2 Timoti 3
3
Ịdi kemite ruukuna phọ
1Tụutughian ịphen phọ, mọ aruukuna phọ keḍighi ni ooto rꞌosooromineen. 2Awe kobeeph ni ịkaraph, ọmoogh ekpooko ikpoki, obagaam siloor ạbidi. Koḍighi ni we iituma rꞌiitunyian, ḅịle rꞌẹnaghanan ạburude rꞌaburunhiin ạbidi, rꞌelegheri iiḅi, rꞌelegheri Ẹnaan. 3Bịdi kọ́moogh ghan igbiririph rꞌọnma ighirigiir we, kọpue ghan ni siḍien awe, ọmoogh mukpo, oḍighi ịgbagara awe, ọlogh ḍien igey phọ. 4Koḍighi ni we dị kobologhi ghan rịghiri ạbidi, oḍighi yogh ịlo ạteeny. Iituma ạbidi kepul li oopha. Bịdi kọpomoghian ẹelha opu Ẹnaan. 5Kopu ni oḍeenaan mọ ạbuno omeeraam Ẹnaan, kụ ạri sịphe iloghi phọ ạbidi rokel li ọkaraghi ịikpo omeeraam mọ. Úḍighom ghan ọdo phọ awe phọ ạbuen. 6Buniin ạbidi awe dị roḍighi ghan ḅụun koḍiku ruutu ạbunon awe ookeleghi nmạriir ịyegheyeghe iloghi ọphueghiom rurugh otu ạbidi. Bụen phọ ạnmariir dị adool ịkaraph mẹnin, ḅịle ạruuphua kịrokiro reporogh. 7Bịdi rọkparagha ghan ni ịlo ọtuugha oomo amem, kụ kótue osereghian olegheri aani igey phọ. 8#Ẹḍua 7.11Ịdipho aJanis rꞌaJambris ọgbagharan ghan bọ Mozis kụ ịdi awe phọ ạbuen rọgbagharan ghan igey phọ. Bịdi aweye dị iloghi phọ mẹphuughi. Rokue ghan ni bịn mọ ạbuno omeeraam ni Ẹnaan. 9Bịdi kọ́ki ghisigh iboom, ịdi eḍighi bọ elegheri ịyaar phọ ạbidi keganana ni ghisigh awe, ịdipho emitenaan bọ Janis rꞌaJambris.
Oroma okureriom
10Kụ nạ mạdaph ịtughemi phọ rꞌẹeghara phọ rꞌigbiighi phọ ạmi. Nạ mạmiin ni omeeraam mọ, rꞌọminoghom mọ, rꞌẹphomoghian phọ, rꞌọkparam mọ, 11#Iiḍ 13.14-52; Iiḍ 14.1-7; Iiḍ 14.8-20rꞌịgbiphoghom mọ, rꞌịminimiin phọ ạmi. Nạ alegheri ni oomo phọ ịpe imitenaan bọ ịmi ẹpe Ạntiok, rꞌAikoniom, rꞌạListra, rꞌịgbiphoghom mọ ịpe mị ạminoghom bọ, kụ Ọmoogh-we phọ ụphel bọ ịmi ạsighe esi oomo phọ ịdi. 12Kọgbiphoghom ni oomo awe lọ ọwa ọḅophoghan rꞌạJizos Kraist ọrol ạdol aruukuan; 13kụ ọlo abuḍighinom ịkaraph rꞌawe iigbegheḍiom kọloghori ghan ni bịn ọkiom ghisigh ookeleghi ghan bụnon, ọḅile ookeleghian loor ạbidi. 14Nạ ạna, kụ ọlo dạph ni igey phọ ịpe ọtughemi bọ nyịna, ịpe nạ ạkparami bọ ameeraam. Tụutughian we phọ ạbuphe ọtughemi bọ nyịna. 15Tụutughian mọ kꞌẹghoroghor ạna ni, nạ alegheri bọ ọghaaph Ạḍinya Iigbia phọ ọpo arue bọ ạngo nyịna olegheri ịyaar dị raḍighi ghan dị bụphe omeeraam bọ Jịzos Kraist kọmoogh pẹleeny. 16Ẹnaan kụ iphum ghan we mọ ọge oomo phọ ịpe edi bọ sịphe Ạḍinya Iigbia phọ. Ịphen phọ ẹnighe ọtughemiom ghan igey phọ, rꞌọḅaam ghan ạbulo oḍighi ịkaraph, rꞌoolemiom ghan ịlo ẹpioman, rꞌoromoghiom ghan ịlo ạdol dị ẹkpe ọrol, 17pịdi ẹzo oye phọ ọpo rakumu bọ kạngo Ẹnaan emunughan, dị ạḅile ạmoogh ịinya oḍighinom ạtorobo ooḅi oḍighi.
Currently Selected:
2 Timoti 3: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
