem retu ni dị ạraaḅaraph kemeleghu
ḅịle kẹn ạrana etelhe ni ẹḍuaghu.
19Ạmuum kạagbirion sighiigh
kụ ogbogh ọlophia ạagbirion de phọ
kụ nạ aagulemi oḍuom ologhi phọ oye ọmoogh aghuḍum.
20Nạ ạkpar apu oye kụ aporogh nyọdi bịn kꞌagee-pọ;
ghisigh phọ ọdi mopighe esi aḍuugh.
21Ạnmuny ọdi ọkpar ọmoogh rughuenian, ọdi ólhegheri mun,
ḅịle kẹn rọ́ḅeni ghan nyọdi mem lọ oofolomi bịdi.
22Ọdi raloghoma ghan eephina aloor phọ ọdi bịn,
ḅịle rꞌịkunu ologhi phọ ọdi.
Currently Selected:
Job 14: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
