Ẹḍua 18
18
AJetro ạki ophogh Mozis
1AJetro oyil ạrikia phọ ạMidian ọyogo phọ aMozis ạnaghan oomo ịpe Ẹnaan meḍighinaan bọ Mozis rꞌawe Ịzirel awe phọ ọdi, mem mọ Ọmoogh-we phọ ạsighe bọ bịdi ạḍuanam ẹpe Ijipt. 2#Ẹḍua 2.21, 22Kụ ọdi aru ạteeny Mozis, ạphamam Zipora ạnir phọ aMozis, ọpo asugha bọ ọman, 3#Iiḍ 7.29rꞌịyal phọ ạnmuny ạnir phọ. (Oniin ughol mọ aGersom, ịduon phọ rẹḅem ghan mọ, “Mị maḍighi ooruen eeruen ẹmha.” 4Nyọori phọ ughol mọ Eliezer. Ẹmhu aḍien phọ rẹḅem ghan mọ, “Ẹnaan ọde phọ ạmi kụ ịloghonaan ịmi ḍịghaagh kụ ịphel ịmi ẹsighe dị ọdaam eelhe phọ Ijipt ịmi úghiigh.”) 5AJetro ọyogo phọ aMozis rꞌịyal phọ ạnmuny phọ rꞌạnir phọ ọghi osi ẹpe ẹdala phọ, sịphe eegum mọ Ẹnaan, kụ ọrol ropooghian. 6Mem dị aMozis ạnaghan mọ aJetro ọyogo phọ ọno, ạnir phọ ọno, rꞌịyal ạnmuny phọ ọno rotu, 7ọdi amite ạghi azuan ọyogo phọ ọdi, kụ akpuḍian ghisigh ọdi kụ ạkpun nyọdi. Kụ oniin apuru ghan nyoniin ịlo aloor phọ, kụ ọghi oḍigh sịphe ogbogo phọ. 8AMozis ạghaaph ạḅeni ọyogo phọ ọdi oomo ịpe Ọmoogh-we phọ ạtuan bọ ẹmhu awe Ịzirel aḍighi ọdaam eelhe phọ Ijipt rꞌawe phọ ọdi. Ọdi ạḅeniom kẹn nyọdi ịminimiin phọ awe phọ ọmiinom bọ ẹpe eten phọ, rꞌịpe Ọmoogh-we phọ ạphel bọ bịdi. 9Mem dị aJetro ạnaghan bọ oomo ịphen phọ, ologhi ọdi ạḅaal li 10kụ ạḅem mọ, “Ạḍiseph ẹrolonaan Ọmoogh-we phọ ịphel bọ inyina ạsighe esi ọdaam eelhe phọ rꞌawe phọ Ijipt. 11Nyịidipho mị malhegheri mọ Ọmoogh-we phọ ạbugh apu oomo ịnon ạrumugh, ịdi eḍighi bọ ọdi mạphel we phọ ọdi dọl ịminimiin rạghaagh awe Ijipt phọ, mem mọ bịdi rọmiine bọ bịdi.” 12AJetro ọyogo phọ aMozis amiteghom rạraar ạkpuyanaan Ẹnaan ịkpuy, kụ Eeron rꞌikumoor awe phọ Ịzirel ọdaphan nyọdi ọghi olhe ịkpuy phọ risigh Ẹnaan.
Ọmaaghi awe ịiruen
(Dutoronomi 1.9-18)
13Ḍịeri phọ aḍio phọ aMozis aagbo ghan ịiruen ạngo we phọ, rꞌịnon iiḍighi emiigh kꞌạḍiroor kụ ẹteeny dulhe. 14Mem dị aJetro ọyogo phọ aMozis ạmiin oomo ịpe ọdi raḍighi bọ we phọ, kụ ọdi apuru mọ, “Ịphen nạ raḍighi bọ we phọ ịghen? Uḍighi ika kụ ogina ạna bịn kụ raḍighi ghan bọ, kụ aḍita awe phọ ọmeregha sịen ẹḍua kꞌạḍiroor kụ ẹteeny dulhe rọwa ghan ọghaaphan rꞌạna?”
15AMozis ạḅeni ọyogo phọ ọdi mọ, “Mị ạmoogh oḍighi ịduon phọ loor esi dị awe phọ rotu ghan esi ạmi ọtuugha ịlo Ẹnaan. 16Tọrobo amem lọ bịdi ọmoogh sighiton, bịdi otu esi ạmi kụ mị asophonaan ọoruen ịyal phọ ạbidi, kụ mị aḍighi ịdi bịdi kolegheri ịtooghi phọ rꞌiilogh phọ Ẹnaan.”
17Kụ aJetro ạḅeni Mozis mọ, “Nạ ráḍighi egeny eḍighinom. 18Kẹpher ri nyịna rꞌawe phọ ạbuen phọ. Ịphen phọ ẹpughan dị ogina ạna bịn kụ kaḍighi ghan. 19Nạghan ịphen mị raroma bọ nyịna, bịn Ẹnaan kẹrolonaan ni nyịna. Eḍighi ni elhiom dị nạ kạmeeranaan enye we phọ kụ ạsighe ghan sighiton ạbidi atuomonaan Ẹnaan. 20Tụghemi bịdi ịtooghi phọ rꞌiilogh phọ Ẹnaan, kụ ạgba aagbunion ạḅeni bịdi ịlo bịdi kọtol rꞌịlo ẹkpe oḍighi. 21Kụ esi ọḅaram, sọn ikakara awe amitiom sịphe ogbo awe phọ Ịzirel ạmaaghi buḍiemiom dị kopogh ghan sita ọonir, mꞌoniin okuron, mꞌooghdi, mꞌaḍioph. Bịdi oḍighi we oghiilaan Ẹnaan dị koḍuom ologhi ḅịle kúḍighi we ole oti-ọman. 22Bịdi kụ oogboonaan ghan we phọ ịiruen oomo amem. Kụ aḍighiton lọ epel bịdi loor kụ bịdi ọsighe ghan oruomonaan nyịna. Oomo ịbam asighiton phọ bịdi kụ ọḅem ghan. Ịduon kụ kedughanaan nyịna, loor ịdipho bịdi mophoor bọ dool phọ ạna. 23Eru mạar dị nạ ạtuugh ịphen phọ kụ aḍighi, ịdipho Ẹnaan ẹto bọ, nạ kạmoogh ni ọninom, kụ oomo awe phọ ạbuen kokeleghu ni rꞌẹwoor ịdi eḍighi bọ mọghaaphogh sighiton phọ ạbidi.”
24Kụ aMozis ạnaghanan ọyogo phọ ọdi, kụ ạtuugh oomo phọ ịpe ọdi ạḅeni bọ nyọdi aḍighi. 25Kụ aMozis ạson ikakara awe amitiom sịphe ogbo awe phọ Ịzirel kụ ạmaaghi bịdi buḍiemiom dị kopogh ghan sita. Buniin kopogh ọonir, buniin oniin okuron, buniin ooghdi, buniin ḍioph. 26Kụ bịdi ọḅemogh ghan sighiton awe phọ oomo amem. Aḍighiton lọ epel bịdi loor bịdi ọsighe ọkiom Mozis, kụ ọlo oomo ịbam asighiton phọ bịdi kụ ụḅem ghan.
27AMozis rọḅeni mọ ọdi agheel rꞌẹepho, kụ aJetro agheel ẹmha ạbidi.
Currently Selected:
Ẹḍua 18: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
