LUCAS 23
23
Pilatopajman Jesusta pushashcami
(Mt 27.1-2, 11-14; Mr 15.1-5; Jn 18.28-38)
1Chai q'uipami tucuicuna huaica jatarishpa, Jesustaca Pilatopajman pusharcacuna. 2Chaipimi Jesustaca:
–Cai runaca ñucanchij llajta runacunata mana allita yachachishpa, bullata rurachishpa puricujtami japircanchij. Cesarman impuestota cunatapish mana cunachu ninmi. Paica jatun mandaj Cristomi cani ninmi– nircacunami.
3Chaimi Pilatoca:
–¿Canca, judiocunapaj jatun Mandajchu cangui?– nijpi, Jesusca:
–Ari, canllataj ña chashna ninguica– nirca.
4Chaimi curacunata pushajcunaman, chaipi cajcunamanpish Pilatoca:
–Cai runapica, imamanta jatunta llaquichinata mana japinichu– nirca.
5Ashtahuanpish paicunaca cashna nishpami caparircacuna:
–Cai runami Galileamanta callarishpa, cai Judeapi causajcunacamami mana allita yachachishpa bullarishpa puricun– nircacuna.
Herodespajman Jesusta pushashcami
6Pilatoca “Galilea” nijta uyashpami, cai runaca galileamantachu nishpa tapurca. 7Herodes mandacun Galileamanta cashcata yachashpami Herodespajman cacharca. Chai punllacunapica, Herodespish Jerusalenllapitajmi carca. 8Herodesca Jesusta ricushpaca achcatami cushicurca. Paica ñaupamantami Jesusca pi mana rurai tucuipaj achcacunata ruracun nijta uyashpa, paipaj ñaupajpipish chaicunata rurachun ricusha nicurca. 9Herodesca Jesustaca achca tapunacunatami tapurca. Jesusca imata mana cutichircachu. 10Chaillapitajmi curacunata pushajcuna, mandashcacunata quillcajcunapish caita chaita nishpa Jesustaca yallitaj juchachircacuna. 11Herodespish paipaj soldadocunapish, Jesusmanca jatun mandajman shina achij nicuj churanata churachij tucushpami asircacuna. Chaimantaca Pilatopajmanmi tigrachishpa cacharca. 12Pilatohuan, Herodeshuanca p'iñanacushca cashcamantaca chai punllapimi alli tucurcacuna.
Jesustaca huañunatajmi nishcami
(Mt 27.15-26; Mr 15.6-15; Jn 18.39–19.16)
13Chaimi Pilatoca curacunata pushajcunata, llajtata mandajcunata, chaipi cajcunatapish cayashpa tandachishpa, 14cashna nirca:
–Cai runataca, llajtapi causajcunata muspachishpa bullata ruranatami yachachicun nishpami pushamurcanguichij. Ashtahuanpish cancunapaj ñaupajpi ñuca tapushpaca, cancuna juchachishca shina millai runa cashcataca mana japinichu. 15Herodespish ima mana allita mana japishpami ñucapajman tigrachishpa cachashca. Cai runata huañuchinapajca paipica ima mana allitaca mana japinichu. 16Paitaca azotichishpa cacharishalla– nircami.
17Pilatoca Pascua punllapica shuj prezuta cacharij cashcamantaca maijantapish cacharinatajmi carca.
18Ashtahuanpish tucui chaipi cajcunaca:
–¡Jesustaca huañuchilla, Barrabastami cacharichun ninchij!– nishpami, shuj shinalla caparircacuna.
19Chai Barrabastaca chai pueblopi macanacungapaj jatarichishcamanta, shujta huañuchishcamantapishmi carcelpi churashca carca. 20Pilatoca, Jesusta cacharisha nishpami paicunataca cutin tapurca. 21Chaipipish paicunaca:
–¡Chacatai, chacatai!– nishpami caparircacuna.
22Chaimi Pilatoca caihuanca quimsa cutin:
–¿Ima mana allitataj rurashcari? Cai runata huañuchinapajca ima mana allita rurashcataca, paipica mana japinichu. Chaimanta azotichishpa cacharishalla– nirca.
23Ashtahuanpish paicunaca chacatashpa huañuchilla nishpami ashtahuan caparircacuna. Chashna caparicushpallami, curacunata pushajcunaca paicuna nishcata rurachircacuna. 24Pilatoca paicuna nishcata pajtachishpami, Jesustaca huañunami can nirca. 25Ashtahuanpish paicuna nishcata pajtachingapajmi, macanacungapaj jatarichij, huañuchishcamanta carcelpi cajta cacharirca. Jesustaca paicuna munashcata rurachunmi curca.
Jesusta chacatashcami
(Mt 27.32-56; Mr 15.21-41; Jn 19.17-30)
26Ña Jesusta pushacushpaca, chagramanta shamucuj Cirenemanta Simontami japirca. Paimanmi cruzta apachishpa Jesustaca catichishpa pusharcacuna.
27Achcacunami Jesustaca catishpa ricurcacuna. Chaicunapurapica, tauca huarmicunami Jesusmanta achcata llaquirishpa huacashpa caticurcacuna. 28Chai huarmicunata Jesús tigrarishpa ricushpaca cashnami nirca:
–Jerusalenpaj ushushicunalla, ñucamantaca ama huacaichijchu. Cancunallamantataj, cancunapaj huahuacunamantapish huacaichij. 29“Mana huachaj, mana chichuj, mana chuchuchij huarmicunaca cushicuichij” nina punllacunami chayamunga. 30Chai punllacunapica, urcucunataca: “Ñucanchijta llapihuayari”, lomacunataca: “Ñucanchijta pacahuayari” ningacunami. 31Verderaj yuratapish cashna ruracushpaca ¿chaquishca yuratacarin imatapishchari rurangacuna?– nircami.
32Jesushuan chacatangapajca, huañuchij ishqui runacunatapishmi pushashpa rircacuna. 33Uma Tullu urcuman ña chayashpa chaipi Jesusta chacatashpaca, huañuchij ishqui runacunatapish shujtaca alli ladoman, caishujtaca lluqui ladomanmi chacatarcacuna. 34Chaipimi Jesusca:
–Yayitu, paicunaca imata ruracushcataca mana yachancunachu, perdonapailla– nirca.
Jesuspaj churanataca, soldadocunami sorteashpa japircacuna. 35Tucui chaipi cajcunami Jesustaca chaparacurcacuna. Llajtata mandajcunapish asishpami:
–Shujtajcunataca quishpichircami. Taita Dios cachashca Cristo cashpaca, paillataj quishpirinmanmari– nircacuna.
36Soldadocunapish vinagreta cushun nishpa c'uchuyashpaca, chanzata rurashpami, 37cashna nircacuna:
–Judiocunapaj jatun Mandaj cashpaca, canllataj quishpiriyari– nircacuna.
38Jesusta chacatashca uma jahua nijpica: “Caica, judiocunapaj jatun Mandajmi” nishpa, griegopi, latinpi, hebreopi quillcashcami tiyacurca.
39Chaipi chacatashca caj huañuchij shuj runaca:
–Cristotaj cashpaca, canllataj quishpirishpa, ñucanchijtapish quishpichiyari– nishpami c'amirca.
40Caishuj huañuchij runaca, chai rimacuj runataca cashnami nirca:
–Canpishchu Taita Diostaca ¿mana manchangui? Pai shinallatajmari llaquita apacungui. 41Ñucanchijca millaita rurashcamanta llaquita apana cashcallatatajmi apacunchij. Ashtahuanpish cai runaca, ima mana allita mana rurashcachu– nircami.
42Chai runaca Jesustaca:
–Can mandangapaj shamushpaca, ñucata yuyaripangui– nijpimi, 43Jesusca:
–Cunanllatajmi paraisopi ñucahuan cangui. Chashnatajmi canga– nirca.
Jesús huañushcami
44Chaupi punllamanta quimsa horas chishicamami, tucui cai pacha amsayarca. 45Intipish mana achijyachircachu. Taita Diospaj huasi ucupi jarcachishca linsoca, jahuamanta urimanmi chaupita lliquirirca. 46Jesusca sinchita caparishpami:
–Yayitu, cambaj maquipimi ñuca espirituta mingani– nishpaca huañurcallami.
47Chashna tucujta patsaj soldadocunata mandaj ricushpaca:
–Cai runaca jucha illajtajmari cashca– nishpami, Taita Diosta jatunyachirca.
48Tucui chaipi cajcunapish imalla tucujta ricushpaca paicunapaj shungupi huajtarishpami tigramurcacuna. 49Jesuspaj tucui rijsishcacunapish, Galileamanta Jesusta catishpa shamuj huarmicunapish, tucui imalla tucujtaca carullamantami ricushpa shayacurcacuna.
Jesusta pambashcami
(Mt 27.57-61; Mr 15.42-47; Jn 19.38-42)
50Chaipica Judeapi caj Arimatea pueblomanta José shuti cashcata ruraj alli shungu runami tiyarca. Paica mandajcunapuralla tandanacushcamantami carca. 51Paipish Taita Dios mandai callari punllata shuyacujmi carca. Chashna cashpami caishuj mandajcuna ima shinalla yuyarinacushcatapish, Jesusta ima shina llaquichicujtapish mana allichu nicurca. 52Paica Pilatopajman rishpami, Jesuspaj cuerpota pambangapaj mañarca. 53Cruzmanta uriyachishpaca linsohuan pilluchishpami, sinchi q'uillinpi quinriman jutcushcapi churarca. Chaipica, pita manaraj churashcami carca.
54Samana punlla callarina ña chayamujpi allichirina punllami carca.
55Galileamanta Jesusta catishpa paihuan shamuj huarmicunapish catishpa rishpami, jutcupi Jesusta ima shina churajta ricurcacuna. 56Paicuna tigrashpaca, mishquijllata ashnacujcunatapish, llihuina jambicunatapishmi allichircacuna. Mandashcapi nishca shinallatajmi, samana punllapica samarircacuna.
Currently Selected:
LUCAS 23: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.
Lucas 23
23
Jesustaca Pilatopaj maquipimi churashcacuna
(Mat 27:1-2, 11-26; Mar 15:1-15; Juan 18:28-39; 19:16)
1Chai qʼuipa tucuicuna cutin huaicashpa jatarishpami, Jesustaca Pilatopajman pushashpa rircacuna. 2Paipaj ñaupajpimi Jesustaca, cashna juchachircacuna:
—Cai runaca, ñucanchij llajta runacunata crichishpa, mana allita rurachishpami purin. Paica: ‘Cristo tucushpa, Jatun Mandajmi cani’ nishpami, Cesarman cuna cashca impuestotapish ama cuchun mandan— nircacunami.
3Chashna nijpimi Pilatoca, Jesustaca:
—¿Canca judiocunata Jatun Mandajchu cangui?— nijpi, Jesusca:
—Ari, can nishcallatajmi cani— nircami.
4Shina nijpi Pilatoca pushaj curacunatapish, chaipi tucui cajcunatapish:
—Cai runapica, ima mana allita rurashcata mana japinichu— nircami.
5Chashna nijpipish, tucui chaipi cajcunami caparishpa:
—Galileamanta callarishpa caicamamari, tucui Judea llajtapi causajcunata crichishpa, mana allita rurachishpa purin— nircacuna.
6‘Galilea’ nijta Pilato uyashpaca:
—Shinashpaca, ¿cai runaca Galileamantachu?— nishpami tapurca.
7Chashna tapujpica:
—Ari, Galileamantami— nijpi, Galileata mandaj Herodespajmanmi cacharca.
Chai punllacunapica, Herodespish Jerusalenllapitajmi carca. 8Herodesca, paipajman pushajpi Jesusta ricushpaca, achcatami cushicurca. Herodesca, ñaupamanmi Jesús achca milagrocunata ruraj cashcata uyarca. Chaimantami, Pai ima señalta rurajta ricusha nicurca. 9Herodesca Jesustaca, achcatami caita chaita tapurca. Chashna tapujpipish, Jesusca imata mana nircachu. 10Pushaj curacunapish, Mandashcata yachachijcunapish chaillapitajmi carca. Paicunaca, Jesustaca caita chaita nishpa, achcatami juchachircacuna. 11Chai qʼuipami Herodespish, paipaj soldadocunapish Jesustaca pʼiñashpa pugllarcacuna. Churanatapish, jatun mandajman shinami alli, sumaj churanata churachij tucurcacuna. Chashna rurashpaca, cutinllatajmi Pilatopajman tigrachishpa cacharca. 12Chai punllami Pilatoca, Herodes-huan alli tucunacurca. Ñaupamanca pʼiñanacushcami carca.
13Paipajman cachajpimi, Pilatoca pushaj curacunatapish, llajtata mandajcunatapish, tucui chaipi cajcunatapish tandachirca. 14Paicuna tandanacujpimi, Pilatoca cashna nirca:
—Cancunami cai runataca ‘Shujtajcunata crichishpa, mana allita rurachicun’ nishpa pushamushcanguichij. Cai runataca, cancunapaj ñaupajpimi ña tapurcani. Cancuna juchachicushca shina, ima mana allitaca mana japinichu. 15Cancuna nijpi Herodespajman cachajpi, paipish ima mana allita mana japishcachu. Chaica riquichij, cai runaca huañuchishca canapaj shina ima mana allitaca mana rurashcachu. 16Paitaca macachishpa cacharishalla— nircami.
17Pilatoca Pascua punllapica, preźucunamanta shujta cacharij cashcamantami, maijantapish cacharina carca. 18Ashtahuanpish chai tandanacushca gentecunaca:
—¡Paitaca huañuchilla! ¡Barrabastami cacharichun ninchij!— nishpami caparircacuna.
19Barrabastaca, chai pueblopi macanacungapaj jatarichishcamantapish, huañuchij cashcamantapishmi carcelpi tiyacurca. 20Pilatoca, Jesusta cacharisha nishpami cutin tapurca. 21Cutin tapujpipish, tucuicunami:
—¡Chacatailla, chacatailla!— nishpa, ashtahuan caparircacuna.
22Chashna caparicujpipish Pilatoca, caihuanca quimsa cutinmi cashna nirca:
—Paita huañuchingapajca, ¿ima mana allitataj rurashcari? Ima mana allita mana japinica. Paitaca, macachishpa cacharishalla— nircami.
23Chashna nijpipish:
—¡Chacatashpa huañuchilla!— nishpami, ashtahuan caparircacuna.
Pushaj curacunaca, chashna achcata caparishpami, paicuna nishcata rurachircacuna. 24Pilatoca, paicuna nishcata caźushpami, Jesustaca ‘Huañunami cangui’ nishpa mana cacharirca. 25Chai pueblopi macanacungapaj jatarichishcamantapish, huañuchishcamantapish preźu tiyacuj runata cacharichun paicuna mañashcatami cacharirca. Ashtahuanpish Jesustaca, paicuna munashcata rurashpami, paicunapaj maquipi churarca.
Jesustaca Golgotapimi chacatashcacuna
(Mat 27:32-44; Mar 15:21-32; Juan 19:17-27)
26Jesusta ña chacatanaman pushacushpaca, Cirene pueblomanta Simón shuti shuj runatami chagramanta shamucujta japircacuna. Paimanmi, Jesusta chacatana cruzta apachishpa, Jesuspaj cati pushashpa rircacuna.
27Achca gentecunapishmi caticurca. Achca huarmicunapish Jesusta llaquishpa, caparirishpa huacashpami caticurcacuna. 28Jesusca, chai huacacuj huarmicunata tigralla ricushpami cashna nirca:
—Jerusalén huarmicunalla, ama Ñucamanta huacaichijchu; cancuna quiquinmanta, cancunapaj huahuacunamanta huacaichij. 29‘Mana huachaj, mana chichuj, mana chuchuchij huarmicunaca cushicuichij’ nina punllacuna chayamungamari. 30Chai punllacunapica, huañusha nishpa:
“Urcucuna llapihuaiari, lomacuna pacahuaiari” ningacunami. 31Verde yurata cashna rurashpaca, chaquishca yuratacarin, ¿imatapishchari rurangacuna?— nircami.
32Jesusdij chacatashpa huañuchingapajca, huañuchij ishqui runacunatapishmi pushashpa rircacuna. 33Uma Tullu sirina shuti urcuman ña chayashpami, Jesustaca chaipi chacatarcacuna. Shinallataj huañuchij runacunatami, shujtaca Paipaj alli ladoman, caishujtaca lluqui ladoman chacatarcacuna. 34Cruzpimi Jesusca:
—Ñuca Yayalla, Ñucata pʼiñajcunataca perdonailla. Paicunaca, imata ruracushcata mana yachancunachu— nirca.
Cutin soldadocunaca, Jesuspaj churanataca, suerteta rurashpami chaupinacurcacuna. 35Tucui chaipi cajcunami, Jesustaca chaparacurcacuna. Mandajcunapish asishpami, cashna nircacuna:
—Paica, shujtajcunataca quishpichijmari carca. Taita Dios cachashca Cristotaj cashpaca, cunan paillataj quishpirichunri— nircacunami.
36Soldadocunapish Jesustaca pugllashpami, vinagreta ubyachishun nishpa asircacuna. 37Chashna rurashpaca:
—Judiocunata Jatun Mandaj cashpaca, Canllataj quishpiriari— nircacunami.
38Jesusta chacatashca uma jahuanijpica griego, latín, hebreo rimaicunapimi: «caica judiocunapaj jatun mandajmi» nishpa quillcashcata churarcacuna.
39Chacatashca shuj huañuchij runapish, Jesustaca:
—Can Cristo cashpaca, Canllatajpish quishpiri, ñucanchijtapish quishpichiari— nishpami cʼami callarirca.
40Chashna rimacujpimi, caishuj huañuchij runaca cashna nirca:
—Canpish chacatashcallataj huañucushpapish, ¿manachu Diostaca manchangui, imatagari? 41Ñucanchijca millaita rurashcamantami, cai llaquitaca apacunchij. Ashtahuanpish cai runaca, ima mana allita mana rurashcachu— nircami.
42Shina nishpa chai runaca, Jesustaca:
—Can mandaj shamushpaca, ñucata yuyaripangui— nircami.
43Chashna nijpi Jesusca:
—Cunanllatajmi Ñucahuan Paraisopi cangui, chashnatajmi canga— nircami.
Jesusca chaupi chishitami huañushca
(Mat 27:45-56; Mar 15:33-41; Juan 19:28-30)
44Ña chaupi punlla shinamantami, chaupi chishicama tucui cai pacha tutayarca. 45Intipish mana achijyachircachu. Diospaj huasi ucupi jarcachishca jatun linsopish, chaupitami chaquiyajta uriman lliquirirca. 46Chashna tucushca qʼuipami, Jesusca:
—Yayito, Quiquinpaj maquipimi Ñuca espiritutaca mingani— nishpa, sinchita caparirca.
Chashna nishpaca, huañurcallami.
47Patsaj soldadocunata mandaj chaita ricushpaca, Taita Diosta sumajyachishpa:
—Cai runaca, cashcata ruraj runatajmari cashca— nircami.
48Tucui chaipi cajcunapish, chai tucuita ricushpaca, mancharishpa, shungupi huajtarishpami tigramurcacuna. 49Ashtahuanpish Jesuspaj tucui rijsishcacunahuan, Galilea llajtamanta Jesusta catishpa shamuj huarmicunaca, carullamantami chai tucuita ricushpa shayacurcacuna.
Arimatea pueblomanta Josemi Jesusta pambashca
(Mat 27:57-61; Mar 15:42-47; Juan 19:38-42)
50Cashcata ruraj, José shuti shuj runami tiyarca. Paica, tandanacushca mandajcunapurami carca. 51Paipish, Taita Dios mandachun shuyacushcamantami, caishuj mandajcuna ima shinalla yuyarinacushpa, Jesusta chashna rurashcahuanpish mana shujlla yuyai carca. 52Chaimantami Pilatopajman rishpa, Jesuspaj aichata pambangapaj mañarca. 53Chacatashcamanta uricuchishpaca linsohuan pillushpami, rumi quinripi jutcuchishca ucupi churarca. Chai jutcuca, pita manaraj churashcami carca. 54Sábado punlla ña callarigrijpimi, Pascuapaj allichina carca.
55Galilea llajtamanta Jesusta catishpa shamuj huarmicunapish Joseta catishpa rishpami, jutcupi Jesusta ima shina churajtaca ricurcacuna. 56Chai huarmicunaca ña huasiman tigramushpaca, sumaj mishquiman ashnacujcunatapish, llihuina jambicunatapishmi Jesuspaj cuerpopi churangapaj allichircacuna. Chai qʼuipaca, ña sábado punlla callarijpimi, mandashcapi nishca shina samarircacuna.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Quichua-Chimborazo New Testament
(Mushuj Testamento Diospaj Shimi)
Copyright © 2010, 2016 by Biblica, Inc.®
Used by permission of Biblica, Inc.®. All rights reserved worldwide