Ẹḍua 31
31
Bụo ẹmaar-iiḍighi ạraghaagh kịrokiro sịphe Ogbogo Ạdol Ọmoogh-we phọ
(Ẹḍua 35.30—36.1)
1Ọmoogh-we phọ ạḅeni Mozis mọ, 2“Mị mạsaḅar Bẹzalel, ọony aUri ḅịle ọony-oko aHur, ọlo eghun aJuda, 3kụ mị mamuzeḍinaan nyọdi ịikpo phọ ạmi, ạḅile ạngo nyọdi olegheri-ịyaar, ẹmaar ḅịle rꞌepul oḍighinom ạtorotoro ọkal oḍighi — 4ọsighe agol, silva rꞌenaba ogbiighiom ologhi rꞌoḍighinom ịlo kẹnighe; 5okulugh ịnme dị kọlogh esi; ọsighe oreeny ọkaam ịyaar; ḅịle rꞌạtorotoro oḍighi dị koḍighinom ẹmaar ạḍighaagh. 6Mị mạsaḅar kẹn ni Oholiab ọony Ahisamak, ọlo eghun ạDan, mọ ạḅophoghan nyọdi aḍighi. Mị mạngo kẹn ni egbogh ẹmaar oomo awe ẹmaar-iiḍighi ạraghaagh phọ, pịdi bịdi otue ọlem ịyaar lọ mị ạḅeni bịdi: 7Ogbogo Ạdol phọ ạmi, Igbe Ịyo phọ rꞌekpereghi phọ, oomo ạraraar Ogbogo phọ, 8ịdaabili phọ rꞌoomo ạraraar phọ kọḅamaghi bọ, ọmeremiom ọtozi phọ oḍighinom bọ ogey agol rꞌoomo ịnme phọ ọdi, enmeny ọsu ghan ịnsens phọ, 9enmeny ọsu ghan ẹkia rꞌoomo ịnme phọ ọdi, ogbogh ạbafu ootolaam ạraghaagh phọ, 10ịikia ibura ariil ạrikia phọ, ịpe Eeron rꞌạnmuny phọ ọdi konmenaan ghan bọ mem lọ bịdi rọpinyon rịkia, 11mụnum iigbia phọ kooduom ghan bọ oye, ḅịle rꞌịnsens eeḅi eḍu phọ ẹpe Ạdol Iigbia phọ. Esi oḍighi ạraraar phọ ịphen phọ, bịdi ọtuugh ịpe mị ạto bọ ạḅeni nyịna kụ oḍighi ghan.”
Aḍio ophooghian phọ
12Ọmoogh-we phọ ạto ni ạngo Mozis 13mọ ạḅeni weye phọ Ịzirel mọ, “Iiko ghan ḍio ophooghian phọ ạmi, loor esi dị ẹpe kụ elegh igbo anyina rꞌạmi kꞌagee-pọ oḍeenaan ghan mọ mị Ọmoogh-we phọ miḍighi inyina weye ạmi. 14Iiko ghan ḍio ophooghian phọ loor esi dị eḍighi ni ḍio iigbia. Tọrotoro oye lọ úuko kụ akumuan ḍio phọ ạḍien, pọ kokiigh ni. 15#Ẹḍua 20.8-11; 23.12; 34.21; 35.2; Lịv 23.3; Dut 5.12-14Nyina ẹmoogh odiiny aḍio okumuan, kụ ọlo omuneniom oḍual aḍio phọ pọ aḍio ophooghian dị mọḅogh ụngo ịmi. Oye lọ akumuan ḍio phọ ạḍiphe kokiigh ghan ni. 16Awe phọ Ịzirel ooko ghan ḍio phọ ạḍien eḍighi elegh ịyo phọ. 17#Ẹḍua 20.11Eḍighi elegh dị edi ghan bịn igbo awe phọ Ịzirel rꞌạmi, loor esi dị mị Ọmoogh-we phọ ụlhem kẹ phọ rꞌade phọ esi odiiny aḍio, kụ omuneniom oḍual aḍio phọ bịn mị akureri rukumuan kụ aphooghian.”
18Mem dị Ẹnaan mẹghaaphan bọ Mozis ẹmadan sịphe Eegum aSainai, ọdi ạngo ni nyọdi ịyal ịdaabili aḍighiigh phọ Ẹnaan rꞌaloor kụ ạge bọ iilogh phọ.
Currently Selected:
Ẹḍua 31: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
