Esta 7
7
1Ịduon phọ ọdaam mọ rꞌaHaman mọghi bọ olhe ẹyaal kꞌEsta 2sịen ịyal amem. Rọḅile rọmeleghi rimiim mọ, kụ ọdaam mọ ạḅile apuru Esta ukueni-ạnir phọ mọ, “Eeghe kụ ẹdi nạ rạwa bọ? Ụḅeni ịmi bịn nạ kạmoogh ni. Mị kạkuom ni nyịna ghạlamo oolemi-odi eelhe ọda phọ ạmi.”
3Esta ukueni-ạnir phọ ạphagharanaan mọ, “Eru mạar dị ịḅeeraan esi ạdol Igbogh phọ ạna ọngo ịlom osooromi aloor phọ ạmi, ịḅeeraan ịmi dị mị kạtol ḅịle awe phọ ạmi kọtol. 4Maal kọzeeghi we phọ ạmi rꞌạmi. Eḍighi mạar dị ítu ịyaar dị ẹkpar epu aal esi ạdol ạrebene, mị muḅoorian ni kụ mị nyịna mụ́uḅaghami ịlo ịphen phọ; kụ ọlo mekpekian dị kopiemi — ụze iyoor!”
5Pọ kụ amem dị aZakzis ọdaam eelhe phọ apuru Esta ukueni-ạnir phọ mọ, “Ạnhian kụ kaḅom ẹmhu aḍighi ịyaar dị ẹrol ịduon? Odi ẹghen oye phọ ọphon?”
6Esta ạphagharanaan mọ, “Ạmulogh-ḍien phọ rụgbiphoghom bọ iyoor, ọḅaghama phọ oye phọ ọphon aHaman.”
AHaman ạnmagharan aphogh ọdaam mọ rꞌukueni-ạnir phọ esi oboom oghiilaan. 7Kụ ọdaam mọ aḅetenu ni rꞌoboom ọghagh ologhi, ạḍua osoph phọ kụ ạghi erugh aroghoony ogiga ọdaam mọ. AHaman rọmiin mọ ọdaam mọ agbiighi ni ọlhiom ọdi esi ịphen phọ, kụ ọdi ạrol ọman ịlo ọoḅereghian Esta ukueni-ạnir phọ ịlo aghuḍum ọdi. 8Pụruku ọdi akpuḍian ni sịphe ạgada phọ Esta ịlo ọlhom ọdi ọnma ighirigiir bịn ezuanan, mem dị ọdaam mọ aḅula sịphe ologhi osoph phọ ọdi ạḍua bọ kụ ạghi ẹpe aroghoony phọ. Rọmiin ịphen phọ kụ ọdaam mọ ạlooghi amitiom mọ, “Oye phọ ọphon rạki obiighi ukueni-ạnir ẹmha phọ sịen esomanan ạmi ologhi ogiga phọ ḍụghum?”
Ọdaam mọ kọ̋ḅem ịphen phọ ọman bịn aroophoony awe phọ ookpereghi ẹmhu aHaman. 9Pọ kụ esi dị oniin ọnyo ạbidi dị oghol mọ aHabona ạḅem mọ, “AHaman ạkaraghi ni kụ agim ịyaar dị ọka oseere ẹpe kꞌọdi, ẹrol dị ọdi asin Modekai, ọpo ạphel bọ ghuḍum Igbogh phọ ạna. Kụ ịyaar phọ ẹman ịyaldi rꞌịyal akuḅu ḍiphoph.”
Ọdaam mọ ạto ạḅeni bịdi mọ, “Isin Haman ạnyu ịsiphe.”
10Ịduon phọ usin Haman ạnyu ịyaar phọ ọpo ọdi ạka bọ osinom aModekai. Ịphen reten kụ ọghagh ologhi ọdaam mọ asoor.
Currently Selected:
Esta 7: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
