AMÓS 1
1
C'uchulla llajtacunata llaquichinamanta
1Cai shimicunaca, Tecoa pueblomanta michijcunapura Amós runa, israelcuna ima tucunamanta huillashca shimicunami. Judá llajtataca, jatun mandaj Uziasmi mandacurca. Israel llajtataca, Joaspaj churi Jeroboammi mandacurca. Allpa chujchui tiyanapaj ishqui huata ñaupamanmi, 2cashna huillarca: Sión urcupi caj Jerusalén pueblomantami, Mandaj Diosca león huacarij shina sinchita rimashpa uyaringa. Michina q'uihuacunapish chaquiringami. Carmelo urcupish, jahua urcucamami chaquiringa. 3Mandaj Diosca cashnami nin: “Damasco pueblopi causajcunaca, cutin cutin millaita ruracujllapica, paicunata llaquichinataca manataj saquishachu. Paicunaca Galaad llajtapi causajcunataca, trillana fierrohuanmi tacashpa ñuturcacuna. 4Chashna llaquichishcamantami, Hazaelpaj huasica ninahuan japichishca rupanga. Chai ninallatajmi, Ben-adadpaj mandashpa tiyana huasicunatapish tucui rupachinga. 5Damasco pueblo jatun pungu aldabacunatapish p'aquishpami yaicusha. Avén pugru pambapi causajcunatapish, Bet-edén llajtata mandajcunatapish chingachishami. Shinallataj Siria llajtapi causajcunaca, Kir llajtamanmi prezu apashca cangacuna” ninmi Mandaj Diosca.
6Mandaj Diosca cashnapishmi nin: “Gaza pueblopi causajcunaca, cutin cutin millaita ruracujllapica, paicunata llaquichinataca manataj saquishachu. Paicunaca, shuj pueblopi causajcunataca tucuicunatami Edom llajtapi huatashca shina causachun prezu aparcacuna. 7Chashna llaquichishcamantaca, Gaza pueblo muyundij patapimi ninata japichisha. Chai ninallatajmi, mandashpa tiyana huasicunatapish tucui rupachinga. 8Shinallataj Asdod pueblopi causajcunatapish, Ascalón pueblota mandajcunatapish chingachishami. Ecrón pueblopi causajcunataca yallitajmi llaquichisha. Maijan saquirij filisteocunacamami huañuchisha” ninmi Mandaj Jatun Diosca.
9Mandaj Diosca cashnapishmi nin: “Tiro pueblopi causajcunaca, cutin cutin millaita ruracujllapica, paicunata llaquichinataca manataj saquishachu. Paicunaca shuj pueblopi causajcunataca, Edom llajtapi huatashca shina causachunmi prezu cacharcacuna. Quiquin huauquindijpura shina ari ninacushcataca mana yuyarishpami, chashna rurancuna. 10Chashna llaquichishcamantaca, Tiro pueblo muyundij patapimi ninata japichisha. Chai ninallatajmi mandashpa tiyana huasicunatapish tucui rupachinga” ninmi.
11Mandaj Diosca cashnapishmi nin: “Edom llajtapi causajcunaca, cutin cutin millaita ruracujllapica, paicunata llaquichinataca manataj saquishachu. Paicunapaj quiquin huauquicunallatatajmi espadahuan catishpa huañuchircacuna. Mana llaquishpami, shuhuashpa causarcacuna. Paicunapaj huauquicunataca p'iñaillami causarcacuna. 12Temán pueblopipish ninatami japichisha. Chai ninallatajmi, Bosra pueblopi mandashpa tiyana huasicunatapish rupachinga” ninmi.
13Mandaj Diosca cashnapishmi nin: “Amón llajtapi causajcunaca, cutin cutin millaita ruracujllapica, paicunata llaquichinataca manataj saquishachu. Paicunapaj allpa achca tucuchun nishpami, Galaad llajta chichu huarmicunataca huijsata lliquishpa huañuchircacuna. 14Chashna llaquichishcamantaca, Rabá pueblo muyundij patapimi ninata japichisha. Jatun macanacui punllapica ninaca trasyacujmi canga. Chai ninallahuantajmi paicuna mandashpa tiyana huasicunatapish tucui rupachisha. Chai punllaca jatun mancharina punllami canga. 15Paicunata jatun mandajpish, pai churashca mandajcunandijmi prezu ringacuna” ninmi Mandaj Diosca.
Currently Selected:
AMÓS 1: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.