COLOSENSES 1
1
Allillachu canguichij nishcami
1Dios munashcamanta, Jesucristopaj apóstol Pablomi, huauqui Timoteondij quillcanchij. 2Cristohuan shujlla tucushpa Colosapi alli caticuj jucha illaj huauquicunahuanca: Dios ñucanchij Yayapaj, Mandaj Jesucristopaj mana c'uyajpajta c'uyaj canapish, sumaj causaipish cancunahuan cashca cachun ninchijmi.
Diosmanta yachaj canata crijcunaman cuchun Diosta Pablo mañashcami
3Cancunamanta Diosta mañacushpaca, ñucanchijta Mandaj Jesucristopaj Yaya Diostaca pagui nicunchijllami. 4Cancuna Cristo Jesusta crishcatapish, tucui jucha illajcunata c'uyacun nijtapish uyarcanchijmi. 5Cancunaca jahua pachapi huaquichishcata japina yuyailla cashpami, chashna c'uyacunguichij. Chai japinataca mana llulla, alli huillai shimita, 6cancunamanpish huillajpimi yacharcanguichij. Chai alli huillaimi tucui cai pachapi grano p'ucuj shina miraricun. Taita Diostaca mana c'uyaipajta c'uyajtaj cashcata uyashca, rijsishca punllamantami cancunapurapipish chashna mirachicun. 7Chaitaca Cristopajta alli huillaj c'uyashca Epafras yachachijpimi yacharcanguichij. Paica Cristopajta ñucanchijhuan rurajmi. 8Espíritu yuyaita cushca shina cancuna c'uyanacucujtaca, paillatajmi ñucanchijmanca huillarca.
9Chaita uyashca punllamantami, cancunamanta Taita Diosta mañanataca ñucanchijca mana shaicunchij. Taita Diospaj munaita allitaj yachajcanahuan, yachaisapa canahuan, Taita Diosmanta yuyaisapa canahuan cachunpishmi mañacunchijlla. 10Mandaj Jesuspaj cashca shinataj causashpa pai munashcata tucuipi rurashpa, tucui alli ruranapi, alli granota p'ucuj shina, Taita Diosta rijsinapipish ashtahuan huiñashpa catichunmi mañacunchijlla. 11Tucuipi paipaj sumaj poderhuan sinchiyachijpi mana p'iñarij, sinchi cachunpishmi mañacunchijlla. 12Ñucanchij jucha illajcuna achij llajtapi herenciata japijcunata ruraj ñucanchij Yayataca, cushicushpa pagui nijcuna cachunmi mañacunchijlla. 13Diosmi ñucanchijtaca amsapaj podermanta cacharichishpa, paipaj c'uyashca Churipaj mandacunpi churarca. 14Paipaj Churi yahuarta jichashpa cutin randishpa quishpichijpimi, juchacunata perdonashca canchij.
Cristo huañushcamantami Dioshuan cutin alli tucushcanchij
15Cristoca mana ricuipaj Dios ima shina cashcata ricuchijmi.
Paica cai pachata manaraj rurajpi ña tiyajmi.
16Diosca jahua pachapi, cai pachapi tucui imalla tiyajta, mana ricuipajcunata, ricuipajcunatapish paipaj Churihuanmi rurarca.
Shinallataj jatun mandajcunata, uchilla mandajcunata, ñahuihuan mana ricuipaj mandajcunata, poderyujcunata, tucuicunatami paipaj Churipaj cachun paillahuantaj rurarca.
17Tucui imalla tiyajcunapaj ñaupami Cristoca ña tiyarca.
Tucuimi paipaj maquipi, maillapi canapimi tiyacun.
18Tandanacushca crijcunaca Cristopaj cuerpomi, paica umami.
Paica callarinapaj ña tiyajmi.
Huañushcacunapaj chaupimanta punta causarijmi.
Tucuipi punta cangapajmi chashna tucurca.
19Dios pai ima shina cashcaca, Cristopi junda causachunmi munarca.
20Diosca Cristomantami tucui imalla tiyajcunahuan cutin alli tucurca.
Cai pachapi cajcunahuanpish, jahua pachapi cajcunahuanpishmi alli tucurca.
Cristo cruzpi yahuarta jichashcahuanmi Diosca chashna alli tucurca.
21Cancunapish sarunmanca cancunapaj yuyaicunamanta, cancunapaj mana alli ruraicunamanta Diosmanta caruyashcacuna, Diosta p'iñajcunami carcanguichij. Cunanca paihuan alli tucushcacunami canguichij. 22Diosca, Cristo paipaj aichayuj cuerpopi, jatun llaquita apashpa huañushcamanta, pi mana juchachipaj, mapa illajta, jucha illajcunata paipaj ñaupajpi ricuchingapajmi chashna rurarca. 23Chaimanta cancunaca crishcapi, sapiyashpa sinchi catichij. Alli huillaita huillajpi cancuna imata japina cashcataca uyarcanguichijmi. Chaimantaca ama anchurishpa chai yuyailla caichij. Chaitaca tucui cai pachapi causajcunamanmi huillashca. Ñucapish chaita huillachun churashca Pablomi cani.
24Ñucaca, cancunamanta llaquita apacushpapish, cunanca cushicunimi. Chashna rurashpami Cristo paipaj cuerpo caj tandanacushca crijcunamanta, llaquita apashca shinallataj ñucapish ñuca cuerpopi paimanta llaquita apashpa pajtachicuni. 25Tandanacushca crijcunapaj Dios rurasha nishca shina, cancunapaj allipaj Diospajta rurajta rurashcami cani. Diospaj Shimita chaitataj huillachun churashcami cani. 26Patsaj patsaj huatacuna ñaupaman causajcunapajca, pi mana yachashca pacallami cashca. Chaitaca cunan paipaj jucha illajcunamanmi ricuchishca. 27Diosca pi mana yachaipaj sumaj charinacunataca jucha illajcunaman cushpami, tucui mana judiocunamanpish ricuchisha nirca. Chaica Cristo cancunapi cashcami, paimantami sumaj cashca ricurina yuyailla canguichij.
28Ñucanchijca Cristomantami huillanchij. Tucuicunata cunashpa, tucuicuna imapipish alli yachaj cachunmi yachachinchij. Allitaj cajcunata Cristo Jesusman ricuchingapajmi chashna yachachinchij. 29Chaipajca Cristo ima shina fuerzata cushcahuanmi macanacucuj shina trabajacuni. Chai fuerzami ñucapica poderhuan rurachicun.
Currently Selected:
COLOSENSES 1: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.