1 Bụo ạKorint 4
4
Abutelhedom aKraist
1Ịsighenom mọ yoor awe oḍighi aKraist dị Ẹnaan mẹḅogh ịpe ịbooghian phọ ọdi ẹlogh ḍịghaagh. 2Kụ egbogh ịyaar dị rọwa ghan ḍịghaagh oye dị aḍiemiom oḍighi, oseere ghan ologhi esi oḍighi phọ. 3Ị́kigh ịyaar esi ạmi mọ nyina mụghumo abuugboom ịiruen ịsien aḅirini phọ kụ usophonaan ịmi ọoruen. Mị rásopha ghan ọoruen kạḅamian ẹmhu. 4Ịduon mị úloghoma bọ apum mọ íḍeenaan mọ mị mạar ụ́piom. Ọmoogh-we phọ kụ alegheri akeel rꞌapum. 5Ịduon kụ iḍighi kụ kéḅonom ghan osophonaan oye ọoruen kụ egbi ọteeny amem mọ. Ọmoogh-we phọ aru, kạsighe ni rạraar ịbooghian ufiri phọ amitiom ẹphalaḅaal, kụ agananami ịitughian phọ ịpe ạaghian bọ sịphe iloghi phọ ạbidi. Kụ ẹtuan sịphe kụ tọrobo oye ạboor Ẹnaan ḍịseph phọ ạḍiphe ẹgbaanyan bọ nyọdi.
6Bụo asiya, loor ẹmhu anyina, ịphen phọ mị ạkaaph ạmaam loor ạmi rꞌẠpolos. Mị ụmaaniom iyoor pịdi nyina elegheri ẹmhu ọḅem mọ ọphon mọ, “Kétenom ghan ọku.” Kébomaam ghan nyoniin kụ ephogh nyọori phọ esoore. 7Ạnhian kụ aphophe bọ nyoniin ọnyo anyina apuemi bụeri phọ? Ẹnaan kụ inyina ị́ngo bọ oomo ạraraar phọ nyina ẹmoogh bọ ḍụghum? Kụ eru ni ruunmo, nyina ighol eeghe nụun kụ rebaga ghan bọ?
8Nyina ịḅem ḍịen mọ nyina ẹmoogh ni emuzeḍi. Nyina ịḅem mọ nyina eḍum ni ewarara. Nyina ịḅem ḍịen mọ nyina mẹrologhu sịgada ọdaam ẹmha, rꞌẹmhu anyina ni. Ḅẹm loon mọ nyina ẹkaraghi ni ẹtologhu sịgada ọdaam ẹmha phọ, ọbo yoor moḍighi bụḅarama anyina. 9Ẹkigh esi ạmi mụdi yoor abutelhedom mọ, eekuna ạrebene dị Ẹnaan ekpor ẹkol bịn ẹngo ịdipho awe dị erugh aḍuugh ephum, kụ kọze esi ogbo dị ạruukpaany phọ Ẹnaan rꞌaweye rꞌoomo aḅirini phọ rọmiin. 10Yoor moghol ẹmhu phọ aKraist ọkigh bụo arolologhi, kụ nyina rẹḅem ghan ghụn ni mọ nyina kụ ịsu ologhi esi aKraist. Mọ nyina kụ ịkpar, kụ yoor odugh. Mọ nyina kụ ịmoogh eghuan, kụ eghuan iyoor ílho. 11Kꞌạnyiidipho yoor odi ni ọkoony eḍien rꞌạmuum, oonmenemineen iyoor úlho, rụphamam ghan iyoor igbagbaar, yoor marugh ụ́moogh, 12#Iiḍ 18.3yoor rokumuanam ghan rạghaagh ayoor ọbo ọmoogh ịyaar ọrolom. Bụlo uronyon iyoor, yoor rọngo ghan ḍịseph. Bụlo ụgbiphoghom iyoor, yoor rọkparam ghan ni. 13Bụlo ụgilaam iyoor yoor rọbonyian ghan ịyoghoyogho ikpo ọnhu. Kꞌạnyiidipho yoor kụ atopha ḅịle rꞌịiya aḅirini phọ.
14Mị rạ́ge ịphen phọ osiphiom anyina umugholoor. Mị ụtuan ghụn oromoghiom anyina ịdipho ạnmuny phọ mị ạphomoghian bọ. 15Ghạlamo ịdipho kótue bọ ni ọbal omuneni riibia dị rịtughemi inyina ịlo aKraist, ạburude anyina úḍiza. Mị ughol ooḅi ọghaaph phọ kụ aḍighi bọ ọde anyina esi ạJizos Kraist. 16#1 Kọr 11.1; Fil 3.17Esi ịduon phọ, mị rịkpaariom ni inyina mọ ịtuughaany ghan ịmi. 17Mị ụtuan ịduon kụ atom bọ Timoti, ooḅi ọony phọ ạmi ạkpar bọ ni sịphe oḍighi Ọmoogh-we phọ, mọ aru ịghiom inyina ologhi ọdo eḍighinom ịyaar phọ mị rạḍua ghan bọ sịosi kạgba sịosi ạtughemi ghan we mọ oḍighi oḍighi ọngo Jịzos Kraist.
18Ịbadi anyina rebaga ghan mụdi mị mighiilaan inyina bịn ạbile oru phọ. 19Kụ mị ạnuun ni ratu ọteeny anyina, lọ Ọmoogh-we phọ ameera, kụ mị ạmiin aani ịikpo ạbuen phọ rọpaaghian ghan bọ. 20Rọmiin ghan ọmar phọ kꞌẸnaan sịphe ịikpo oḍighi phọ kópu ghan bịn ọghaaph. 21Nyina epin nyẹghen? Mị ụpam ịkpara ọguroghom anyina, kụ ọpham ologhi ẹphomoghian rꞌọnma ighirigiir kụ orumom ḍụghum?
Currently Selected:
1 Bụo ạKorint 4: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
