Bụo ạKolosi 1
1
1Mị ạPol phọ Ẹnaan ẹsaḅar bọ oḍighi otelhedom ạJizos Kraist, rꞌaTimoti ọnyo asiya phọ ayira, 2kụ ụge ḍịnya phọ ạḍien riruomaan inyina aweye phọ Ẹnaan ẹpe Kọlosi, iiḅi asiya phọ ayoor momeeraam aani bọ Kraist.
Ooḅi ọghor rꞌẹepho kꞌẸnaan Ọde phọ ayira ịrolonaan inyina!
Ịiḅereghi ọsephom Ẹnaan
3Yoor rọseph ghan ni Ẹnaan Ọde phọ ạJizos Kraist Ọmoogh-we phọ ayira kighol inyina oomo amem esi ịiḅereghi, 4ịdi eḍighi bọ yoor mọnaghan ni ịlo omeeraam mọ anyina esi ạJizos Kraist, rꞌẹphomoghian phọ nyina edimom bọ oomo aweye phọ Ẹnaan. 5Ẹḅel amem mọ ooḅi ọghaaph ịlo igey phọ ịteeny bọ inyina, nyina ịnaghan ni ịlo ọdo ạraraar dị Ẹnaan meselemi iseenaan inyina ẹpe kꞌạke. Ạraraar phọ nyina eḍuom bọ ologhi ọmoogh phọ kụ ịngo bọ inyina omeeraam mọ rꞌẹphomoghian phọ. 6Ạḍiseph ẹtuan ni ooḅi ọghaaph phọ raaleghaan bọ oomo aḅirini phọ retuanaan we, ịdipho idianaan bọ inyina kꞌẹḅel amem mọ nyina ẹphur bọ ẹnaghan ịlo ighirigiir dị Ẹnaan rẹnma ghan buḍighinom ịkaraph, kụ egbi bọ olegheri aani mọ ọkaraghi agey ni. 7#Kọl 4.12; Fạil 1.23Ẹpafras, ọpo rꞌayoor rokumu bọ kọngo Ẹnaan, kụ ịtughemi bọ inyina ịphen phọ. Yoor oseere ni nyọdi ologhi iboom. Ọdi ạmaar ri ụphamanaan iyoor oḍighi phọ aKraist ạtuugh raḍighi. 8Ọdi kụ ụḅeni bọ iyoor ịdi nyina ẹsighe ni ẹphomoghian Uwaloor Iigbia phọ kụ ẹphomoghianam weye.
9Ịduon kụ iḍighi kụ emiigh kꞌaḍio phọ yoor ọnaghan bọ ịlo anyina, yoor úsoph mem oghol ghan anyina esi ịiḅereghi. Yoor rọlom ghan Ẹnaan mọ ọdi iḍereghinaan inyina oomo ịitughian ologhi phọ ọdi, ạḅaram oomo olegheri ịyaar rꞌọnaghan ạḍughum mọ ọpo Uwaloor Iigbia phọ ọdi rạngo ghan bọ, 10ọbo nyina erue ẹrol dọl phọ ạḍiphe ẹkpianaan bọ Ọmoogh-we phọ, eḍighinom ghan ịpe ẹḅeeraan bọ nyọdi ẹmadan. Ịduon kụ ịdi tọrobo ogey oḍighi lọ nyina eḍighi, nyina kemuum iiḅi iimuma, ḅịle elegheriom mọ nyina ẹkar bọ elegheri Ẹnaan epoph rẹkiom ghisigh. 11Yoor rọoḅereghi ghan mọ Ẹnaan ịngo inyina ịnyaam dị eelenyan oomo igbogh ịikpo phọ ọdi, ọbo nyina ẹmanam ọsighe ọḅaal ologhi kụ ọrolom ạdol ọkparam ghan amem ịminimiin. 12Mọ ịngo ghan Ọde phọ ḍịseph. Ọdi kụ aḍighi bọ ịdi nyina ẹman ophin aani abin erua ạraraar phọ ịpe ọdi maselemi bọ aseenaan we phọ ọdi, ẹpe ạḍiḅaal phọ esoor bọ. 13Ọdi kụ ụphel bọ iyira amitiom aḅirini ufiri phọ, kụ mụlhogh iyira ọmar Ọony ẹphomoghian phọ ọdi, 14#Ẹfe 1.7ọpo ụtagharan bọ iyira ọbo Ẹnaan ẹsar ịkaraph ịwilenaan iyira.
Ọdo oye dị aKraist aru ḅịle rꞌoḍighi phọ ọdi
15Oye ólho dị mạmiin ghan Ẹnaan ekpeḍien. AKraist phọ rọ́miin ghan bọ bịn kụ ạkpoghoronaan Ẹnaan ạmadan. Ọdi bịn kụ aḍeenaan we ịdi Ẹnaan ẹrol. Ọdi kụ Ọkpana dị ạrol li kụ ogbi bọ ọlhem aḅirini phọ. 16Esi ọdi rꞌịlo kụ ẹdi Ẹnaan ẹlhem bọ oomo ạraraar phọ edi bọ kꞌạke rꞌịsien ade phọ, ịdi rọmiin rꞌịlo rọ́miin, rꞌoomo ịkpana ạraraar ẹpe kꞌạke rꞌịsien ade phọ, mꞌạbudaam aruwaloor mꞌạraalha mꞌigbogh awe ạbidi — oomo ạraraar, ụsighe ḍịghaagh ọdi kụ ọlhemom bọ mọ eḍighi ịpe ọdi ạtooghi bọ. 17Ọdi kụ ạrol kụ ogbi bọ ọlhem aḅirini phọ. Esi ọdi kụ ẹdi oomo ạraraar phọ ẹḅophoghan bọ kụ ẹmoogh sịdol. 18#Ẹfe 1.22, 23Ịdipho ẹmhu oye phọ kụ ẹda bọ loor phọ kụ ẹdi aKraist aḍighi uwo ẹmhu ạsiosi phọ. Ọdi kụ azin phọ. Ọdi bịn kụ ọkpana dị oḅeton esi aḍuugh. Loor ịphen phọ, maḍighi ọkaraghi oḍiemiom dị apu oomo ạraraar. 19Ịḅeeraan ni Ẹnaan mọ oomo ạroozo phọ ọno emunughan ẹrol esi Ọony phọ, 20#Ẹfe 2.16mọ esi Ọony phọ kụ ọno ạsighe oomo ọlhem mọ, ịlo edi kꞌạke rꞌịlo edi sịen ade phọ, ạpomoghi aḅulemi loor ọno. Kụ mạtuan ịḅaal Ọony phọ ọdi ọkan bọ loor oreeny phọ ạpomoghiom ẹepho oomo ọlem mọ ọdi.
21Mem dị meten nyina ịgumom ni ọman Ẹnaan, eḍighi bụmulogh-ḍien ọdi loor ịkaraph iloghi rꞌeḍighinom ịyaar phọ anyina. 22Kụ nyịidipho Ẹnaan mẹtuan ḍuugh aḍizu Ọony phọ ọdi ịloghoma inyina, pịdi ọdi ịsighe inyina ạmeremi egbodo ọdi ịdipho awe aruukuan dị oseleman, ḅịle ịyaar ị́biph, 23lọ omeeraam mọ anyina ạmeera ni giph rạki ghisigh, ḅịle rạ́kporokporo. Kẹ́bile oḍuom ologhi phọ ọpo nyina ẹmoogh bọ kꞌamem mọ nyina ẹnaghan bọ ooḅi ọghaaph phọ. Ọghaaph phọ ọphon mọghaaph ni oleenye oomo aḅirini phọ, kụ ọghaaph aani phọ kụ oḍighi phọ ạmi ạPol.
Oḍighi phọ ạPol aḍighi bọ ọloghonaan ạḍighaagh bụo ạsiosi phọ
24Kụ ẹḅaal li ologhi phọ ạmi ịduon mị ighol bọ inyina rạmiinom. Ịminimiin phọ ịphen iphulupul phọ ạmi rẹmiinom bọ ịlo ọmadanam ịminimiin phọ ịpe aKraist asugheeny bọ, mem mọ ọpo ọdi ạtuan bọ loor phọ ọdi sịosi phọ kụ ạmiinom bọ. 25Ẹnaan kụ ịma ịmi mọ mị utu uḍighi oḍighi ịngo inyina ạbuo ạsiosi phọ ọdi, mọ mị ụḅile ụkaaph ghan ọghaaph phọ ọdi awe olegheri ọmadan. 26Kꞌagediidi, ọghaaph phọ ọphon aḍighi ni ịbooghian, dị ạruukpaany phọ Ẹnaan rꞌawe úlegheri, kụ nyịidipho Ẹnaan meḍeenaan weye phọ ọdi olegheri ẹmhu ạraraar phọ ịpe phọ. 27Ạbuphe phọ kụ ẹdi ẹḅeeraan bọ Ẹnaan oḍeenaan ọdo ẹelha rꞌigbogh dị kẹtolonaan ruuruen phọ, loor ẹmhu ịphen ạaghi bọ mọ aKraist odi ni iloghi anyina, ọbo nyina ẹmoogh oḍuom ologhi ophin aani abin eegu phọ ọdi. 28Esi ịduon phọ yoor rọkaaph ghan ịlo aKraist, kọphurom rụru oomo awe. Yoor rọtughemi ghan we oomo areten olegheri ịyaar ọbo yoor ọsighe we dị omeeraam mọ ạbuno mophoph ọmadan kụ mọḅophoghian rꞌaKraist ọghiom Ẹnaan. 29Rꞌamem mị úpooghian rọkparagha ọbo mị aḍighi ịphen phọ amitiom. AKraist kụ rụngo ghan bọ ịmi ịnyaam mọ mị odimom bọ raḍighinom.
Currently Selected:
Bụo ạKolosi 1: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
