Ɛyf 16

Timoti chinten ngoo Bool ghene Silas

1Ghe Bool me ndu ɛ Delbe gese nɛ̀ Listla ghaa wan-ɛyfɛl əblee nɛ ɛ́ toŋte ge Timoti nè chiin. No ə Timoti nè lu wele Juus gese lu wel əbbeemen, dî nɛ ba ə wen lu wele Glees. 2Timoti nè lu wel nɛ ghel ɛbeemene ɛjim ɛ Listla ghene Ikonium bensen wen. 3Bool loo kɛŋ se liɛ wen, è me nɛɛyte wen bek ge ghele Juus ghɛ ɛ́ nè chiin ɛ keleŋ fo naa kejim ko nè lô se ke ge ba ə Timoti lu wele Glees.#16.3 Ghele Juus nè báà se beeme wel nɛ ɛ́ bɛɛy ghàà nɛyte. Bool loo liɛ Timoti è me nɛyte wen fɛ ghene yɛ vək. 4Ghene me se ghane lii ntɛk nɛ̀ ntɛk, fekte nduu nɛ̀ kenəə kɛ ghɛ́ ntume ghene ghe chɛɛse nè diom è siyse ɛ Jolesalem kum tesak, ka ghene me yɛ lɛm. 5Kii nɛ̂ kine nɛɛy əbnchintene ghel ɛbeemene se taa ɛybeeme, gese kuye se ngose wel əbchii əbjim.

Kuumese koo Bool kum ghele Masedonia

6Bool ghene ngoo ə wen tosen kɛn tosen ɛ keleŋe Fligia ghene Galashia, bek ka Keyioy Kelanene nè báà beeme ge ghene fekte kenəə ə Feyin ɛ ɛylake Asia. 7Se lu ka ghene nè nduunmen è chin ɛ Misia, è se kɛŋe se lii ɛ Bitinia, Keyioy ə Jesus jia beeme. 8Ghene me wɛbte ɛyghaŋe Misia è chio se Tloas. 9Nɛy loo lu nɛ ntəke, kuumese koo Bool ge yɛn ka wele Masedonia teem è se beŋte yi ge: Kiy wɛ̀, ko diaŋ è gwiy ɛ Masedonia è giamten ghɛs. 10Kuumese koo Bool dì ɛ leghɛ, ghɛse ghene me loole è se diaŋe se Masedonia, nɛ ghɛse liɛmen ge Feyine kɛŋe ge ghɛs fekte sakghɛ əbjuŋ se ghele Masedonia.#16.10 Ghɛse ghene: Wel wɛ əb nè nyaken ŋwaale yin nè lu Luk, nɛ əb nè lô se jɛle ghene Bool.

Lidia bééme kenəə ə Feyin ɛ Filibi

11Ghɛs lii se kenək ɛ Tloas è diaŋ ɛ titiy è ndu chin ɛ Samotles, əbtəke yio, ghɛs ndu ɛ Neabolis. 12Ghɛs lòò se fo, è ndu ɛ Filibi è chii fo se əbchii. Filibi nè lu ntɛk ɛytaa ɛylee ɛ ngvəne Masedonia, nɛ sake ghele Lûm ntɛke ten, nɛ̀ ghele Lûme baklemen fo. 13Nɛy se lu ɛ kechii ɛybam ghɛs fəynen ntɛk è ndu chin ɛyghaŋe jio ghaa ghɛs nè kwaaten ge lòó ɛ́ yɛn kelik kɛ ɛ́ jem ɛ ten. Ghɛs diom fo è se suŋnen se əbkiy ɛlee ghɛ ɛ́ nè kaamen fo. 14Əbvii əblee nè lu ɛydiom fo, nɛ ɛ́ toŋte ge Lidia. Əb nè lu wele wɛ̂ Tiatila, feene ndəyse əbkaa əbtaa. Nè lu wel koksee Feyin. Báàba nɛɛy əb yio kenəə kɛ Bool nè suuyen. 15Ɛ́ nɛy me foo moo se ghene ghel ə wene. Əb me se beŋte ghɛs ge: Loo lu nɛ ghɛne yɛn ge mɛ lu nɛ mɛ fó ɛytem se Feyine, ghɛn gwiy è chii ɛ mɛ ndaa. Əb beŋte dì, kɛ́ wene fɛl.

Ɛ́ vii Bool ghene Silas se nchak

16Nɛy se lu ɛ kechii kelee, ghɛs se nduu ɛ kelik ɛyjem, wándɛ əbvii əblee báksén ghɛs nɛ lu kekos, ki ɛyfim yɛ ɛy nè nɛɛyen nɛ əb fiɛŋe əbnəə. Əb nè fiɛŋe əbnəə di, kaa əbkaa naa se ɛydio se ɛbaa ɛyfɛl nə wene. 17Wan əbvii wɛ́ ten me se gwiye kɛn ɛ ghɛse ghe Bool ɛybam gwiyen, jaŋe suuy ketaan se ghele ge: Ghel ghine lu ghel ɛyfɛl nə Feyine, vi wɛ əb ngaŋten è chia. Ghene fekte se ghɛn jii yɛ lòó wel kiile ɛyboy ɛ ten. 18Əb nè jaŋe suuy kenəə nɛ̂ kin kechii nɛ̀ kechii, kenəə kɛ́ tene nɛy me lòò yaf Bool yafen. Bool benle è kwante ɛyfim yi ge: Mɛ suuy se wɛ̀ əbtaawe ɛyghel nə Jesus ge wɛ̀ fəy se wen əbghun. Ɛyfime tene fəy se wen əbghun kɛn əbliy fo.

19Ɛbaa ɛyfɛl nə wándɛ əbvii vi yɛn ge jii ɛykeŋ nə ghen fenenmen è me koo Bool ghene Silas, è guf è ndu so se ɛytiye nsak ɛ kelik əbwɛy ge ɛ́ fó se ghɛ́ ɛysake. 20Ghene ndu dì fo ghene se ghel ghɛ ɛ́ sɛɛ tenen nsakse è suuy ge: Ghel ghine lu ghele Juus ghɛ ɛ gwiyen nɛ̀ ngɛkse ɛ ghɛse ntɛk. 21Ghene dinte nchiine yɛ ɛysak ə yɛ́se báà beeme. Ghɛsen ka ghele Lûm lòó ɛ́ jia beeme nchiine nɛ̂ yin. 22Ngose wel yɛ ɛy nè luun fo ŋaake ɛ Bool ghene Silas əbghun: Ghɛ́ ɛytenene nsake suuy ge ɛ́ chokte ndəyse se ghene əbghun è tɛl. 23Nɛy se lu ka ɛ́ tɛlen ghene lɛ kejuŋ è yal, ɛ́ mak ghene se ndaa nchak, è suuy se wel wɛ əb nè chiyen ge əb yɛ loote chiy. 24Əb yio ka kwanten wen dì, è me kum ghene nɛ lu ɛ ndaa nchak yɛ̂ məm è gese faase ɛvəə ghen se əbnkùm.

25Nɛy se lu nɛ̀ ɛyteme ntəke, Bool ghene Silas me se jeme yeme njàŋse, kokse Feyin nɛ ghele nchak ɛlee yiotee. 26Ɛ́ loo chin ntiɛ sasen è se shikene naa se ŋaŋ, ketiɛ-ndaa nchak shiken. Kɛn se əbliy ɛychio-ndaa dise naa ɛyjim, nchakse teene se ghɛ́ nchake ɛykoy ghel ɛjim. 27Wele nchiy vi loole, è yɛn ɛychio-ndaa ɛyjim ɛyyii è se kwaate ge ghele nchake nyiŋkemen ɛjim, è me guf fiak ə wen se əbkuu è se kɛŋe se yuye ngeŋ ə wen. 28Bool me waame ketaan ge: Ghàà yuy ngeŋ ə yiɛ, ghɛs lu fɛn ghel ɛjim.

29Əb jaŋ ɛ́ gwiy nɛ̀ kekaakene, əb me too, è lii è ndu ɛ məme ndaa è təm ɛləy ɛ Bool ghene Silas ɛyshiɛ chiŋe fane. 30Əb liɛ ghene è fəy so se bɛy, è bif se ghene ge: Ɛbaa ə ghome, lòó mɛ nɛɛy ghɛ se geese se kiile ɛyboy.

31Ghene fise ge: Fó ɛytem ə yiɛ se Báàba Jesus, é ghɛne ɛyshaa ndaa nə wɛ̀ me boy. 32Ghene suuy dì, è me fekte kenəə kɛ kum Jesus se wen gese nɛ̀ wel əbjim wɛ əb nè luun ɛ wen ɛyshaa ndaa. 33Wel wɛ əb nè chiyen ndaa nchak nɛ̂ vi liɛ ghene kɛn ɛ ntək fo, è suu əblɛɛme ghen. Bool ghene Silas me fo moo se ghene ɛyshaa ndaa nə wen ɛyjim. 34Əb me liɛ ghene, ghene ghene ndu ɛ wen ə ndaa, əb fo əbfua-əbyíɛ́ne se ghene. Ghene ɛyshaa ndaa nə wene se saŋle naa se ŋaŋ bek ka ghene fomen ɛytem se Feyin.

35Əbtəke yio, ghɛ́ ɛytene nsake ghɛ Lûme tum ghele nchil se wele nchiy vi ge əb fəyse ghel ghi. 36Əb me suuy se Bool ge: Ghɛ́ ɛytene nsake tinsemen ntum ge mɛ fəyse ghɛne Silas. Lòó ghɛn yɛ ndu ɛ leenen. Ghɛn jɛl kejuŋ.

37Bool sɛ̂y suuy se ghɛ nchil ghii nɛ lu ge: Ɛ́ nè tɛl ghɛs ɛ ghele ɛyshiɛ se lólò, è kum se ndaa nchak, dî nɛ lu kelike kɛs ge ɛ́ liɛ ghɛs ka ghel ɛylake Lûm. Ɛ́ me se kɛŋe ge ɛ́ nyiake nyiaken è fəyse bek ghɛ? Lòó ke jia gan dì. Ghene gwiy nɛ̀ ngeŋse ghene è fəyse ghɛs.

38Ghele nchil ghii fiile, è ndu è suuy kenəə kɛ Bool kè suuyen, ghene yio ge Bool ghene Silas lu sɛ́y ghele Lûm, è me se fane. 39Ghɛ́ ɛytenene nsak ghii me ndu è se buke ɛghoo se Bool ghene Silas ge: Ghɛn ko lɛysen kenəə ten. Ghene buk ɛghoo dì è me fəyse Bool ghene Silas se ndaa nchak, è lon ge ghene ko lòò se ntɛk fo. 40Ghene me fəy, è ndu ɛ Lidia ndaa, bene fɛ ghene nè yɛnen ghel ɛbeemene, è fo ntef se ghene è me lòò.

Currently Selected:

Ɛyf 16: oku

Highlight

Copy

Compare