Ẹḍua 30
30
Enmeny dị kọsu ghan ịnsens
(Ẹḍua 37.25-28)
1“Sịghe oreeny ạkasia ạkanam enmeny ọsu ghan ịnsens. 2Inya phọ ạraghaagh phọ eeleeny ni, 45 ẹkulom ạsunugh ḍịdoony, 45 ẹkulom ạsunugh ḍịregh, 90 ẹkulom ạsunugh ḍiphoph. Ạsiogho inya phọ aruukuna phọ ẹḅophan ni rꞌenmeny phọ. 3Sịghe ogey agol kụ agbul ạnyu phọ rꞌinya phọ ạraghaagh phọ rꞌạsiogho phọ, kụ ạsighe gol ạgoor akitonom ruukuna phọ. 4Sịghe ịyal ariigida agol ạloghom ịkoro eeḍian iigbom mọ ịyal ạga pịdi ẹpam ịkolom mọ ịpe kogbanam ghan bọ. 5Sịghe rọkolom ạkasia kụ ạkaam ịkolom mọ kụ agbul gol. 6Seere enmeny phọ ẹpe erugh ukpe phọ ọkpo bọ osophom risigh Igbe Ịyo phọ. Ịsiphe kụ esi dị mị kạteeny ghan nyịna. 7Tọrotoro ạḍiroor mem lọ Eeron aru ookolobian ịtozi phọ, ọdi ạsu ghan ịnsens ịma eḍu sịphe phọ. 8Ọdi ạmoogh ọtuugh ịduon phọ kẹn kụ oḍighi mem lọ ọdi ạsuughi ịtozi phọ dulhe. Ẹkia ọsu ghan ịnsens phọ ẹrol ghan bịn kꞌagee-pọ. 9Ạnyu enmeny phọ ẹphen kẹ́pighironom ẹkia ịnsens lọ íseleman, ẹnam mụghumo ariiḍien, ḅịle kémor miim. 10Mem lhạ Eeron aḍighi ghan ịinua oselemiom enmeny phọ, ọdi agbul ghan inya ạsiogho enmeny phọ ịḅaal ịnam mọ ịpe ọphighironom bọ ẹkia ịkaraph phọ. Iḍighi ghan ịphen phọ tọrotoro ạlha kꞌagee-pọ. Enmeny phọ ẹphen ẹrol ghan dọl iigbia, ẹḅogh ịngo ịmi Ọmoogh-we phọ.”
Osogh ophoghom Ogbogo Ạdol Ọmoogh-we phọ
11Ọmoogh-we phọ ạḅeni Mozis mọ, 12“Mem lọ nạ agbi weye phọ Ịzirel, tọrotoro olephiri ọony kụkpe ghan ni ịmi kụ ạtagharanam ẹmhu ọdi ọbo ịkaraph kesoorom ghan bọ nyọdi ịduon phọ rogbi bọ weye phọ. 13#Ẹḍua 38.25, 26; Mat 17.24Tọrotoro oye lọ mogbi ạmoogh ọkpe ipoḍi asilva, ọdaph ịpe ipoḍi ịsiphe Ạdol Iigbia ẹman bọ. Tọrotoro oye kạkpe ni eḍighi ẹkia dị rụngo ịmi. 14Tọrotoro oye dị mạman ịyaldi ạsia kụ ẹghiom ạnyu dị mogbi, pọ kụkpe ni ịmi ikpoki phọ. 15Ọolha kạ́kpe apele ḅịle uwekulom kạ́kpe ákome mem lọ rọkpeeghi ikpoki phọ ịphen ọtagharanam ạrumhu ạbidi. 16Bọnyi ikpoki phọ ịphen weye phọ Ịzirel ạsighe aphoghom ghan Ogbogo Ạdol phọ ạmi. Osogh phọ ọphon ọlo ọphelom asighuḍum ạbidi, ḅịle mị kạatughian ni aako ghan bịdi.”
Ạbafu dị ọlemom enaba
17Ọmoogh-we phọ ạḅeni Mozis mọ, 18#Ẹḍua 38.8“Sịghe enaba ạlemom oogboghom ạbafu. Seere bạfu phọ igbo Ogbogo phọ rꞌenmeny phọ, kụ ạlogh mụum ologhi phọ. 19Eeron rꞌạnmuny phọ ọdi ootola ghan rạghaagh rꞌaruwol ạbidi 20kụ ogbi nụun oḍigh Ogbogo phọ, mụghumo otuman enmeny phọ ọphighiron ẹkia eḍien. Bịn bịdi rꞌighuḍum. 21Bịdi ootola ghan rạghaagh rꞌaruwol phọ ạbidi, ọbo bịdi komugh ghan bọ. Ọphon phọ ologh dị bịdi rꞌẹemara ẹemara ạbidi kọpam kꞌagee-pọ.”
Ạmunum-ịko
22 #
Ẹḍua 37.29
Ọmoogh-we phọ ạḅeni Mozis mọ, 23“Sịghe rạraar ịma eḍu — odiiny igbogh ịtoom ẹemor amaa, ịraar igbogh ịtoom ẹemor asinamon, ịraar igbogh ịtoom ẹemor ụguo, 24odiiny igbogh ịtoom ẹemor akasia (oomo phọ ịdi eḍighi ghan ogey ọtoom). Lọghom inya aruuku ạmunum-ọliv, 25kụ ạsighe aḍighinom mụnum iigbia dị kooduom ghan oye. 26Sịghe mụnum mọ aadu Ogbogo Ạdol phọ ạmi, Igbe Ịyo phọ, 27ịdaabili phọ rꞌoomo ạraraar phọ ọdi, ọmeremiom ọtozi phọ rꞌạraraar phọ ọdi, 28enmeny ọsuughi ịnsens phọ rꞌoomo ạraraar phọ ạḅamaghi bọ ạnyu, ḅịle rꞌạbafu owuraam ạmuum mọ rꞌaruwol phọ ọdi, 29Tụugh ịduon kụ ạgbatan rạraar phọ bịn bịdi mẹkaraghi eten rạraar iigbia, ḅịle tọrotoro oye mụghumo ịyaar lọ etir bịdi, pọ kạgua ni ika. 30Kụ ạsagharan nụun mụnum Eeron rꞌạnmuny phọ ọdi, adeneghi bịdi oḍighi bụpinyon rịkia esi iiḍighi phọ ạmi. 31Ḅẹni weye phọ Ịzirel, ‘Ạmunum-ịko phọ ạmuen kụ ẹdi koḍighinom ghan iiḍighi phọ ạmi kꞌagee-pọ. 32Kéeduom ghan oopho awe, ḅịle kékirion mụnon lọ ạghigh mụen phọ. Mụen phọ ạmunum iigbia. 33Tọrotoro oye lọ akirion mụlo ạghigh mụen phọ mụghumo ooduom oye lọ úḍighi oyil ạrikia, pọ moroph ogbeph.’”
Ịnsens phọ
34Ọmoogh-we phọ ạḅeni Mozis mọ, “Sịghe rạraar ịma eḍu phọ ịphen, sitakt, onisa, galbanum rꞌogey ạfrankinsens — eniin nyeniin kúpu. 35Sịghe rạraar phọ ịphen aḍighinom ịnsens, akirion ịdipho asimeri. Lọgh boph ọbo ạtol abia ạḅile aseleman. 36Kuur iniin, ạsighe ạghi sịphe Ogbogo Ạdol phọ ạmi, kụ aadu risigh Igbe Ịyo phọ. Ịmiin ịnsens phọ ịphen mọ ịyaar iigbia. 37Kẹ́tuugh ịduon kụ eḍighi aani ịnon ịnsens ịlo anyina. Ilegheri mọ ịphen phọ ịyaar iigbia dị mọḅogh ụngo ịmi. 38Eḍighi mạar dị oye ạtuugh ịduon phọ kụ aḍighi asimeri ọlo ọdi, pọ moroph nyọdi ogbeph.”
Currently Selected:
Ẹḍua 30: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
