Jonas 2

Amsa gɨnə Jonas duwa mana gɨ dòche nudəwə

1Mana gɨ cendi u Jonas àsɨw kurayyə mwom da, Aba dama gɨ dɨrəw bɨr̰ɨn̰ giyə dòche gɨ geche gɨra chə̀ Jonas bam ilag. Me Jonas i mana gɨ dòche nudəwə àl wála subu. 2Jonas di i mana gɨ dòche nudəwə me amsɨ Aba dama gɨ dɨrəw bɨr̰ɨn̰ gɨ i Mãr̰ĩ duwa ba da:

3«Mana gɨ wamani ni gɨ gecheyə da,

nə soy ꞌwogɨm i ɨjɨm Gaba dama gɨ dɨrəm bɨr̰ɨn̰ di,

me mə doy ꞌwaga ni di.

Mana gɨ nə dam nare nə mare dúndɨrəgɨ dwar̰agɨ lə da,

nə soy ꞌwogɨm dara ba mə wanan daa,

me mə doy mar̰ɨjan, mə wannə.

4Pii, mə álɨn mana gɨ kuray gɨ geche don duwa lə,

nimi wan dɨn bam,

me ku day ilə gwaba lə dɨnnə.

5I ta di me, nə way nɨm ba nə ꞌyorər i bam hən̰ mana gɨ sɨmmə di.

Ɨr̰ɨ nə ùr ba nə cor yər kulu dɨma gɨ mə dam lə di.

6Nimi yɨn bər̰u niyə gɨləj,

ɗungə day ɨmɨn hwaya bam.

Bogɨr̰e legɨrər dɨnnə.

7Nə chɨ́ bɨraa yá ɓɨlə kur̰a gɨndɨdɨ dodə kuray don duwa lə bá.

Munɨ bɨw ɗesər daa dɨnnə gɨ dɨrəm bɨr̰ɨn̰.

Me mə ꞌwon daa bɨraa mana gɨ ɓengə,

ɨjɨm gɨ Mãr̰ĩ ni Gaba dama gɨ dɨrəm bɨr̰ɨn̰ di.

8Mana gɨ dúndɨn gandɨ bam sɨnnə da,

nə ɨrɨm ɨjɨm Gaba dama gɨ dɨrəm bɨr̰ɨn̰ dɨmmə.

Amsa ni di yá bɨraa ɨndara sumɨmmə daa

mana gɨ kulu dɨma gɨ mə dam lə di.

9Woni dama dara buraga gɨ domde nə i mani nə pəgɨn̰ da,

cendi com ɨjɨm gɨ Mãr̰ĩ gɨ daa gɨ aba ùrəgɨ di taragɨ.

10Me ɨndi da, nə ha àlam sarga àlam gɨ dóche me,

nə ha àlam mani nə nə u bɨn waygɨ di me.

Ɓɨlə da, i ɨjɨm Gaba dama gɨ dɨrəm bɨr̰ɨn̰ dɨma.»

11Ɨr̰ɨ Aba dama gɨ dɨrəw bɨr̰ɨn̰ wayɨw dòche me, dòche di hur̰ɨ Jonas àsɨw daa wayniyə.

Currently Selected:

Jonas 2: sor

Highlight

Copy

Want to have your highlights saved across all your devices? Sign up or sign in

Learn More About Maktubu dɨnə Mãr̰ĩduwa gɨ bii gɨ chibne