1 Bụo ạKorint 10
10
Kẹ́eḅereghi ịkaaghineen ạrumugh
1 #
Ẹḍua 13.21, 22;
Ẹḍua 14.22-29
Bụo asiya, ịkiom ologhi ịpe emitenaan bọ bụrude ạburude phọ ayoor ọdaph bọ Mozis. Bịdi uḍigh ḍibuo ọotu dị Ẹnaan emitiom, kụ oomo phọ ạbidi ụḅeeny ni Ọphiiny Igbilha phọ rꞌẹwoor. 2Ọotu phọ rꞌọphiiny phọ kụ ạmuum dị owurogh mọ bịdi ọḅophoghan ọdaph Mozis. 3#Ẹḍua 16.35Oomo phọ ạbidi ule ni eniin phọ eḍien aruwaloor phọ. 4#Ẹḍua 17.6; Igb 20.11Ḅịle kẹn oomo phọ ạbidi ụphughol li muniin ạmuum aruwaloor phọ. Bịdi ụphughol ghan mụum aḍighiigh aruwaloor phọ ẹdaph ghan bọ bịdi. Aḍighiigh phọ pọ aKraist rꞌaloor ọdi. 5#Igb 14.29, 30Rꞌịduon phọ ni bịn bịdi uphin ni ologhi Ẹnaan dị ạrumhu ogbogh opol awe epheeghu ni ẹpe ẹdala phọ.
6 #
Igb 11.4
Oomo phọ ạraraar phọ ịphen phọ ịlo ọsuemi ayira ologhi, ọphurom ạruru ayira mọ ịkaraph iyira kị́phu ghan ịdipho ẹphu ghan bọ bịdi, 7#Ẹḍua 32.6mọ kụ́uḅereghi ghan ịkaaghineen ạrumugh, ịdipho buniin ạbidi ọoḅereghi ghan bọ. Ịdipho ạḍinya iigbia phọ ẹḅem bọ mọ, “Awe phọ ụrol ude olhe ghan ọphughol, kụ oḅerenu ọgher ịḅa.” 8#Igb 25.1-18Yira ipesi kúpesi ghan, ịdipho buniin ạbidi opesi yogh ghan bọ kụ awe dị oḅeleghu oniin ootaany bịn omuughu ụghiom ni ịyaldi rꞌịraar ọonir. 9#Igb 21.5, 6Yira kúḍighi ghan ịlo ọdegh Ọmoogh-we phọ ịdipho buniin ạbidi oḍighi bọ kụ iḍigh-eḍum mọ ẹḍaanyogh ghan bọ bịdi ẹze. 10#Igb 16.41-49Kẹ́nun ghan ịnun, ịdipho buniin ạbidi ọnun ghan bọ kụ ọokpaany aḍuugh phọ aphiemi bọ.
11Oomo phọ ạraraar phọ ịphen phọ imiteghunaan bịdi ịlo ọsuemi ạbunon ologhi, kụ ọge bọ oseere ọphurom ạruru ayira, ịdi eḍighi bọ yira odi mem dị aruukuna phọ rẹteeny.
12Oye lọ ragbi mọ ọno ạmeera ni amiigha ni loor, ọbo ọdi kameel ghan bọ! 13Tọrobo ọdegh ophogh dị ịteeny inyina, pọ rạteeny ghan ni weye. Kụ Ẹnaan reḍighi ghan ni ịlo dị aguanaan, kụ ọdi kámeera mọ ọdegh ophogh dị ipel inyina ịteeny inyina. Mem lọ ọdegh ophogh ịteeny inyina, ọdi kịngo ni inyina ịnyaam ọkparam ḅịle rꞌịlo oḍighi kụ okpetenaan.
14Iiḅi asiya ạmi, esi ịduon phọ, ịkporion rạghaagh ọoḅereghi ghan ịkaaghineen ạrumugh. 15Mị ạsighenom mọ nyina awe ologhi ni. Imitenom ezue iloghi phọ anyina kụ ẹeḅeghion ịphen mị rạkaaph bọ ephogh. 16#Mat 26.26-28; Mạk 14.22-24; Luk 22.19, 20Ọḅophoghan ọphugholom oniin ọphaal amiim mọ yoor oghol ghan bọ rọngo ḍịseph Ẹnaan — ịduon phọ pọ yira kụ rópin bin ạsuo ịḅaal phọ aKraist ḍụghum? Ọḅophoghan olhe eniin eeḅoghoḍi ạbred phọ yoor ọparion bọ — ịduon phọ pọ yira kụ rópin bin ạsuo aloor phọ ọdi ḍụghum? 17Ịdipho ạbred phọ yira rọḅophoghan ghan bọ kole aḍighi bọ ni eniin eeḅoghoḍi, oomo phọ ayira, aḍita phọ emuza-muza, pọ aḍiniin aloor phọ ni.
18 #
Lịv 7.6
Ịitughian eḍighinom ịyaar awe phọ Ịzirel: bụphe role ghan bọ rạraar lọ ọphinyonom rịkia roḍeenaan ghan mọ bụno rooseeny ghan Ẹnaan phọ ọkananaan bọ enmeny ịyaar aghuḍum mọ. 19Ẹmhu ịphen phọ eeghe? Ọony aghuḍuul ạmoogh ni ḍiphooghu ḍụghum? Eḍien lọ ọngo mọony aghuḍuul phọ reenmia ghan ni ḍụghum? 20#Dut 32.17Kị́duon. Mị rạḅem ghan mọ ạrikia lọ ọphighiron ọḅam enmeny ịyaar aghuḍum aruru, pọ ọngo ruru ụ́ngo Ẹnaan. Mị ụ́wa mọ ịmoogh mụḅoph rꞌaruru. 21Nyina kẹ́ḅar ọphaal Ọmoogh-we phọ rꞌọphaal aruru kụ ẹpugholom, ḅịle kẹn nyina kẹ́ḅar malhe Ọmoogh-we phọ rꞌamalhe aruru kụ ele. 22#Dut 32.21Yira rọwa ghan mọ Ọmoogh-we phọ ạghagh ologhi ḍụghum? Ẹkigh mụdi ịnyaam ayira kụ ipu ịlo ọdi ḍụghum?
23 #
1 Kọr 6.12
Rọḅem ghan mọ, “Ịlo umirighan iyira oḍighi ílho.” Ọbo ịduon phọ ni, kụ oomo ạraraar kụ ị́nighenaan oye oḍighi ghan. “Ịlo umirighan iyira oḍighi ílho,” oomo phọ ịdi kụ kẹ́loghonaan ḍịghaagh ophophe omeeraam mọ. 24Oniin ạwa ghan ịlo kẹngo sụo nyọori phọ, kị́lo ọdi bịn!
25Itoph ologhi anyina iipuruan kị́tol bịn ạa ghan tọrobo ẹnam lọ ọpham orumom ḍighi aal, 26#Ạsuo 24.1ịdi eḍighi bọ ạḍinya iigbia phọ ẹḅem mọ, “Ọmoogh-we phọ kụ ạmoogh de phọ rꞌoomo ạraraar phọ.”
27Eḍighi ịyaar dị ọnyo aruru ịmagh inyina olhe eḍien kụ nyina emeeraam ni ẹghi, pọ itoph ni ologhi anyina iipuruan kị́tol bịn ele ịyaar lọ ịḅamanaan inyina. 28Kụ eḍighi ịyaar dị oye arophaan ọnhu mọ, “Ẹphen eḍien dị ọphighironom ẹkia ọngo ruru,” pọ ịtuan nyọdi ẹsighe ologhi ẹwilenom eḍien phọ. 29Nyina ekol nyọdi kụ rẹbile bọ eḍien phọ, kị́itughian ologhi anyina.
Ooni oye kapuru mọ, “Ẹmhu eeghe nụun kụ mịna kạtuan bọ ịitughian ologhi ọnon oye bịn asoph oḍigh eḍighinom ịyaar phọ ạmi akpere? 30Eḍighi ịyaar dị mị rakol ghan eḍien ạmi kạngo ḍịseph Ẹnaan, oye kạtuan bọ eeghe kụ ụḍagha ịmi ịlo eḍien phọ mị maghol bọ ni ạngo ḍịseph phọ?”
31Kụ mị ạpagharanaan ạḅeni we mọ, “Tọrobo ịlo nyina eḍighi, mꞌamale ḅịle mꞌịpughol, iḍighi ghan oomo phọ ịne eghueniom Ẹnaan. 32Ạdol phọ anyina kíḍighi ịiḅaghami ịngo bụo aJu rꞌaruuruen rꞌạbuo ạsiosi phọ Ẹnaan. 33Ịtuugh dọl phọ ạmi kụ ẹrol aani. Oomo phọ oḍighi phọ mị aḍighi ghan bọ, mị ụwa ghan ni ọḅaalami ologhi awe, ạḅile ạatughian ghan ịlo ạsuo aḍita phọ, kọ́lo ạmi bịn, ọbo bịdi ọmoogh aani pẹleeny.”
Currently Selected:
1 Bụo ạKorint 10: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
