LIVAI 26
26
Uwebiye nɛ Ya 'Wa Unu-tuhwuga
(Undwa 7:12-24; 28:1-14)
1Nazhɛ AGWANGWAMA hiɛŋ, Ta mama ndana ma tuwa kwo kaa ntatanuwaŋ mu tɛshaba o. To momo shikicingono ma kaa atayɛ na sụbɛ iyi ike na cɛnjɛ ti hiŋ, maa hi na zhɛba iŋ o. Gamba AGWANGWAMA na shɛ Agwatana hiŋ na.#Ụban 20:4; 34:17; Liv 19:4; Undwa 5:8; 16:21,22; 27:1
2Na untangana ma Ijitɛ-ụhinjanụ mi maa hi na muna ohwolu mi tijilo ụjɛrụma: Gamba AGWANGWAMA na.#Liv 19:30
3Yaa shɛ ahia 'wa shikpogo shi mi, ohio shiyono kaa onu-tupana mi eshe maa hi na nda aŋ, 4nazhɛ Ngɛɛ zhɛ ma hi pana eshilo na aka na teni cɛŋ, maa cɛnjɛ ti hiŋ ti keeni iyi tumata, i'wɛ'wɛ shihilo shi hiŋ kaa zhɛ ya 'wala duwa. 5Nazhɛ iyimɛyɛ nɛ ehi jibi, zhɛ ya nama i ci aka iyimɛyɛ ifwo tudwa. Iyimɛyɛ hiŋ ingwụshɛ kaa zhɛ ya nama i ci aka iyi tibila. Hi zhɛ kaa hi na ya iyimɛyɛ, hi no shigogo, ɛhi zhɛ kaa hia nama na cɛnjɛ ti hiŋ lapiya.#Undwa 11:13-15; 28:1-14 6N zhɛ ma pana cɛnjɛ ta ata amɛ-olom, hi zhɛ hio woto, i zasa bụtụ okwo bu ko na zhɛ mo hi zwono inyɛsɛ o. N zhɛ ma ishɛcɛnga isundɛ iwɛ nɛ namɛ na cɛnjɛ ta ata. Ujasa kaa zha shɛ ma hi zhaganɛ na cɛnjɛ ti hiŋ o. 7Hi zhɛ kaa hio unzo atwa i'ime hiŋ, hi zhɛ kaa hia kwụna aŋ nu ujasa. 8Atwa hiŋ a ta, zhɛ o unzo atwa aba dipi-yebi, atwa hiŋ dipi-yebi kaa zhɛ o unzo atwa aba igbɛɛ-itɛ. Hi zhɛ hia kwụna atwa i'ime hiŋ nu ujasa.
9N zhɛ ma hi pana kaa uwebiye maa hi meci miaụŋ mu ufwugwo. N zhɛ mo shikicingo unu mu tutwa ne hiŋ. 10Hi zhɛ hia ya iyimɛyɛ nɛ ahi ga intanɛ cala cala nu urubwu hiŋ, hi zhɛ kaa hia bwa inɛ ingwụshɛ hia 'waŋ, maa ohwolu namana inɛ ifwo. 11N zhɛ kaa ma gɛga nu udulo mu tijilo na ashashɛ hiŋ. N zha shɛ kaa ma nda inyizhi hiŋ o. 12N zhɛ kaa mu no rungo na ashashɛ hiŋ maa ma sha Agwatana hiŋ, maa hiɛ shɛ atwa mi.#2 Kor 6:16 13Gamba AGWANGWAMA na shɛ Agwatana hiŋ na ihi bɛcinjɛ na cɛnjɛ ti Ijipti na, iwɛ maa kede hiɛ shɛ ajama aba o. Ibɛ po Ngee bwereteji ukpahiŋ na ga hiɛ pɛpɛtanɛ la, maa Ma hi nda maa hi hirinje hi shikono to.
Ulwapɛ na Wa 'Wa Unu-hwụjɛshɛ
(Undwa 28:15-68)
14Nazhɛ AGWANGWAMA hiɛŋ, Ama yaa shɛ ehi shiri shi acɛbɛ ni iwɛ mi, maa hi na 'wa onu-tupana mi kpaaŋ, #Undwa 28:15-68 15yaa shɛ ahiɛ lacɛ shikpogo shi mi keeni andwa mi, yaa shɛ ehi bweji kaa unu mu tutwa, maa kede hiɛ njɛ onu mi tụpana kpaaŋ o 16asha N zhɛ ma hi pana ulwapɛ. Ngɛɛ zhɛ ma nda maa go shihwulu shi no hi horoko eshigiri, tụ ụngwụ ụ tụgba, tu mpiala tɛsha mu na mo lubicingo bụtụ, ta mu naa na ma incɛnga bụtụ. Hi zhɛ kaa hi na bila izɛgwu hiŋ na tɛgadaga, iwɛnɛ ta atwa i'ime hiŋ zhɛ a ya iŋ. 17N zhɛ mo hi holono, atwa i'ime hiŋ zhɛ no hi kwuto, aba kaa zhɛ a 'yaganana ụhwada hiŋ. Hi zhɛ hi no gozhigo okwo bụtụ be elele ihi urigeni shi.
18Yaa shɛ ahiɛ hwụjɛ shɛ unu mu ni inɛ ɛtɛ, asha N zhɛ ma hi pana ulwapɛ na hwuri una ata kpalụ cenje, iwɛ iwɛwɛ nɛ ahia nda. 19N zhɛ kaa ma salanana ukpahiŋ hiŋ, nazhɛ Ngɛɛ zhɛ ma nda maa kede eshilo ihi ngbeni o, maa ga cɛnjɛ ti hiŋ tu hweteni gana ụshɛmbɛrɛ. 20Hi zhɛ kaa hi na nda ukpahiŋ hiŋ ufwu gadaga nu ugondu tɛnda, iyi nɛ cɛnjɛ ti hiŋ ti zhɛ tu na mata zha shɛ na kaana ugombo. I'wɛ'wɛ cɛnjɛ ta ata kaa zha shɛ na 'wala o.
21Yaa shɛ kaa ahi ta ma zhagana tahaŋnụ to obwozhi, ahi ta hwụjɛ shɛ unu mu waa, asha N zhɛ ma hi kaana tishikpe tusugeni maa e hi urigeni kpalụ cenje gana na tu ufwugwo iwɛwɛ nɛ ahia nda namɛ. 22N zhɛ kaa mo lonono isundɛ-ehilo i mazhanga maa i zhajɛ na ashashɛ hiŋ, inɛɛ nɛ zhɛ na ya miaụŋ mi hiŋ, inɛɛ nɛ kaa zhɛ ye iricingo iyimabiga hiŋ. Ɛ zhɛ kaa a salanana ufwugwo hiŋ, iwɛ maa gɛ ihwɛŋnɛ hiŋ 'wi.
23Yaa shɛ kaa ehi te gwuri shi pi mi tedure ne evwuri ga, ama ahi ta laka waa unu mu tuhwuga, 24asha N zhɛ du ma hi zhagana tahaŋnu to obwozhi, asha N zhɛ ma hi kaana tukwuto uhwuri gana ga kpalụ cenje iwɛ iwɛwɛ hiŋ. 25N zhɛ me hi sugeni ujasa iwɛnɛ ehi bweji unu mu tutwa. Aka na ahi ụlwatagwụ na ashɛpwụ hiŋ, N zhɛ ma tumwanɛ ụngwụ ụwɛ na ashashɛ hiŋ. Atwa i'ime hiŋ, aba zhɛ a 'yaga ụhwada hiŋ. 26Aka na ti Ngee seleneni iyimɛyɛ hiŋ, eyikwo hiŋ umpwa zhɛ a ta iyimɛyɛ ɛtɛ nu ujejebi uko gba, ibɛ ɛɛ zhɛ ma hi pananana iyimɛyɛ ɛtɛ ne bimenji, hi zhɛ hia ya, hi zha shɛ kaa hio shigogo.
27Yaa shɛ kaa ahi zha shɛ hia hwuga iwe mi ni inɛ ɛtɛ waa, ahi ta ma zhagana waa tahaŋnụ to obwozhi, 28asha N zhɛ ma hi zhagana du tahaŋnụ to obwozhi ni isɛbwɛ mi ti'ishijɛ. N zhɛ ma hi kaana ulwapɛ tụpana ni ikɛnyi mi kpalụ cenje, iwɛ iwɛwɛ hiŋ nɛ ahia ndangana. 29Hi zhɛ hi na ya usunda miaụŋ mi hiŋ, ta mu na me eyi keeni mu na mo o. 30N zhɛ ma nda tikpekwu ta ata ti hiŋ tɛ tɛzhɛba ufwu, maa Ma jajaga otukwu-arụpɛ hiŋ. N zhɛ ma 'waŋ n'wo mi hiŋ na azuba n'wo mu tuwa ti hiŋ. Amɛ mi zha shɛ o lomo ne hiŋ kwukwuŋ. 31N zhɛ ma nda ashɛpwụ hiŋ shisombo, maa ma nda shihwolu shi hiŋ shi tijilo iyi yo ohondo. N zha shɛ kaa maa hunga ilɛtu ni iyi ụhiụŋ ụlatụ hiŋ o. 32N zhɛ ma nda cɛnjɛ ta ata maa ge tu 'wi, iwɛ maa i dama atwa i'ime hiŋ a na jɛjɛ na tuba. 33N zhɛ ma hi garataga na ashashɛ anya edenji. N zha shɛ kaa mo ngwuricingo ajasa na zhɛ ma hi sukakana o. Cɛnjɛ ti hiŋ kaa ti zhɛ ta sha osombo, ashɛpwụ hiŋ kaa zhɛ a bwaratagwụ.
34Nazhɛ cɛnjɛ ta ata ti zhɛ ta nda unyasa nụ ụhinjanụ tuta unaa na ehi ge peni shi tu la. Aka na ahi namɛ ya na cɛnjɛ ta atwa i'ime hiŋ, nazhɛ cɛnjɛ ta ata ti zhɛ ta 'waŋ ya ihwungwɛ, maa tɛ njɛ unyasa nụ ụhinjanụ tuba tuta. 35Cɛnjɛ ta ata ti zhɛ ta sha osombo, ibɛ du tɛ ɛ zhɛ ta 'waŋ ihwungwɛ, ibɛ shɛ ihwungwɛ tu'waŋ nɛ taa ga zasa la ni ijitɛ ụhinjanụ hiŋ na aka na ahiɛ jɛjɛ na tuba.
36N zhɛ ma tumwananɛ atwa hiŋ a na ta vwɛ na ti'ima na cɛnjɛ ta atwa i'ime ya aba shihwulu tuhoroko. Rundu ru uwaŋmbɛ na wa hiɛla, ri zhɛ ra ana aŋ usumwa tugozhigo, ɛ zhɛ no gozhigo gana bụtụ na ee urigeni nu ujasa; ɛ zhɛ kaa a laya na aka na ta bụtụ be elele urigeni shi aŋ. 37Ɛ zhɛ na mama twatwagwụ gana atwa na o gozhigono ujasa, asha kaa i zasa bụtụ be elele urigeni aŋ o. Hi zha shɛ kaa hia 'yaga ukpahiŋ maa hi shikono maa hi sukakanɛ atwa i'ime hiŋ o. 38Hi zhɛ kaa hio ilono na ashashɛ anya edenji, na cɛnjɛ ta atwa i'ime hiŋ kaa ɛɛ zhɛ mo hi no. 39Atwa hiŋ a na ta vwɛ cwɛŋ, ɛ zhɛ a 'nyangana na cɛnjɛ ta atwa i'ime hiŋ, iwɛ iyi iwɛ ya aba, keeni iwɛ iwɛwɛ nɛ eshi aba njɛ du.
40Ama yaa shɛ ajalalo hiŋ leni-unu iwɛwɛ ya aba, tu unu iwɛwɛ ye eshi aba, a na n sukakanɛ la ne tigezhe ta aba, 41a na kaa du upo Ngaa sukakanɛ aŋ, Ngaa njɛ maa e suji aŋ na cɛnjɛ ta atwa i'ime ya aba. Ama yaa shɛ ajalalo aba meme zucinje maa a nanganganɛ iyi iwɛ ya aba, iwɛ ụngwụ na aa hwụjɛ, iwɛ tigezhe ta aba; 42nazhɛ Ngɛɛ zhɛ me teyinje unu na Ngaa twa la ne Jekob, na Azik keeni Abraham, maa Mo shilono aŋ sasana unu ufwo, maa ma pana aŋ cɛnjɛ ta ata.#Umoz 17:7,8; 26:3,4; 28:13,14 43Ama aba ata zhɛ a ganga cɛnjɛ ta ata, nazhɛ tɛ ɛ zhɛ ta nda unyasa nụ ụhinjanụ tuta ni iheni na ta a zasaba, cɛnjɛ ta ata ti zhɛ ta sha osombo. Ɛ zhɛ a lashɛga ulwapɛ wa aba hwɛɛ, iwɛ iwɛwɛ ya aba nɛ aa ga lacɛ la andwa mi keeni onu-tupana mi. 44Okwo ti yaa shɛ bwonu, aka na ta a namɛ na cɛnjɛ ta atwa i'ime ya aba, N jineci shi aŋ o. N zha shɛ kaa ma nda inyizhi ya aba iwɛ maa mo iricingo aŋ hwɛ hwɛɛ o, kwo kaa maa ma bwada unu na Ngaa twa la na aba o. Gamba AGWANGWAMA na shɛ Agwatana aba na. 45Ama iwɛ aba Ngɛɛ zhɛ me teyinje unu na Ngaa twa la ne eshi aba angwụshɛ, anaa na Ngɛɛ bɛcinjɛ la na cɛnjɛ ti Ijipti ne eshe anya edenji, iwɛ maa ma sha Agwatana aba: Gamba AGWANGWAMA aba na.
46Inɛ gɛ hwɛɛ ibɛ shɛ shikpogo, na andwa keeni onu-tupana anaa na AGWANGWAMA shikicinji na ashashɛ ubwa na atwa Isrɛl ni Ishɛmɛ Sainai tedure no Moses.
Currently Selected:
LIVAI 26: RBT
Highlight
Share
Copy
Want to have your highlights saved across all your devices? Sign up or sign in
Rubassa Bible © Bible Society of Nigeria, 2008
LIVAI 26
26
Uwebiye nɛ Ya 'Wa Unu-tuhwuga
(Undwa 7:12-24; 28:1-14)
1Nazhɛ AGWANGWAMA hiɛŋ, Ta mama ndana ma tuwa kwo kaa ntatanuwaŋ mu tɛshaba o. To momo shikicingono ma kaa atayɛ na sụbɛ iyi ike na cɛnjɛ ti hiŋ, maa hi na zhɛba iŋ o. Gamba AGWANGWAMA na shɛ Agwatana hiŋ na.#Ụban 20:4; 34:17; Liv 19:4; Undwa 5:8; 16:21,22; 27:1
2Na untangana ma Ijitɛ-ụhinjanụ mi maa hi na muna ohwolu mi tijilo ụjɛrụma: Gamba AGWANGWAMA na.#Liv 19:30
3Yaa shɛ ahia 'wa shikpogo shi mi, ohio shiyono kaa onu-tupana mi eshe maa hi na nda aŋ, 4nazhɛ Ngɛɛ zhɛ ma hi pana eshilo na aka na teni cɛŋ, maa cɛnjɛ ti hiŋ ti keeni iyi tumata, i'wɛ'wɛ shihilo shi hiŋ kaa zhɛ ya 'wala duwa. 5Nazhɛ iyimɛyɛ nɛ ehi jibi, zhɛ ya nama i ci aka iyimɛyɛ ifwo tudwa. Iyimɛyɛ hiŋ ingwụshɛ kaa zhɛ ya nama i ci aka iyi tibila. Hi zhɛ kaa hi na ya iyimɛyɛ, hi no shigogo, ɛhi zhɛ kaa hia nama na cɛnjɛ ti hiŋ lapiya.#Undwa 11:13-15; 28:1-14 6N zhɛ ma pana cɛnjɛ ta ata amɛ-olom, hi zhɛ hio woto, i zasa bụtụ okwo bu ko na zhɛ mo hi zwono inyɛsɛ o. N zhɛ ma ishɛcɛnga isundɛ iwɛ nɛ namɛ na cɛnjɛ ta ata. Ujasa kaa zha shɛ ma hi zhaganɛ na cɛnjɛ ti hiŋ o. 7Hi zhɛ kaa hio unzo atwa i'ime hiŋ, hi zhɛ kaa hia kwụna aŋ nu ujasa. 8Atwa hiŋ a ta, zhɛ o unzo atwa aba dipi-yebi, atwa hiŋ dipi-yebi kaa zhɛ o unzo atwa aba igbɛɛ-itɛ. Hi zhɛ hia kwụna atwa i'ime hiŋ nu ujasa.
9N zhɛ ma hi pana kaa uwebiye maa hi meci miaụŋ mu ufwugwo. N zhɛ mo shikicingo unu mu tutwa ne hiŋ. 10Hi zhɛ hia ya iyimɛyɛ nɛ ahi ga intanɛ cala cala nu urubwu hiŋ, hi zhɛ kaa hia bwa inɛ ingwụshɛ hia 'waŋ, maa ohwolu namana inɛ ifwo. 11N zhɛ kaa ma gɛga nu udulo mu tijilo na ashashɛ hiŋ. N zha shɛ kaa ma nda inyizhi hiŋ o. 12N zhɛ kaa mu no rungo na ashashɛ hiŋ maa ma sha Agwatana hiŋ, maa hiɛ shɛ atwa mi.#2 Kor 6:16 13Gamba AGWANGWAMA na shɛ Agwatana hiŋ na ihi bɛcinjɛ na cɛnjɛ ti Ijipti na, iwɛ maa kede hiɛ shɛ ajama aba o. Ibɛ po Ngee bwereteji ukpahiŋ na ga hiɛ pɛpɛtanɛ la, maa Ma hi nda maa hi hirinje hi shikono to.
Ulwapɛ na Wa 'Wa Unu-hwụjɛshɛ
(Undwa 28:15-68)
14Nazhɛ AGWANGWAMA hiɛŋ, Ama yaa shɛ ehi shiri shi acɛbɛ ni iwɛ mi, maa hi na 'wa onu-tupana mi kpaaŋ, #Undwa 28:15-68 15yaa shɛ ahiɛ lacɛ shikpogo shi mi keeni andwa mi, yaa shɛ ehi bweji kaa unu mu tutwa, maa kede hiɛ njɛ onu mi tụpana kpaaŋ o 16asha N zhɛ ma hi pana ulwapɛ. Ngɛɛ zhɛ ma nda maa go shihwulu shi no hi horoko eshigiri, tụ ụngwụ ụ tụgba, tu mpiala tɛsha mu na mo lubicingo bụtụ, ta mu naa na ma incɛnga bụtụ. Hi zhɛ kaa hi na bila izɛgwu hiŋ na tɛgadaga, iwɛnɛ ta atwa i'ime hiŋ zhɛ a ya iŋ. 17N zhɛ mo hi holono, atwa i'ime hiŋ zhɛ no hi kwuto, aba kaa zhɛ a 'yaganana ụhwada hiŋ. Hi zhɛ hi no gozhigo okwo bụtụ be elele ihi urigeni shi.
18Yaa shɛ ahiɛ hwụjɛ shɛ unu mu ni inɛ ɛtɛ, asha N zhɛ ma hi pana ulwapɛ na hwuri una ata kpalụ cenje, iwɛ iwɛwɛ nɛ ahia nda. 19N zhɛ kaa ma salanana ukpahiŋ hiŋ, nazhɛ Ngɛɛ zhɛ ma nda maa kede eshilo ihi ngbeni o, maa ga cɛnjɛ ti hiŋ tu hweteni gana ụshɛmbɛrɛ. 20Hi zhɛ kaa hi na nda ukpahiŋ hiŋ ufwu gadaga nu ugondu tɛnda, iyi nɛ cɛnjɛ ti hiŋ ti zhɛ tu na mata zha shɛ na kaana ugombo. I'wɛ'wɛ cɛnjɛ ta ata kaa zha shɛ na 'wala o.
21Yaa shɛ kaa ahi ta ma zhagana tahaŋnụ to obwozhi, ahi ta hwụjɛ shɛ unu mu waa, asha N zhɛ ma hi kaana tishikpe tusugeni maa e hi urigeni kpalụ cenje gana na tu ufwugwo iwɛwɛ nɛ ahia nda namɛ. 22N zhɛ kaa mo lonono isundɛ-ehilo i mazhanga maa i zhajɛ na ashashɛ hiŋ, inɛɛ nɛ zhɛ na ya miaụŋ mi hiŋ, inɛɛ nɛ kaa zhɛ ye iricingo iyimabiga hiŋ. Ɛ zhɛ kaa a salanana ufwugwo hiŋ, iwɛ maa gɛ ihwɛŋnɛ hiŋ 'wi.
23Yaa shɛ kaa ehi te gwuri shi pi mi tedure ne evwuri ga, ama ahi ta laka waa unu mu tuhwuga, 24asha N zhɛ du ma hi zhagana tahaŋnu to obwozhi, asha N zhɛ ma hi kaana tukwuto uhwuri gana ga kpalụ cenje iwɛ iwɛwɛ hiŋ. 25N zhɛ me hi sugeni ujasa iwɛnɛ ehi bweji unu mu tutwa. Aka na ahi ụlwatagwụ na ashɛpwụ hiŋ, N zhɛ ma tumwanɛ ụngwụ ụwɛ na ashashɛ hiŋ. Atwa i'ime hiŋ, aba zhɛ a 'yaga ụhwada hiŋ. 26Aka na ti Ngee seleneni iyimɛyɛ hiŋ, eyikwo hiŋ umpwa zhɛ a ta iyimɛyɛ ɛtɛ nu ujejebi uko gba, ibɛ ɛɛ zhɛ ma hi pananana iyimɛyɛ ɛtɛ ne bimenji, hi zhɛ hia ya, hi zha shɛ kaa hio shigogo.
27Yaa shɛ kaa ahi zha shɛ hia hwuga iwe mi ni inɛ ɛtɛ waa, ahi ta ma zhagana waa tahaŋnụ to obwozhi, 28asha N zhɛ ma hi zhagana du tahaŋnụ to obwozhi ni isɛbwɛ mi ti'ishijɛ. N zhɛ ma hi kaana ulwapɛ tụpana ni ikɛnyi mi kpalụ cenje, iwɛ iwɛwɛ hiŋ nɛ ahia ndangana. 29Hi zhɛ hi na ya usunda miaụŋ mi hiŋ, ta mu na me eyi keeni mu na mo o. 30N zhɛ ma nda tikpekwu ta ata ti hiŋ tɛ tɛzhɛba ufwu, maa Ma jajaga otukwu-arụpɛ hiŋ. N zhɛ ma 'waŋ n'wo mi hiŋ na azuba n'wo mu tuwa ti hiŋ. Amɛ mi zha shɛ o lomo ne hiŋ kwukwuŋ. 31N zhɛ ma nda ashɛpwụ hiŋ shisombo, maa ma nda shihwolu shi hiŋ shi tijilo iyi yo ohondo. N zha shɛ kaa maa hunga ilɛtu ni iyi ụhiụŋ ụlatụ hiŋ o. 32N zhɛ ma nda cɛnjɛ ta ata maa ge tu 'wi, iwɛ maa i dama atwa i'ime hiŋ a na jɛjɛ na tuba. 33N zhɛ ma hi garataga na ashashɛ anya edenji. N zha shɛ kaa mo ngwuricingo ajasa na zhɛ ma hi sukakana o. Cɛnjɛ ti hiŋ kaa ti zhɛ ta sha osombo, ashɛpwụ hiŋ kaa zhɛ a bwaratagwụ.
34Nazhɛ cɛnjɛ ta ata ti zhɛ ta nda unyasa nụ ụhinjanụ tuta unaa na ehi ge peni shi tu la. Aka na ahi namɛ ya na cɛnjɛ ta atwa i'ime hiŋ, nazhɛ cɛnjɛ ta ata ti zhɛ ta 'waŋ ya ihwungwɛ, maa tɛ njɛ unyasa nụ ụhinjanụ tuba tuta. 35Cɛnjɛ ta ata ti zhɛ ta sha osombo, ibɛ du tɛ ɛ zhɛ ta 'waŋ ihwungwɛ, ibɛ shɛ ihwungwɛ tu'waŋ nɛ taa ga zasa la ni ijitɛ ụhinjanụ hiŋ na aka na ahiɛ jɛjɛ na tuba.
36N zhɛ ma tumwananɛ atwa hiŋ a na ta vwɛ na ti'ima na cɛnjɛ ta atwa i'ime ya aba shihwulu tuhoroko. Rundu ru uwaŋmbɛ na wa hiɛla, ri zhɛ ra ana aŋ usumwa tugozhigo, ɛ zhɛ no gozhigo gana bụtụ na ee urigeni nu ujasa; ɛ zhɛ kaa a laya na aka na ta bụtụ be elele urigeni shi aŋ. 37Ɛ zhɛ na mama twatwagwụ gana atwa na o gozhigono ujasa, asha kaa i zasa bụtụ be elele urigeni aŋ o. Hi zha shɛ kaa hia 'yaga ukpahiŋ maa hi shikono maa hi sukakanɛ atwa i'ime hiŋ o. 38Hi zhɛ kaa hio ilono na ashashɛ anya edenji, na cɛnjɛ ta atwa i'ime hiŋ kaa ɛɛ zhɛ mo hi no. 39Atwa hiŋ a na ta vwɛ cwɛŋ, ɛ zhɛ a 'nyangana na cɛnjɛ ta atwa i'ime hiŋ, iwɛ iyi iwɛ ya aba, keeni iwɛ iwɛwɛ nɛ eshi aba njɛ du.
40Ama yaa shɛ ajalalo hiŋ leni-unu iwɛwɛ ya aba, tu unu iwɛwɛ ye eshi aba, a na n sukakanɛ la ne tigezhe ta aba, 41a na kaa du upo Ngaa sukakanɛ aŋ, Ngaa njɛ maa e suji aŋ na cɛnjɛ ta atwa i'ime ya aba. Ama yaa shɛ ajalalo aba meme zucinje maa a nanganganɛ iyi iwɛ ya aba, iwɛ ụngwụ na aa hwụjɛ, iwɛ tigezhe ta aba; 42nazhɛ Ngɛɛ zhɛ me teyinje unu na Ngaa twa la ne Jekob, na Azik keeni Abraham, maa Mo shilono aŋ sasana unu ufwo, maa ma pana aŋ cɛnjɛ ta ata.#Umoz 17:7,8; 26:3,4; 28:13,14 43Ama aba ata zhɛ a ganga cɛnjɛ ta ata, nazhɛ tɛ ɛ zhɛ ta nda unyasa nụ ụhinjanụ tuta ni iheni na ta a zasaba, cɛnjɛ ta ata ti zhɛ ta sha osombo. Ɛ zhɛ a lashɛga ulwapɛ wa aba hwɛɛ, iwɛ iwɛwɛ ya aba nɛ aa ga lacɛ la andwa mi keeni onu-tupana mi. 44Okwo ti yaa shɛ bwonu, aka na ta a namɛ na cɛnjɛ ta atwa i'ime ya aba, N jineci shi aŋ o. N zha shɛ kaa ma nda inyizhi ya aba iwɛ maa mo iricingo aŋ hwɛ hwɛɛ o, kwo kaa maa ma bwada unu na Ngaa twa la na aba o. Gamba AGWANGWAMA na shɛ Agwatana aba na. 45Ama iwɛ aba Ngɛɛ zhɛ me teyinje unu na Ngaa twa la ne eshi aba angwụshɛ, anaa na Ngɛɛ bɛcinjɛ la na cɛnjɛ ti Ijipti ne eshe anya edenji, iwɛ maa ma sha Agwatana aba: Gamba AGWANGWAMA aba na.
46Inɛ gɛ hwɛɛ ibɛ shɛ shikpogo, na andwa keeni onu-tupana anaa na AGWANGWAMA shikicinji na ashashɛ ubwa na atwa Isrɛl ni Ishɛmɛ Sainai tedure no Moses.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Rubassa Bible © Bible Society of Nigeria, 2008