Hosia 13
13
Aruukuna ịiruen dị kosophonaan Ịzirel
1Mem dị meten, mem lọ eghun phọ Ifraim ọḅa, ịpheri phọ arughunughun phọ Ịzirel ughiilaan ghan ni. Bịdi ụlogh ni eghuan Ifraim. Kụ awe phọ ụpioman ni loor ooseeny ghan aBaal, kụ loor ẹmhu ịphen phọ bịdi komugh ni. 2Bịdi odi nịiniin roḍighi ịkaraph reten ọlhem ạmama kụ ooseeny — ịkaaghineen ạraraar asilva dị ologhi oye kụ agbiighi kụ ạraghaagh oye eḍighi. Kụ bịdi ọto ọḅem mọ, “Iḍighi rạraar aghuḍum ẹngo bịdi.” Ika kụ ịdi awe kọkpun ịkaaghineen ạraraar phọ ịpe — ịkaaghineen ạraraar dị ẹghigh ilephiri ạsinam! 3Kụ iḍighi kụ awe phọ ạbuen oowalanu ịdipho ooto ạḍiroor, ịdipho ooto dị ạḍuaghu mem dị aḍio ẹḅaal. Bịdi kọkigh ịpherepher dị ookuugh aphula ạsighiogh esi dị rọgbe ghan ikpo, mụdi ạmughi arughol.
4Ọmoogh-we phọ ạḅem mọ, “Mị Ọmoogh-we phọ kụ Ẹnaan phọ anyina, ọpo iḍiemiom bọ inyina ạḍuanam Ijipt. Nyina ị́moogh ẹnon Ẹnaan emuton ịmi. Mị bịn kụ ọpelia anyina. 5#Dut 8.11-17Mị ụmaar ri ịpham inyina ẹpe ẹgharaghar ẹdala phọ kụ eḍighi ịisaar bịn. 6Kụ mem dị nyina eḍigh bọ ḍigey ade phọ ịgbaanyan bọ inyina, bịn nyina ephoophe loor iwula ịmi. 7Kụ iḍighi kụ mị kizuom inyina ịdipho ạnam-dịka. Ịdipho ootiir kụ ẹdi mị kạbooghian ogon anyina eten. 8Mị kizuom inyina ịdipho ạno dị ạnmuny ọdi ophe, kụ mị ịphanyi inyina. Ịdipho ạnam-dịka kụ ẹdi mị kịraalom inyina ịgbalapuur esi esi phọ kụ ịphanyi inyina ritigh mụdi mị elhom ẹnam.
9“Mị kiphiemi ni inyina, weye Ịzirel! Kụ ạnhian kụ kịphel bọ inyina? 10#1 Sạm 8.5, 6Ọdaam mọ rꞌạbuḍiemiom mọ nyina ẹwa bọ ọphel eelhe phọ, odi ẹghen nyịidipho? 11#1 Sạm 10.17-24; 1 Sạm 15.26Rꞌophin ologhi ạmi mị mịngo inyina bụdaam, kụ rꞌophin ologhi ạmi kụ mị mạsighiogh ạḍuanam.
12“Ịkaraph rꞌạsipioghom mọ Ịzirel mọge ni esi, kụ esi phọ ọge bọ ọmaar ri oseere. 13Mọngo ni Ịzirel eepoogh ọmoogh aghuḍum kụ úmeera ọsighe amem mọ — ịdipho ọony dị rạwa ọmar pụruku ómeera omite sịphe ọkuruḅaka phọ. 14#1 Kọr 15.55Mị kạ́pel we phọ ạbuen ạsighe ọmar iḍim, ọbobo ạtagharan bịdi ḍịghaagh ịikpo aḍuugh. Sịghe aru rẹezegh phọ ạna, ḍuugh! Sịghe ophiemi phọ ạna aru, ọmar iḍim! Mị kạ́moogh ghan mun ọnma ighirigiir we phọ ạbuen. 15Ghạlamo Ịzirel oḍum ịdipho ạroogho, mị katom ni ọghologhol oghim dị kạḍua ẹdala ịisaar kꞌẹpe erumuḍio phọ remite ghan bọ kụ atu. Oghim mọ kẹkaragharami sikol ạmuum mọ rꞌasighuḍia phọ ạbidi, kụ ẹsighe ẹḍuanam tọrobo ịyaar ạsuo. 16Kọliom ni Sameria loor ọḅaar ẹmhu phọ ạbidi esi ạmi. Awe ọdi komugh ẹgham; nmụny asipugh kọgurom ude; kụ nmạriir eghun-aḍien ọbaay ogbo.”
Currently Selected:
Hosia 13: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
