Ẹzra 6
6
Ọḅile ọmiin ịto phọ ạSairos
1Esi ịduon phọ, ạDarios ogbogh ọdaam mọ ạngo ịtooghi mọ oḅiligha ịpe ạbuo-ọda phọ ọgeeghi bọ oseere sịphe ạBabilon, 2kụ ịsiphe ẹmha phọ Ekbatana ẹpe eelhe phọ aMedia kụ ẹdi ọmiin ḍikpooghineen ạḍinya dị ẹmoogh ịge phọ ịphen:
3“Ḍịḅel ạlha ọda phọ ọdi, ạSairos ogbogh ọdaam mọ ạto ni mọ ọḅile ọlogh Otu Ịiḅereghi phọ ẹpe Jeruselem pịdi oyil ghan rịkia ọḅile ọngo ghan inmo. Mọ aḍiphoph Otu Ịiḅereghi phọ kẹman ịyaldi rꞌoḍual akuḅu, kụ mọ ẹreghe ẹman ịyaldi rꞌoḍual akuḅu. 4Mọ kọloghom oniin ookpe ireeny ạnyu ạtorobo ịraar ookpe asighiigh. Mọ otu ikpoki ọdaam mọ kụ kạkpe oomo amaliom mọ. 5Ḅịle kẹn, mọ ạrukpa agol rꞌasilva phọ ịpe ạNebukadnezar ọdaam mọ ạsighe bọ sịphe Otu Ịiḅereghi phọ Jeruselem aru Bạbilon koḅulemi sịphe ọkaraghi esi phọ ạbidi sịphe Otu Ịiḅereghi phọ ẹpe Jeruselem.”
ẠDarios ạto mọ oḍighi phọ ạghi ghisigh
6Pọ kụ amem dị ạDarios ạghiom ọphagharanaan phọ ọphon:
“Ọkiom Tatenai ọdaam eelhe phọ aYufratis ạga phọ ọpo erumuḍio phọ remeel ghan bọ, Setar Bozenai, rꞌạbunon ạbuo ịtooghi phọ orugh bọ ẹpe phọ.
“Ịḍua ẹkelan sịphe Otu Ịiḅereghi phọ, 7kụ kẹ́ngo mun ịiḅaghami esi oḍighi phọ. Imeera mọ ọdaam eelhe phọ aJuda rꞌabuḍiemiom aJu phọ ọḅile ọlogh Otu Ịiḅereghi Ẹnaan sịphe ạrol bọ ẹḅel amem mọ. 8Nyịidipho mị ạto ịngo inyina ọlogh ạḍighaagh ọngo ạbidi ọḅile ọlogh Otu Ịiḅereghi phọ. Ịsighe ghan ikpoki sịphe iisogh phọ ọdaam eelhe phọ aYufratis ạga phọ ọpo erumuḍio phọ remeel ghan bọ rạbonyi ghan bọ ẹnuun ẹkpiom ghan malhiom mọ ạbidi, ọbo koosophion ghan bọ oḍighi phọ. 9Aḍio etum ḍio, dị kópel, nyina kẹngo ghan riil ạrikia phọ sịphe Jeruselem tọrobo ịyaar phọ ẹpe bịdi kịḅeni bọ inyina mọ bụno rọwa ọngo Ẹnaan kꞌạke phọ: ịbam alephiri ạsinam, mꞌiyool-ịga, mꞌạnmuny iyool-ịga dị koguom nịan, mꞌịbiakpa, mꞌaboph, mꞌamiim, mꞌạmunum ọliv. 10Koḍighi ghan ịphen phọ ọbo bịdi ọngo ghan rịkia dị ẹḅeeraan Ẹnaan kꞌạke phọ kụ ọoḅereghi ghan ịlo ạḍiseph phọ ọdi kịteeny ịmi rꞌạnmuny ạmi. 11Ịdi epu pạ, mị ạto mọ ọsiosio oreeny dị ọkpol eniin eekuna kụ kakputon loor oye lọ ụ́naghanan ịto phọ ịphen, ḅịle otu phọ ọdi kaḍighi egu atopha. 12Ẹnaan phọ ẹsaḅar bọ Jeruselem eseere mọ eḍighi esi dị kooseeny ghan nyịno, ekiton elher bụdaam mọ rꞌareelhe lọ ọopu ologh phọ ọphon, kụ ọkparagha ịlo ophiemi Otu Ịiḅereghi phọ ẹpe phọ! Mị ạDarios kụ mạngo ịto phọ ịphen. Oomo phọ ịdi kooko ni ọmadan.”
Ọḅogh Otu Ịiḅereghi oseenaan Ẹnaan
13Pọ kụ amem dị aTatenai ọdaam eelhe phọ rꞌaSetar Bozenai rꞌạbueri ạbuo ịtooghi phọ ạbidi oḍighi ọkaraghi ịpe ogbogh ọdaam mọ mạto bọ. 14#Hag 1.1; Zẹk 1.1AHagai rꞌạZekaraya ariil phọ ụngo ni buḍiemiom aJu phọ ạkpo ologhi kụ oḍighi ọlogh Otu Ịiḅereghi phọ ạghi ni ghisigh elhom. Bịdi ụmadan ni Otu Ịiḅereghi phọ ịdipho Ẹnaan phọ Ịzirel ḅịle rꞌạbudaam mọ aPasia, ạSairos, Dạrios rꞌAtazakzis mọtooghi bọ. 15Bịdi ụmadan ni Otu Ịiḅereghi phọ ḍio dị emuneniom ịraar esi ụnwanyu Adar ạlha phọ ạḍiphe eḍighi bọ odiiny sịphe ọda phọ ạDarios ogbogh ọdaam mọ. 16Pọ kụ amem dị awe phọ Ịzirel — ariil ạrikia phọ, ạbuo aLivai phọ, rꞌoomo phọ ạbueri phọ ạbuphe ọḍua bọ iiruen ạramha origheel — rꞌọḅaal ologhi ọḅogh Otu Ịiḅereghi phọ oseenaan Ẹnaan. 17Bịdi ụphinyon ni rịkia oniin okuron ilephiri ạsinam, ịyal okuron idughuna, rꞌinya okuron ạnmuny iyool-ịga kụ ọngo ḍioph rꞌịyal ạrutu-ịga ịlo ạrikia ịkaraph, oniin ọlo eniin eghun Ịzirel. 18Kụ bịdi ọḅile kẹn ookolobian bụpinyon rịkia phọ rꞌạbuo aLivai phọ ịlo arukumuan phọ ạbidi sịphe Otu phọ sịphe Jeruselem, ọdaphan ịtooghi phọ ịpe edi bọ sịphe ạḍinya phọ aMozis.
Ẹyaal ọphel otene phọ
19 #
Ẹḍua 12.1-20
Awe phọ ạbuphe ọḍua bọ iiruen ạramha origheel ulhe ni ẹyaal ọphel otene phọ ḍio dị emuneniom ḍioph rꞌinya ọḅel ụnwanyu ạlha phọ etum bọ sịphe. 20Oomo phọ ariil ạrikia phọ rꞌạbuo aLivai phọ mọosa ọḅaalami siloor. Ạbuo aLivai ụze ni ịnam mọ ọphinyonom ghan rịkia mem ẹyaal ọphel otene phọ, ịlo oomo awe phọ morigheel bọ, ịlo ariil ạrikia phọ rꞌịlo asiloor ạbidi. 21Oomo ạbuo Ịzirel phọ ọḍua bọ iiruen ạramha phọ origheel, rꞌoomo ạbuphe mọwile bọ reten aruru awe phọ orugh bọ sịphe ade phọ kụ moru bọ ooseeny Ọmoogh-we Ẹnaan phọ Ịzirel, kụ ạa ịnam ạrikia phọ. 22Esi oḍual aḍughul-otu rꞌọḅaal ologhi bịdi ulhe ni omuneni ẹyaal ạbred dị yist ụ́logh. Iloghi phọ ạbidi ẹḅaal igey ịdi eḍighi bọ Ọmoogh-we phọ maḍighi ịdi ọdaam mọ Asiria ạmoogh ḍịḅeeraan esi ạbidi kụ ạloghonaan ḍịghaagh bịdi esi oḍighi ọḅile ọlogh Otu Ịiḅereghi Ẹnaan phọ Ịzirel.
Currently Selected:
Ẹzra 6: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
