SANTIAGO 1
1
Allillachu canguichij nishcami
1Taita Diospajtapish, Mandaj Jesucristopajtapish ruraj Santiagomi cani. Caita chaita rishca chunga ishqui aillucunatami allilla cashca cachun nini.
Yachaisapa canaca Diosmantami shamun
2Ñuca huauquicunalla, ch'ican ch'ican llaquicunahuan cashpapish, ucu shungumanta cushicuichij. 3Cancuna crijtaj cashcata ricuchij llaquica, mana p'iñarij canata cuj cashcataca yachanguichijmi. 4Chashna alli shungu cashca ricuringapajca alli caichij. Chashna cashpami imapish mana illaj, ña alli crijcunataj canguichij.
5Cancunamanta maijan yachai illaj cashpaca, Diosta mañaichij. Paica mana mitsashpami, tucuicunaman yallijta cunga. 6Ashtahuanpish ama caita chaita yuyashpa cunataj cashcata yuyashpa mañaichij. Maijanpish caita chaita yuyashpa mañajca, huaira caiman chaiman apajpi huajtaricuj mama cucha shinami. 7Maijanpish chashna mañajca, Jatun Diosmanta imallatapish chasquinataca ama yuyachun. 8Chashna ishqui yuyaiyuj runaca, paipaj tucui causaipimi mana alli causan.
9Imata mana charij huauquica, Dios jatunyachina cashcamanta cushicuchun. 10Maijanpish achcata charijca, Dios quichujpica cushicuchun. Pai charij canaca q'uihua sisa chaquirij shinami tucunga. 11Q'uihuaca inti llujshishpa achcata rupachijpica, chaquirinmi. Paita sumajyachij sisa urmajpica, pai sumaj cashcapish chingarinmi. Shinallatajmi achcata charijca, paipaj charinacunandij tucuringa.
Crijtaj cashcata ricuchij llaquita mishanami
12Ima millai yuyaicuna shamujpipish chaita mishaj runaca cushichishcami canga. Chai millai yuyaicunata mishajca causaipaj coronatami chasquinga. Diosca paita c'uyajcunamanmi cusha nishca. 13Maijanpajman ima millai yuyaicuna shamujpica, Diosmantami shamun ama nichun. Diosca ima millai yuyaitaca mana charinchu. Paica piman ima millai yuyaitaca mana cunchu. 14Ashtahuanpish imapish millaita rurana yuyaica quiquinllapitaj tiyashpami, pita cashpapish chashna mana allitaca rurachin. 15Chai millai yuyaicunata chichushca q'uipami, juchaca huacharin. Chai juchapi catijpica, huañuitami cun.
16Ñuca c'uyashca huauquicunalla, ama pandarichijchu. 17Tucui alli charinacuna, imatapish allita ruranacunaca jahuamantami shamun. Paica achijyachijcunata ruraj Yayami. Paica mana shujtajyanchu, paitaca llandullapish mana amsayachinchu. 18Pai munashcamantami mana llulla shimimanta pai rurashcacunapaj punta p'ucushca grano shina cachun, ñucanchijtaca mushujyachirca.
Diospaj Shimi nishcataca rurajcunataj caichij nishcami
19Chaimanta ñuca c'uyashca huauquicuna, imatapish uyanataca alli uyaichij. Manaraj alli yuyarishpaca ama rimaichijchu, ama utca p'iñarichijchu. 20P'iñarijlla runaca, Diospaj munaitaca mana rurai tucunchu. 21Chaimanta millanana yuyaita, millai ruranacunatapish tucui saquishpa, Diospaj Shimita cancunaman huillashcataca alli shunguhuan chasquichij. Chaimi cancunataca quishpichi tucun.
22Diospaj Shimi nishca shina rurajcuna caichij, ama uyajcunalla caichijchu. Chashna tucushpaca, cancunallatajmi umaringuichij. 23Maijanpish Diospaj Shimita uyashca jahua mana chaita rurajca, espejopi paipaj ñahuita ricurij runa shinallami. 24Pai ima shina cashcata ricurishpa rishca q'uipaca, ima shina cashcatapish cungarinllami. 25Ashtahuanpish cashcata ruraj mandashcaca, huatashcamanta cacharijmi. Chaita ricurashpa, uyarashpa, mana cungarishpa chaitataj rurashpa catirajca, pai imata ruracunpi cushichishcami canga.
26Maijanpish cancunapurapi pai crishcapi allimi caticuni yuyashpapish, paipaj c'alluta mana jarcarijca, paipaj shungupimi umarin. Pai caticushcapish yangami. 27Dios Yayata crijtaj cashcata paipaj ñaupajpi ricuchingapajca caitami rurana: Yaya mama illajcunata, llaquihuan caj viudacunatapish ayudana, cai pacha mapacunamantapish huaquichirinami.
Currently Selected:
SANTIAGO 1: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.