2 Bụo ạKorint 8
8
Ạbuo ạsiosi onmo ghan inmo!
1 #
Rom 15.26
Bụo asiya, mị rạwa mọ ilegheri iiḍighi dị ọnma ighirigiir phọ Ẹnaan maḍighi yogh bụo ạsiosi eelhe phọ aMasidonia. 2Ịikia phọ ịminimiin phọ bịdi ọmiinom bọ mẹdegh bịdi epogh, kụ ọlo ọḅaal ologhi phọ ạbidi ạbugh ni iboom dị bịdi ḍịghaagh ụ́kul onmo ghan inmo ghạlamo ịdipho ekulom bọ ni bịdi iboom. 3Mị ạkaaph ni ramitiom mọ bịdi ụngo ni iyoor opeeliom ịlo bịdi ọmoogh. Iḍigh ni ologhi ạbidi, 4bịn ụuḅereghian iyoor ọkpaariom mọ omeera bụno ọloghonaan aani ḍịghaagh we phọ Ẹnaan odi bọ Judia. 5Ipeeliom ni ịpe yoor ọotughian bọ. Bịdi ụphur ri ọkuom loor phọ ạbidi Ọmoogh-we phọ, kụ ogbi bọ osoman aani ạmi ịdipho Ẹnaan ẹto bọ. 6Yoor ụtuan ni ịduon phọ ọkpaariom mọ ạTaitos ạanyi ạmadan osogh phọ ọpo ọdi imiighom bọ inyina ịlo oḍighinom iiḅi phọ. 7Nyina ẹmoogh ni oomo ạraraar ẹbalabalami: omeeraam, ọghaaph, olegheri ịyaar, ḍịdugh oḍighi phọ, rꞌẹphomoghian phọ nyina ịphomoghian bọ iyoor. Ịduon phọ kẹn kụ ịdi yoor rọwa ghan bọ mọ kẹ́kul ḍịghaagh osogh phọ nyina resogh bọ oḍighinom iiḅi phọ.
8Mị ụ́ḅem mọ íten ịphen phọ, mị rạwa ghan ọmiin aani ẹemor ẹphomoghian phọ anyina kụ mị rịḅeni bọ inyina ịdi ạbunon roogbulughian ịlo ọloghonaan ạḍighaagh phọ. 9Nyina elegheri ni ọdo ighirigiir phọ ạJizos Kraist Ọmoogh-we phọ ayira ụnma bọ iyira. Ọdi aḍighi ni ọolha kụ ughol bọ iyira ameel ekulom mọ, ọbo ekulom mọ ọdi ịngo inyina ẹelha.
10Bin ologhi ạmi, mẹkasian dị nyina kẹmadan ịpe nyina emiigh bọ nana phọ ạḍiphe eten bọ. Nyina kụ ạbuḅel dị emiigh bọ ẹḅile eseere ologhi oḍighi ịphen phọ. 11Ịnuun eḍighi ẹmadan. Ịlo emite ḍịghaagh anyina, ipiighaam ni ọmadan phọ ịdipho nyina ephiighaam bọ omiigh phọ. 12Nyina ephiighaam ni ọngo ghan phọ, Ẹnaan kepogh ni ịdipho ạḍighaagh phọ anyina ẹman bọ, kị́lo nyina ị́moogh, kụ ẹsighe inmo phọ anyina.
13-14Mị rạ́wa oghiigh anyina oseere kụ kẹboghoghoom bụnon; kụ ịdipho ịboghoghoom bọ inyina nyịidipho ẹkpe ni dị nyina kẹloghonaan ḍịghaagh bụphe ekuom bọ, ọbo mem lọ ikuom inyina kụ ẹboghoghoom bịdi, bịdi ọlogh ḍịghaagh ịngo aani inyina. Ịduon kụ ịdi elhiom keetol ekeeny, ekeeny eetol elhiom. 15#Ẹḍua 16.18Ịdipho ạḍinya iigbia phọ ẹḅem bọ mọ,
“Oye lọ aakoroghi iboom ọ́mooghom sụo,
Oye lọ aakoroghi ẹnum ómoghi.”
ẠTaitos rꞌạbuḅarama ọdi
16Ạḍiseph edianaan ni Ẹnaan phọ eḍighi bọ dị aloor ạTaitos rẹkologhol aani ịdipho ạḍiphe ayoor ọloghonaan anyina ḍịghaagh. 17Ọ́naghanan ịlom ayoor bịn, aloor phọ ọdi ịghologhol li ọlogh ạḍighaagh dị tụtu eḍigh ni ologhi ọdi oru ọteeny anyina. 18Yoor morom ọnyo asiya phọ rạkaaph ghan bọ ni ooḅi ọghaaph phọ, ọpo aḍien phọ eeleghaan bọ ni sịosi ạsiosi ọtuan aani ọdi. 19Ḅịle epel ịphen phọ, ạsiosi ẹmha kịrokiro phọ ọsaḅar ri ọḅile ọlogh nyọdi mọ urelhian iyoor sịen yoor rọki bọ oḍighinom ịpe mosogh bọ iiḅi phọ rokueniom bọ Ọmoogh-we phọ. Ịdipho ọlogh bọ nyọdi, mị umeeraam ni 20ịdi eḍighi bọ yoor omiigha ni loor kụ rọpamaghan bọ ẹeḍiom mọ ẹphen phọ ọbo ịḍagha kesoor ghan bọ. 21#Asid 3.4Ịḅeeraan ni iyoor oḍighi ghan ịpe eru bọ igey phọ ghisigh Ọmoogh-we phọ rꞌaghisigh awe.
22Esi okpere, yoor morom ọnon ọnyo asiya phọ ayira ọḅaram bịdi. Yoor mọwaaghi ni ọmiin mọ ịbadi amem aloor phọ ọdi rẹkologhol ghan ni ọloghonaan ạḍighaagh, kụ nyịidipho phọ ghụn ọdi miḍuom bọ inyina ologhi phọ, ọdi rạnya kapu ịdipho ẹrol ghan bọ. 23Ọsighe ịlo ạTaitos, ọdi ọḅarama dị rꞌạmi roḍighi ghan bọ oḍighi phọ ọloghonaan anyina ḍịghaagh. Ọsighe ịlo ạbueri phọ ạbuo asiya phọ rꞌọdi rọki bọ, ạsiosi ạsiosi phọ kụ ụlogh bịdi, ḅịle eḍighinom ịyaar phọ ạbidi rẹngo ghan eghuan Kraist. 24Iḍeenaan bịdi ẹphomoghian phọ anyina, ọbo ạsiosi ẹmha kịrokiro phọ ọmiin aani kụ olegheriom mọ nyina ẹman ni ootumaam mọ.
Currently Selected:
2 Bụo ạKorint 8: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
