Hosia 8

Ọmoogh-we phọ akol ooseeny ịkaaghineen ạrumugh atonyon Ịzirel

1Ọmoogh-we phọ ạḅem mọ, “Pula eeḍue phọ! Ạbumulogh-ḍien rosoor ghan de phọ ạmi ịdipho aruga. Awe ạmi moogbonyon ịyo phọ mị aghiran bọ rꞌạbidi kụ mọḅaar ẹmhu esi ịtughemi phọ ạmi. 2Ghạlamo ịduon bịdi rụmagh bọ ịmi mọ Ẹnaan ạbidi kụ ọḅem mọ bụno awe ạmi kụ bụno ulegheri ịmi phọ, 3bịdi moghel igey phọ. Loor ịphen phọ ạbumulogh-ḍien ạbidi koporogh ni bịdi.

4“Awe ạmi ọsaḅar bụdaam, kụ bịdi ọdaamian siloor. Bịdi ọma buḍiemiom, dị mị úmeeraam. Bịdi ọsighe silva rꞌagol ạbidi kụ ọkaaghi rụmugh — ịlo ophiemiom aloor ạbidi. 5Mị akel ḍilephiri ạnam agol phọ awe ẹmha phọ aSameria rooseeny ghan bọ. Mị ạmooghom ni bịdi ọghagh ologhi. Kꞌapuramem kụ bịdi ọbileghi ooseeny ghan ịkaaghineen ạrumugh phọ? 6Oye ẹmaar ọnyo Ịzirel kụ ạlhem bọ mọony aghuḍuul phọ, kụ kẹ́naan rꞌẹnum. Aḍilephiri ạnam agol phọ rooseeny ghan bọ ẹpe Sameria kootughuḍi ni eten ịpherepe! 7Mem dị bịdi ọzuph ookuugh, bịdi kobugha oghim! Ozo ịbiakpa dị ị́karaghar kémuum iimuma. Kụ ghạlamo emuum ni, aruuruen phọ kụ kole ọman. 8Ịzirel mẹghigh oomo ịpheri phọ areelhe kụ meeph mụdi aguugh dị aḅomaan. 9Ọḅaar ẹmhu ịdipho ịnam adool dị eḍien ụ́ngo, awe phọ Ịzirel rotelhe ghan ḍịo ạbidi. Bịdi mọghi ọwa ọloghonaan ạḍighaagh esi Asiria, kụ mọkpe ịnon areelhe mọ ọmaar ọpham bịdi. 10Kụ nyịidipho mị kaakpomoghi bịdi kụ ạliom bịdi. Kébia bịdi kokironaan esi eephina, mem dị ogbogh ọdaam Asiria amiigh ọkpiloghom ạbidi.

11“Ọnhu arenmeny ạrikia dị awe phọ Ịzirel odoghoḍi ịlo ootol ịkaraph, ịdipho kụ ọnhu ariisi dị bịdi ọmoogh oḍighi ịkaraph. 12Mị ụgeeghinaan we phọ ịtughemi dị kótue ogbi, kụ bịdi okel mọ eḍighi imoom. 13Bịdi ọpighiron ẹkia ụngo ịmi, kụ ạany iphulupul ịnam mọ. Kụ mị Ọmoogh-we phọ, bịdi ịmi ụ́ḅeeraan kụ nyịidipho mị kạatughian ni ịkaraph ạbidi ạlhiom bịdi; mị kaḅulemi bịdi ẹpe Ijipt!

14“Awe phọ Ịzirel mọlhoghoḍi igbogh aruutu, kụ bịdi mowula Ọlemia phọ ạbidi. Awe phọ aJuda mọlhoghoḍi rạmha dị oghoony. Kụ ọlo mị katom ni nịan dị kele igbogh aruutu rꞌạramha phọ ạbidi.”

Currently Selected:

Hosia 8: ẠḌI

Highlight

Copy

Want to have your highlights saved across all your devices? Sign up or sign in

Abuan Language Development and Literacy Society

Ayama-Abua, Rivers State, Nigeria

Published by

NBTT

Nigeria Bible Translation Trust

No. 7 Old Airport Road

P.O. Box 790, Jos Plateau State, Nigeria

ISBN: 978-978-966-354-5

In cooperation with

MIDI BIBLE

Ch. de Praz-Roussy 4b, 1032 Romanel-sur-Lausanne, Switzerland

The New Testament in Abuan was originally published

in 1978 by The Bible Society of Nigeria with © UBS

Learn More About Ạḍinya Iigbia