Esta 2
2
Esta aḍighi ukueni-ạnir phọ
1Ẹnum amem reten, ghạlamo amem dị ọghagh ologhi ọdaam mọ masoor ri, ọdi ạḅile ghan ni ạatughian ịlo ịpe aVasti maḍighi bọ rꞌịpe ọdi magbeel bọ. 2Esi ịduon phọ abuniin ạbuo oroma ọdaam mọ dị otuman nyọdi ogbiighi kụ ọḅem mọ, “Uḍighi ika kụ nạ ọ́wa bọ ọmiin ạbunon arisina ạnmanyaan lọ ọnighe? 3Mạ bụo ịtooghi phọ odi bọ sịphe tọrobo ẹkpigh eelhe ọda phọ kụ ạto ạngo bịdi ọsighe oru oomo arisina ạnmanyaan phọ ạbuen phọ odi bọ ịsiphe ạdol ạnmariir otu phọ ạna sịen Sụsa, ẹkpana ẹmha phọ. Lọgh bịdi esi ịtooghi aHegai, oophoony oye phọ ọpo ạmoogh bọ ịto ophogh ạdol ạnmariir phọ ạna, kụ aselemi bịdi ịlo ariiḅi. 4Ịpe reten, sịghe ọnyani phọ ọpo ạkaraghi bọ ạḅeeraan nyịna kụ aḍighi nyọdi ukueni-ạnir esi aVasti.”
Ọdaam mọ agbiighi mọ ọphon ogey oroma ni kụ ọdi ạdaph.
5Sịphe Sụsa, ọlo aJu dị oghol mọ aModekai ạrol li — ọony aJair; ọdi ọlo ịsiphe ẹemara ẹemara phọ ạBenjamin kụ ọlo kꞌạnmuny ạnmuny aKis rꞌaSimei. 6#2 Ạbud 24.10-16; 2 Krọ 36.10Mem mọ ạNebukadnezar ọdaam eelhe phọ ạBabilon ạsighe bọ Jehoyasin ọdaam mọ aJuda sịphe Jeruselem ạghi iiruen rꞌạbunon aḍita dị osiphi, aModekai ạrolom aani ni. 7Ọdi ạmoogh ni umarani dị oghol mọ Esta, ọpo aḍien aHibru phọ ọdi eḍighi bọ Hadasa; ọnyani phọ ạnighe kụ ạmoogh ịma aḍimite. Mem mọ ọpo ọde rꞌonhiin phọ ọdi omugh bọ, aModekai ạsighe nyọdi kụ aakonom ạmanam aḍighi ọnyani ọdi.
8Mem dị ọdaam mọ mạngo bọ imoom ịto phọ ọdi kụ rọsighe bọ ịbadi ạnmanyaan koru sịphe Sụsa, Esta ạrolom aani ni. Ụlogh aani ni nyọdi sịphe ogiga ọdaam mọ aHegai rapogh bọ, ọpo ạmoogh bọ ịto ophogh ạdol ạnmariir kꞌọdaam mọ. 9Esta ạḅeeraan Hegai, kụ ọdi aḍigh esi igey ịitughian aHegai. Ọdi óroph mem ọsighe oru ạraraar oselemiom ẹnighe phọ ọdi rꞌegey eḍien. Ọdi ạngo nyọdi esi dị ẹnighe epu oomo ạbueri phọ sịphe ạdol ạnmariir phọ sịphe odi bọ sịphe ogiga ọdaam mọ kụ ạma oḍual igey ạnmanyaan sịphe ogiga ọdaam mọ okumu ọdi.
10Esi oroma phọ aModekai, Esta ạaghi ni mọ ọno ọlo aJu. 11Tọrobo aḍio aModekai arelhe ghan ni ạghi arelhe aḅula sịphe esomanan ogiga ạdol ạnmariir kꞌọdaam mọ, ịlo ọwa olegheri ọdo ịpe rẹki bọ rꞌịpe kemitenaan bọ nyọdi.
12Oselemi ariiḅi ạnmanyaan phọ aḍio etum ḍio ịrol ḍiniin ạlha — ụkioghiom ghan ạmunum amaa esi odiiny ụnwanyu rꞌạmunum abalsam esi ịnon odiiny ụnwanyu. Ịpe reten, ụsighe ghan oniin ọnyani kụ ọghiom Zakzis ọdaam mọ. 13Mem dị ọdi ạḍua sịphe ạdol ạnmariir phọ kạki ogiga ọdaam mọ, ọnyani phọ kạkpologhian ni tọrobo ịyaar lọ ọdi ạwa. 14Ọdi kạki sịphe dulhe, kụ rẹḅaal ḍịroor kụ ọsighe nyọdi ọki ḍịnon ạdol ạnmariir kꞌọdaam mọ kụ ọḅogh ọngo aSaasgaz oophoony oye dị rapogh ghan rụga ọdaam mọ. Ọdi kạ́ki mun ẹpe kꞌọdaam mọ emuton dị ọdi ạḅeeraan ọdaam mọ opuru aḍien ọdi.
15Amem mọ mụo Esta iru ni ẹteeny ọghi kꞌọdaam mọ — Esta, ọnyani phọ Abihel rꞌumarani phọ aModekai, ọpo ọdi mạsighe bọ ịdipho ọnyani ọdi. Esta ạḅeeraan ni tọrobo oye dị ạmiin nyọdi. Mem dị ẹteeny bọ nyọdi, ọdi ạkpologhian ọkaraghi ịpe aHegai oophoony oye phọ rapogh bọ dọl ạnmariir kꞌọdaam mọ aroma bọ nyọdi ọkpologhian phọ. 16Esi ịduon, lhạ ḍịphe emuneniom bọ oḍual kꞌamem mọ aZakzis amiigh bọ ọda, sịphe ụnwanyu phọ ọpo aḍighi bọ ḍioph, ụnwanyu phọ aTebet, ụsighe ni Esta oruom Zakzis ọdaam mọ sịphe ogiga phọ ọdi. 17Ọdi ạḅeeraan ni ọdaam mọ apu oomo ạbueri phọ ạnmanyaan phọ; kụ ạḅile ạphomoghian nyọdi apu oomo ạbueri phọ. Ọdi azu eghoony ọdaam ẹmha phọ ẹmhu ọdi kụ aḍighi nyọdi ukueni-ạnir phọ esi aVasti. 18Ịphen reten kụ ọdaam mọ alhe egbogh ẹyaal ẹlo oghueniom Esta kụ ạamaghagh oomo ạbuo ịtooghi rꞌiiḍighi ọdi. Ọdi ạto mọ oomo awe eelhe ọda phọ ophooghian esi iiḍighi ạbidi kụ adiighi inmo dị ẹkpianaan ọdaam.
AModekai ạpel ghuḍum ọdaam mọ
19Mem dị ọdaam mọ mạma Modekai ạngo esi ịtooghi. 20Esta kőgananami mọ ọno ọlo aJu loor esi dị aModekai mạḅeni nyọdi mọ ọdi rꞌoniin oye kụ́ḅeni; Esta ạnaghanan ni nyọdi esi ịphen phọ, ọkaraghi ịdipho ọdi ạnaghanan ghan bọ nyọdi kꞌamem mọ ọpo ọdi aḍighi bọ ọbam ọnyani dị odi kꞌọdi.
21Mem mọ ọpo aModekai ạrol bọ esi ịtooghi sịphe ogiga ọdaam mọ, aBigtana rꞌaTeres, ịyal aroophoony awe phọ okori ghan bọ ọnhu-aḍibuo iisoph ọdaam mọ, ụmoogh ni oboom ọghagh ologhi esi aZakzis ọdaam mọ kụ omite ezue oghiigh ọdi. 22AModekai alegheri ịlo ịphen phọ kụ ạḅeni Esta ukueni-ạnir phọ. Esta ạḅeni ọdaam mọ ịphen aModekai mạwa bọ amitiom. 23Oḅiligha ọwaaghi ophogh ạrol li, kụ ụwa ni omitiom mọ ịphen ọghaaph bọ igey ni. Esi ịduon phọ usin ni ịyal phọ awe phọ sịphe ireeny phọ ọka bọ. Ọdaam mọ ạto ni mọ ọge ịphen emite bọ sịphe ạrinya ịpe emiteghu bọ sịphe eelhe phọ.
Currently Selected:
Esta 2: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
