2 Bụo ạKorint 1
1
1 #
Iiḍ 18.1
Mị ạPol phọ Ẹnaan ẹsaḅar bọ oḍighi otelhedom ạJizos Kraist, ḅịle rꞌaTimoti ọnyo asiya phọ ayira, kụ ụge ḍịnya phọ ạḍien rotuomaan bụo ạsiosi phọ Ẹnaan odi bọ ẹpe Kọrint, rꞌoomo awe phọ Ẹnaan odi bọ oomo eelhe phọ Ạkaya.
2Ạḍiseph rꞌẹepho kꞌẸnaan Ọde phọ ayira rꞌạJizos Kraist Ọmoogh-we phọ ịrolonaan inyina!
ẠPol rạseph ni Ẹnaan
3Itu ọngo ḍịseph Ẹnaan rꞌỌde phọ ạJizos Kraist Ọmoogh-we phọ ayira, Ọde ọnma ighirigiir, Ẹnaan phọ eḍighi bọ zin oomo ịidereghi phọ. 4Ọdi kụ rụudereghi ghan iyoor esi oomo ịminimiin, ọbo yoor orue ọsighe ọdo ịidereghi phọ Ẹnaan rịidereghiom ghan bọ iyoor kụ ọodereghiom aani bụphe rọmiinom bọ ịminimiin kịrokiro phọ. 5Ịdipho yoor ophin aani bọ bin ịbadi ịminimiin phọ aKraist kụ ịdi yoor kọtuan nyọdi opin aani bin ịbadi ịidereghi phọ ọdi. 6Ịlo yoor ọmiinom, pọ ịlo ọodereghiom ḅịle rꞌọphelom anyina otene. Ịlo ụudereghi iyoor, pọ mịidereghi aani ni inyina ọḅile ịngoom inyina ịnyaam ọkparam ọrolom igina phọ ịpe yoor rọkparam aani bọ ni. 7Oḍuom ologhi phọ yoor ịmooghom bọ inyina ạmeera ni gbakiki. Yoor olegheri ni mọ ịdipho nyina ephin aani bọ bin ịminimiin phọ ayoor kụ ịdi nyina kepin aani ni bin ịpe ụudereghi bọ iyoor.
8 #
1 Kọr 15.32
Bụo asiya, ịḅeeraan ni iyoor lọ nyina kelegheri aani ịlo ịminimiin phọ yoor ọmiinom bọ ẹpe eelhe phọ Esia. Adool phọ ụleti bọ iyoor ịbugh ni rꞌeboom ẹemor dị tụtu yoor ogbi ghan mọ ịlo aghuḍum ílho mun. 9Ịghigh mụdi mosoph ịiruen aḍuugh ọḅam ẹmhu ayoor. Kụ ạri ịphen phọ imite oḍeenaan ayoor mọ yoor kọ́da ẹmhu ayoor bịn ọtol, emuton oḍuom ologhi Ẹnaan phọ reḅerion ghan bọ bụlo momuughu. 10Ọdi mụphel li iyoor ạsighe esi oboom omuzaan aḍuugh phọ ọphon, kụ kụphel li iyoor. Kụ yoor oḍuom ni ologhi mọ ọdi kụphel kẹn ni iyoor. 11Nyina phọ kẹn, ịlogh ni ḍịghaagh ighol ghan iyoor ẹeḅereghi, ọbo ịbadi awe ughol ghan iyoor ọseph Ẹnaan, ịdipho ọdi mạnaghanan bọ ịiḅereghi ịbadi awe phọ ụngo iyoor ḍịseph phọ ọdi.
Monme ịpe ạPol agbiighi bọ
12Ẹphen kụ ịyaar phọ yoor robomaam bọ: ịitughian phọ ayoor ịḅeni ni iyoor ekuphom owol mọ ophooph ologhi dị iguegue ụ́ḅaram rꞌọnma ighirigiir phọ Ẹnaan, kólegheri ịyaar awe, kụ rẹtooghiom bọ eḍighinom ịyaar phọ ayoor sịen aḅirini phọ ḅịle rꞌọkaraghi asiya phọ yira osian bọ. 13-14Yoor ọge ni ịdi nyina kẹ́bal ẹki ẹbal etu kụ egbi ọnaghan. Kụ mị aḍuom ni ologhi mọ ịpe nyina elegheri bọ ẹnum bịn ịlo ayoor nyịidipho nyina kelegheri ni ẹmadan, mọ ḍio phọ ạJizos Ọmoogh-we phọ katu bọ, nyina kịlogh ni iyoor ọman, ịdipho yoor kịlogh bọ ni inyina ọman phọ.
15Mị ulegheri bọ ghụn ịlo oomo ịphen phọ, kụ mị ạtu bọ agbiighi ọphur oru ẹpe, ọbo nyina ẹmoogh ịyal amem ạḍiseph. 16#Iiḍ 19.21Mị ugbiighi ni oḍigh ẹpe, mem lọ mị aten rạki Masidonia ḅịle rꞌamem lọ mị ratigheel, ọbo nyina ịloghonaan ịmi ḍịghaagh ọghi aJudia. 17Egbiighiom mọ ạmi ịkporokporo ni ḍụghum? Mem lọ mịna agbiighi ịlo oḍighi, mịna rạtuan ghan ịlo ịḅeeraan ịmina bịn ḍụghum? Odi ropogh mọ ii, onyam-ọḅatan mọ eeye, ḍụghum? 18Ẹnaan phọ reḍighi ghan bọ ịpe ọdi aguanaan bọ elegheri ni mọ mị inyina íguanaan ghan ọkpe rꞌigey, 19#Iiḍ 18.5ịdi eḍighi bọ ạJizos Kraist Ọony phọ Ẹnaan, ọpo ạSailas rꞌaTimoti rꞌạmi ọghaaph ghan bọ ịlo ọdi ịḅeni inyina, kóye ọkpe rꞌigey. Ọdi rạ́bile ghan oḍighi ịlo ọdi mạghaaph. 20Ọdi kụ ezen phọ ọkan bọ oḍighi ghan oomo ịlo Ẹnaan eguanaan. Ụtuan nyọdi kụ mem lọ yira ọngo eegu Ẹnaan rọḅem ghan bọ mọ, “Ẹrol li ịdipho!” 21Ẹnaan rꞌaloor ọdi ni kụ iḍighi bọ ịdi yoor rꞌanyina mọḅophoghan bọ aKraist roḍuom ghan ologhi mọ yira ạbuo ọdi ni phọ. Ẹnaan rꞌaloor ọdi kẹn ni kụ ịsaḅar bọ iyira eegho eseerian, 22ẹlhogh Uwaloor Iigbia phọ oḍighi elegh sịphe iloghi phọ ayira, ẹmeremi nyọdi enye oomo ạraraar phọ dị useenaan bọ iyira.
23Mị ạmagh Ẹnaan phọ elegheri bọ ologhi phọ ạmi kụ ọmeera ọgbaanaan ạmi, mọ mị ịnma inyina ighirigiir kụ ạtu bọ aḅoton ọḅile oru ẹpe Kọrint. 24Ụ́ḅem mọ yoor ogiba ni bịn kụ rọgo rạraar dị nyina kemeeraam, loor esi dị omeeraam mọ anyina ạmeera ni gbakiki. Yoor ghụn rọlogh ni ḍịghaagh ọbo nyina ẹmoogh ọḅaal ologhi.
Currently Selected:
2 Bụo ạKorint 1: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
