JUAN 1
1
1Taita Dios imatapish manaraj rurajpimi Rimashca Shutica ña tiyarca.
Rimashca Shutica Taita Dioshuanmi carca.
Rimashca Shutica Taita Diosllatajmi carca.
2Taita Dios tucuita rurai
callaricujpica,
paica
Taita Diosllahuantajmi
carca.
3Tucui imalla
tiyajcunataca,
paihuanmi
rurarca.
Tucui imatapish
paillahuantajmi
rurarca.
4Paipimi causaica
tiyarca.
Chai causaimi,
runacunapaj luz
carca.
5Chai luzmi
amsataca
achijyachin,
amsaca chai
luztaca mana
amsayachi
tucunchu.
6Taita Dios cachashca shuj runami tiyarca. Paica Juan shutimi carca. 7Pai huillajpica tucuicuna crichunmi, chai luzmanta huillangapaj paica shamurca. 8Juanca mana luzchu carca, ashtahuanpish luzmanta huillachun cachashcami carca.
9Tucui
gentecunata
achijyachijtaj
luzca, cai
pachapica ñami
ricurigrirca.
10Cai pachataca
Taita Diosca Rimai
Shutihuan
tucushpami
rurarca.
Cai pachapi
causajcunaca pai
rurashca
cashpapish
paitaca mana
rijsircacunachu.
11Paipaj
cajcunapajmanmi
shamurca.
Ashtahuanpish
paipaj cajcunaca
mana
chasquircacunachu.
12Maijanpish paita chasquishpa, paipaj Shutipi crijcunataca tucuicunatami
Taita Diospaj huahuacunata rurarca.
13Taita Diospaj huahua tucungapajca mana huahuacuna huacharij shina aicha munaimanta, c'arita munashcamantachu huacharirca. Ashtahuanpish Taita Diospaj munaimantami huacharirca.
14Taita Diospaj Rimaica, aichayujmi tucurca.
Paica ñucanchij chaupipimi causarca.
Paitaca
Yaya shinallataj sumaj cajtami ricurcanchij.
Mana c'uyaipajta c'uyaj canahuan, mana llullahuan jundami carca.
15Bautizaj Juan Jesusmanta huillashpaca: “Ñucapaj q'uipa shuj shamucunmi nishcaca paimari. Paica ñucapaj q'uipa shamushpapish ñucapaj ñaupa ña tiyashcamanta ñucata yalli jatunmari” nishpami caparirca.
16Paica tucuihuan junda cajpimi, mana c'uyaipajta c'uyaitaca tucuicuna jahuanpi jahuanpi chasquinchij.
17Mandashcataca Moisesmanmi huillachirca.
Ashtahuanpish mana c'uyaipajta c'uyaica, mana llullaca, Jesucristomantami shamurca.
18Taita Diostaca pi manataj ricushcachu.
Paipaj shujlla Churi paipaj c'uchupi cajllami ricushca.
Paimi Taita Dios ima shina cashcataca ricuchishca.
Bautizaj Juan huillashcami
(Mt 3.11-12; Mr 1.7-8; Lc 3.15-17)
19Jerusalenpi causaj judiocunami curacunatapish, levitacunatapish:
–¿Canca pitaj cangui?– nishpa Juanta tapuchun cachajpi, Juanca cashna nirca:
20–Ñucaca mana Cristochu cani– nircami. Chashna huillashpaca mana llullarcachu.
21Shina nijpi:
–Shinashpaca ¿pitaj canguiyari? ¿Eliaschu cangui?– nijpi:
–Chaipish mana canichu– nirca.
Shina nijpi:
–Shinashpaca ¿profetachu cangui?– nijpipish:
–Mana– nircami.
22Chaimi paicunaca:
–Shinashpaca ¿pitaj canguiyari? ¿Canllatajca pi cashcatataj yuyangui? Ñucanchijta cachajcunaman huillagringapajmari yachashun ninchij– nircacuna.
23Chaimi Juanca:
–Profeta Isaiasca shitashca pambapica: “Jatun Diospaj shamuna ñanta allichichij nishpami shuj runa caparicun” nishcami. Ñucaca chaimari cani– nircami.
24Juanta tapunaman cachashcacunaca, fariseocunapurami carca. 25Paicunaca:
–Canca manapish Cristo cashpa, manapish Elías cashpa, Profetapish mana cashpaca ¿ima nishpataj bautizacungui?– nircacunami.
26Chaimi Juanca cashna nirca:
–Ñucaca yacupi bautizajllami cani, ashtahuanpish shujmari cancunapurallapitaj tiyan. Paitaca cancunaca manaraj rijsinguichijchu. 27Paica ñucapaj q'uipa shamushpapish ñucata yalli jatunmari. Chaimanta paipaj pargate huatashcallatapish mana pascaipajmi cani– nircami.
28Juan bautizacushca Jordán yacu ch'imbanij Betábara pueblopimi chashna tucurca.
Taita Diospaj malta Ovejamari nishcami
29Chai cayandij punllami Juanca, Jesús paipajman shamucujta ricushpa cashna nirca:
–¡Caimari cai pachapi causajcunapaj juchata anchuchij Taita Diospaj malta Ovejaca! 30Paitamari ñucaca: “Ñucapaj q'uipa shamujca, ñucapaj ñaupa ña tiyashcamanta ñucata yalli jatunmari” nicurcani. 31Ñucapish paitaca pi cashcata mana rijsishpapish israelcunaman paita rijsichingapajmi yacupi bautizaj shamurcani– nircami. 32Juanca pai ricushcataca cashnami huillarca:
–Jahua pachamanta Taita Diospaj Espíritu paloma shina uriyamushpa paipaj jahuapi saquirijtami ricurcani. 33Ñucapish paitaca pi cashcata manaraj rijsircanichu. Ashtahuanpish yacupi bautizachun ñucata cachaj Taita Diosmi: “Maijanpaj jahuamanmi Espíritu uriyamushpa paipaj jahuapi saquirin. Chaimi jucha illaj Espirituhuan bautizajca canga” nirca. 34Chashna tucujtaca ñucataj ricushca cashpami, caimari Taita Diospaj Churi nishpa huillacuni– nircami.
Juanpaj ishqui yachacujcuna Jesusta catishcami
35Chai cayandij punllapish Juanca cutinmi, paipaj ishqui yachacujcunandij chaillapitaj carca. 36Chaipi cashpami Jesús chaita puricujta ricushpa Juanca:
–¡Riquichij, chaimari Taita Diospaj malta Ovejaca!– nirca. 37Chashna nijta Juanpaj ishqui yachacujcuna uyashpaca, Jesusta catishpa rircallacunami. 38Paicuna caticujta Jesús tigrarishpa ricushpaca:
–¿Imatataj mashcacunguichij?– nijpi, paicunaca:
–Rabí, ¿maipitaj causangui?– nircacuna. (Rabí nishcaca: “Yachachij” nisha ninmi).
39Chaimi Jesusca:
–Jacuchij, ricunguichij– nijpi paicuna rishpaca, Jesús maipi causacushcatami ricurcacuna. Ña chishi cajpimi chai punllaca paihuan saquirircacuna. 40Bautizaj Juan chashna nijta uyashpa Jesusta catishpa rij ishquicunamanta shujca, Simón Pedropaj huauqui Andresmi carca. 41Andresca paipaj huauqui Simonhuanraj tupashpaca:
–Mesiashuanmari tupashcanchij– nircami. (Mesías nishcaca: “Cristo” nisha ninmi).
42Andresca paipaj huauqui Simontaca Jesuspajmanmi pushamurca. Jesusca Simonta ricushpaca:
–Canca, Jonaspaj churi Simonmi cangui. Cunanca cantaca Cefastami shutichini– nircami. (Cefas nishcaca: “Pedro” nisha ninmi).
Felipetapish Natanaeltapish Jesús cayashcami
43Chai cayandij punllami Jesusca Galileaman risha nicushpa, Felipehuan tupashpaca:
–Ñucata cati– nirca.
44Felipeca, Andrespish, Pedropish causan Betsaida pueblomantami carca. 45Felipeca, Natanaelta mashcashpa paihuan tupashpaca:
–Moisés quillcashpa mandashcapi, Profetacuna quillcashpa huillashcapi nishca runahuanmari tupashcanchij: Paica, Nazaret pueblomanta Josepaj churi Jesusmi cashca– nircami.
46Chaimi Natanaelca:
–Nazaretpica ¿ima allitaj tiyangari?– nijpi, Felipeca:
–¡Jacu ricungui!– nirca.
47Jesusca paipajman Natanael shamucujta ricushpaca:
–¡Caitajca israeltajmari, paipica ima umana mana tiyanchu!– nijpimi,
48Natanaelca:
–¿Maipitaj ñucataca rijsircangui?– nijpi, Jesusca:
–Cantaca, Felipe manaraj cayajpimi, higo yura ucupi cajpiraj ricurcani– nirca.
49Chaimi Natanaelca:
–¡Rabí, canca Taita Diospaj Churimi cangui! ¡Canca, israelcunata jatun Mandajmi cangui!– nijpimi,
50Jesusca:
–“Higo yura ucupi cajpirajmi ricurcani” ¿nishcallamantachu ñucataca cringui? Caita yallicunatapishmi ricungui– nirca.
51Cashnapish nircami:
–Cunanmanta pachami cancunaca jahua pacha pascarishcata, Runa Aichayujpajman Taita Diospaj angelcuna huichiyacujta, uriyacujtapish ricunguichij. Chashnatajmi canga– nircami.
Currently Selected:
JUAN 1: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.
Juan 1
1
Rimashca Shimimi Aichayuj tucushca
1Callaripajca, Rimashca Shimica ñami tiyarca. Chai Shimica, Taita Dios-huanmi carca. Chai Shimica, Diosllatajmi carca.
2Paica callarimantapachami, Taita Diosllahuantaj carca.
3Diosca tucui ima tiyajtaca, Paihuanmi rurarca. Imata rurashpapish, Paillahuantajmi rurarca.
4Paipimi causaica tiyarca. Chai causaimi, tucui runacunata achijyachij Luz carca.
5Chai Luzmi amsataca achijyachicun.
Amsaca chai Luztaca manataj mishai tucurcachu.
6Taita Dios cachajpimi, Juan shuti runa shamurca. 7Tucuicuna crichun nishpami, Luzta paiman ricuchishpa, chaita tucuicunaman huillachun cacharca. 8Mana Juanllatajchu Luz carca. Luz shamushcata huillachunllami paita cacharca. 9Tucuicunata achijyachij chai Luzmi, ña cai pachaman chayamurca.
10Pai quiquintajmi, cai pachapi carca. Cai pachaca Pai rurashcami. Cai pachapi causajcunaca, Pai rurashca cashpapish Paitaca mana rijsircacunachu. 11Paipaj cajcunapajmanmi shamurca. Paicunapish mana chasquircacunachu. 12Chashna cajpipish maijanlla Paita crishpa chasquijcunataca, Diosca Paipaj quiquin huahuacunatami rurarca. 13Diospaj huahua tucungapajca mana yahuarmanta, mana aicha munaimanta, mana cʼaripaj munaimanta huacharishcachu, ashtahuanpish Taita Diospaj munaimantamari Diospaj huahua tucun.
14Rimashca Shimi aichayuj tucushpami, ñucanchijpurapi causarca. Paitaca, Diospaj shujlla Churi cashpa, Yaya shinallataj tucuita yalli sumaj cajtami ricurcanchij. Paica mana cʼuyaipajta cʼuyajpish, cashcatataj huillajpishmi carca.
15Juanca, Paimanta huillacushpaca: «Caitamari sarunca: “Ñucapaj qʼuipa shamucujca, ñucapaj ñaupami ña tiyarca. Chaimanta Paica ñucata yalli jatunmari” nishpa huillarcani» nircami. 16Paica tucuita charij cashpa, mana cʼuyaipajta cʼuyashpa cujpimi, allicunataca tucuicuna jahuanpi jahuanpi chasquicunchij. 17Mandashcahuanca Moisestami cachashca. Ashtahuanpish mana cʼuyaipajta cʼuyangapajpish, cashcatataj huillaj Shimicunahuanpish, Jesucristomari shamurca. 18Taita Diostaca, pi manataj ricushcachu. Paihuan causaj, Paipaj shujlla Churillami ricushca. Paimi ñucanchijmanca rijsichirca.
Bautiźaj Juanca ‘Mana Cristochu cani’ nishcami
(Mat 3:11-12; Mar 1:7-8; Luc 3:15-17)
19Jerusalenpi causaj judiocunami:
—Canca, ¿pitaj cangui?— nishpa, Juanta tapuchun curacunata, levitacunata cacharcacuna.
Paicuna tapujpimi, Juanca pi cashcata huillarca.
20Juanca cashcallatatajmi huillarca, mana pacarcachu. Chaimantami:
—Ñucaca, mana Cristochu cani— nishpa huillarca.
21Chashna nijpica:
—Shinashpaca, ¿pitaj canguiari? ¿Eliaschu cangui?— nijpi:
—Mana chaichu cani— nircami.
Shina nijpica:
—Shinashpaca, ¿Dios ima nishcata huillangapaj shamuna cashca, chai huillajchu cangui?— nijpipish:
—¡Mana!— nircami.
22Chashna nijpica:
—Shinashpaca, ¿pitaj canguiari? ¿Canllatajca pi cashcatataj yuyanguiari? Ñucanchijta cachajcunaman huillagringapajmari, yachashun ninchij— nircacunami.
23Chashna nijpimi, Juanca:
—Dios ima nishcata huillaj Isaiasca: “Shuj runamari shitashca pambapica: ‘Mandaj Diospaj ñanta allichichij. Pai purichunca, ama quingushpalla chaqui ñancunatapish ruraichij’ nicunmari” nishpami huillarca. Chai runamari cani— nishpami cutichirca.
24Tapunaman shamujcunapuramanta fariseocunami, 25Juantaca cashna nircacuna:
—Canca ‘Cristopish, Eliaspish, chai shamuna cashca huillajpish mana canichu’ ninguica. Shinashpaca, ¿ima nishpataj bautiźacunguiari?— nircacunami.
26Chashna nijpimi, Juanca cashna nirca:
—Ñucaca, yacullahuanmari bautiźacuni, ashtahuanpish shujmari quiquincunapurallapitaj tiyan. Paitaca, manaraj rijsinguichijchu. 27Paica ñucapaj qʼuipa shamucushpapish, ñucapaj ñaupamari tiyashca. Chaimanta, ñucaca Paipaj pargate huatashcallatapish mana pascaipaj canichu— nircami.
28Jordán yacu chʼimbanij Betabarapi Juan bautiźacujpimi, chashna tucurca.
Jesusca Taita Dios cachashca Malta Ovejami
29Chai cayandij punllami Juanca, Jesús paipajman chayamucujta ricushpaca, cashna nirca:
—¡Riquichij, cai pachapi causajcunapaj juchata anchuchij, Taita Diospaj Malta Ovejaca Paimari! 30Paitamari ñucaca: “Ñucapaj qʼuipa shamucuj runaca, ñucapaj ñaupa ña tiyashcamanta, ñucata yalli jatunmari” nicurcani. 31Ñucapish Paitaca manaraj rijsircanichu. Shinapish israelcunaman Paita rijsichingapajmi, yacuhuan bautiźashpa caticurcani— nircami.
32Juanca caitapishmi pai quiquin ricushcata huillarca:
—Jahua pachamanta Diospaj Espíritu paloma shina uriyamushpa, Paipaj jahuapi tiyarishpa saquirijtami ricurcani. 33Chaicamaca, Paitaca manaraj rijsircanichu. Yacuhuan bautiźachun ñucata Cachajmi: “Pipaj jahuapimi Ñuca Espíritu uriyashpa tiyarijta ricungui, chaimi jucha illaj Espirituhuan bautiźanga” nircami. 34Ñuca quiquintaj chashna tucujta ricushpami cunancama: “Caimari Taita Diospaj Churica” nishpa rijsichimushcani— nircami.
Punta yachacujcunatami Jesús cayashca
(Mat 4:18-22; Mar 1:16-20; Luc 5:2-11)
35Cayandij punllapish cutinmi Juanca, paipaj yachacujcunamanta ishquihuan puricurca. 36Jesús chaita puricujta ricushpami, Juanca:
—¡Riquichigari, Taita Diospaj Malta Ovejaca Paimari!— nirca.
37Juan chashna nijpica, paipaj ishqui yachacujcunami Jesusta caticurcacuna. 38Paicuna caticujpimi, Jesusca tigralla ricushpaca:
—¿Imatataj mashcacunguichij?— nijpi:
—Rabí, ¿maipitaj causangui?— nircacuna.
(Rabí nishcaca: “Yachachij” nisha ninmi).
39Chashna tapujpi Jesusca:
—Jacuchij, ricunguichij— nijpimi, maipi causacushcata rijsigrircacuna.
Ña chuscu horas shina chishi cajpimi, chai chishica paihuan saquirircacuna.
40Juan huillashcata uyashpa, Jesusta catishpa rij chai ishquimanta shujca, Simón Pedropaj huauqui Andresmi carca. 41Paica, paipaj huauqui Simonhuanraj tupashpaca:
—Mesias-huanmari tupanchij— nircami.
(Mesías nishcapish, Cristo nishcapish “aceitehuan llihuishca” nisha ninmi).
42Chashna nishpami Simontaca, Jesuspajman pushamurca. Jesusca Simonta ricurashpaca:
—Canca Jonaspaj churi Simonmi cangui. Cunanca, Cefas shutitami shutichini— nircami.
(Cefas nishcaca: “Pedro” nisha ninmi).
Jesusca Felipeta Natanaeltami cayashca
43Jesusca, chai cayandij punlla Galileaman llujshiricushpami, Felipehuan tuparca. Paitami:
—Ñucata cati— nirca.
44Felipepish Andres-huan, Pedrohuan causan Betsaidamantami carca. 45Felipeca, Natanaelhuan tupashpaca:
—Moisés Quillcashca Mandashcapipish, Dios ima nishcata huillajcunapish huillashca runahuanmari tuparcanchij. Paica Nazaretmanta Josepaj churi Jesusmari— nircami.
46Chashna nijpi Natanaelca:
—Nazaretmantaca, ¿ima alli llujshipajchari?— nijpi Felipeca:
—¡Shinashpaca jacuari, ricungui!— nircami.
47Jesusca, Natanael Paipajman cʼuchuyacujta ricushpami:
—Caitajcarinpish Israel runatajmi, paica umanata mana yachanchu— nircami.
48Chashna nijpi Natanaelca:
—¿Ima shinataj ñucataca rijsingui?— nijpi, Jesusca:
—Cantaca, Felipe manaraj cayajpimari, higo yura ucupi cajpiraj ricurcani— nircami.
49Chashna nijpimi, Natanaelca:
—Rabí, Canca Diospaj Churimari cangui. Canca, israelcunata jatun Mandajmari cangui— nircami.
50Shina nijpi Jesusca, cashnami nirca:
—¿“Cantaca higo yura ucupi cajpirajmi ricurcani” nijllapichu, ñucataca cringui? Caita yallicunatapishmari ricungui. 51Cancunaca, cunanmantapachami jahua pacha pascarishcatapish, Runa Aichayujpajman Taita Diospaj angelcuna huichiyacujtapish, uriyacujtapish ricunguichij. Chaica chashnatajmari— nircami.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Quichua-Chimborazo New Testament
(Mushuj Testamento Diospaj Shimi)
Copyright © 2010, 2016 by Biblica, Inc.®
Used by permission of Biblica, Inc.®. All rights reserved worldwide