Iiḍighi 18
18
Ẹpe Kọrint
1Ịphen reten kụ ạPol ạḍua Ạtens ạghi Kọrint, 2kụ ạmiin oniin ọlo aJu dị oghol mọ Ạkuila. Ụmar nyọdi ẹpe Pọntos. Pụruku ọdi rꞌạPrisila ạnir ọdi ọḍua ni Itali oru, ịdi eḍighi bọ ạKlodios uwo ẹmha phọ aRom mạlhogh ologh mọ oomo ạbuo aJu ọḍuaghu Rom. Kụ ạPol ạghi asi kꞌạbidi, 3ịdi eḍighi bọ ọdi rꞌạbidi ọḅoph oniin ọdo oḍighi ọkologh ghan arukpe ọloghoḍiom arugbogo, kụ arughan bịdi oḍighi ghan oḍighi phọ. 4Kụ ọdi ạagbaghanaan ghan sịphe obughotu phọ tọrobo aḍio ophooghian, ạkpaariom ghan mọ ạbuo aJu rꞌạbuo aGris omeeraam.
5Mem mọ ạSailas rꞌaTimoti ọḍua bọ Masidonia oru osi, ạPol ạkuom oomo amem ọdi ọghaaph ghan adom mọ ḅịle rꞌoḍeenaan ghan ạbuo aJu mọ ạJizos kụ aMesaya phọ. 6Mem dị bịdi okitonaan oronyon nyọdi, kụ ọdi ạakpa ịisaar aruwol ọdi kụ ạḅeni bịdi mọ, “Ịḅaal anyina ẹrol rụmhu anyina! Ologhi ạmi apooph ni. Emiigh kꞌạnyiidipho mị kakiton asoman ruuruen phọ.” 7Rọḅem bọ ịduon phọ, kụ ạḍua ạghi kꞌooruen dị oghol mọ ạTitios Jọstos, dị rakueni ghan Ẹnaan. Otu ọdi atuman obughotu phọ. 8Kụ ạKrispos, uwo ẹmhu obughotu phọ, rꞌoomo kꞌọdi umeeraam ni Ọmoogh-we phọ. Ịbadi ạbunon ạbuo ạKorint dị ọnaghan bọ dom mọ umeeraam aani ni, kụ owurogh bịdi mụum.
9Ḍiniin aḍughul, kụ ạPol ạmiin uḍien dị Ọmoogh-we phọ rạḅeni ghan nyọdi mọ, “Kákiilaan mun! Kạaph ni ạghiom, úḅoorian ghan! 10Mị odianaan ni rꞌạna. Oye lọ kaḍighi nyịna ịyaar ólho. Ịbadi awe ạmi odi ni sịen ẹmha phọ ẹphen.” 11Kụ ọdi ạrol ẹpe phọ lhạ rꞌạpakiri, ạtughemi ghan we phọ ọghaaph phọ Ẹnaan.
12Mem dị ạbuo ịtooghi aRom ọma Galio mọ aḍighi uwo ẹmhu Ạkaya, ạbuo aJu phọ ụḅoph ni ọnhu osiph Pọl ọsighe ọghi otu ịiruen, 13kụ ọḅem ghan mọ, “Oye phọ ọphon rạkpaariom ghan we mọ oghueni Ẹnaan reten dị ẹgbatanaan rꞌiilogh phọ.”
14ẠPol rạwa ọghaaph, kụ aGalio ạḅeni bụo aJu phọ mọ, “Eḍighi ḍighiton ḅịle mꞌosoor ologh, pọ mị muler ri loor ịnaghanan inyina. 15Kụ eḍighi bọ ịikonoghian ikpo ọnhu rꞌasiḍien, rꞌiilogh anyina, pọ nyina kụ ịiḅeghion ni ephogh. Mị úgbiom ologhi osoph ịiruen ọdo asighiton phọ ịphen.” 16Kụ ọdi aphorogh bịdi sịphe ạdol ịiruen phọ. 17Kụ aḍita phọ ạbidi omeleghuom Sostenis, uwo ẹmhu obughotu phọ, okuphogh dị abuugboom ịiruen phọ ọmiin ni. Kụ aGalio óphogh ịphen phọ ọlogh elegh.
Ịdi ọḅile oḅula osi Ạntiok
18 #
Igb 6.18
ẠPol ạḅile ni ạrolan bụo ạsiosi phọ ịminighan aḍughul-otu, kụ rọḅeni mọ ọmaar ọrol, kụ ạpham Prịsila rꞌẠkuila ọghimom ạSiria. Tụtu koḍigh oghuugh ẹpe Kenkria, ọdi aghula ni ẹmhu ọdi, loor iikunya phọ ọdi maghunyian bọ. 19Rosul Ẹfesos, kụ ạPol ạgbatanaan Prịsila rꞌẠkuila ạghi aḍigh obughotu phọ ạagbaghanaan rꞌạbuo aJu phọ. 20Kụ ọḅeni mọ ọdi ạrol ebianam, kụ ómeera. 21Rọḅeni mọ bịdi ọmaar ọrol, kụ ạḅem mọ, “Eḍighi ni ịtooghi Ẹnaan, pọ mị kạḅile ni aḅula ẹphen.” Kụ ọdi aḍigh oghuugh ạḍua Ẹfesos.
22Rosul Sizaria, kụ ọdi ạghi Jeruselem aphogh bụo ạsiosi phọ kụ ạḍua asi Ạntiok. 23Rọrol ẹpe mọony amem, kụ ạḅile amiigh erelhe phọ ạḍua ẹmha ạgba ẹmha reelhe aGaletia rꞌaFrijia, ạkparami ghan iloghi ạbumatuan phọ.
Ạpolos odi Ẹfesos ḅịle rꞌạKorint
24Kụ Ạpolos, ọlo aJu dị ọmar Ạleksandria, aru ẹpe Ẹfesos. Ọdi oye dị ạmaar ọghaaph, alegheri ni igey Ạḍinya Iigbia phọ ạḅile ghan ạtughemi. 25Ụtughemi ni nyọdi eten Ọmoogh-we phọ, kụ uwaloor ọdi ạghologhol li esi oḍighi phọ. Mem lọ ọdi rạkaaph, ạkaraghi ghan ạtughemi ịlo ạJizos, kụ ọlo ọdi phọ alegheri ịlo ewurom ạmuum mọ ạJon bịn. 26Ọdi amiighom ọghaaph rꞌạkpo ologhi sịphe obughotu phọ. ẠPrisila rꞌẠkuila ọnaghan bọ ụsighe ni nyọdi ọloghoma, kụ ọmaaghi Emoom Eten Ẹnaan phọ oḍeenaan mọ ọdi ạmaar alegheri. 27Ạbuo ạsiosi phọ ọmiin bọ mọ meḍigh ologhi Ạpolos ọḅeeny ọghi Ạkaya, ụkparami ni ologhi ọdi, kụ ọge ḍịnya ọghiom bụmatuan phọ mọ ọghereghom ni nyọdi. Ọdi asi bọ, ạloghonaan ni iboom ḍịghaagh bụphe mọtuan bọ ḍịseph Ẹnaan phọ omeeraam. 28Rꞌịikpo kụ ọdi ạagbaghanaan ghan alher bụo aJu phọ, kụ ạḅeni ghan ạkpaariom aḍereghinaan sịphe Ạḍinya Iigbia phọ, mọ ạJizos kụ aMesaya phọ ni.
Currently Selected:
Iiḍighi 18: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
