JEREMÍAS 1
1
Jeremiasca ima huatacunallapi huillashcamanta
1Cai shimicunaca, Hilcías curapaj churi Jeremías huillashca shimicunami. Hilciasca, Benjamín aillupaj llajtapi caj Anatot pueblopi causaj curacunapurami carca. 2Mandaj Diosca Jeremiastaca, Amonpaj churi jatun mandaj Josías, Judá llajtata chunga quimsa huatata mandacujpimi huillachi callarirca. 3Shinallataj Josiaspaj churi Joacim shuti jatun mandaj Judá llajtata mandacui huatacunapishmi huillachirca. Josiaspaj caishuj churica, Sedequías shutimi carca. Paica Judá llajtataca, ñami chunga shuj huatata mandacurca. Chai huatapaj pichca quillapimi, Jerusalenpi causajcunataca prezu aparcacuna. Chai huatapi pai mandana tucuringacamami, Diosca Jeremiastaca huillachirca.
Mandaj Diosca Jeremiastaca pai ima nishcata huillaj cachun cayashcamanta
4Mandaj Diosca ñucataca cashnami nirca:
5“Manaraj cambaj mamapaj huijsapi huiñachishpami, cantaca ña ricushcata charicurcani.
Manaraj huacharijpimi, cantaca ñucallata servichun agllarcani.
Cantaca tucui llajtacunapi causajcunaman ñuca ima nishcata huillajtami rurarcani” nircami.
6Shina nijpica, ñucaca cashnami nircani:
“¡Mandaj Jatun Dioslla, ama chashna nihuaichu.
Ñucaca alli rimanallatapish manaraj yachaj huambramari cani!” nircanimi.
7Shina nijpipish, Mandaj Diosca cashnami nirca:
“Imata rurachun ñuca cachajpipish, canca ruragringuillami.
Ñuca imata huillagrichun nijpipish huillanguillami.
8Canca ama pita manchaichu, ñucami canhuan casha.
Ñucami cantaca imamantapish quishpichisha” nircami Mandaj Diosca.
9Chashna nishpaca paipaj maquita chutashpami, Mandaj Diosca ñuca shimipi tupashpa cashna nirca: “Ñuca shimicunatami huillachun cambaj shimipi churani. 10Riqui, cunantajmi cantaca llajtacunata jatun mandajcunatapish, llajtacunapi causajcunatapish sapimanta llujshichichun, urmachishpa chingachichun, cutin shayachichunpish, llajtacunata cutin tigrachichunpish cantaca churani” nircami. 11Chai q'uipaca Mandaj Diosca ñucataca: “Jeremías, ¿imatataj ricungui?” nishpa tapujpi, ñucaca: “Shuj almendro yura ramatami ricuni” nircani. 12Shina nijpica Mandaj Diosca: “Allimi ricushcangui. Ñuca canta imallata huillachishcataca utcami pajtachigrini” nircami. 13Chai q'uipapish, Mandaj Diosca cutinllatajmi ñucataca: “¿Imatataj ricungui?” nishpa tapujpi, ñucaca: “Janajpi shuj manga t'imbushpa, ñalla jicharigrijtami ricuni” nircanimi. 14Shina nijpica, Mandaj Diosca cashnami nirca: “Janaj lado llajtamantami cai tucui llajtapi causajcunapajca, jatun llaqui tallirimugrin. 15Ñuca, Mandaj Diostajmi janaj lado llajtacunapi causaj ch'ican ch'ican runacunataca, tandanacushpa shamuchun mandani. Chai llajtacunata jatun mandajcuna shamushpami, tucuicuna cai Jerusalén pueblo pungu ñaupaj pambapi macanacungapaj tiyaringacuna. Cai jatun pirca huashanij tucui muyundijtami chapangacuna. Cai Judá llajta tucui pueblocunapimi, chashna macanacungapaj shayaringacuna. 16Cai tucui pueblocunapi causajcunatami, paicunallataj ñucata saquishpa millaita rurashcamantaca, chashna llaquichigrini. Paicunaca quiquin maquillahuantaj rurashca dioscunatamari inciensota rupachishpa adorarcacuna. 17Quiquinca alli chumbillirishpa shayarishpa, paicunataca ñuca imallata rimachun nishca shina rimanguilla. Paicunapaj ñaupajpi shayarinataca ama manchanguichu. Ñataj paicuna manchachichun, paicunapaj ñaupajpi quiquinllata saquiman. 18Cunan punllatajmi, cantaca muyundijta jatun pircayuj pueblota shina, fierro pilarta shina, bronce patata shina pi mana cuyuchipaj cachun churani. Cai Judá llajtapi causajcunaca quiquintaca, jatun mandajcuna cashpapish, paicuna churashca mandajcuna cashpapish, curacuna cashpapish, tucui cai llajtapi causajcuna cashpapish, mana imata rurai tucungachu. 19Quiquinhuan macanacungapaj shayarishpapish, quiquintaca manataj mishangacunachu. Ñucami quiquinhuan casha, ñucami quiquintaca imamantapish quishpichisha” nircami Mandaj Diosca.
Currently Selected:
JEREMÍAS 1: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.