Ẹmos 7
7
Ọmiin uḍien igurubia
1Mị ụmiin ni ịmiin dị Ọmoogh-we Oomo Ịikpo phọ uḍeenaan ịmi. Mị ụmiin ịdi ọdi ạlhem ọoloogh igurubia mem dị mogbo bin ạroogho dị ịnam ọdaam mọ rẹḅal ịḅal, kụ ạroogho phọ mạḅile rasiighi. 2Sịphe ịmiin phọ ạmi, mị ụmiin igurubia phọ dị elhe ẹmadan oomo ạroogho dị ạrol sịphe ade phọ, kụ mị ạḅem mọ, “Ọmoogh-we Oomo Ịikpo, sạr ạwilenaan we phọ ạna. Bịdi koḍum bọ ika? Bịdi okom ni kụ ọḅile odugh!”
3Ọmoogh-we phọ anme ni ologhi phọ ọdi kụ ạḅem mọ, “Ịphen nạ ạmiin bọ kémite.”
Ọmiin uḍien nịan
4Ọmoogh-we Oomo Ịikpo phọ ạḅile ni uḍeenaan ịmi ịmiin. Nyẹen, mị ụmiin dị odi raakolobian ọlhiom awe phọ ọdi rꞌạnian. Ạnian phọ ilhe ni ogbogh ọphiiny phọ odi bọ eeḍian ade phọ, kụ emiigh olhe oomo ade phọ. 5Kụ mị ạḅem mọ, “Bịle, Ọmoogh-we Ẹnaan. Ika kụ ẹdi awe phọ ạna koḍum bọ? Bịdi okom ni kụ ọḅile odugh!”
6Ọmoogh-we phọ ạḅile kẹn ni anme ologhi phọ ọdi kụ ạḅem mọ, “Ịphen phọ kẹn ni kémite.”
Uḍien oolemiom
7Ọmoogh-we phọ ạḅile ni uḍeenaan ịmi uḍien. Nyẹen, mị ụmiin dị ọdi ạmeera ọgbal iikpe dị ọsighe okuron-oolemiom kụ ọloghom, kụ okuron-oolemiom ạrol li ḍịghaagh ọdi. 8Ọdi upuru ni ịmi mọ, “Ẹmos, nạ ạmiin eeghe?”
Mị ụphagharanaan mọ, “Okuron-oolemiom.”
Kụ ọdi agbi ọḅem mọ, “Mị ạsighe ịyaar phọ ẹphen kụ raḍighinom ịlo oḍeenaan mọ awe phọ ạmi ọkigh iikpe dị íileeny. Kụ mị kánme mun ologhi ạmi esi ọliom ạbidi. 9Ariisi phọ ạnmuny ạnmuny phọ Ạizik ọghi ghan bọ ịiḅereghi, kopiemi ni. Ariisi iigbia phọ Ịzirel koogulemi ni. Mị kakureri oḍigh ạgada ọda-eelhe phọ esi aJeroboam ọdaam mọ.”
Ẹmos rꞌAmazaya
10Amazaya oyil ạrikia phọ ạBetel arom ni dom iphiligba ạghiom Jeroboam ọdaam mọ Ịzirel mọ: “Ẹmos ramitenom ni nyịna ẹkaraph ezue igbo awe phọ. Ikpo ọnhu phọ ọdi kepiemi ni eelhe phọ. 11Ịphen kụ ịdi ọdi ạḅem mọ: ‘Kokiigh ni Jeroboam mem ẹgham, kụ kọsighe ni we phọ Ịzirel sịen ade phọ kụ okeelom ẹnon eelhe ọmiinom ạdol iiruen.’”
12Pọ kụ amem dị Amazaya ạḅeni Ẹmos mọ, “Mẹkasian ni, oyil! Ḅula ẹpe Juda kụ ạmiin ịmiin ạna. Bịdi ọkpe nyịna ikpoki esi ịmiin phọ. 13Kạ́miin mun ẹphen Bẹtel. Ẹphen kụ ẹmha dị ọdaam mọ rạpam ghan ịiḅereghi sịphe ogbogh obughotu eelhe phọ.”
14Ẹmos ạphagharanaan mọ, “Mị kọ́do phọ oyil phọ ọpo rạmiin ghan bọ ịmiin ikpoki. Mị otelhiom ịnam, kụ mị ạḅile aḍighi oye dị raakonom ghan ireeny ạfig. 15Kụ Ọmoogh-we phọ kụ ụsighe ịmi ẹpe oḍighi okoriom iyool-ịga phọ kụ ụḅeni ịmi oru ọghaaph ghan ịpe ọdi agananami bọ ọḅeni awe phọ ọdi Ịzirel. 16Kụ nyịidipho ịnaghanan ịdi Ọmoogh-we phọ ạḅem. Nyina rịḅeni ghan ịmi mọ mị kụ́kaaph mun, ụ́ḅile mun ụ́looghiom we phọ Ịzirel. 17Kụ iḍighi kụ Ọmoogh-we phọ ạḅeni nyịna Amazaya mọ, ‘Ạnir ạna kaḍighi oliom-ẹmha ẹpe areten phọ, kụ nmụny ạna kọze ẹgham, de phọ ạna kodiighi ni kụ ọngo bụnon awe, kụ nạ rꞌaloor ạna kamugh eelhe dị Ẹnaan úlegheri. Kụ kọsighe ni we phọ Ịzirel sịen ade phọ ạbidi kụ okeelom ẹnon eelhe ọmiinom ạdol iiruen.’”
Currently Selected:
Ẹmos 7: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
