Ɛyf 8

1Ɛ́ nè nyable nɛ̀ Stefen dî nɛ Sool tiy fo tokte ge ɛ́ yúy.

Sool Nɛɛy ge Ghel Ɛbeemene yɛ Yɛne Ngɛk

Se kɛ̀ɛ̀tè se kechii fo, ɛ́ me se nəkse ghel ɛbeemene ghɛ́ Jolesalem ɛ jii ɛybee, ghene saanken Judea əbjim ghene Samalia, buu kɛn ghɛ ntum nə Jesus ghɛ ɛ́ nè goken. 2Ghel ɛlee ghɛ ɛ́ nè vəmen Feyin gvəəme Stefen è se toŋe ɛykuo wen naa se ŋaŋ. 3Sool me se mome kɛ́ wene ge yi mɛyse kenchintene ghel ɛbeemene mɛysen. Əb nè jɛle ndaa nɛ̀ ndaa gufe əbkiy ghene ɛluumene nduu vii se nchak.

Filib Fekte Kenəə ə Feyin ɛ Samalia

4Ghel ɛbeemene ghɛ ɛ́ nè saanken ghi me se fekte kenəə ə Feyin naa ghááy ghaa ghene nè nduun. 5Filib chio ndu ɛ ntɛke Samalia è se fekte sakghɛ kum Vi wɛ Feyine nè Yiosen. 6Ghele se yio se ɛydio gese yɛne əbnəə əbchio əbyúméné wɛ Filib nɛɛyen è me chìntèn è se ki shi se yɛ yiote kenəə kɛ əb nè fekten. 7Tefime nè toŋnene, fəyke se ghele tetem nɛ ghel ɛkɛblene nɛ̀ ɛləmmene bonene naa se ɛydio. 8Ghele ghɛ́ Samalia me se saŋle naa se ŋaŋ.

Simon Bééme sɛy Kenəə ə Feyin

9Wel əblee nè lu ɛ ntɛk fo nɛ ɛyghel ə wene lu ge Simon, nɛ əb nè se fiɛŋe ɛyfuu naa se nguk nɛ əbchio yume ghele ghɛ Samalia ɛjim bek wen. Əb nè ghaŋse əbghun ge yi lu wel əbghaken əblee. 10Wel əbjim kene ngɛse wel kene wándɛ me se yio kɛn se wen suuye ge: Wel vin lu kediak ə Feyin ki kɛ ɛ́ toŋten ge: Kediak Ketaa. 11Ghene nè yio kɛn se wen dì bek ka əb nè fiɛŋen guose wen nɛ̂ shi nɛ kenəə tene yume əbchio wel əbjim yumen. 12Filib nè gwiy è se fekte sakghɛ əbjuŋ kum ɛysake Feyin nɛ̀ ɛyghele Jesus Christe; ghele bééme ɛ́ fó moo se ghene ghel ɛjim, əbkiy nɛ̀ ɛluumene. 13Simon se wen ə ngeŋ bééme sɛy, ɛ́ fó moo se wen, əb me se jɛle kɛn ghene Filib, è se lu nɛ̀ əbchíò əbyúméné kum əbnəə əbkanene nɛ̀ wɛ́ əbchio əbyúméné wɛ Filib nè nɛɛyen.

14Ghɛ ntum nə Jesuse nɛy yio ɛ Jolesalem ge ghele ghɛ́ Samalia beememen kenəə ə Feyin, è me tum Bita ghene Joon se ghene. 15Bita ghene Joon ndu è chin gho ɛ leghɛ è me jem se ghene ge ghene kiile Keyioy Kelanene, 16bek ge Keyioy Kelanene nè bɛɛy ghàà gwiy se ghene. Ɛ́ fo kɛn nɛ lu moo se ghene ɛyghel nə Báàba Jesus. 17Bita ghene Joon me lɛm ɛghoo ɛ ghene əbtuu, ghene kiile Keyioy Kelanene.

18Simon yɛn ka ghɛ́ ntum nə Jesuse lɛmen ɛghoo ɛ ghele əbtuu, nɛ ghene kiile Keyioy Kelanene, è me se foo əbkaa se ghene, 19suuye ge: Ghɛn fó əbtaawe vin se mɛ sɛ̂y ka mɛ yɛ lɛm ɛghoo ɛ naa ndɛ ketuu, əb kiile Keyioy Kelanene. 20Ka əb suuyen di, Bita fise ge: Ghɛne əbkaa viɛ nɛ̂ vi ndu əbvəs. Lòò lɛɛy é wɛ̀ yɛ kwaate ge lòó wɛ̀ yun fomɛ ə Feyin nɛ̀ əbkaa? 21Wɛ̀ báà se ki keleŋ, ki wiy kenəə se nɛɛy ɛ ghɛse məm ɛyfɛl bek ge ɛytem ə yiɛ wiy ɛ titiy ɛ ɛyshiɛ nə Feyine. 22Kubsen ɛytem ɛybee yɛ wɛ̀ kiin yì, è jem se Bay ge əb sɛ lɛyse fo se wɛ̀ se ɛykwaate ɛybee nɛ̂ yin yɛ wɛ̀ kè kiin ɛ wɛ̀ ɛytem-a? 23Mɛ yɛne ge kenghɛke lunmen se wɛ̀ ɛytem, wɛ̀ me se lu kekos ə mbee. 24Simon me suuy se Bita ghene Joon ge: Kiy ghɛn, ghɛn yɛ jem se Bay fɛ kenəə se əbnəə wɛ̀ ghɛn suuyen vin gan se mɛ.

25Nɛy se lu ka Bita ghene Joon mɛysen è fekte əbnəə wɛ kum Báàba Jesus, ghene me kase fiile se Jolesalem, è se fekte nduu nɛ̀ sakghɛ əbjuŋ ɛ ntɛke sɛ́ Samalia se ɛydio.

Filib Baksen Nchiy-ndaa Etiobia

26Nchiy-ndaa-Feyin suŋnen se Filib ge: Loole è chio è ndu ɛ jii yɛ ɛy lòòn ɛ Jolesalem è se chio se Gaza, jii nɛ̂ yin lu jii yɛ ɛy nduun ɛ əbkwak. 27Əb me loole è se nduu, è baksen wele Etiobia əblee nɛ əb kfəəye. Əb nè lu wele Fekɛɛy fetaa, nchiy-ndaa toknen nɛ̀ ɛychia no ə ntoke Kandase wɛ̂ ɛylak fo. Wel vin nè lòò ɛ Jolesalem ka əb nè nduun se kokse Feyin, 28əb nè kfəəye nɛ əb diom ɛ wen ə ɛykal nɛ gufe nyamse, è se jaŋe kelike ŋwaale kɛ ɛynyaken wele ntum nə Feyine wɛ Ezaya. 29Keyioy Kelanene suuy se Filib ge: Kokte, è ndu è baksen se ɛykal fɛɛy. 30Filib me nyiŋte è ndu è baksen wen è yio nɛ əb jaŋe kenəə ɛ ŋwaale nə Ezaya wɛ wele ntum nə Feyine, è bif se wen ge: Wɛ̀ lɛ jaŋe dì yio kenəə kɛ wɛ̀ jaŋen-a? 31Əb fise ge: Lòó mɛ yio lɛɛy nɛ wele báà dinte se mɛ? Əb suuy di, è suuy ge Filib kok, è diom ghene yi. 32Kenəə kɛ wel nɛ̂ vi nè jaŋen ɛ ŋwaale fo lu ge:

“Əb nè lu ka bvəy njiɛ yɛ ɛ́ liɛn ge ɛ́ ndu so è sɛɛ.

Gese lu ka wán bvəy njiɛ wɛ əb tiyen ɛ chichi ɛyshiɛ nə wel wɛ əb komen ɛyghuye wen.

Əb dì nè báà ŋak giɛ.

33Ɛ́ nè kiy wen nchɛk,

è jia chèmè ben sak ə wen

wele jia yî suŋnen kum ghon ə wen

bek ka ɛ́ nè tenenmen ɛychii ə wen ɛ ketuu ntiɛ.”

34Nchiy-ndaa yi me bif se Filib ge: Wele ntum nə Feyine nè suuye kenəə kin kum ndɛ? Əb suuy kum ngeŋ ə wen moo kum wel əb chin-a? 35Filib me kɛɛte nɛ̀ kelike ŋwaale kɛ tenen se fekte sakghɛ əbjuŋ wɛ kum Jesus se wen. 36Ghene wen se nduu ɛ jii, è gwiy è chin əbghune jio, wel əbghaken vi suuy ge: Yɛn-a? Jio yine. Lòó jefse ghɛ fɛ ɛ́ fó moo se mɛ?

37(Filib me suuy ge: Lòó mɛ fó moo se wɛ̀ ɛ lefɛ wɛ̀ foon ɛytem ə yiɛ ɛyjim se Jesus. Wel vi me suuy ge: Mɛ lu nɛ mɛ bééme ge Jesus lu wán ə Feyin.) 38Əb suuy dì è me suuy ge ɛ́ tiyse ɛykal. Ghene Filib səəke è chia, è lii se jio Filib fó moo se wen. 39Ghene fəy se jio, Keyioy ə Bay liɛ Filib è lòò so. Wel vi jia gese yɛn wen, dî è se nduu jii ə wen saŋlee. 40Filib loo chin nɛ əb shi ɛ ntɛke Azotus, è me se jɛle, fekte sakghɛ əbjuŋ ntɛk sejim se chin se ka əb nè chinen ɛ Saesalea.

Currently Selected:

Ɛyf 8: oku

Highlight

Copy

Compare

Want to have your highlights saved across all your devices? Sign up or sign in

©CABTAL, 2012

Learn More About Ŋwaale Feyin; Kelek Kefɛɛ