Matiu 26
26
Idiọọk edioomo abañake Yisọs
1Ke Yisọs amaaketañ mme afịd ñkpọ ami ama, Anye abọ mbed amọ ate, 2“Nte ndufo ediọọñọke, usọrọ Basofa ayaaba ke usen iba ke iso, ndin eyaeyaak Ayịn Awo nọ ekọñ ke krọs.”
3Akem mme ikpọ aku ye mme ñkpisọñ edibono ke ekwere akwa aku, a-akekereke Kaifas. 4Do ammọ emaedioomo adimʌm Yisọs ke ñkara nyʌñ ñwot anye. 5Ammọ emaebo ete, “Idiidooho ke ini usọrọ ami, mmidooho ntodo, mme awo ekeme isịn ntịme.”
Eyet Yisọs adan ke Betani
6Yisọs akesʌk aba ke Betani ke ufọk Saimọn awo akpamfia keed, 7awonwaan keed amaadʌk abịne anye, akama atu adan adabasta, ata nsọñudua adan, anyʌñ aduọk anye ke iwuod ke ini anye asʌkkọ abede ke akpokoro.
8Ke ini mbed ekịtte ami, esịd ammọ amaadiọọk ñkpa-ñkpa. Ammọ emaebịp ete, “Ntak ebahake adan ami-e? 9Adan ami ado se ekpenyam ke nsọñudua enyʌñ enọ mme uwueene akʌk ami.”
10Ke Yisọs amaakediọọñọ ami, anye abịp ammọ, “Ntak a-ndufo efịnake awonwaan ami-e? Anye anam ñkpọ a-ayaiyake. 11Mbon uwueene ediisʌk ibaba ye ndufo, ado ami ndiibaagha ye ndufo afịd ini. 12Ke ini anye amfiọññọke adan ami ke idem, anye akenam ami adimbeeñe idem nọ edimbuuk miin. 13Ami ntañ akpanikọ inọ ndufo, itie ake adodo e-edikwọrọ eti etob ami ke afịd ederimbod eyaenyʌñ etañ se anye anam ami ke aditoiyo anye.”
Yudas ayịmme aditap Yisọs
14Akem keed ke atu mbed duob ye iba amọ, anye e-ekekoodo Yudas Iskariọd, abịne mme ikpọ aku 15anyʌñ abịp ammọ ete, “Nso-o ke ndufo enyịmme adinnọ adieke ntappa anye inọ ndufo?” Do ammọ ebat mbaak akpoho sịrifa edịb ye duob enọ anye. 16Tọọñọ ke ini ado Yudas amaayep ini a-anye aditap Yisọs inọ ammọ.
Akpatre ndidia
17Ke akpa usen usọrọ Bred a-yis mmiisịneke, mbed edibịne Yisọs enyʌñ ebịp anye ete, “Ke mmọ-ọ ke afo abo ñnyịn ibeeñe idem unọ fiin nọ adia Basofa?”
18Anye abọọrọ ammọ ate, “Ikaa abio ikikịt awo keed inyʌñ idọkkọ anye ite, ‘Andikpeeb abo: Ini e-ekenịmme ennọ akpere. Ami ndiidia usọrọ Basofa ye mbed mmi ke ufọk mfo.’ ” 19Mbed emaenyʌñ enam naña Yisọs akebo ammọ enam, enam mbeeñeidem enọ Basofa.
20Ke ndubi, Yisọs amaasuuk atie ke akpokoro udia ye mbed amọ duob ye iba. 21Ke ini ammọ esʌkkọ edia ñkpọ, anye abo, “Ntañ akpanikọ inọ ndufo, awo keed ke atu ndufo ayaantap miin anọ.”
22Ammọ emaefʌhọ eti-eti enyʌñ etọọñọ ibịp keed-e-keed, “Abọọñ nkọ idooho ami ke akọm, Abọọñ?”
23Yisọs abọọrọ, “Andisịn ubọk amọ ke usan ye ami adintap. 24Ayịn Awo adika ukem-ukem naña ekewet ebaña anye. Ado adọdiọọk anọ awo a-atappa Ayịn Awo. Akpaafọn anye mmiikpikimanake mana.”
25Ndin Yudas, anye a-adiitap anye, abo, “Ikemeke-keme ido ami-o, Andikpeeb?”
Yisọs abọọrọ anye ate, “Afo ke ado.”
26Naña ammọ esʌkkọ edia ñkpọ, Yisọs aben uyo, ndin anye amaakebọñ akam ama, abuuñ anyʌñ anọ mme mbed amọ, abo, “Imbọ ita; ami ado ikpọkidem mmi.”
27Ndin anye aben kọọb, ke anye amaakenọ Abasi ekọọm, anye akpọñ anọ ammọ ate, 28“Enwọñ ami, afịd ndufo, ami ado iyiib mmi, iyiib edioomo e-eduọkkọ enọ uwak awo nọ edakka do ke mme idiọọkñkpọ. 29Tọọñọ ke idahami, ami ibo ndufo ke ami ndiinwọññọ mmịn fain ami aba tutu akem usen a-ndinwọñ ufa mmịn ye ndufo ke abio ubọọñ Ete mmi.”
30Ke emaekekwọ ikwọ ema, ammọ emaedakka eka Abod Ọdif.
Yisọs atañ abaña Bita adikañ imọ
31Ndin Yisọs abo ammọ ate, “Kpa ke akoneyo ami afịd ndufo eyaediañña eñkpọñ miin, sia emaewet ete:
“ ‘Ñyaayʌppọ akpemeedọñ,
ndin mme atu edọñ eyaesuana.’
32 Ado mmaaset ke ñkpa ñyaibem ndufo iso ñka Kadidi.”
33Bita abo anye ate, “Afịd awo ekpedadiañña ukpọñ fiin, ami ndiidiaññake.”
34Yisọs abọọrọ anye ate: “Ntañ akpanikọ unọ, idem akoneyo ami, mbemiso akikọ akpọk, afo ayaañkañ miin ñkenta.”
35Bita abo anye ate, “Akpekọm awuọọñọ ami adikpa ye afo, ami nduukañña fiin.” Ndin afịd mme mbed eken enyʌñ etañ ukem ikọ ado.
Ketsemeni
36Ndin Yisọs asaña ye mme mbed amọ aka itie keed ekoodo Ketsemeni; anyʌñ abo mme ibed amọ ate, “Ndufo ebet mi nọ ami ñka ko ñkebọñ akam.” 37Anye adat Bita ye nditọ Sebidi iba aka do, ndin anye adiiba mbom-mbom, anyʌñ afʌhọ eti-eti. 38Anye ndin abo ammọ ate, “Ukpọñ mmi ayọhọ ye mfʌhọ tutu akpere ñkpa. Ebed mi inyʌñ itap idab ye ami.”
39Anye amaana asaña aka iso etək anyʌñ aduọ ke isọñ afʌk iso, abọñ akam ate, “Ete mmi, akpedo usʌñ mfen aba, ben kọọb ami fep nnọ miin. Ado yak ado naña afo ayem, ke ado naña ami ñyem.”
40Anye atịmme abịne mme mbed amọ, ado adikịt nte ammọ esʌk edaiya, ndin anye abo Bita ate, “Awuọọñọ ndufo ikemeke aditap idab ye ami ukpọk awa keed? 41Akpena etap idab ebọñ akam mbaak ididuọ idʌk idomo. Sịbidịd anyịmme, ado ikpọkidem akop mmemidem.”
42Akem anye atịmme aka akebọñ akam ayọhọ ñkemba, “Ete mmi, akpedo kọọb ami ikemeke adimboiyo ibọhọke ami ñnwọñ anye, yak uduak mfo asu.”
43Ke ini anye amaaketịmme adi anye amaakịt mme ibed amọ naña edaiya, sia idab amaayeed ammọ. 44Anye adakka akpọñ ammọ anyʌñ atịmme akebọñ akam ayọhọ ñke nta, asʌk abọñ kpa ukem akam ado.
45Ndin anye atịmme abịne mme mbed amọ anyʌñ abo ammọ ate, “Ndufo esʌk edadaiya enyʌñ eduọk adudu? Se ini akem, enyʌñ eyaak Ayịn Awo esịn ke ubọk mme anam idiọọkñkpọ. 46Idakka ida yak ika! Se awo a-antappa adieeghe mi!”
Emʌm Yisọs
47Idaha a-anye akesʌkkọ atañ ikọ do, Yudas, keed ke atu ibed duob ye iba adiwuọ. Ekamba atu awo e-ekekamake mme akañkañ ye mme akpeti, a-mme ikpọ aku ye mme ñkpisọñ ekedọññọ enọ Yisọs emaesaña ye anye. 48Awo a-akebooho itap anye amaanọ ammọ idiọọñọ: “Anye a-mbooho ntʌminua ado awo ado; imʌm anye.” 49Ini keed, Yudas aka abịne Yisọs akekọọm anye ate, “Mmekọọm-o, Andikpeeb!” Anyʌñ atʌm anye inua.
50Yisọs abọọrọ ate, “Ufan, nam se akedi inam.”
Ndin mme iden ke atu awo ado ewuọ emʌm Yisọs. 51Ke ndo-ndo ado, keed ke atu mme ibed Yisọs amaasio akañkañ akpi ayịnufọk akwa aku, anyʌñ akpịkke anye utọñ asio.
52Ndin Yisọs amaabo, “Sịn akañkañ mfo ke efọk, sia afịd awo se iben akañkañ edikpañña ke akañkañ. 53Me ndufo ebo ke ami ñkemeke ibeeñe Ete mmi a-akpesọppọsọp anọ se iwak ñkan diyọn mme enyere duob ye iba ediñkpeme miin? 54Do ndin, die ke ikọ Abasi adisaña isu a-abooho ke ana ado ke utọ usʌñ ami?”
55Ado ke ini ami ke Yisọs akebo mme atu awo, “Nte ami ndo asịn nsọk ke abio nọ ndufo ewuọọñọ ekaama mme akañkañ mme ñkpeti ete idimmʌm? Ami mmaatie ñkpeeb ñkpọ ke afe tembịd ke usen ke usen, ado akananam ndufo idueeghe indot ubọk ke idem. 56Idahami afịd ami atịppe nọ se mme brọfed ekewet ke ñwed Abasi asu.” Ndin afịd mme mbed emaefeeñe ekpọñ anye.
Yisọs ke iso esob Sanhidrin
57Mme awo e-ekemmʌmọ Yisọs emaedat anye eka ke ufọk Kaifas, akwa aku, itie a-mme skraib ye mme ikpọ mbọọñ ekebohoke. 58Bita amaakeene anye ke edem ke anyanusʌñ tutu akesịm esịd akwere akwa aku. Bita ñko amaadʌk akesuuk atie ye mme akpeme akwa aku mbaak ato do anye akịt se utịd adido.
59Afịd mme ikpọ aku ye afịd mme esob Sanhidrin emaeyem ikọ ntiense se etañ edian Yisọs nọ ediikan iwot anye. 60Ado ammọ ikikanna ikịt usʌñ ndomokeed, akpesʌk ado umiañ nsu-nsu ntiense emaewuọ edi.
Ke akpatre ntiense iba emaewuọ edi, 61enyʌñ edibo ete, “Awo ami akebo, ‘Ami mmenie adudu adibiad tembịd Abasi ñnyʌñ mmaana mbọp anye ke usen ita.’ ”
62Do ndin akwa aku ama adakka ada anyʌñ abo anye, “Nte afo unieeghe ibọọrọ? Nso-o ikọ ntiense ke mme awo etañ udian ami?” 63Ado Yisọs ikisiooho uyo.
Ñko akwa aku amaabo anye, “Ami mmukpeiye fiin ke idak unwọñọ ke anyịñ ndu-ndu Abasi adidọkkọ ñnyịn me afo ado Mesaya, Ayịn Abasi.”
64Yisọs amaabọọrọ anye ate, “Ado afo atañ. Ado ntañ inọ afịd ndufo mbo ke tọọñọ ke idahami ka iso, ndufo eyaekịt Ayịn Awo nte atie ke ubọk udom ke adudu, anyʌñ adi ke ntọñ ikpaanyọñ.”
65Ndin akwa aku amaawai afọñidem amọ anyʌñ abo, “Anye atañ ikọ asappa Abasi! Nso-o ido ufọn ntiense a-ñnyịn iyemme idahami? Sese do, idahami ndufo emekop usappa Abasi ami. 66Nso-o ido akikere ndufo?”
Ammọ emaebọọrọ ete, “Anye adot adikpa.”
67Ndin ammọ emaetọ anye etab ke iso enyʌñ etọ anye ita. Ubaak awo emia anye 68enyʌñ ebo anye ete, “Tañ brọfesi inọ ñnyịn, Mesaya. Anie awo umia fiin idahado?”
Bita akañ Yisọs
69Ke ukem ini ado Bita aketie ke esịd ekwere, ndin abọikpa ayịnufọk keed adi adibo anye, “Afo ñko akeba ye Yisọs awo Kadidi.”
70Ado Bita amaakañ ke iso afịd ammọ ate, “Ami ndiọọñọke se afo atañ abaña.”
71Ke anye amakewuọ aka ke inuaatob, abọikpa ayịnufọk ñnwen amaakịt anye anyʌñ adọkkọ mme awo e-ekebaaha do ate, “Awo ami akeba ye Yisọs awo Nasared.”
72Ñko Bita amaañwọñọ ñkpọ, anyʌñ akañ, “Ami ndiọọñọke awo ami!”
73Ke etək ini amaakeboiyo, mbon se ikida do emaebịne Bita enyʌñ ekebo anye ete, “Ke akpanikọ afo ado keed ke atu ammọ, sia uyo ikọ mfo uyaara fiin.”
74Ndin Bita atọọñọ adikood isuuñọ nnọ idem amọ, anyʌñ añwọñọ anọ ammọ ate, “Ami ndiọọñọke ete ado!”
Kpa idahado, akikọ unen akpọk. 75Ndin Bita amaatoiyo ikọ a-Yisọs aketañ, “Mbemiso akikọ unen akpọk, afo ayaañkañ miin ñke nta.” Ndin anye awuọ esiin anyʌñ aketua ñkpa-ñkpa.
Currently Selected:
Matiu 26: NAAM
Highlight
Share
Copy
Want to have your highlights saved across all your devices? Sign up or sign in
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.