Ɛyf 12

Helod nəkse ghel ɛbeemene

1Nè lu əbliy fo əbfon wɛ Helod se koote ghel ɛbeemene ɛlee ge yi yɛ nəkse. 2Əb nè lô chiase ɛysak ɛ́ yúy Jɛms wɛ wán-no ə Joon nɛ̀ fiak. 3Əb yɛn nɛ kenəə tene jofe ghele Juus è me suuy ɛ́ koo sɛy Bita. Kii nɛ̂ kine nè gan ɛ əbliy ɛyyiɛ Kechii Ɛyboyse. 4Ɛ́ koo Bita dì è vii se kengɛye nchak, è me lɛm ghel ɛyghoŋ ɛkɛɛk ɛkɛɛk əbleŋ əbkɛɛk ge ɛ́ yɛ chiye wen ka kechii kɛ ɛ́ yíɛ́ Kechii Ɛyboyse loo chia, é yi tiyse Bita ɛ ɛyshiɛ nə ghel ɛjime è sak wen. 5Ka ɛ́ viin Bita se nchak dì ghel ɛbeemene se jeme ketaan ge Feyine giamten wen.

Nchiy-ndaa-Feyin fəyse Bita se kengɛye nchak

6Nɛy se lu ɛ ntək wɛ Helod nè bvəsen se fəyse Bita ge ɛ́ sak, Bita se buune ɛ feteten nə ghel ɛyghoŋ ɛbaa nɛ ɛ́ kul wen nɛ̀ nchak sebaa. Nè lu dì nɛ ghel ɛyghoŋ ɛlee ɛbaa tiy ɛ əbchio kengɛye nchak. 7Nchiy-ndaa-Feyin tum è fəy fo, ndaa ban. Əb shikse Bita ɛ wen ɛytii-ɛybee, əb kamke, əb suuy se wen ge: Loole se ɛyyio chikiy chikiy. Nchakse me yayte se Bita ɛykoy. 8Nchiy-ndaa-Feyin yi me suuy se wen ge: Make ndəy ə shiɛ è tuŋte guose ɛvəə. Bita nɛɛy dì. Əb suuy se wen ge: Make ndəyse kenton nə wɛ̀ è gwiy ɛ́ loo. 9Bita me fəy è se nduu ɛ nchiy-ndaa-Feyin yi ɛybam, maanen ge əbnəə wɛ əb kooyen sɛ ko lu əbluuy-a! Əb nè kwaate ge koo kuumese yi. 10Ghene chia kenone ghele nchiy kɛ mbiye, è chia kɛ kenkumtene, è chin ɛ əbchio kengɛy wɛ əb kiyen ntɛk, nɛ ɛ́ fɛl nɛ̀ kekase. Əb dise se ngeŋ, ghene fəy. Ka ɛ́ fəyen è jɛte fentam nchiy-ndaa-Feyin yi me saame.

11Ɛytof ə Bita me kase gwiy, əb suuy se ngeŋ ə wen ge: Mɛ keelemen se əbluuy ɛ leenen ge kè tum Feyin nchiy-ndaa nə wen ɛy gwiy è fəyse mɛ se Helod ə ketam, mɛ boy se kenəə kɛ ghele Juuse kè kwaaten se nɛɛy se mɛ.

12Ka Bita keelen kenəə kɛ ke ganen dî, è me lòò è ndu ɛ Mɛɛle wɛ no ə Joon Make ndaa. Nè lu dì nɛ ghele chintenmen fo se ɛydio, è se jeme. 13Əb kfənte əbchio ndaa wɛ bɛye, wan əbvii wɛ əb nè fɛ́len ɛ ndaa fo nɛ ɛ́ toŋte ge Loda gwiy se dise, 14è me keele giɛ Bita, ɛysaŋle lun ɛ wen ɛytem. Əb kase nyiŋ è ndu nɛ əb báà chèmè dise əbchio ndaa è jaŋ è suuy ge: Bita tiy ɛ əbchio ndaa. 15Ghene fise ge: Wɛ̀ jake jaken. Əb soote sooten ge Bita tiy ɛ əbchio ndaa. Ghene me fise ge: Fene dî lu nchiy ə wen. 16Bita ko se tiy kfənte əbchio ndaa, ghene loo dise è yɛn se əbluuy nɛ lu wen, əbchio yúm ghene. 17Əb lii, è chil ghene nɛ̀ keghoo ge ɛ́ ghusen, è me fiɛl ka Feyine kè fəysen wen se nchak, è gese suuy ge: Ghɛn fiɛl əbnəə vin se Jɛms ghene ghone-nyii ɛlee. Əb suuy dì è me lòò è ndu se kelik kelee.

18Əbtəke yio, ghel ɛyghoŋ ghii ghɛ ɛ́ nè chiyen Bita jia yɛn wen, ɛytof ə ghene bvəŋ, ghene me se kante ge sɛ gan ghɛ se wen-a? 19Helod chiase ɛysak ge ɛ́ kɛŋ Bita, ɛ́ kɛŋ è jia yɛn. Əb me bifte əbnəə se ghɛ́ nchiy ghii è me chiase ɛysak ge ɛ́ yúyté ghene. Əb nɛɛy dì è me lòò se Judea è ndu ɛ Saesalea è se moote fo.

Ɛykuo ə Helod

20Nè lu əbliy fo nɛ Helod yafse ɛytem se ghele ghɛ́ Taya ghene ghɛ́ Sidone. Ghene me baate se kenon è ndu se yɛne wen. Ghene ndu è chia mbiy è koo əbsun ghene ghe Blastus wɛ nè luun nchiy-ntok, è me yɛn Helod è se lone ge əb koosen ɛysen se ghene bek ge ɛylak ə ghene nè kiile əbfua-əbyíɛ́ne ɛ Helod ɛylak. 21Nɛy se lu ɛ kechii kɛ ghene nè siysen, Helod mak ndəyse tefon nə wen è kok kaba ə wen è se suŋnen se ghel ghii. 22Ghel ghii kum fezəə ge: Suŋnene feyin felee, báà se suŋnen wel. 23Kɛn se əbliy, nchiy-ndaa-Feyin me tɛl wen, teghoghoke yíɛ́ əbtoo ə wen, əb kuo bek ge əb nè báà chiase ɛykokse yɛ ɛ́ nɛ koksen wen nɛ lu se Feyine. 24Kenəə ə Feyine ko se kuye nduu kɛn ɛ mbiy. 25Balnabas ghene Sool nɛy mɛyse ɛyfɛl ə ghen è loo lòò se Jolesalem è liɛ Joon wɛ ɛ́ nè toŋten ge Mak.

Currently Selected:

Ɛyf 12: oku

Highlight

Copy

Compare