Iiḍighi 25
25
ẠPol ạsighe ḍighiton phọ ạkiomaan uwo eelhe aRom
1Kụ ạFestos roru rosi pạ eelhe phọ, ịraar aḍughul-otu reten, kụ ạḍua Sizaria ạghi Jeruselem. 2Kụ ạbuo ạrumhu ariil ạrikia phọ rꞌikpolom awe ạbuo aJu phọ ọgba iilogh phọ bịdi osiph bọ Pọl ọḅeni Fẹstos. 3Kụ bịdi ọoḅereghian nyọdi mọ aḍighi bụno iiḅi, ameeraam mọ oḅulemi Pọl ẹphen Jeruselem, loor esi dị bịdi ụwa ghan ọmoogh eepoogh okori ọdi eten oghiigh. 4ẠFestos ạphagharanaan bịdi mọ, “Loor esi dị ạPol odi bọ ikoli phọ ẹpe Sizaria, kụ mị rꞌaloor ạmi kạnuun bọ ni aḅula ẹpe, 5ạbuo ạrumhu phọ anyina ụdaph ịmi ọghi ẹpe ọgba ịkaraph phọ ạPol aḍighi bọ!”
6ẠFestos rọrolan rꞌạbidi esi ọphaanya mọ ḍioph aḍughul-otu, kụ ọdi aḅula ẹpe Sizaria, kụ ḍio phọ etum bọ pạ ọdi ạrolom ạgada ịiruen phọ, kụ arom mọ ọsighe Pọl aru. 7Kụ mem dị ạPol aru asi bụo aJu phọ ọḍua bọ Jeruselem oru ụmeregha ni okoom nyọdi ọgbaaghi ịikpara iilogh ọḅamaghi ẹmhu ọdi, kụ ạri bịdi útue ụgba umitiom ụlogh ephigh. 8Kụ ạPol ạgba rạpelaam ẹmhu ọdi kụ ạḅem mọ, “Mị úḍighi ịyaar dị ẹpioman esi iilogh ạbuo aJu phọ rꞌOtu Ịiḅereghi phọ rꞌuwo eelhe phọ aRom.”
9Kụ ạFestos ạwa ghan ọmoogh aḍiiḅi aḍien esi ạbuo aJu phọ kụ ạḅem mọ, “Nạ rạwa ni ọghi aJeruselem kụ ọrol ọghaaph aḍighiton phọ ạna ghisigh ạmi ḍụghum?”
10Kụ ạPol ạḅem mọ, “Mị úmeera. Mị rạwa ni dị uwo eelhe phọ aRom kụ kạghaaph ḍighiton phọ ạmi. Ịsiphe kụ ịkpe ọrol ọghaaph aḍighiton phọ. Mị ụ́pioman bụo aJu phọ, ịdipho nạ alegheri bọ ni. 11Eru dị mị ạka ologh dị ẹkpianaan oghiigh ạmi, pọ mị úkel omugh; kụ eru dị ịpe bịdi rụgbaanaan bọ ịmi ítu igey, pọ oye ólho dị kụsighe ịmi ạngo bịdi. Mị mạsighe ḍighiton phọ ạmi rạkiomaan Siza uwo eelhe phọ aRom.”
12Kụ ạFestos rozu rụru bụo oroma phọ ọdi, kụ ạphagharanaan mọ, “Nạ mạsighe bọ ḍighiton phọ ạna ạghiomaan Siza, pọ nạ kạki ni kꞌaSiza phọ.”
Ọmeremi Pọl ghisigh Ạgripa rꞌaBanisi
13Asiḍughul-otu reten, kụ Ọdaam Ạgripa rꞌaBanisi oru ẹpe Sizaria ọmagh ạFestos mọ, “Nạ masi.” 14Bịdi mọrol pạ ịbadi asiḍughul-otu kụ ạFestos ạgba ḍighiton phọ ạPol ạḅeni ọdaam ẹmha phọ mọ, “Oniin oye dị ạFeliks ạlhogh ikoli odi ni sịen ḍịghaagh ạmi. 15Kụ mem dị mị ạghi bọ Jeruselem, ạbuo ạrumhu ariil ạrikia phọ rꞌikumoor awe ạbuo aJu phọ ụgba ni iilogh ọḅamaghi ẹmhu oye phọ ọphon kụ ụḅeni ịmi mọ mị usoph ọoruen upume nyọdi. 16Kụ mị ụḅeni ni bịdi mọ ạbuo aRom ụ́moogh ẹzo ọḅogh ghan oye lọ osiph ologh bịn ọngo, tụtu bụphe ọpham bọ nyọdi ologh phọ rꞌọdi mọmerenyan ọgbaanaan. 17Kụ mem dị bịdi oru bọ ẹphen mị útoph mem, kụ ḍio phọ ạḍiphe etum bọ pạ, mị ạrolom ạgada ịiruen phọ, ạto ạngo mọ ọsighe oye phọ oru. 18Kụ mem dị bụphe rꞌọdi rọokonoghian bọ oḅetenu bọ ụ́gba ọdo ịkaraph phọ mị agbiom bọ ologhi phọ. 19Ịikonoghian phọ ạbidi iḍighi ịlo omeeraam mọ ạbidi bịn, rꞌịlo oniin oye dị oghol mọ ạJizos, dị amugh kụ ạPol rạḅem ghan mọ maḅetenu sịphe aḍuugh phọ. 20Ịlo ọnaghan aḍighiton phọ ạḍien igo ni ịmi. Ịduon kụ iḍighi mị apuru Pọl mụghumo ọdi ameeraam ni ọghi aJeruselem kụ ọrol ọghaaph aḍighiton phọ ọdi. 21Kụ ạPol mạsighe ḍighiton phọ ạkiomaan Siza. Ọdi ạḅem mọ ọno kạtol li pạ otu ikoli phọ ẹteeny ḍio lọ kọsighe nyịno ọkiom Siza, kụ mị mạto mọ ọdi ạrol li pạ otu ikoli phọ.”
22Kụ Ạgripa ạḅeni Fẹstos mọ, “Mị rꞌaloor ạmi rạwa ni ọnaghan aani aḍighiton oye phọ ọphon.”
Kụ ọdi mọ, “Iḍue nạ kạnaghan ni ịpe ọdi kạkaaph bọ.”
23Ḍio phọ etum bọ pạ Ạgripa rꞌaBanisi uru ni rꞌeboom eegu rꞌuduru. Bịdi rꞌaruwo ẹmhu ạbuo ẹgham mọ rꞌikpolom awe ẹmha phọ uḍigh ni sịphe otu ạsiagba phọ. Kụ ạFestos ạto ạngo mọ ạPol aru. 24Kụ ạFestos ạḅem mọ, “Nạ Ọdaam Ạgripa, rꞌanyina phọ ạbuen edi bọ sịen, nyina mẹmiin ni oye phọ ọphon, ọpo oomo aḍita ạbuo aJu phọ oḍighi bọ ḍighiton phọ ọḅam ẹmhu ọdi sịen ghisigh ạmi. Ẹphen rꞌẹpe Jeruselem, rọlooghi ghan mọ ị́kpe mun lọ ọdi kạtol. 25Kụ mị ạwa bọ mị ụ́miin ịyaar lọ ọdi aḍighi dị ẹkpe oghiigh ọdi. Kụ ịdipho ọdi mạsighe bọ ḍighiton phọ ọdi ạghiom Siza, mị mameeraam ọsighe ọdi ọghiom ẹpe phọ. 26Mị ụ́kar ụmiin ịlo ọdi dị eganana ọge ọghiom uwo eelhe phọ aRom. Ịduon kụ iḍighi kụ mị ạtu bọ ạsighe nyọdi ạmeremi sịen ghisigh anyina, ḅịle rꞌesi ạna Ọdaam Ạgripa, pịdi mem lọ mẹeḅeghion ephogh iini mị kạmoogh ni ịyaar ọge ịlo ọdi. 27Ẹtol mụdi ị́moogh ẹmhu ọtuan ọsighe ọnyo-ikoli bịn ọghiomaan aSiza, dị ụ́wa ulegheri ọdo ologh phọ dị asoor bọ.”
Currently Selected:
Iiḍighi 25: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
