TITO 1
1
Allillachu canguichij nishcami
1Taita Diospajta ruraj, Jesucristopaj apóstol Pablomi cani. Taita Diosca pai munashca shina crij cachunca ñaupamanmi agllashca. Chaicunataca Diosta yuyarijtaj cachunca mana nij tucushpalla ima shina canatataj yachachichun cachashcami cani. 2Ñucanchijca huiñai causaiyuj cashca yuyaillami canchij. Mana llullaj Diosca, chai causaitaca manaraj cai pachapi ima tiyajpimi cusha nirca. 3Chai cusha nishcataca pai rurasha nishca punllapimi, ñucanchijta Quishpichij Diosca ñucaman mingashpa huillachirca.
4Tito, canca ñuca crishca shinallataj crij cashcamanta, ñuca huahuatajmi cangui. Dios Yayapaj, ñucanchijta Quishpichij Mandaj Jesucristopaj mana c'uyaipajta c'uyaj canapish, llaquij canapish, sumaj causaipish canhuan cashca cachun ninimi.
Ancianocunapish obispocunapish ima shina canami
5Ñuca mandashca shinallataj yachana illashcacunata yachachishpa, tucui pueblocunapi ancianocunata churachunmi Cretapi saquimurcani. 6Ancianoca mana juchachipaj cashnami cana. Shuj huarmipajlla cusa, huahuacunapish crijcuna, mana maipish cachun purij, cazuj, pi mana juchachipaj cachun. 7Obispoca Dios mingashcata alli cuidashpa apajmi. Chaimanta pi mana juchachipaj, mana huahuayarij, mana p'iñarij, mana machaj, p'iñanacunata mana munaj, cullquita munashcamanta ima mana allita mana ruraj, 8chaipaj randica puzachij, imapish alli cajta c'uyaj, alli yuyaiyuj, cashcata ruraj, Diospajlla caj, quiquinllataj jarcarij, 9mana llulla shimitaca ima shina yachachishcatataj mana cungarij cachun. Chashna cashpami, shujtajcunatapish alli yachachinahuan yuyachishpa rimanga. Mana chashnachu nijcunatapishmi upallachinga.
10Achcacunami mana cazujcuna, yangata rimajcuna, umajcunapish tiyanraj. Ashtahuantajca circuncisionta rurachishcacunami chashnacunaca. 11Chaicunataca upallachinatajmi. Paicunaca cullquita japingaraicullami, tucui huasi familiata manapish yachachinacunahuan muspachincuna. 12Paicunapurallamantataj shuj huillajca: “Cai Cretapi causajcunaca llullajcunami, millai animalcuna shinami, micunallata yuyajcuna q'uillacunami” nircami. 13Chai huillashcaca chashnatajmi cashca. Chaimanta alli crijcuna cachun, sinchita rimai. 14Judiocunapaj yanga parlocunata, mana llulla shimimanta anchuchij yanga mandashcacunatapish amataj uyachun rimangui.
15Chuyacunapajca tucui imapish chuyami. Ashtahuanpish ismushca shinacunapaj, mana crijcunapajca tucui imapish mapami. Paicunapajca yuyaipish, shungupish ismushcami. 16Diostaca rijsinchijmi nincunami. Ashtahuanpish rurashcacunahuanca Diosta mana rijsij cashcatami ricuchincuna. Millananacuna, mana cazujcuna cashpami, ima allita ruranapajca mana alli cashcata ricuchincuna.
Currently Selected:
TITO 1: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.