MATEO 8
8
Leprahuan caj runata Jesús alliyachishcami
(Mr 1.40-45; Lc 5.12-16)
1Jesús chai tucuita yachachishpa urcumanta uriyacujpica, paitaca achcacunami caticurcacuna. 2Chaipica leprahuan caj shuj runa c'uchuyashpami, Jesuspaj ñaupajpi cungurishpaca:
–Amito, ñucata alliyachisha ninguipishchari– nijpi, 3Jesusca maquita chutashpa tuparishpaca:
–Ari, alliyachisha ninimi, nishpaca alliyashcami cangui– nircami. Chashna nincami, lepraca chingarirca. 4Chaimi Jesusca:
–Riqui, canta pi alliyachishcata pajta piman huillanguiman. Curaman ricuchigri. Can alliyashcamantaca Moisés mandashca shina ofrendata cugri. Chashna rurajpimi curacunaca can alliyashca cashcata yachangacuna– nircami.
Patsaj soldadocunata mandajpajta rurajta Jesús alliyachishcami
(Lc 7.1-10)
5Capernaumman Jesús ña yaicugrijpica, patsaj soldadocunata mandaj paipajman c'uchuyashpaca: 6–Amito, ñucapajta ruraj huambrami mana cuyurijta ruraj ungüi japijpi achca nanaihuan huasipi llaquita apacun, paita alliyachihuai– nishpa rogajpi, 7Jesusca:
–Ñuca rishpa alliyachishallami– nirca.
8Shina nijpimi patsaj soldadocunata mandajca:
–Amito ñucaca quiquin ñuca huasipi yaicuipajca manamari canichu. Caimanta quiquin alliyai nijpica, ñucapajta rurajca alliyangallami. 9Ñucapish mandajpaj ucupimi cani. Chashnallataj soldadocunata mandajmi cani. Maijanta: “Ri” nijpica, rinllami. Shujtajta: “Shamui” nijpipish, shamunllami. Shinallataj ñucapajta rurajta: “Caita rurai” nijpipish, chaita ruranllami– nircami.
10Chaita uyashpa Jesusca mancharishpami, paita caticujcunataca:
–Pai shina yallitaj crijtaca, israelcunapurapipish manataj ricushcanichu. Chaica chashnatajmi. 11Cancunaman huillanimi: Inti llujshinmanta, inti huashicunmantapish achcacuna shamushpami, jahua pachamanta mandacunpica Abrahamhuan, Isaachuan, Jacobhuan tiyaringacuna. 12Ashtahuanpish Taita Dios mandacujpi chaipi cana cashcacunarajmi, amsapi canllaman shitashca cangacuna. Chaipica huacangacunami, nanaihuanpish quirucunata caniringacunami– nircami.
13Chashna nishpaca Jesusca patsaj soldadocunata mandajtaca:
–Rilla, can crishca shinallataj rurashca cachun– nincami, huambraca alliyashca carca.
Jesusca Pedropaj suedrata alliyachishcami
(Mr 1.29-34; Lc 4.38-41)
14Chai q'uipami Jesusca, Pedropaj huasiman rishpa Pedropaj suedra fiebrehuan camapi ancha siricujta ricurca. 15Ungushcapaj maquipi Jesús tuparijpica, fiebreca anchurcallami. Alliyashpa jatarishpaca tucuicunamanmi cararca.
Achca ungushcacunata Jesús alliyachishcami
16Ña tutayacuitaca, supai japishca achcacunatami Jesuspajman pushamurcacuna. Paica rimashcallahuanmi supaicunataca llujshichirca. Tucui ungushcacunatapish alliyachircami. 17Profeta Isaías: “Paillatajmi ñucanchij ungüicunata, nanaicunata aparca” nishpa huillashca pajtachunmi chashna rurarca.
Jesusta catishun nishcacunami
(Lc 9.57-62)
18Jesusca paipaj muyundijpi achcacuna cajta ricushpami, paipaj yachacujcunataca cai cuchata ch'imbashunchij nishpa mandarca. 19Chaimi mandashcata quillcaj c'uchuyashpaca:
–Yachachij, maiman rijpipish canhuanmi risha– nijpimi, 20Jesusca:
–Zorracunapish causanapaj jutcuta, pajarocunapish tazinta charincunami. Ashtahuanpish Runa Aichayujca, saunashpa dorminallatapish mana charinchu– nirca.
21Paipaj yachacujcunamanta shujca:
–Amito, ñuca yayataraj pambamugrisha– nircami.
22Shina nijpi Jesusca:
–Canca cunantaj ñucata catilla. Huañushcacunataca huañushcacunallataj pambacuchun saquilla– nircami.
Jesusca huairandij tamyata casilla cai nishcami
(Mr 4.35-41; Lc 8.22-25)
23Barcoman Jesús yaicujpica, paipaj yachacujcunapish catishpami yaicurcacuna. 24Ña cuchata ricujpica, huairandij tamyandij yallitaj jatarishpami, chai cucha yacu jahuata jatarishpa barcota tapagrirca. Jesusca dormicurcallami. 25Paipaj yachacujcuna c'uchuyashpaca:
–¡Amito, chingarigrinchijca quishpichihuai!– nishpami rijchachircacuna.
26Chaimi Jesusca:
–¿Ima nishpataj mancharinguichij? Cancunaca ashallata crijcunami canguichij– nishpa jatarishpaca, huairatapish, yacutapish casilla tucui nishpa sinchita rimajpica chashna tucurcallami. 27Chaipi cajcunaca mancharinacushpami:
–Cai runaca pitagari, huairapish yacupish paitaca cazunllamari– ninacurcacuna.
Supai japishca gadareno runacunami
(Mr 5.1-20; Lc 8.26-39)
28Cuchata ch'imbashpaca, gadarenocunapaj llajtamanmi Jesusca chayarca. Chaipica supai japishca ishqui runacunami panteonmanta llujshishpa, Jesusta tupanaman shamurcacuna. Chaicunaca yallitaj millaicuna cajpimi, pi mana chai ñantaca ri tucurcacuna. 29Paicunaca:
–Taita Diospaj Churi Jesús, ¿ñucanchijtaca imatataj ruragringuiyari? ¿Manaraj punlla pajtajpichu, llaquichingapaj caimanca shamurcangui?– nishpami caparircacuna.
30Paicunamanta asha carullapimi canlla cuchicuna puricurcacuna. 31Chaimi supaicunaca:
–Cai runamanta ñucanchijta llujshichishpaca, chai canlla cuchicunapi yaicuchun saquihuai– nircacuna.
32Shina nijpi Jesusca:
–Richij– nircami.
Supaicuna llujshishpaca, chai canlla c'uchicunamanmi yaicugrircacuna. Canlla cuchicunaca, c'aca quinrita singushpami cuchaman huashicushpa yacupi chingarircacuna. 33Michijcunaca achcata mancharishpa puebloman callpashpa rishpami tucui imalla tucushcata, supai japishcacunapish ima shinalla tucushcata parlarcacuna. 34Chaimi chai pueblopi tucui causajcuna, Jesusta tupanaman llujshircacuna. Paita ricushpaca, ñucanchij llajtamantaca ripailla nishpami rogarcacuna.
Currently Selected:
MATEO 8: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.
MATEO 8
8
Leprahuan caj runata Jesús alliyachishcami
(Mr 1.40-45; Lc 5.12-16)
1Jesús chai tucuita yachachishpa urcumanta uriyacujpica, paitaca achcacunami caticurcacuna. 2Chaipica leprahuan caj shuj runa c'uchuyashpami, Jesuspaj ñaupajpi cungurishpaca:
–Amito, ñucata alliyachisha ninguipishchari– nijpi, 3Jesusca maquita chutashpa tuparishpaca:
–Ari, alliyachisha ninimi, nishpaca alliyashcami cangui– nircami. Chashna nincami, lepraca chingarirca. 4Chaimi Jesusca:
–Riqui, canta pi alliyachishcata pajta piman huillanguiman. Curaman ricuchigri. Can alliyashcamantaca Moisés mandashca shina ofrendata cugri. Chashna rurajpimi curacunaca can alliyashca cashcata yachangacuna– nircami.
Patsaj soldadocunata mandajpajta rurajta Jesús alliyachishcami
(Lc 7.1-10)
5Capernaumman Jesús ña yaicugrijpica, patsaj soldadocunata mandaj paipajman c'uchuyashpaca: 6–Amito, ñucapajta ruraj huambrami mana cuyurijta ruraj ungüi japijpi achca nanaihuan huasipi llaquita apacun, paita alliyachihuai– nishpa rogajpi, 7Jesusca:
–Ñuca rishpa alliyachishallami– nirca.
8Shina nijpimi patsaj soldadocunata mandajca:
–Amito ñucaca quiquin ñuca huasipi yaicuipajca manamari canichu. Caimanta quiquin alliyai nijpica, ñucapajta rurajca alliyangallami. 9Ñucapish mandajpaj ucupimi cani. Chashnallataj soldadocunata mandajmi cani. Maijanta: “Ri” nijpica, rinllami. Shujtajta: “Shamui” nijpipish, shamunllami. Shinallataj ñucapajta rurajta: “Caita rurai” nijpipish, chaita ruranllami– nircami.
10Chaita uyashpa Jesusca mancharishpami, paita caticujcunataca:
–Pai shina yallitaj crijtaca, israelcunapurapipish manataj ricushcanichu. Chaica chashnatajmi. 11Cancunaman huillanimi: Inti llujshinmanta, inti huashicunmantapish achcacuna shamushpami, jahua pachamanta mandacunpica Abrahamhuan, Isaachuan, Jacobhuan tiyaringacuna. 12Ashtahuanpish Taita Dios mandacujpi chaipi cana cashcacunarajmi, amsapi canllaman shitashca cangacuna. Chaipica huacangacunami, nanaihuanpish quirucunata caniringacunami– nircami.
13Chashna nishpaca Jesusca patsaj soldadocunata mandajtaca:
–Rilla, can crishca shinallataj rurashca cachun– nincami, huambraca alliyashca carca.
Jesusca Pedropaj suedrata alliyachishcami
(Mr 1.29-34; Lc 4.38-41)
14Chai q'uipami Jesusca, Pedropaj huasiman rishpa Pedropaj suedra fiebrehuan camapi ancha siricujta ricurca. 15Ungushcapaj maquipi Jesús tuparijpica, fiebreca anchurcallami. Alliyashpa jatarishpaca tucuicunamanmi cararca.
Achca ungushcacunata Jesús alliyachishcami
16Ña tutayacuitaca, supai japishca achcacunatami Jesuspajman pushamurcacuna. Paica rimashcallahuanmi supaicunataca llujshichirca. Tucui ungushcacunatapish alliyachircami. 17Profeta Isaías: “Paillatajmi ñucanchij ungüicunata, nanaicunata aparca” nishpa huillashca pajtachunmi chashna rurarca.
Jesusta catishun nishcacunami
(Lc 9.57-62)
18Jesusca paipaj muyundijpi achcacuna cajta ricushpami, paipaj yachacujcunataca cai cuchata ch'imbashunchij nishpa mandarca. 19Chaimi mandashcata quillcaj c'uchuyashpaca:
–Yachachij, maiman rijpipish canhuanmi risha– nijpimi, 20Jesusca:
–Zorracunapish causanapaj jutcuta, pajarocunapish tazinta charincunami. Ashtahuanpish Runa Aichayujca, saunashpa dorminallatapish mana charinchu– nirca.
21Paipaj yachacujcunamanta shujca:
–Amito, ñuca yayataraj pambamugrisha– nircami.
22Shina nijpi Jesusca:
–Canca cunantaj ñucata catilla. Huañushcacunataca huañushcacunallataj pambacuchun saquilla– nircami.
Jesusca huairandij tamyata casilla cai nishcami
(Mr 4.35-41; Lc 8.22-25)
23Barcoman Jesús yaicujpica, paipaj yachacujcunapish catishpami yaicurcacuna. 24Ña cuchata ricujpica, huairandij tamyandij yallitaj jatarishpami, chai cucha yacu jahuata jatarishpa barcota tapagrirca. Jesusca dormicurcallami. 25Paipaj yachacujcuna c'uchuyashpaca:
–¡Amito, chingarigrinchijca quishpichihuai!– nishpami rijchachircacuna.
26Chaimi Jesusca:
–¿Ima nishpataj mancharinguichij? Cancunaca ashallata crijcunami canguichij– nishpa jatarishpaca, huairatapish, yacutapish casilla tucui nishpa sinchita rimajpica chashna tucurcallami. 27Chaipi cajcunaca mancharinacushpami:
–Cai runaca pitagari, huairapish yacupish paitaca cazunllamari– ninacurcacuna.
Supai japishca gadareno runacunami
(Mr 5.1-20; Lc 8.26-39)
28Cuchata ch'imbashpaca, gadarenocunapaj llajtamanmi Jesusca chayarca. Chaipica supai japishca ishqui runacunami panteonmanta llujshishpa, Jesusta tupanaman shamurcacuna. Chaicunaca yallitaj millaicuna cajpimi, pi mana chai ñantaca ri tucurcacuna. 29Paicunaca:
–Taita Diospaj Churi Jesús, ¿ñucanchijtaca imatataj ruragringuiyari? ¿Manaraj punlla pajtajpichu, llaquichingapaj caimanca shamurcangui?– nishpami caparircacuna.
30Paicunamanta asha carullapimi canlla cuchicuna puricurcacuna. 31Chaimi supaicunaca:
–Cai runamanta ñucanchijta llujshichishpaca, chai canlla cuchicunapi yaicuchun saquihuai– nircacuna.
32Shina nijpi Jesusca:
–Richij– nircami.
Supaicuna llujshishpaca, chai canlla c'uchicunamanmi yaicugrircacuna. Canlla cuchicunaca, c'aca quinrita singushpami cuchaman huashicushpa yacupi chingarircacuna. 33Michijcunaca achcata mancharishpa puebloman callpashpa rishpami tucui imalla tucushcata, supai japishcacunapish ima shinalla tucushcata parlarcacuna. 34Chaimi chai pueblopi tucui causajcuna, Jesusta tupanaman llujshircacuna. Paita ricushpaca, ñucanchij llajtamantaca ripailla nishpami rogarcacuna.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.