Ẹḍua 40
40
Ọmeremi ọḅile odeneghi Ogbogo Ạdol Ọmoogh-we phọ
1Ọmoogh-we phọ ạḅeni Mozis mọ, 2“Ḍịḅel aḍio ọḅel ụnwanyu phọ mẹremi Ogbogo Ạdol Ọmoogh-we phọ. 3Lọgh sịphe Ogbogo phọ Igbe Ịyo phọ ịpe ọlogh bọ ḍioph phọ iilogh phọ kụ ạkpo ukpe phọ ẹpe arisigh phọ. 4Sịghe ịdaabili phọ ạlogh kụ ạḅamaghi rạraar phọ ọdi. Ḅịle kẹn ạlogh ọmeremiom ọtozi phọ kụ ạmeremi yogh ịtozi phọ ọdi. 5Kạn enmeny agol phọ ọḅam ghan ịnsens ẹpe arisigh Igbe Ịyo phọ ạḅile ạkpo ukpe phọ sịphe ọnhu-aḍibuo Ogbogo phọ. 6Kạn enmeny dị kịpighironom ghan ẹkia ạnian phọ ẹpe arisigh Ogbogo phọ. 7Seere gbạgba ootolaam ạraghaagh phọ igbo Ogbogo phọ rꞌenmeny phọ kụ ạlogh mụum amuzeḍi. 8Koony oghoony akitonom kụ ạkpo ukpe sịphe ọnhu-aḍibuo phọ.
9“Sịghe nụun mụnum iigbia phọ adeneghiom. Ogbogo phọ ḅịle rꞌoomo ạraraar phọ, bịn maḍighi esi iigbia. 10Sịghe kẹn mụnum mọ aaḍuom adeneghiom enmeny phọ rꞌoomo ạraraar phọ, bịn meten ịyaar iigbia ẹmadan. 11Deneghi kẹn ni ạgbagba ootolaam ạraghaagh phọ rꞌesi ọḅam mọ iniin phọ eḍighinom mọ.
12“Sịghe Eeron rꞌạnmuny phọ ọdi aru sịphe ọnhu-aḍibuo Ogbogo phọ, kụ ạḅeni bịdi mowura mụum ịko phọ. 13Sịghe ibura ariil ạrikia phọ aanmenemi Eeron, aadu nyọdi mụnum, bịn mọgbatan nyọdi ọḅogh ọngo, pịdi ọdi ukumu ghan ịmi ịdipho oyil ạrikia. 14Sịghe nmụny phọ ọdi aru ạkpologhi rụsuoma phọ. 15Kụ aadu bịdi mụnum mọ ịdipho nạ aadu bọ ọde phọ ạbidi, pịdi bịdi ukumu ịmi ịdipho ariil ạrikia. Eeduom mọ ẹphen ketene bịdi riil ạrikia kꞌagee-pọ.”
16AMozis aḍighi ni tọrotoro ịyaar ịdipho Ọmoogh-we phọ mạto bọ. 17Kụ iḍighi kụ ḍịḅel aḍio ụnwanyu ạlha dị emuneniom ịyal mem mọ bịdi mọḍua bọ Ijipt, bịdi ọmeremi Ogbogo Ạdol Ọmoogh-we phọ. 18AMozis ạmaar asereghi ẹpe ude phọ, ạmeremi yogh ịḅagham mọ, atulughiom igbonoghineen phọ, ạḅile agimi rọko phọ. 19Ọdi ạatarion nyọpo ozuom bọ Ogbogo phọ, kụ ạḅile azuom nyọpo ạnyu phọ, ạtuugh ịdipho Ọmoogh-we phọ mạto bọ. 20Kụ ọdi agbi nụun ọsighe ịyal ịdaabili aḍighiigh phọ ọlogh bọ ịsiphe Igbe Ịyo phọ. Kụ ọdi aḅughe riisi ọpham mọ sịphe ịkoro Igbe Ịyo phọ kụ ạsighe ekpereghi phọ aakpereghiom. 21Kụ ọdi ạsighe Igbe Ịyo phọ ạlogh sịphe Ogbogo phọ kụ ạḅile ạkpo ukpe phọ asophom Igbe Ịyo phọ, ạtuugh ịdipho Ọmoogh-we phọ mạto bọ.
22Ọdi ạsighe ni ịdaabili phọ ạlogh sịphe Ogbogo phọ, ạga ephunom mọ ẹpe ọkpo bọ ukpe phọ osophom mọ, 23kụ ọdi ạḅam sịphe ịdaabili phọ ạbred iisua Ọmoogh-we phọ, ạtuugh ịdipho Ọmoogh-we phọ mạto bọ. 24Ọdi ạlogh ọmeremiom ọtozi phọ sịphe Ogbogo phọ, ạga esoorom mọ, ẹḅeenyom ịdaabili phọ, 25kụ sịphe Ogbogo Ạdol Ọmoogh-we phọ ọdi ạsuughi ịtozi phọ, ạtuugh ịdipho Ọmoogh-we phọ mạto bọ. 26Ọdi ạsighe enmeny agol phọ ạlogh sịphe Ogbogo phọ, ẹpe ọkpo bọ ukpe phọ osophom mọ, 27kụ ạsu ịnsens eeḅi eḍu phọ, ạtuugh ịdipho Ọmoogh-we phọ mạto bọ. 28Ọdi ạkpo ukpe sịphe ọnhu-aḍibuo Ogbogo phọ, 29kụ sịphe ọkpo bọ ukpe phọ osophom mọ ọdi aseere enmeny dị kọpinyon ghan rịkia ạnian phọ. Ịsien kụ ẹdi ọdi ạphighiron ẹkia oguom ạnian ḅịle rꞌẹkia ịbiakpa phọ, ạtuugh ịdipho Ọmoogh-we phọ mạto bọ. 30Ọdi aseere gbạgba ootolaam ạraghaagh phọ igbo Ogbogo phọ rꞌenmeny phọ kụ amuzeḍi mụum. 31AMozis, Eeron rꞌạnmuny phọ ọdi ootola ghan rạghaagh rꞌaruwol ạbidi sịphe 32tọrotoro amem lọ bịdi oḍigh Ogbogo phọ mụghumo otuman enmeny phọ, ọtuugh ịdipho Ọmoogh-we phọ mạto bọ. 33AMozis aghoony oghoony phọ akitonom Ogbogo phọ rꞌenmeny phọ kụ ạkpo ukpe phọ sịphe ọnhu-aḍibuo oghoony phọ. Bịn ọdi ạmadan oomo oḍighi phọ.
Ọotu aakpereghiom Ogbogo Ạdol Ọmoogh-we phọ
(Igbiighi 9.15-23)
34 #
1 Ạbud 8.10, 11; Azay 6.4; Izik 43.4, 5; Ogon 15.8 Pọ kụ amem dị ọotu aakpereghiom Ogbogo phọ kụ ạḍinmananmana ạḍiḅaal kꞌỌmoogh-we phọ emuza sịphe phọ. 35Loor esi ịphen phọ aMozis órue óḍigh Ogbogo phọ. 36Awe phọ Ịzirel uḍur ghan rugbogo amarugh phọ ạbidi ọghi ẹnon esi mem lọ ọotu phọ aphooph ạnyu Ogbogo Ọmoogh-we phọ. 37Eḍighi mạar lọ ọotu phọ ạrol li ạnyu Ogbogo phọ bịdi únme ghan dọl phọ ạbidi. 38Esi oomo erelhe phọ ạbidi, bịdi ụmiin ghan ni ọotu kꞌỌmoogh-we phọ ạnyu Ogbogo phọ ootaany ḅịle nịan dị reemor pạ phọ ḍughul.
Currently Selected:
Ẹḍua 40: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
