Ẹḍua 35
35
Ịdi kooko ghan ḍio ophooghian phọ
1AMozis aakpomoghi ni oomo awe phọ Ịzirel kụ ạḅeni mọ, “Ịphen kụ ịdi Ọmoogh-we phọ ạtol mọ oḍighi ghan: 2#Ẹḍua 20.8-11; 23.12; 31.15; 34.21; Lịv 23.3; Dut 5.12-14Nyina ẹmoogh odiiny aḍio okumuan ghan, kụ ọlo omuneniom oḍual aḍio phọ eḍighi ḍio iigbia, ḍio ophooghian dị mọḅogh ụngo ịmi Ọmoogh-we phọ. Oye lọ akumuan ḍio phọ ạḍiphe kokiigh ni. 3Rꞌạnian kẹ́kpooni ruutu anyina ḍio ophooghian phọ.”
Inmo ịlo Ogbogo Iigbia phọ
(Ẹḍua 25.1-9)
4AMozis ạḅeni oomo awe phọ Ịzirel, “Ịphen kụ ịdi Ọmoogh-we phọ ạto: 5Ịngo ghan inmo Ọmoogh-we phọ. Tọrotoro oye lọ rạwa ọngo ạsighe aru inmo agol, asilva rꞌenaba; 6ọyegheyeghe ukpe; ạbiloogh, oodor rꞌọtogh-tọgh ogbidagbida ukpe; ukpe lọ oloom suphuugh ạrutu-ịga; 7ozu idughuna dị ọtoghomi; ọyegheyeghe ozu ạnam, oreeny ạkasia; 8mụnum ọsuom ịtozi phọ; rạraar lọ kẹnighemi mụnum-ịko phọ ẹḅile ẹdughemi eḍu ịnsens phọ; 9ikpo ẹbe ḅịle rꞌịnon ọdo ịikia ạrana dị kọkpooghi onyoraam, ọḅile okophom odaam-ekpologhi ogbogh oyil ạrikia phọ.
Ạraraar ophoghom Ogbogo Ọmoogh-we phọ
(Ẹḍua 39.32-43)
10“Oomo awe ẹmaar sịen ogbo phọ anyina oru oḍighi tọrotoro ịlo Ọmoogh-we phọ ạto: 11Ogbogo phọ, ukpe osophom ologhi phọ rꞌạnyu phọ, ịkomom ọdi, ḅịle ịḅagham mọ, ịpe ogbonoghi bọ ạnyu phọ, ạroko phọ, ịpe ade phọ; 12Igbe Ịyo phọ, ariisi ọpham mọ, ekpereghi phọ, ḅịle rꞌukpe-ogbo phọ ọkpo bọ osophom nyọdi; 13ịdaabili phọ, ariisi ọpham mọ, ḅịle rꞌoomo ạraraar phọ kọḅamaghi bọ; ạbred phọ ọngo bọ Ẹnaan phọ; 14ọmeremiom ọtozi ịlo ọngo ạḍiḅaal phọ, ịtozi phọ rꞌạmunum mọ ạbidi; 15enmeny ọsu ghan ịnsens phọ ḅịle rꞌariisi ọpham ghan, ạmunum-ịko phọ; ịnsens eeḅi eḍu phọ; ukpe ọkpo ọnhu-aḍibuo Ogbogo phọ; 16enmeny ọḅam ghan ẹkia phọ kụ ọsu, rꞌeeta phọ ọdi oḍighinom bọ enaba phọ, rꞌariisi ọpham mọ, ḅịle rꞌoomo ịpe kọḅamaghi bọ; ạgbagba ootolaam ạraghaagh phọ ḅịle rꞌẹpe ade phọ; 17arukpe ọkpooghi ẹpe ologhi phọ, ạroko phọ ọdi ḅịle rꞌẹpe ade phọ; ukpe ọkpo ọnhu-aḍibuo osoph phọ; 18ạsikan rꞌiḍigh ọkpooghiom Ogbogo phọ rꞌosoph phọ; 19ḅịle rꞌịikia ạrusuoma phọ ariil ạrikia phọ kọkpologhian ghan bọ mem lọ bịdi rokumuan sịphe Ạdol Iigbia phọ; rụsuoma iigbia phọ Eeron oyil ạrikia phọ ḅịle rꞌạnmuny phọ ọdi.”
Awe phọ otumom ruunmo ạbidi
20Kụ oomo awe phọ Ịzirel ọḍuaghu, 21kụ tọrotoro oye lọ ẹḅeeraan ạsighe ghan inmo aruom Ọmoogh-we phọ ịduon phọ mọlhogh bọ Ogbogo Ạdol Ọmoogh-we phọ. Bịdi ụsighe ni oru oomo ạraraar lọ kọsighe kụ ọoḅereghiom ọḅile ọkolom rụsuoma oyil ạrikia phọ. 22Oomo awe lọ ẹḅeeraan, nmạriir rꞌalephiri, ụsighe ni oru ịkomom, reḅeri-sụa, rạlha, sigulu, rꞌọdo kịrokiro ịkuta dị oḍighinom gol, kụ ọḅogh ọngo Ọmoogh-we phọ. 23Tọrotoro oye lọ ạmoogh ịma ọyegheyeghe ukpe; ạbiloogh, oodor, mụghumo ọtogh-tọgh ogbidagbida ukpe; ukpe dị oḍighinom suphuugh ạrutu-ịga, ozu idughuna lọ ọtoghomi; mụghumo ọyegheyeghe ozu ạnam; ạsighe ni aru. 24Oomo awe lọ orue osogh silva mụghumo enaba ụsighe ni oru ọngo Ọmoogh-we phọ, ḅịle oomo ạbulo ọmoogh oreeny ạkasia dị kotue oḍighinom oḍighi phọ ụsighe ni oru. 25Oomo ạnmariir ẹmaar ụsighe ni oru iri, ịyegheyeghe iri ạbiloogh, oodor ḅịle rꞌịtogh-tọgh dị bịdi ọlem. 26Bịdi ụsighe kẹn ni suphuugh ạrutu-ịga ọlemom iri. 27Abuḍiemiom mọ ụsighe kẹn ni oru ikpo ẹbe ḅịle rꞌịnon ọdo ịkuta dị kọkpooghi ạsuoma iikpera ạraghaagh phọ ḅịle rꞌọdaam ekpologhi phọ, 28rạraar lọ kẹnighemi, mụnum ịtozi rꞌạmunum-ịko phọ ḅịle rꞌodughemi eḍu ịnsens phọ. 29Oomo awe phọ Ịzirel lọ ẹḅeeraan ụsighe ni inmo oruom Ọmoogh-we phọ esi oḍighi phọ ọdi ạto bọ ạngo Mozis mọ oḍighi phọ.
Bụo ẹmaar-iiḍighi ạraghaagh kịrokiro sịphe Ogbogo Ạdol Ọmoogh-we phọ
(Ẹḍua 35.1-11)
30AMozis ạḅeni weye phọ Ịzirel mọ, “Ọmoogh-we phọ mạsaḅar Bẹzalel, ọony aUri ḅịle ọony-oko aHur, ọlo eghun aJuda, 31Ẹnaan memuzeḍinaan nyọdi ịikpo phọ ọdi, ạḅile ạngo nyọdi ẹmaar, olegheri-ịyaar, ḅịle rꞌikeḍi oḍighinom ạtorotoro ọkal oḍighi, 32ọsighe agol, silva rꞌenaba ogbiighiom rꞌoḍighinom ịlo kẹnighe; 33oogboom ịnme dị kọlogh esi; ọsighe oreeny ọkaam ịyaar; ḅịle rꞌạtorotoro oḍighi dị koḍighinom ẹmaar. 34Ọmoogh-we phọ mạngo nyọdi rꞌOholiab ọony Ahisamak, ọlo eghun ạDan, ikeḍi ọtughemiom ạbunon awe ẹmaar. 35Ọdi mạngo bịdi ẹmaar oḍighinom oomo iiḍighi ạmaka, ọlogh ịnme, ḅịle rꞌoloom ọyegheyeghe ukpe; ạbiloogh, oodor, ḅịle rꞌọtogh-tọgh ogbidagbida ukpe; ḅịle rꞌọnon ukpe. Bịdi kotue ni oḍighi ịdo kịrokiro iiḍighi; ḅịle rꞌọlogh ịma ịnme.
Currently Selected:
Ẹḍua 35: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
