1 Bụo ạKorint 2
2
Ọghaaph ịlo aḍuugh egbo phọ aKraist amugh bọ
1Bụo asiya, mem mọ mị aru bọ ọghaaph ạraraar ịbooghian phọ Ẹnaan ọḅeni anyina, mị ụ́kaaph mụdi mị ophelegbe olegheri ịyaar rꞌịidugha ikpo ọnhu. 2Mem mọ yira ọrolan bọ, mị ụphur ri ọkpuku awula ịnon ạraraar, omuton ọghaaph ghan ịlo ạJizos Kraist rꞌaḍuugh phọ ọdi loor oreeny phọ bịn. 3#Iiḍ 18.9Mị ụpham ni eepuph rꞌophiigha aloor rꞌokaphian oomiigh kụ arumom bọ ịteeny inyina. 4Mị ụ́sighe ḍịidugha anem rꞌolegheri ịyaar ịsien aḅirini phọ kụ ạghaaphom ghan bọ ạtughemi. Ịikpo Uwaloor Iigbia phọ ịkparami ghan ni ikpo ọnhu phọ ạmi, eḍeenaan mọ ịḍua ni esi Ẹnaan phọ kụ eru. 5Esi ịduon phọ, nyina ị́tuan olegheri ịyaar awe aḅirini phọ, nyina ịtuan ghụn ni ịikpo phọ Ẹnaan kụ emeeraam bọ.
Olegheri ịyaar dị ạḍua kꞌẸnaan kụ aru
6Kụ ọlo yoor rọkaaph ghan ni ịlo olegheri ịyaar kọloghoḍi rụru ạbuphe uwaloor phọ maphoph bọ ạmanam, kụ kị́lo olegheri ịyaar ịsien aḅirini phọ ḅịle rꞌịlo ạbuphe ọdaaghi bọ riisi sịen aḅirini phọ. Ịikpo ạbuen phọ reminenom. 7Yoor rọkaaph ghan ịlo olegheri ịyaar phọ ọpo Ẹnaan ạaghinaan bọ we. Kꞌamem dị kọ̋lhem aḅirini phọ, Ẹnaan mẹsaḅar ri olegheri ịyaar phọ ọphon ọbo yira ọmoogh aani bin igbogh phọ ọdi. 8Ọnyo ạbuphe ọdaaghi bọ riisi sịen aḅirini phọ dị alegheri olegheri ịyaar phọ ọphon ọ́rol. Mọ bịdi ulegheri ni, ọbo mụ́kan Ọmoogh-we Eghuan phọ loor oreeny phọ ukiigh. 9-10#Azay 64.4Kụ Ẹnaan mẹsighe Uwaloor phọ ọdi egananamiom iḍeenaan iyira rạraar ịbooghian phọ ọdi. Ịdipho ạḍinya iigbia phọ ẹḅem bọ, “Rạraar dị oye kꞌekulha ụ́miin, kꞌekulha ụ́naghan; ịdi kꞌekulha ụ́utughian mọ kemite, ịphen kụ ạraraar phọ Ẹnaan eekolobian bọ eseenaan bụphe ọphomoghian bọ nyọdi.” Uwaloor Iigbia phọ alegheri ni oomo ạraraar ạman, ghạlamo rꞌeekuna ịitughian ịbooghian phọ Ẹnaan ni. 11Ọmar awe, uwaloor phọ odi bọ loor oye phọ bịn kụ ralegheri ghan oomo ịlo oye phọ. Ịduon phọ kẹn kụ ẹdi Uwaloor Iigbia phọ bịn kụ ralegheri ghan oomo ịlo Ẹnaan. 12Uwaloor phọ yira ọmoogh bọ ọlo Ẹnaan, kọ́lo ịsien aḅirini phọ. Ẹnaan kụ ịngo mọ yira olegheriom oomo aruunmo phọ ọno.
13Uwaloor Iigbia phọ kụ ụtughemi bọ iyoor. Awe olegheri ịyaar ịsien aḅirini phọ kụ iyoor ụ́tughemi bọ ikpo ọnhu phọ yoor rọgbaam ghan bọ ẹmhu ạraraar uwaloor phọ kọḅeni bụphe olegheri bọ Uwaloor Iigbia phọ. 14Kụ oye lọ úlegheri rạraar uwaloor phọ kạ́moogh aani ruunmo kꞌUwaloor Iigbia phọ. Ịphen phọ kétue ẹbol eḍigh rụru ọdi. Ọdi kạ́maghami ịyaar ịdi eḍighi bọ ropoghom uwaloor bịn kụ olegheriom mọ ẹman ni ịyaar. 15Oye lọ alegheri rạraar uwaloor phọ ratue ghan ni kalegheri ịdi oomo ạraraar ẹman, kụ ọnon oye kátue ạmiin ịdi ọdi ạman aani. 16#Azay 40.13Ịdipho ạḍinya iigbia phọ ẹḅem bọ,
“Ạnhian kụ alegheri ịitughian Ọmoogh-we phọ?
Ạnhian kụ katue atomoghiom nyọdi?”
Kụ yira ghụn ọḅoph ịitughian rꞌaKraist.
Currently Selected:
1 Bụo ạKorint 2: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
