MATEO 1
1
Jesucristopaj ñaupa yayacunami
(Lc 3.23-38)
1Jesucristoca Davidpaj, Abrahampaj huahua huahuapuramantami. Paipaj ñaupa yayacunapaj shuticunaca caicunami:
2Abrahampaj churica, Isaacmi. Isaacpaj churica, Jacobmi, Jacobpaj churicunaca Judapish, paipaj huauquicunapishmi. 3Judapaj huahuacunami Farespish, Zarapish carca. Paicunapaj mamaca Tamarmi carca. Esromca Farespaj huahuami carca. Aramca Esrompaj huahuami carca. 4Arampaj huahuaca Aminadabmi carca. Aminadabpaj huahuaca Naasonmi carca. Naasonpaj huahuaca Salmonmi carca. 5Salmonpaj huahuaca Boozmi carca. Boozpaj mamaca Rahabmi carca. Boozpaj huahuaca Obedmi carca. Obedpaj mamaca Rutmi carca. Obedpaj huahuaca Isaimi carca. 6Isaipaj huahuaca jatun mandaj Davidmi carca.
Jatun mandaj Davidca Uriaspaj huarmi cashca Betsabepimi, Salomontaca charirca. 7Salomonpaj huahuaca Roboammi carca. Roboampaj huahuaca Abiasmi carca. Abiaspaj huahuaca Asami carca. 8Asapaj huahuaca Josafatmi carca. Josafatpaj huahuaca Jorammi carca. Jorampaj huahuaca Uziasmi carca. 9Uziaspaj huahuaca Jotammi carca. Jotampaj huahuaca Acazmi carca. Acazpaj huahuaca Ezequiasmi carca. 10Ezequiaspaj huahuaca Manasesmi carca. Manasespaj huahuaca Amonmi carca. Amonpaj huahuaca Josiasmi carca. 11Josiaspaj huahuacunaca Jeconiaspish, chaishuj huauquicunapishmi carca. Paicuna causai punllacunami, Babiloniaman prezu aparcacuna.
12Babiloniaman prezu apashcamanta, Jesús huacharingacama ñaupa yayacunapaj shuticunaca caicunami. Jeconiasca Salatiel shuti huahuatami charirca. Salatielpaj huahuaca Zorobabelmi carca. 13Zorobabelpaj huahuaca Abiudmi carca. Abiudpaj huahuaca Eliaquimmi carca. Eliaquimpaj huahuaca Azormi carca. 14Azorpaj huahuaca Sadocmi carca. Sadocpaj huahuaca Aquimmi carca. Aquimpaj huahuaca Eliudmi carca. 15Eliudpaj huahuaca Eleazarmi carca. Eleazarpaj huahuaca Matanmi carca. Matanpaj huahuaca Jacobmi carca. 16Jacobpaj huahuaca Josemi carca. Chai Josemi Mariapaj cusa carca. Chai Mariapimi Cristo shuti Jesusca huacharirca.
17Cai tucui huahua huahuacunaca cashnami: Abrahammanta Davidcamaca, chunga chuscu yayacunami. Shinallataj Davidmanta Babiloniaman prezu apancamaca, chunga chuscu yayacunami. Babiloniaman prezu apashcamanta Cristocamapish, chunga chuscu yayacunami carca.
Jesucristo huacharishcami
(Lc 2.1-7)
18Jesucristo huacharishcaca cashnami: Paipaj mama Mariaca, Josehuanmi cazaranapaj ari ninacushca carca. Manaraj tandalla causashpami, Mariaca jucha illaj Espiritumanta chichu ricurirca. 19Paipaj cusa Joseca cashcata ruraj cashcamantami, Mariata mana pingachisha nishpa pacalla saquisha nicurca. 20Pai chashna yuyacujpimi, Jatun Diospaj ángel muscuipi ricurishpaca: “Davidpaj huahua huahua José, cambaj huarmi Mariata chasquinataca ama manchaichu. Pai chichushca huahuaca, jucha illaj Espiritumantami. 21Paica shuj churitami huachanga. Paitaca Jesús shutita shutichingui. Paica paipaj cajcunatami juchacunamanta quishpichinga” nircami. 22Tucui caicunaca, profetaman Jatun Dios cashna huillachishca pajtachunmi chashna tucurca:
23“C'arihuan manaraj chayarinacushca shuj huarmimi chichunga.
Paica shuj c'ari huahuatami huachanga.
Paitaca Emanuel shutitami shutichinga”
(Chai shutica: “Taita Diosca ñucanchijhuanmi” nisha ninmi).
24Dormicushcamanta José rijcharishpaca, Jatun Diospaj ángel mandashca shinallataj rurashpami, paipaj huarmi Mariataca chasquirca. 25Chaipipish punta churita María huachangacama, Joseca manaraj chayarircachu. Chai huahuataca, JESÚS shutitami shutichirca.
Currently Selected:
MATEO 1: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.