Ẹḍua 17
17
Ạmuum dị ạḍua ḍighiigh kụ amite
(Igbiighi 20.1-13)
1 #
Igb 20.2-13
Oomo ookpomoghan awe phọ Ịzirel uḅerenu ni ọḍua sịphe ẹdala phọ ạSin omiigh ẹghi phọ ạbidi. Bịdi ọdaph ghan iilogh Ọmoogh-we phọ kụ ọḍua esi ọgba esi. Rosi Refidim, bịdi odoghoḍi rugbogo kụ ạmuum ọ́rol sịphe phọ ọphughol. 2Awe phọ Ịzirel ọwa sighiton Mozis kụ ọḅeni nyọdi mọ, “Ụngo iyoor mụum ọphughol.”
AMozis apuru bịdi mọ, “Nyina ịtuan eeghe kụ retu bọ esi ạmi? Nyina ịtuan eeghe kụ rẹdegh bọ Ọmoogh-we phọ?”
3Kụ ọlo ẹephua ạmuum mọ ịphughan ni, kụ awe phọ ọḅile ghan ọgumom Mozis kụ ọḅem mọ, “Nạ ụtuan eeghe ụsighe bọ iyoor ẹpe Ijipt arumom ẹphen mọ ẹephua ạmuum ịze iyoor, rꞌạnmuny phọ ayoor rꞌịnam mọ ayoor?”
4AMozis ạaḅereghi agey Ọmoogh-we phọ kụ ạḅem mọ, “Mị kaḍighi ika we phọ ạbuen? Nyịidipho bịdi mọnyaaghian ịlo oroḅol ạmi ikpo.”
5Ọmoogh-we phọ ạḅeni Mozis mọ, “Sịghe buniin ikumoor awe phọ Ịzirel ạḅaram rꞌạna ẹghi ẹpe risigh kụ ạpham ịkpara phọ ạna ịpe nạ ạgurom bọ Ọphiiny aNail phọ, ạghimom. 6Mị kaḍiemi ghan ạmeera ạnyu aḍighiigh phọ ẹpe Eegum aSainai, kụ nạ ạgur ḍighiigh phọ kụ ạmuum kạḍua ni sịphe aloor aḍighiigh phọ amite, ẹrol dị awe phọ ọpughol.” Kụ aMozis ạtuugh ịdipho aḍighi ghisigh ikumoor awe phọ Ịzirel.
7AMozis aghol ḍien esi phọ mọ aMasa rꞌaMeriba loor esi dị bịdi ugum ni ophogh ịpe Ọmoogh-we phọ kaḍighi bọ dị bịdi opuru mọ, “Ọmoogh-we phọ odi ni rꞌayira ḍụghum kụ ólho?”
Ẹgham dị eenian rꞌạbuo Ạmalek phọ
8Kụ awe Ạmalek oru ozuom we Ịzirel elephiri sịphe Refidim. 9AMozis ạḅeni Josua mọ, “Sọn we ọghi eenan rꞌạbuo Ạmalek phọ iḍue. Mị kạpam ịkpara phọ Ẹnaan kụ ạmeeraam ẹpe ạnyu ẹeḅaraph phọ.” 10Kụ aJosua ạdaph ịpe aMozis ạḅeni bọ nyọdi kụ anyeene eenan rꞌạbuo Ạmalek phọ. AMozis rꞌEeron rꞌaHur ọghi ọsiiny ạnyu ẹeḅaraph phọ. 11Tọro amem lọ aMozis aphoophe rạghaagh ọdi ạghiom ạnyu, awe Ịzirel ọkpar opu; tọro amem lọ aMozis aseere ude rạghaagh phọ ọdi, ạbuo Ạmalek phọ omiigh ọkpar opu. 12Mem dị ẹpher rạghaagh aMozis, bịdi ụsighe ḍighiigh oseere kụ ọdi ạrolom; kụ Eeron rꞌaHur ọrologhu ịigaany ọdi kụ ophoophe rạghaagh phọ ọdi ọpham ịdi kékagh tụtu erumuḍio emeel ighool. 13Ịduon kụ ẹdi aJosua ạkpar bọ apu bụo Ạmalek phọ.
14 #
Dut 25.17-19; 1 Sạm 15.2-9 Kụ Ọmoogh-we phọ ạḅeni Mozis mọ, “Gẹ ịlo ọkpar opu phọ ọphon loor ạḍinya ẹrol dị ọsighe ghan ọotughianam, kụ ạghaaph ịphen phọ adoghoḍi reḅeri aJosua. Ḅẹni nyọdi mọ mị kaagulemi ni bụo Ạmalek phọ ịdi kọ́otughian ghan mun bịdi sịen aḅirini phọ.” 15AMozis ạkan enmeny ạrikia, kụ aghol ḍien enmeny phọ mọ “Ọmoogh-we phọ kụ ạlagba ạmi.” 16Kụ ọdi ạḅem mọ, “Pạm aphoophe ạnyu ạlagba Ọmoogh-we phọ. Ọmoogh-we phọ kabianan ghan ni bụo Ạmalek phọ, oghiil atum oghiil.”
Currently Selected:
Ẹḍua 17: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
