2 Bụo ạKorint 5
5
1Yira olegheri ni mọ mem dị mozughuron ogbogo phọ ọphon yira orugh bọ, Ẹnaan kiseenaan ni iyira otu dị awe kụ ụ́logh ẹpe kꞌạke mọ orugh kꞌagee-pọ. Ogbogo phọ ọphon rọkaaph ghan bọ, pọ aḍizu ọposo phọ ayira. 2Yira rọḅiphighu ni kọmaagha yogh iboom loor esi dị rịphu bọ iyira mọ ọsighe otu phọ yira kọmoogh bọ ẹpe kꞌạke ozu ukpereghiom iyira. 3Rozu ịduon phọ rukpereghiom iyira bịn kọ́miin mun ẹdaḅa ayira. 4Ịduon yira orugh bọ sịen ogbogo phọ ọphon phọ yira rọḅiphighuom ni ẹemor adool phọ ạḍien yira orool bọ. Ụ́ḅem mọ yira rọwa ghan ọkporonaan aruzu ọposo phọ oseere. Yira rọwa ghan ghụn mọ ụkpologhi iyira ḍịphe kꞌạke phọ, ọbo aghuḍum mọ ạminogh ḍịen remugh ghan bọ. 5Ẹnaan ighol ịphen phọ kụ ịlhem bọ iyira, ẹngoom Uwaloor phọ ọdi mọ ụmeeranaan iyira enye.
6Esi ịduon phọ, yira rọkparami ghan ni iloghi ayira oomo amem. Yira ologhoma ni mọ ịduon yira odimom bọ ni ḍizu phọ ạḍien phọ, pọ yira ọkelan ni kꞌỌmoogh-we phọ. 7Kụ ạri ghụn kị́pe rọmiin bọ, omeeraam kụ ratelhiom ghan bọ ghuḍum mọ ayira. 8Iloghi phọ ayira ẹkpar ri kụ kịḅeeraan ni iyira ọwile aḍizu phọ ạḍien phọ kụ orughan Ọmoogh-we phọ. 9Ịdi ghụn epu oomo phọ ịne, yira rọwa ghan ni ọḅaalami ologhi ọdi mꞌịsien aḍizu phọ ạḍien phọ ni, ḅịle mꞌẹpe kꞌạke, 10#Rom 14.10ịdi eḍighi bọ oomo phọ ayira kụ kọmeera ni ghisigh aKraist kụ ọdi aagbo ịiruen ayira ọbo ọtuan oḍighi ọlo oye rꞌoye, igey mꞌịkaraph, sịen aḍizu phọ ạḍien kụ ọngo ịdi ẹkasian.
Mọtuan Kraist oḍighi rịghiri Ẹnaan
11Loor oghiilaan Ọmoogh-we phọ, kụ yoor rọkpaariom ghan bọ we. Ẹnaan ilegheri ni iyoor ẹmadan, kụ mị aḍuom ni ologhi mọ nyina ilegheri kẹn ni iyoor sịphe iloghi phọ anyina. 12Íḍighi ịdi ẹrol mụdi yoor ọḅile kẹn rootuma ịlo ạroozo phọ ayoor kịḅeni inyina. Eḍighi ghụn ịdi yoor rọwa ghan mọ ịmoogh ẹmhu ịyaar oghol kụ ọlogh ayoor ọman, ọbo nyina erue ẹphanyanaan bụphe rọmiin ghan bọ ḍimite, bịn ẹzo oye phọ rópogh ghan bọ kụ kọsighe ọloghoma. 13Mọ iloghi ayoor ị́bomoghan, pọ ighol ẹmhu Ẹnaan. Iloghi ayoor ẹbomoghan, pọ ighol ẹmhu anyina. 14Ẹphomoghian phọ aKraist ụphomoghian bọ iyoor kụ rirelhiom ghan bọ iyoor sịen yoor molhoghoma bọ mọ oniin oye aghol li oomo awe phọ kụ amugh. Ịduon phọ emeeraam mọ oomo awe phọ ụḅophoghan ni omugh aani ḍuugh phọ ọdi. 15Ọdi aghol oomo awe phọ kụ amugh bọ, ọbo bụphe odi bọ kọ́tolonaan mun loor ạbidi, kọtolonaan nyọdi phọ bịn amugh bọ kụ oghol bọ ẹmhu phọ ạbidi oḅeton sịphe aḍuugh phọ.
16Esi ịduon phọ, yoor rọ́sighe mun ịpe aḅirini phọ bịn kophoghom oye. Ghạlamo yoor uphoghom ịduon phọ aKraist mem dị meten, nyịidipho yoor mosoph okpere. 17Oye phọ raḍighi ghan omoom, mem lọ ọdi mạḅophan aKraist. Igbaany phọ meten, imoom meru. 18Ẹnaan phọ ẹtuan bọ aKraist kụ ịphomoghi bọ iyira ẹḅile bọ ịngoom iyoor oḍighi ọsighe ghan ạbunon ọphomoghiom ọdi phọ, kụ iḍighi yogh bọ ni oomo ịphen phọ. 19Ọghaaph phọ ayoor rạḅem ghan mọ Ẹnaan meghol aKraist rẹpomoghian aḅirini phọ. Ẹnaan ị́bal ghan ịkaraph phọ ạbidi iseere. Ḅịle ọdi mạḅogh ịpe ọdi rạpomoghi ghan bọ we phọ ạlogh ḍịghaagh ayoor mọ ọghaaph ghan ọḅeni we.
20Ịduon phọ yoor moḍighi bọ rụukpaany dị ọmeera rọkaaphaan aKraist ẹkigh mụdi Ẹnaan rꞌaloor ọdi kụ ụsighe iyoor rịlhomom inyina mọ ịpomoghian nyịno. 21AKraist ịkaraph ólhegheri; Ẹnaan ịtuan iyira kụ ẹsighe bọ nyọdi eḍighi ọrim-onu phọ, ọbo yira ọḅophoghan nyọdi ọmoogh aani ruukuan phọ Ẹnaan.
Currently Selected:
2 Bụo ạKorint 5: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
