Mə́líkusu 12

Ɔŋana wɔ́ bɔnyɔɔ bɛtɔbɔtɔ́bɔ́ ɔ babɛ́á

(Mat 21.33-46; Lúk 20.9-19)

1Ɔ yɛ́ɛ́yɛ́ ikúílí, Yə́susu a na botólíə́ ɔ uwəbú ɔhɛ́na ɔ tɔ́mbákɛna na ɛŋana, a sɛ́á «Wɔmɔtɛ́ mɔndɔ a ka yáyɛ́á ɛtɔbɔtɔ́bɔ́ nyɔɔkɔ, a ná bɛlɔŋɔ́tɛ́ nɛ́máka, a ná mɔkákɔ hákɛ́na, a ná nɔáta tábɔ́náka, a ná hɛtɛ́ka bə́lə́kíə́. Əlimə yɛ nɔ́yɛ́, a ná yɛɛ́ta índíə́ ɔ ɛlɛ́ndɛa ɔ bɔnyɔɔ, a ná ákáná hata ɔ mɔkɛnda. 2Ikúílí yɛ́ kɛndáka, a ná mɔnyɛna lɔ́má á bɔnyɔɔ busíə́ ɔkɛaka ɔwá, a yáyɛ́á ɛsalɛ kusə́nə ɛ́sɛ́á bá ná bílíhə́níə́. 3Mba, bɔnyɔɔ ɛtɔbɔtɔ́bɔ́ bá ná mɔnyɛna halɛ́na, bá ná wɛɛ́ya subəkə, bá ná wɛɛ́ya úlúə́síə́ makátá ndəmə. 4Muití ɛtɔbɔtɔ́bɔ́ a ná manyɔ́ mɔnyɛna lɔ́ma muinə́muinə́; ɔ mɔ́táyɛ́ tɔ́na, bá ná wɛɛ́ya súbə́ ɔ mɔlɔ́á, bá ná wɛɛ́ya kɔbaka. 5Muití ɛtɔbɔtɔ́bɔ́, a ná bɔnyɛna bá ná úndúsíníə́ bálálɔ́ lɔma, bá ná wɛɛ́ya ɔnɔ; á nɔ́yɛ́ bá ná bɔnyɛna bəkimə bɛ́kɛ́ákɛ́na. Bá ná báaba subəkə, bá ná bə́ní ɔ́nɔkɔ.» 6A ka tíkə́nə na wayɛ́á mɔná wa uhikiə ɔ́hɔ́á. A ná wɛɛ́ya lɔ́má ɔ bɔnyɔɔ bɛtɔbɔtɔ́bɔ́, a ná bílúmə́kíníə́ a sɛ́á: «Bá ŋɔ wamɛ́á mɔná ɔ́kɔ́kɛnɛna.» 7Mba bɔnyɔɔ bɛtɔbɔtɔ́bɔ́ bá ná botólíə́ ɔ ɔbɛ́laa bəə́bú ná bəə́bú bá sɛ́á: «Ɔ́ mɔndɔ wɔ́ɔwɔ ɔwá a ŋɔ ilíkinənə yɛ́ isə́ ɛ́ta. Tɔ́ wɛɛ́ya ɔnɔ́kɔ́ mbá ɛtɔbɔtɔ́bɔ́ yɛ́ ŋɔ híáná yə́ə́su.» 8Bá ná wɛɛ́ya halɛ́na, bá ná wɛɛ́ya ɔ́nɔ́kɔ́, bá ná wə́yíə́ umimə fámáná ɔ ɛtɔbɔtɔ́bɔ́, bá ná muítə ombóko.

9Yə́susu a sɛ́á: «Ɛ́sɛ́á wə́núə́ usinə, nəníə́ muití ɛtɔbɔtɔ́bɔ́ a ŋɔ kɛaka əə́? Ɔ taká, a ŋɔ bɔnyɔɔ bɛtɔbɔtɔ́bɔ́ ɔ́nɔ́kɔ, a yɛɛ́ta índíə́ ɔ bənə́bənə́.» 10Nɔ́ sa ɛsalɛ yɛ́ Mətilə fana ɔmá má ndɔ laa má sɛ́á:

«Muɔkɔ ɔwá bafalaba bá ná ombóko,

muítə wɔ́ ná híáná muɔkɔ wɔ́ nihíkíli.

11Nɔ́yɛ́ yɛ́ lɛ́á buolí bɔ́ Isə́lúkú. Yɛ́ ndɔ bəsú ə́lə́mənəsiə!»

12Bá ka siəkə ɔ ɔwayɛ́ ɔhalɛna, mba, bá ka iloŋo yɛ́ bɛndɔ kɔ́lɔ́maka. Bá ka ɔ́kɔ́kɛna muɛsɛ ɔwá, ɛlɔ́áyɛ́ əbú a ná wútə́yí ɔŋana tɛna. Bá ná wɛɛ́ya tikə, bá ná ákana.

Ɛtásɛ ɔyɛ́á bá ná hɔ́ánána á Káyɛsa ɔsábɔ́nɛna

(Mat 22.15-22; Lúk 20.20-26)

13Bá ka bɛ́mɔtɛ́ Bɛfalísia na bɛndɔ bá ilúkunə yɛ́ Əlóto lɔ́ma á Yə́susu busíə́ ɔkɛaka ɔwá, bá wɛɛ́ya ŋgə́fə́ na ɛmbataka. 14Bá ná ndasá ɔwayɛ́ ɔlɛna bá sɛ́á: «Á Muinə́niə, tɔ ndɔ manya ɔwá ɔ ndɔ hɔ́ɔ́ taká, ɔ lɛ ndɔ mɔndɔ kɔ́lɔ́ma. Ɔ ndɔ bɛndɔ úkúniə nəníə́ bá ná hɔ́ánána ubítíkə ɛ́sɛ́á Huɛlɛ́ a ndɔ hikiə. Lɛ́na bəsú, ɛ́ɛ, ata bóo, ábá yɛ́ lɛa muɛsɛ ɔwá tɔ Káyɛsa ɛtásɛ sábɔ́nákɛ́na.» 15Yə́susu a ka bá ndɔ níə́búə́ nɛbɛ́nyɔ́nyɔlɔ manya, a sɛ́á: «Ɛlɔ́áyɛ́ yatɛ́ nɔ ndɔ mɛaŋɔ́á kɔsɔnɛna əə́? Nɔ́ mɛaŋɔ́á ɛcácɔ́ húlə́nínə́ háha mɛ́ siəlínə!»

16Bá ná wɛɛ́ya yɛɛ́ta húlə́nínə. Yə́susu a sɛ́á: «Nɛ́ɛnɛ nilutə, híihi hibílíndíníə́ na máama məkə́tə má ánɛ́ əə́?» Bá sɛ́á: «Nilutə nɛ́ Káyɛsa na máyɛ́á məkə́tə.»

17Yə́susu a ná bəə́bu lɛ́na a sɛ́á: «Nɔ́ Káyɛsa índíə́ yatɛ́ ɔyɛ́á yɛ́ lɛ́á yɛ́ Káyɛsa, nɔ́ Huɛlɛ́ índíə́ yatɛ́ ɔyɛ́á yɛ́ lɛ́á yɛ́ Huɛlɛ́.» Yayɛ́á ɛbɛ́kámɔsɔna yɛ́ ka bəə́bu ə́lə́mənəsiə mɔŋɛ́ŋa.

Ɛmbataka ɛlɔ́áyɛ́ nɛhɔŋɔa nɛ́ bəwə́nú

(Mat 22.23-33; Lúk 20.27-40)

18Bɛ́mɔtɛ́ Bɛsatúsia bá ná ndásá á Yə́susu busíə́. Bátáyɛ́ bɛndɔ bá ndɔ laa ɔwá, nɛhɔŋɔa nɛ́ lɛ boóko. Bá ná Yə́susu batá bá sɛ́á: 19«Á Muinə́niə, Mósisi a ka tiləkə ɛlɔ́áyɛ́ əsú a sɛ́á: “Ábá mɔndɔ a báka na munínyə́ ɔwá a ná wə́ə́ mbá a ná muəndú tíkə́ ɛŋana mɔná, munínyə́ á ilíkə́ bɛ́lɛna ɔkɛaka ɔwá, a wɛ́ɛ́yɛ́ ɛndɛkɛ tíkínə́ ɔwá a ná wəə.” 20Bənínyə́ balɛ́mɛndɔ́ bá ka báá bálɛ́ndɔ́lɔ́mɔnɔ. Wəbusíə́ a ná muəndú bɛ́lɛ́na, a ná wə́ə́ ɛŋana mɔná ubíə́nə. 21Ɔwá a ná úndúsíníə́ báfandɛ́ a ná ilíkə́ ɛ́ta. Wɛɛ́ya tɔ́na a ná wə́ə́ ɛŋana mɔná ubíə́nə. Nɔ́yɛ́ yɛ́ ná bɛ́kɛ́áka ɔ bənínyə́ bá na úndúsíníə́ bálálɔ́. 22Ata ɔmɔtɛ́ ətíə́ yɛ bátáyɛ́ bənínyə́ bálɛ́ndɔ́lɔ́mɔnɔ á sa mɔná bíə́nə na yɛ́táyɛ́ ilíkə́. Uwəbú əlimə muəndú tɔ́na a ná ayɛ́ wəə. 23Ɔ nɛhɔŋɔa, ɛnáká bá hɔŋɔ́ákɛ́á, ɛ́yánɛ́ uwəbú ətíə́ a ŋɔ bá ibə́ yɛ mɔ́tána muəndú əə́? Ɔ taká, bəə́bu bəkimə bálɛ́ndɔ́lɔ́mɔnɔ bá ka wɛɛ́ya bɛ́lɛna.» 24Yə́susu a sɛ́á: «Tátá bɔkɔasɛ́á nɔ lɛ ndɔ Mətilə manya ata injiŋə yɛ Huɛlɛ́, ɛlɔ́áyɛ́ nɔ́yɛ́ nɔ ndɔ bínímbə əə́? 25Ɔ taká, ikúílí bəwə́nú bá ŋɔ hɔŋɔakɛa, balɛ́mɛndɔ́ bá sɔ́ ŋɔ bəəndú bɛ́lɛna, bəəndú tɔ́na bá sɔ́ ŋɔ lɔ́nɔ, mba, bá ŋɔ niŋəkə ɛ́sɛ́á bɛáŋgɛlɛ ɔ nɔɔ́mɛná.» 26Ɛlɔ́áyɛ́ nɛhɔŋɔa nɛ́ bəwə́nú, nɔ́ sa ɛsalɛ yɛ́ hiəfulə hɛ́ Mósisi fana ɔhɛ́á hɛ́ ndɔ hɛ́na ɛlɔ́áyɛ́ hɛkataka ɔhɛ́á hɛ́ ná bá hɛ́ ndɔ kɔnjɔ, nəníə́ Huɛlɛ́ a ná wɛɛ́ya lɛ́na, a sɛ́á: «Mɛ lɛa Huɛlɛ́ yɛ Ábɛlaháma, Huɛlɛ́ yɛ Ísaakɛ na Huɛlɛ́ yɛ Yákɔbɔ.» 27Yə́susu a ná tifə́níə́ a sɛ́á: «Nɔ́ manyá ɔwá, Huɛlɛ́ a lɛa Huɛlɛ́ yɛ bɔɔmɔ́, tátá Huɛlɛ́ yɛ bəwə́nú. Nɔ́yɛ́, nɔ lɛa kɔ́átɔ́ ɔ hɛkɔma.»

Umbə́ndə́ wúbúsíə́

(Mat 22.34-40; Lúk 10.25-28)

28Mɔmanyumbə́ndə́ ɔmɔtɛ́ a ná tɔ́mbálɛ́la, a ka bəə́bu ɔ́kɔ́kɛna bá ndɔ tə́ŋə́niə, a ná siəkínə́ ɔwá Yə́susu a ná bəə́bu bíhíə́níníə́ muɛsɛ. A ná wɛɛ́ya batá a sɛ́á: «Yatɛ́ yɛ́ lɛ́á umbə́ndə́ wúbúsíə́ ɔ imbə́ndə́ mikimə əə́?» 29Yə́susu a sɛ́á: «Ɔ́kɔ́kɛ́na, á Ísilahɛ́lɛ, Isə́lúkú ɔ yəsúə́ Huɛlɛ́ a lɛa bíbúə́ Isə́lúkú; 30ɔ ná hɔ́ánáná á Isə́lúkú ɔ yawɔ́á Huɛlɛ́ uhikiə na wə́wúə́ mɔlɛ́má mukimə, na híə́wúə́ hɛtányɛ́ hikimə, na yáwɔ́á ɛfɛka yikimə na yáwɔ́á iŋgínə́ mikimə. 31Ɔ́ umbə́ndə́ wɔ́ ná úndúsíníə́ úfəndí wúuwu: Ɔ ŋɔ wawɔ́á mukúlə́kulə hikəkiə ɛ́sɛ́á aŋɔ́á bɛ́múɛ́tɛ́. Umbə́ndə́ mɔŋɛ́ŋa muinə́muinə́ wɔ́ lɛ báá ɔ ɔyáyɛ́ná yííyí ífəndí.» 32Mɔmanyumbə́ndə́ a sɛ́á: «Muɛsɛ nɔ́yɛ́ á Muinə́niə, ɔ ná hɔ́lɔ́ taká: Isə́lúkú á Huɛlɛ́ wɛɛ́ya bíbúə́ a lɛ́á Isə́lúkú, muinə́muinə́ a lɛ báá ɔ húlíə́ wɛɛ́ya, 33ɔwayɛ́ uhikiə tɔ́na na wə́yíə́ mɔlɛ́má mukimə, na yáyɛ́á ɛŋgɛ́lɛ́ yikimə, na yáyɛ́á iŋgínə́ mikimə, mukúlə́kulə uhikiə ɛ́sɛ́á aŋɔ́á bɛ́múɛ́tɛ́, nɔ́yɛ́ yɛ́ ná bɛfɔná na mahánɛna məkimə yayɛna.» 34Ɛnaka Yə́susu á siəkínə́ ɔwá a ná bíhíə́níníə́ muɛsɛ, a sɛ́á: «Ɔ lɛ báá hata na Nɛmanɛna nɛ́ Huɛlɛ́.» Ata mɔndɔ á sa óso tɔ́na ɔ ɔwayɛ́ ɛmbataka ɔbata.

Mɛ́sia a lɛa Isə́lúkú yɛ Ndə́witi

(Mat 22.41-46; Lúk 20.41-44)

35A ná ɛtambá ɛ́ta, Yə́susu a ka bá a ndɔ ínə́niə ɔ Tɛ́mbɛlɛ, a sɛ́á: «Nəníə́ ɛ́kɛ bamanyumbə́ndə́ bá óso ɔlaa ɔwá Mɛ́sia a lɛa mɔná wa Ndə́witi əə́?» 36Mba, ikúílí Umbúínyi Mɔnaŋanaŋa wɔ́ ná Ndə́witi fínə́ ɔ mɛɛ́lɔ, a ka wɛɛ́ya ɛ́lɛnɛna a sɛ́á:

«Isə́lúkú a ná yámɛ́á Isə́lúkú lɛ́na ɔwá:

Sɔ́nɔ ɔ ndə́túə́nə ɔ ɔwámɛ mɔkátá wɔ́ bɛnɔ́mɛ,

mɛ ŋɔ kɛaka ɔwá báwɔ́á bokóyíkoyi bá bámɛ́nɛ́ná nɛbɛ́lɛ́nɛ́ná nɛ́ máwɔ́á makɔlɔ́.»

37Ndə́witi wɛɛ́ya bɛ́múɛ́tɛ́ a ndɔ wɛɛ́ya ɛ́lɛna Isə́lúkú; mba, nəníə́ a óso ɔbáá wayɛ́á mɔná əə́? Nɛmɔndɔ nɛ́ wɛɛ́ya ɔ́kɔ́kɛna na nɛhɔnɔ.

Yə́susu a ndɔ bamanyumbə́ndə́ kə́lə́siə

(Mat 23.1-12; Lúk 20.45-47)

38Ɔ ɔwayɛ́ binə́níníə́ a laaka a sɛ́á: «Nɔ́ bamanyumbə́ndə́ bítə́tə́kə́níə́ ɔbá bá ndɔ hikiə ɔ ɔŋáŋɔ́bɔa na maŋgɔmba matatánɛ, bá bəə́bu hólókíə́ na hibə́təniə ɔ manáka, 39ɔ utuənə ɔ bɛɔkɔ́ bíbúsíə́ ɔ məə́bə má mabɛ́kálɛ́na, ɔ bɛbɔ́ka bíbúsíə́ ɔ manɛ́áka. 40Uwəbú ɔwá bá ndɔ maasɛ má bilíkə́ ɔ́lɔ; bá ndɔ mabɛ́kálɛ́na buniə ɔkɛaka ɔwá mbá bá bəə́bu siəkínə. Bá ŋɔ bəə́bu kə́lə́səkiə mɔŋɛ́ŋa yáyɛ́ná bənə́bənə́.»

Nɛhánɛna nɛ́ hɛtɔyɔ́nɔ́ hɛ́ ilíkímúə́ndú

(Lúk 21.1-4)

41Yə́susu a ná túə́nə ɔ ɛmɛ́ŋɛ́ yɛ ɛkana yɛ́ mahánɛna ɔ Tɛ́mbɛlɛ, a siəkinə ɛ́sɛ́á bá ndɔ bɛcácɔ́ háá umə́. Bobóŋóní bá bɛcácɔ́ hákɛna biəŋí. 42Hɛtɔyɔ́nɔ́ hɛ́ ilíkímúə́ndú a ná ndafama, a ná háá bɛcácɔ́ bɛ́fandɛ́. 43Yə́susu a ná báyɛ́á bɔkɔ́nɛna ɛ́lɛ́ná, a ná bəə́bu lɛ́na a sɛ́á: «Ɔ taká, mɛ ndɔ bənú lɛna ɔwá, híihi hɛtɔyɔ́nɔ́ hɛ́ ilíkímúə́ndú a ná háá ɔ ɛkana yáyɛ́ná bəkimə. 44Ɔ taká bə́ə́ní bəkimə bá ná bɛcácɔ́ índíə́kínə ɔbɛ́á bɛ́ lɛ bəə́bu báá mɔɔsɛ́ŋɛ́; mba ɔwayɛ́, na bɔ́áyɛ́á bɔtɔyɔ́ bukimə, a ná hánɛ́ná yatɛ́ ɔyɛ́á a ná bá itíə́nə́tɔ, yatɛ́ ɔyɛ́á yɛ́ ná wɛɛ́ya báá ɔwá a ayɛ́ niŋə́kə.»

Currently Selected:

Mə́líkusu 12: tvu

Highlight

Copy

Compare