1 Bụo ạKorint 8
8
Aḍipuru ịlo ariiḍien lọ ọphighironom ẹkia ọngo ruru
1Ọoḅeghion nụun ophogh ḍipuru phọ anyina ịlo ariiḍien lọ ọphighironom ẹkia ọngo ruru! Ọkar igey ni bịdi rọḅem ghan mọ, “Oomo phọ ayira olegheri ni ịyaar.” Ọdo olegheri-ịyaar phọ ọphon raaphughemi ghan oye, kụ ẹphomoghian kụ repophe ghan oye. 2Oye lọ ragbi ghan mọ ọno alegheri ni ịyaar, pọ ọ́karaghi olegheri ịpe ẹkpe bọ olegheri phọ. 3Kụ Ẹnaan rẹloghoma ghan ni oye lọ ạphomoghian nyọdi.
4Ọḅile nụun ophogh malhe ịsaraghi phọ! Yira olegheri ni mọ ạnmuny aghuḍuul phọ ị́moogh ḍiphooghu. Yira olegheri ni mọ edi bọ eniin phọ Ẹnaan bịn. 5Ghạlamo ukol ạrumugh edi ghan ni ẹpe kꞌạke rꞌịsien ade phọ — ḅịle kẹn mọ ukol ạrumugh dị ẹmoogh bụo aruru iḍiza ni — 6yira ọmoogh bọ eniin Ẹnaan bịn, Ọde phọ ạlhemogh bọ oomo ạraraar phọ, ọpo roḍighi bọ oḍighi phọ kọngo; ḅịle kẹn yira ọmoogh bọ oniin Ọmoogh-we ạJizos Kraist, ọpo ọtuan bọ kụ ọlem oomo ạraraar phọ, ọpo aḍighi bọ ịyaar phọ yira odi bọ.
7Oomo awe kụ úlegheri ephigh phọ ịphen. Tụtu kꞌarodon oḍighi aruru phọ ạḅaram ni buniin awe dị bịdi role eḍien lọ oḍighinom ịyaar aghuḍum rọotughianam ghan ologhi mọ bụno role eḍien aruru. Ịdipho ịitughian phọ ạbidi esi ị́meera bọ, bịdi rogbiighiom ghan ologhi mọ eḍien phọ mẹphue bụno. 8Bịdi úlegheri mọ eḍien ị́moogh ịyaar oḍighinom ạdol phọ ayira ghisigh Ẹnaan. Mọ yira ole yira úle, ịyaar ayira esi répe.
9Kụ ọlo imiigha ni loor. Kẹ́tuan eḍien lọ ịkpianaan inyina olhe ghan bịn eḍighi dị bụphe omeeraam mọ ạbidi adugh bọ komeel oḍighanaan ịkaraph. 10Eḍighi ịyaar dị oye lọ ịitughian ọdi esi ị́meera ạmiin dị nạ phọ alegheri bọ ịyaar phọ kụ aleeghi eḍien obughotu aruru, ịphen phọ kẹ́kparami ologhi ọdi oleeghi aani eḍien aruru ḍụghum? 11Kụ oye phọ ọphon ịitughian phọ esi ị́meera bọ, ọphon aKraist aghol aani bọ ni kụ amugh, ạtuan olegheri ịyaar phọ ạna bịn ape. 12Ịduon phọ nạ maḍighi bọ ịkaraph ạḅile ạphue iloghi ạbuo asiya phọ ạna ịitughian phọ esi ị́meera bọ, bịn nạ maḍighi aani ịkaraph Kraist. 13Kụ eḍighi ịyaar dị eḍien kụ keḍighi dị ọnyo asiya ạmi kạpioman, pọ mị kạ́ba mun ẹnam, ọbo ọnyo asiya phọ ạmi kụtuan ghan bọ ịmi ạpioman.
Currently Selected:
1 Bụo ạKorint 8: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
