Job 1
1
ASetan ạdegh Job apogh
1Oniin oye ạrol li dị oghol mọ aJob kụ arugh ghan ẹpe ade phọ Ụz. Oye phọ ạaḅereghi ghan Ẹnaan, ạḅile ạmoogh omeeraam esi ọdi. Ọdi aḍighi ni ogey oye, agona ghan loor ọbo ọdi kaḍighi ghan bọ ịkaraph. 2Ọdi ạmar bọ oḍual alephiri ạnmuny rꞌịraar ạnmanyaan, 3kụ ạḅile ạmoogh oḍual ọonir iyool-ịga, ịraar ọonir ạsikamel, oniin ọonir ạsinam ḅịle rꞌoogh okuron ịnam adool. Ọdi kẹn ạmoogh ni ḍiboom aḍita abutelhedom kụ ọdi ạkar ri aḍighi ọdaam oomo ẹpe erumuḍio phọ remite ghan bọ.
4Ạnmuny phọ aJob rọḍua ghan kꞌoniin kọghi kꞌoniin olhe ẹyaal, kụ oomo ạbidi kụ ụghi ghan ni, kụ bịdi ụmagh aani ghan ni ịraar abumarani phọ ạbidi mọ oru aani. 5Tọro amem lọ molhe ẹyaal phọ ọman, rẹḅaal kụ aJob aḅon ghan asuma ạphighironaan ẹkia tọrotoro ọony ọdi esi owoph ạbidi. Ọdi aḍighi ghan ịduon phọ loor esi dị ọdi agbiighi ni mọ iini sịen oniin ọnyo ạbidi maḍighi ịkaraph ạḅa ẹkaraph ekpo ọnhu esi Ẹnaan ekperenom.
6 #
Emi 6.2
Ịteeny ni ḍio dị ạnmuny kꞌạke kọki egbodo Ọmoogh-we phọ, aSetan ạrol li sịphe igbo phọ ạbidi.
7Kụ Ọmoogh-we phọ apuru nyọdi mọ, “Nạ raḍighi ghan eeghe?”
ASetan ạphagharanaan mọ, “Mị ratelhe yogh ghan ni bịn kạghi ạḅile aru, rayeela ghan kakitonom de phọ.”
8“Nạ mạmiin ni otelhedom mọ ạmi Job?” Ọmoogh-we phọ apuru. “Sịen ade phọ ọnon oye ólho dị ạmoogh omeeraam ạḅile ạnighe ịdipho ọdi. Ọdi ruuseeny ghan ịmi ḅịle kẹn agona loor ọbo ọdi kaḍighi ghan bọ ịkaraph.”
9 #
Ogon 12.10
ASetan ạphagharanaan mọ, “Nạ ragbi ghan mọ aJob muuseeny ni nyịna eḍighi ịyaar dị ạsuo úlho? 10Oomo amem nạ raako ghan nyọdi rꞌọto kꞌọdi ḅịle rꞌạtorotoro ịyaar lọ ọdi ạmoogh. Nạ rạseph ghan tọro ịlo ọdi aḍighi, ḅịle nạ mạngo nyọdi sịnam dị kemuza ni ekpom ẹmha. 11Kụ ọlo, eḍighi ịyaar dị nạ ạsighiogh oomo ạraraar phọ dị ạmoogh bọ — ọdi karonyon nyịna egaan.”
12“Ẹnighe ni-a,” Ọmoogh-we phọ ạḅeni Setan, “oomo ạraraar phọ dị ạmoogh bọ edi ḍịghaagh ạna, kụ ọlo kạ́ḅogh loor phọ aJob.” Kụ aSetan ạḍua.
Oogulemi nmụny phọ rꞌẹelha phọ aJob
13Eniin aḍio mem dị ạnmuny phọ aJob odi role ghan ẹyaal ẹpe kꞌokumoor umor phọ ạbidi, 14otelhedom aghiil ạteeny Job. Oye phọ ạḅem mọ, “Yoor odi robul ghan esi iḅeph, ạsinam oḍighi phọ reguphogh ghan, ḅịle kẹn ịnam adool phọ edi rẹḅal ghan ịḅal; 15ekperenom bịn awe aSiba ozuom iyoor ẹgham bịn omi oomo phọ ạbidi. Bịdi ọze oomo abutelhedom mọ ạna umuton ịmi. Mị bịn kụ ukpetenaan oru ọḅeni ạna.”
16Tụtu ọdi ạkaaph bọ rạmadan bịn ọnon otelhedom aru ạḅem mọ, “Ọomaany mạraph iyool-ịga phọ rꞌabukoriom ịga phọ bịn ạze oomo ạbidi, Mị bịn kụ ukpetenaan oru ọḅeni ạna.”
17Tụtu ọdi ạkaaph bọ rạmadan bịn ọnon otelhedom aru bịn ạḅem mọ, “Ịraar asita awe aKaldia uzuom iyoor ẹgham, ọsighiogh sịkamel phọ, bịn ọze oomo abutelhedom mọ ạna. Mị bịn kụ ukpetenaan oru ọḅeni ạna.” 18Tụtu ọdi ạkaaph bọ rạmadan bịn ọnon otelhedom aru bịn ạḅem mọ, “Ạnmuny phọ ạna odi kꞌokumoor phọ ạbidi role ghan ẹyaal, 19bịn oghim ạḍua ẹpe ẹdala phọ aru. Oghim mọ alhereghi otu phọ bịn ạze oomo ạnmuny phọ. Mị bịn kụ ukpetenaan oru ọḅeni ạna.”
20Ẹpe kụ esi dị aJob ạmeera kụ arunyian ibura ọdi loor ọto. Ọdi aghula ẹmhu ọdi, kụ ạmina azuan ude. 21Ọdi ạḅem mọ, “Ụmaram ịmi rꞌoopho ạraghaagh, kụ mị kamugh rꞌoopho ạraghaagh. Ọmoogh-we phọ kụ ạngo, kụ nyịidipho ọdi mạsighiogh. Ạḍiseph ẹrolonaan ḍien phọ ọdi.”
22Ghạlamo ịduon oomo phọ ịphen phọ emiteghu bọ ni, aJob óḍighi ịkaraph esi ọḅaaghiom Ẹnaan.
Currently Selected:
Job 1: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
