Luk 13
13
Wel jia kubsen ɛytem ə wen, é əb lɛy
1Se lu əbliy fo, ghel ghɛ ɛ́ nè luun fo me se fiɛle se Jesus kum ghele Galilee ghɛ Bailɛt nè yuyten nɛ ɛ́ taŋle ntaŋle. 2Jesus bif ge: Ghɛn lɛ kwaate ge ghele Galilee nɛ̂ ghi nè lu ghele mbeese chia ghele Galilee ɛlee bek ka ghene nè kuon ɛ jii ghan-a? 3Ɛngaŋ, mɛ suuy se ghɛn ge ghɛn jia kubsen tetem ə tɛn, é ghɛn ghel ɛjim náà kuoke kɛn ka ghene. 4Moo ghɛne kwaate ge ghel ghɛ njiose-ɛyfaame ɛyvəm ghɛ ndaa nè kɛɛsen, è yuytê ɛ Siloam nè ki njio ɛ ghene keghoo chia ghele Jolesalem ɛlee-a? 5Ɛngaŋ, mɛ suuy se ghɛn ge ghɛn jia kubsen tetem ə tɛn, é ghɛn ghel ɛjim náà kuoke kɛn ka ghene.
Ngane Fekake Fig fɛ fe koom wiy
6Jesus me maa ngan yin se ghene ge: Wel əblee nè lô yiɛte fekake fig ɛ wen ɛylem, è naa se nduu ge yi koy fig ɛ fekak fɛy, è jia yɛn kefaa ɛ ten. 7Ka əb báà yɛn dî è me suuy se wel wɛ əb nè toknen nɛ̀ ɛyleme ge: Shi nguk setal ka mɛ gwiyen se koye fetam ɛ fekak fɛn yɛne wiy kefaa. Gwɛle, fe jefse ntiɛ jefsen. 8Wel vi me fise ge: Babɛy, ko vəse se nguk əbful. Mɛ chɛk ɛyshaa ten, è vii shia se ten. 9Yɛ lu ɛ nguk wɛ əb gwiyen fe koom, é ke jof, fe jia koom ɛ́ me gwɛl.
Jesus chuk Əbvii əblee ɛ Kechii Ɛybam
10Nɛy se lu ɛ kechii ɛybam kelee, Jesus se dinte əbnəə se ghele ɛ ngay ɛyjem ɛylee, 11nɛ əbvii əblee lu fo nɛ keyioy ɛyfime makmen gon se wen əbghun se nguk njiose-ɛyfaame ɛyvəm. Əb nè lu nɛ əb ngvəlenmen ɛ jii yɛ lòó əb jia bo jɛl ɛ titiy. 12Jesus yɛn wen, è toŋte, əb fəy è gwiy, əb suuy se wen ge: No ə wom wɛ̀ boymen se wɛ̀ ɛyyaf fɛy, 13è me lɛm ɛghoo wen se əbvii vi əbghun, əb loole è teem ɛ titiy kɛn se əbliy, è se kokse Feyin.
14Wele mbiy wɛ̂ ngay ɛyjem fo yɛn ka Jesus chuken wel ɛ kechii ɛybam, ke tɛn wen, əb suuy se ghele ge: Əbchii ɛyfɛle lu ntuufe. Ghɛn nɛ̂y yɛ gwiy nɛ ɛ́ chuke ghɛn nɛ lu əbchii nɛ̂ fɛn, ghàà ghɛn yɛ gwiy nɛ lu əbchii ɛybam.
15Báàba suuy se wen ge: Wɛɛy nfefse shine! Lɛ loo lu ɛ kechii ɛybam, ghàà wel se ghɛn liɛ na wen kene kembɛɛybiy ə wen, se keben è ndu so se nəəse-a? 16Əbvii vin lu wel ɛykfəə nə Ablaham wɛ Satan nè kulen se nguk njiose-ɛyfaame ɛyvəm, bef ghɛ ka mɛ chuken wen ɛ kechii ɛybam? 17Əb suuy dì, kenghuumene koo ghele əbbaanese nə wen ɛjim, dî nɛ ndio ghel saŋle naa se ŋaŋ kum əbnəə əbchio əbyúméné wɛ əb nè nɛɛyen.
Nganse Kum Ɛysak ə Feyin
(Mat 13.31-32; Mak 4.30-32)
18Jesus me bif ge: Ɛysake Feyin lu ka ghɛ? Kefaa kɛ lòó mɛ feksen so lu ghɛ? 19Ɛy lu ka feshiɛlese ngos əmkak yɛ wel nè maken ɛ wen ɛylem, fe fəy è kuy è se lu fekak feghuye, əmnənme se tane gwiye, bakle ndaase ghen ɛ ɛytame ten.
20Əb me gese bif ge: Lòó mɛ fek ge ɛysake Feyine lu ka ghɛ-ɛ? 21Ɛy lu ka ɛyshiɛ feshik yɛ əbvii nè liɛn è too kɛlse əmnkfeŋ setal so, feshik fi jɛl kebane ten naa kejim.
22Jesus nɛy me lòò è se jɛle nduu ɛ ntɛk se ghakene nɛ̀ se tɛlɛɛ, dinte nduu nɛ̀ əbnəə se ghele, chia nduu ɛ Jolesalem. 23Wel əblee bif se wen ge: Báàba, ɛ́ náà boyse kɛn ghel se ɛylaay-a? Jesus suuy se ghene ge: 24Ghɛn mom ketaan se lii jii əbchio ndaa əblaytene, mɛ suuy se ghɛn lɛ bek ge, ghel se ɛydio náà yɛ mom se lii, é ke ghak ghene. 25Ɛ́ nɛ̂y yɛ lu əbliy wɛ ba ə ndaa loolen se ɛyyio, è tɛk ndaa, é ghɛn teem ɛ bɛy, è yɛ kfənte əbchio ndaa, lone ge: Bay, dise əbchio ndaa se ghɛs. Dî əb fise ge: Mɛ báà se ke ghaa ghɛn lòòn. 26É ghɛn me kɛɛte è yɛ toyle ge: Ghɛsen nè yíɛ́ gese nəə. Wɛ̀ nè lô se dinte chia nɛ̀ əbnəə ɛ ghɛse ntɛk. 27Dî əb gese fise ge: Mɛ báà se ke ghaa ghɛn lòòn; Ghele mbeese ghine, ghɛn loo se mɛ əbchio ndaa, 28Ghɛne náà yɛn Ablaham, nɛ̀ Ayzek, nɛ̀ Jakob gese nɛ̀ nfekte sejim ɛ kelik əbfon nə Feyine, nɛ ɛ́ tɛktemen ghɛn se bɛy bene fɛ ghɛne yɛ toŋnen, kfəle ɛsoŋ. 29Ghele yî lòò tebuulese mbi tejim è gwiy, è liɛ əblik ə ghen bene ghene diom è yɛ yiɛ əbliy ɛysak nə Feyine. 30Yɛn-a! Ghel ɛlee ghɛ ɛ́ luun ɛybam é yî yɛ lu ghɛ mbiye, nɛ̀ ghel ɛlee ghɛ ɛ́ luun ɛ mbiye yi yɛ lu ɛybam.
Jesus Koosen Ɛysen se Jolesalem
(Mat 23.37-39)
31Kɛn ɛ əbliy fo ghele kenone Falisee ɛlee gwiy è suuy se Jesus ge: Loo se fɛn, è ndu əmchin bek ge Helode kɛŋe se yuye wɛ̀.
32Əb fise ge: Ghɛn ndu è teefe se ɛynseme tene ge: Lu lan nɛ̀ likebvəchi nɛ mɛ jume tefim gese chuke ghel, nɛ əbchii loo lun əbtal é mɛ mɛyse ɛyfɛl ə yom. 33Dî nɛ ke lu ɛ shii ge mɛ yɛ ndu ɛ mbiy lan, nɛ̀ likebvəchi, nɛ̀ ka ɛ́ yesen, bek ge ke báà se lu ɛ titiy ge wele ntum nə Feyine kuo nɛ wiy ɛ Jolesalem.
34O Jolesalem, Jolesalem! Ghɛne yútê ghele ntum nə Feyine gese təmle ghel ghɛ Feyine tumen se ghɛn nɛ̀ ɛtiye. Lu kaŋe sek wɛ mɛ momen ge mɛ baate ghone ghiɛ ka no ngvəə zəten ghon ɛ wen ə ɛyshaa ghàà dî wɛ̀ jia beeme. 35Yɛn-a! Feyine maaymen ndaa-ɛykokse nə wɛ̀, ɛy se lu ɛyyum. Mɛ suuy se wɛ̀ ge wɛ̀ jia bo nɛ̂y gese yɛn mɛ se chin ka wɛ̀ nɛ̂y suuy ge: Ke lu kejuŋ se wel wɛ əb gwiyen ɛ ɛyghel nə Báàba Feyin.
Currently Selected:
Luk 13: oku
Highlight
Share
Copy
Want to have your highlights saved across all your devices? Sign up or sign in
©CABTAL, 2012