Izikiẹl 16
16
Jẹ Esegbuyota Evwo rẹ Jerusalẹm
1Ọfa ota rẹ Ọrovwohwo na de bru vwe rhe: 2Ọmọ rẹ ohwo, gbe dje ẹgua ri Jerusalẹm kẹ, 3re wọ ta, Enẹ Ọrovwohwo Ọghẹnẹ ta kẹ Jerusalẹm: Asan wo nurhe vẹ asan re de vwiẹ wẹn e hẹ obo otọ rẹ ihwo ri Kenan, ọsẹ wẹn ohwo rẹ Amọr, oni wẹn kẹ ohwo ri Hitet. 4Vwọ kẹ evwiẹ wẹn, vwẹ ẹdẹ rẹ vwiẹ wẹ na e bru uhohi wẹ-ẹn, eyẹ a vwẹ ame họ wẹ rere wọ vwọ fo-on, eyẹ a vwẹ ughweraka ghwuro uwe-e, eyẹ a vwẹ ukpoyibo vwọ phare owẹ-ẹ 5Ẹro ọvuọvo re ehrọre wẹ-ẹ, rere ọ vwẹ arodọvwẹ ru imu nana ejobi kẹ wẹ-ẹ, ẹkẹvuọvo a da kparọ kufia phihọ ophephe, kidie e tuoma wẹn, vwẹ ẹdẹ re vwo vwiẹ wẹ na.
6Ọke re me vwọ wanvrẹn wẹn, re me vwọ mrẹ wẹ ro gbunie vwẹ ọbara wẹn, me da ta kẹ wẹ vwẹ evun rẹ ọbara wẹn na, Rhọ, 7re wọ rho phihọ kerẹ ekakọn rẹ aghwa. Wo de gro kpenu wọ da rhe rho te ọmọtẹ gbraka, ivie wẹn da kpogho rhe, ẹton wẹn de gro rhe, dede na yo wọ ban phihọ djoko.
8Ọke re me vwọ rhoma wanvrẹn wẹ ri mi vwo ni we, nighe, yu wo te ovwerhẹ nure; me da vwẹ ewun mẹ vwo phopho uwe, mi de rhurhu ẹban wẹn: uyota, me da sa wẹ hẹ otọ me vẹ owẹ da re ọphọ, eriyin Ọrovwohwo Ọghẹnẹ tare, wo de hirhe phihọ ọmẹ. 9Etiyin me da họ wẹ, me da hworhẹ ọbara wẹn nu we oma, me da vwẹ ori ghworo uwe. 10Me da vwẹ amwa re rhuori vwo rhuo we mi de ku isabato phihọ owẹ awọ, me da vwẹ emwa efuanfon vwo rhuo we me da vwẹ esada vwo phopho uwe. 11Me da nabọ wene uwe oma djọghrọ, mi de ku ikoro phihọ owẹ abọ, mi de ku ojọrọn phihọ ohọre wẹn. 12Mi de phi isa phihọ unwe wẹn, mi de ji phi isa phihọ erhọn wẹn. Me da vwẹ erhu oyoyovwi vwo tughẹ uyovwi wẹn. 13Kẹ enẹ a vwẹ oro vẹ idọnọ vwọ rhuẹrẹ owẹ oma, ewun wẹn kẹ omamọ rẹ ukpoyibo, vẹ esada, kugbe emwa re rhuori, wọ da re omamọ rẹ eyagha rẹ ọka vẹ ọnyọn kugbe evwri. Wọ da rhe rho yoyovwi, wo de rhi te ẹdia rẹ uvie. 14Usi wẹn de rhi titi ro ohri rẹ ẹgborho na ejobi fiki rẹ erhuvwu wẹn, kidie ọ gbare fiki rẹ erhuvwu re me vwọ kẹ wẹ, eriyin Ọrovwohwo Ọghẹnẹ tare.
15Ẹkẹvuọvo wọ da vwẹ ẹro so erhuvwu wẹn, wo de gbe igberadja fiki rẹ usi wẹn, erhuvwu wẹn kọye wo vwo gbe igberadja kẹ ihwo re wanvrẹn. 16Wọ da reyọ iwun wẹn evo, wọ da vwẹ ayen hwa umukpe, enu rọye kọye wo de gbe igberadja, a je mrẹ oghẹre rọye dẹvo-o, eyẹ a cha mrẹ bẹdẹ-ẹ. 17Wọ da je reyọ evwarha vẹ iro mẹ kugbe idọnọ mẹ, re me vwọ kẹ wẹ, kẹ eye wo vwo gbe igberadja. 18Wọ da reyọ iwun wẹn ra nabọ rhuo na vwo phopho ayen, wo de mu ori mẹ vẹ ugboduma mẹ vwọ kẹ ayen. 19Ji kugbe ikara mẹ re me vwọ kẹ wẹ–Me vwẹ omamọ rẹ eyagha rẹ ọka vẹ evwri kugbe ọnyọn vwọ ghẹrẹ owẹ–Wo de mu ayen kẹ ayen ri gbo ọrhe ororo hwe ayen, eriyin Ọrovwohwo Ọghẹnẹ tare. 20Wo da reyọ emeshare vẹ emetẹ wẹn, ri wo vwiẹ kẹ vwẹ, enana keye wo vwo ze izobo kẹ ayen hwere. Wo rori nẹ igberadja wẹn na kẹ emu otete 21ru wo vwo hwe emọ mẹ wọ da vwẹ ayen ze Izobo rẹ ẹtorhẹ kẹ ayen? 22Vwẹ evun rẹ ẹgua wẹn ejobi kugbe igberadja wẹn wọ rha karohọ ọke emọ wẹ-ẹn, ọke rẹ wọ vwọ ban phihọ djoko, wo vwo gbunie vwẹ ọbara wẹn.
23Ọke wo de ru ogbeku na ejobi nu (ekan, ekan kẹ wẹ! eriyin Ọrovwohwo Ọghẹnẹ tare), 24wẹ ọvo re bọn asan ro kpenu kẹ oma wẹn vwẹ ọsuere kọsuere; 25vwẹ oba koba rẹ urhuvwu wọ da bọn asan ro kpenu kẹ oma wẹn ku wọ vwẹ erhuvwu wẹn gbe igberadja, wọ vwẹ oma wẹn ru ẹse kẹ ihwo re wanvrẹn, igberadja kegbe-egbe. 26Wọ vẹ ihwo rẹ Ijipt ri gbe gbe igberadja kuẹgbe, oko wẹn re wọ vẹ ọye ghwe gbe ọfanrhiẹ kuẹgbe, re wọ vwọ kpare ophu mẹ. 27Nighe, fiki rẹ ọtiọye na, ke me riẹn obọ mẹ kpahe owẹ, ki mi ru ẹkẹn ute wẹn hanvwe, ki mi siobọ nẹ uwe kẹ urhuru sivwe rẹ ivwighrẹ wẹn, emetẹ rẹ ihwo ri Filistia, rẹ oma voro fiki rẹ ẹban wẹn. 28Wọ vẹ ihwo rẹ Asiria ji gbe igberadja rhe, fikiridie evun vọn wẹ-ẹ uyota, wọ vẹ ayen gbe igberadja, dede na yẹ evun vọn wẹ-ẹ. 29Igberadja egbe wẹn rhe rho phihọ re wo vwo bru ineki re chua eki vwi Kaldia, vwẹ ọnana dede na evun je vọn wẹ-ẹ.
30Mavọ unuavwerhe rẹ ọfanrhiẹn vọn udu wẹn te, eriyin Ọrovwohwo Ọghẹnẹ tare, ru wo vwo ru imu nana, uruemu rẹ unuavwerhe rẹ igberadja na, 31re wọ vwọ bọn uwevwi ghwroro phihọ oba koba rẹ urhuvwu, re wọ da bọn asan ro kpenu phihọ ọsuere kọsuere je wọ họhọ igberadja-a, fikiridie wọ rhọvwere nẹ a hwa osa kẹ wẹ-ẹ 32Igberadja rẹ aye na, ro brẹ eshare erhorha ra jẹ ọshare rọye vwo na! 33Eshare vwẹ igho kẹ igberadja, ẹkẹvuọvo kẹ o wẹ rhoma vwẹ igho kẹ esen wẹ, wọ jẹ udi kẹ ayen rere ayen vwo bru we rhe nẹ kasan kasan rhe ri gbe igberadja. 34Ọtiọye na wọ da fẹnẹ eya ri chekọ ri gbe igberadja na ohwo ọvuọvo rẹ wẹ-ẹ, wọ rhoma hwa osa kẹ ihwo ri bru we, ye a hwa osa kẹ wẹ-ẹ, fiki rẹ ọtiọye na wọ fẹnẹ ayen. 35Ọtiọye na, E igberadja na, nyo ota rẹ Ọrovwohwo na. 36Enẹ Ọrovwohwo Ọghẹnẹ tare, Fikiridie a ban omaẹvuọ wẹn phihọ a da rha mrẹ ẹban wẹn vwẹ evun rẹ igberadja egbe wẹn vẹ esen wẹn, kugbe fiki rẹ ema wẹn ejobi, ji kugbe fiki rẹ ọbara rẹ emọ wẹn ru wọ kẹ ayen. 37Fiki rẹ otioye na, nighe, me cha ghwẹ esen wẹn ejobi koko, e re wọ vẹ ayen gbe gbe ọfanrhẹn na, ayen ejobi ri je we kugbe ayen ejobi ri tu we oma, ke me ghwẹ ayen ejobi koko rhe vwọ so owẹ nẹ asan kasan rhe, ke rhie ẹban wẹn phihọ kẹ ayen, rere ayen vwọ mrẹ ẹban wẹn ejobi. 38Ke me vwẹ owẹ guẹdjọ kirobo rẹ eya re chọ urhi rẹ orọvwe kugbe i ri sun ọbara te otọ epha, ke me cha vwẹ ọbara rẹ ophu vẹ omẹriọ vwo ghworo uwe. 39Ki mi phi we phihọ obọ rẹ esen wẹn, kẹ ayen guọghọ uwevwi wẹn ri ghwroro na te otọ ayen mi kporo asan ro kpenu na te otọ; ayen me ghwiẹ emwa wẹn nẹ uwe oma ayen me reyọ evwarha iyoyovwi wẹn, ayen me yan ju we vwo ẹbẹban djoko. 40Ayen cha ghwẹ urogho rhe vwọ so owẹ, ke ayen vwẹ ukpokpo phi we ayen me vwẹ ọlọkọ rayen nyavwe owẹ ibribro. 41Ayen ke torhẹ iwevwi wẹn ayen me vwẹ owẹ guẹdjọ vwẹ irharo rẹ eya na, ke me da obọ rẹ igberadja egbe wẹ na ji, wọ gbe hwa osa kẹ ihwo ri bru we rhe ọfa-a. 42Ọtiọye na ke me cha kpara ophu mẹ nu we, me gbe rioma kpahe owẹ-ẹ, ke me fọ gbiẹi, ivun gbi miovwo uwe ọfa-a. 43Fikiridie wọ gbe karohọ ọke-emọ wẹ-ẹn, ẹkẹvuọvo wọ da kpare ophu mẹ vwẹ oma rẹ imu nana ejobi, ọtiọye na, me cha reyọ osa rẹ uruemu wẹn ejobi vwẹ uyovwi wẹn, eriyin Ọrovwohwo Ọghẹnẹ tare.
Wọ rha vwẹ ẹbẹban djoko wẹ na vwọ ba ẹgua egbe wẹn na? 44Nighe kohwo kohwo ro kpe itẹ ejobi ko che kpẹ itẹ nana kpahe owẹ, Nighe obo rẹ oni epha ọtiọye ọmọtẹ rọye je he pha. 45Wẹ ọmọtẹ rẹ oni wẹn, ro tuoma rẹ ọshare rọye vẹ emọ rọye, wọwẹ ke rha oniọvọ ọmọtẹ rẹ iniọvo wẹn, ri tuoma rẹ eshare rayen vẹ emọ rayen. Oni wẹn ohwo ri Hẹt ọsẹ wẹn kẹ ohwo rẹ Amọr. 46Oniọvo wẹn rẹ ọmọtẹ ki Sameria, rọ vẹ emetẹ rọye dia ọbohwẹre-ọnre wẹn na, oniọvo wẹn rẹ ọmọtẹ rẹ otete rọ dia obọrhe ọnre wẹn, ọye Sodọm vẹ emetẹ rọye. 47Yẹ o te kẹ wẹ rere wọ yan phihọ idjerhe raye-en, eyẹ wọ ru kirobo rẹ ẹgua rayen epha-a, vwẹ ọmọke krẹ na wọ rhoma rhi miovwi nẹ obo rẹ ayen epha vwẹ idjerhe rayen. Kirobo re me herọ na, eriyin Ọrovwohwo Ọghẹnẹ tare, 48Kirobo re me herọ na, eriyin Ọrovwohwo Ọghẹnẹ tare, oniọvo wẹn rẹ ọmọtẹ Sọdọm vẹ emetẹ rọye ruru kirobo re wọ vẹ emetẹ wẹn ruru na-a. 49Nighe, Ọnana abe rẹ oniọvo wẹn rẹ ọmọtẹ Sodọm: te ọye vẹ emetẹ rọye muẹ oma kpenu, ayen vwo emuọre buebu, akpọ yovwẹ ayen, ẹkẹvuọvo yẹ ayen cha ivwiogbere rẹ akpọ bẹn uko-o. 50Ayen ihwo ọnko, ayen de gbe ẹgua buebu vwẹ obaro mẹ, fiki rẹ ọtiọye na mi de si ayen no vwọ ọke re me vwọ mrẹ. 51Sameria ji ru abọvo rẹ imwemwu wẹn na-a, wo gbe ẹgua nọ ayen ejobi, ọ da nẹrhẹ iniọvo rẹ emetẹ wẹn họhọ evwata vwẹ oma rẹ ẹgua ru wo gberi na. 52Gbe mu oghwa rẹ omavovwẹ wẹn, kidie wọwẹ rhe, re nẹrhẹ ẹdjọ yovwi kẹ oniọvo wẹn rẹ ọmọtẹ, fiki rẹ imwemwu wẹn ro me miovwi nẹ ayen ejobi, ayen re ma riẹn ru nọ wẹ. Gbe je oma vọ wẹ, re wọ ghwa oghwa rẹ omaẹvuọ wẹn, kidie wẹ re nẹrhẹ e ni iniọvo wẹn rẹ emetẹ kerẹ evwata.
53Me vwẹ ughwẹ rayen rhivwi rhe, te ughwẹ ri Sodọm vẹ emetẹ rọye, kugbe ughwẹ ri Sameria vẹ emetẹ rọye, ke me vwẹ ughwẹ wẹn rhivwi rhe vwẹ uherevie rẹ ayen. 54Wọ cha ghwa oghwa rẹ ophọphọvwẹ wẹn, rere oma vwọ vo wẹn fiki rẹ obo wo ruru ejobi rere ọ vwọ dia uchebrọ kẹ ayen. 55Vwọ kẹ iniọvo rẹ emetẹ wẹna Sodọm vẹ emetẹ rọye cha rhoma rhivwi kpo ẹdia rẹ ẹsosuọ, Sameria vẹ emetẹ rọye cha rhoma kpo ẹdia rẹ ẹsosuọ; te owẹ te emetẹ wẹn cha rhoma kpo ẹdia rẹ ẹsosuọ. 56Ọ dia o wẹ reyọ unu wẹn vwọ pata oniọvo rẹ ọmọte Sodọm vwẹ ọke wọ vọ vẹ oma ephuo na, 57tavwe ra ke rhe fa amwa nẹ umwemwu wẹ-ẹn? Asakiephana wọ rha rhe họhọ emu rẹ ehwẹjẹ kẹ emetẹ rẹ Edọm vẹ otu rọye ejobi, kugbe emetẹ rẹ ihwo ri Filistia, re riariẹ owẹ phihọ na re je we fia na. 58Wọ reyọ osa rẹ ọfanrhiẹn wẹn na kugbe ẹgua egbe na re, eriyin Ọrovwohwo tare.
59Uyota, enẹ Ọrovwohwo Ọghẹnẹ tare: mi nene uwe ru kirobo wo ruru na, wẹ rọ jẹ ivẹ na kufia wo de miovwi ọphọ na, 60ye me je karohọ ọphọ mẹ re me vẹ owẹ rere vwẹ ọke rẹ imitete wẹn, ke me vẹ owẹ rhoma re ọphọ re rara. 61Etiyin ku wọ karohọ idjerhe wẹn, oma kọ vo wẹ vwẹ ọke re me da reyọ iniọvo wẹn rẹ emetẹ, te re ekpako te rẹ imitete wẹn, me da vwẹ ayen ru emetẹ kẹ wẹ, ẹkẹvuọvo ọ dia fiki rẹ ọphọ re me vẹ owẹ rere-e. 62Ke me vẹ owẹ re ọphọ ọfa, ku wọ riẹn nẹ mẹvwẹ Ọrovwohwo na. 63Ọke ri mi de vwo ghovwo uwe emu ejobi ru wo ruru, kẹ wọ cha karo phihọ, oma kọ vo wẹ, wo rhe che rhiẹ unu wẹ ọfa fikirẹ omaẹvọ wẹ-ẹ, eriyin Ọrovwohwo Ọghẹnẹ tare.
Currently Selected:
Izikiẹl 16: UBV77
Highlight
Share
Copy
Want to have your highlights saved across all your devices? Sign up or sign in
Bible in Urhobo © United Bible Societies, 1977.
Izikiẹl 16
16
Jẹ Esegbuyota Evwo rẹ Jerusalẹm
1Ọfa ota rẹ Ọrovwohwo na de bru vwe rhe: 2Ọmọ rẹ ohwo, gbe dje ẹgua ri Jerusalẹm kẹ, 3re wọ ta, Enẹ Ọrovwohwo Ọghẹnẹ ta kẹ Jerusalẹm: Asan wo nurhe vẹ asan re de vwiẹ wẹn e hẹ obo otọ rẹ ihwo ri Kenan, ọsẹ wẹn ohwo rẹ Amọr, oni wẹn kẹ ohwo ri Hitet. 4Vwọ kẹ evwiẹ wẹn, vwẹ ẹdẹ rẹ vwiẹ wẹ na e bru uhohi wẹ-ẹn, eyẹ a vwẹ ame họ wẹ rere wọ vwọ fo-on, eyẹ a vwẹ ughweraka ghwuro uwe-e, eyẹ a vwẹ ukpoyibo vwọ phare owẹ-ẹ 5Ẹro ọvuọvo re ehrọre wẹ-ẹ, rere ọ vwẹ arodọvwẹ ru imu nana ejobi kẹ wẹ-ẹ, ẹkẹvuọvo a da kparọ kufia phihọ ophephe, kidie e tuoma wẹn, vwẹ ẹdẹ re vwo vwiẹ wẹ na.
6Ọke re me vwọ wanvrẹn wẹn, re me vwọ mrẹ wẹ ro gbunie vwẹ ọbara wẹn, me da ta kẹ wẹ vwẹ evun rẹ ọbara wẹn na, Rhọ, 7re wọ rho phihọ kerẹ ekakọn rẹ aghwa. Wo de gro kpenu wọ da rhe rho te ọmọtẹ gbraka, ivie wẹn da kpogho rhe, ẹton wẹn de gro rhe, dede na yo wọ ban phihọ djoko.
8Ọke re me vwọ rhoma wanvrẹn wẹ ri mi vwo ni we, nighe, yu wo te ovwerhẹ nure; me da vwẹ ewun mẹ vwo phopho uwe, mi de rhurhu ẹban wẹn: uyota, me da sa wẹ hẹ otọ me vẹ owẹ da re ọphọ, eriyin Ọrovwohwo Ọghẹnẹ tare, wo de hirhe phihọ ọmẹ. 9Etiyin me da họ wẹ, me da hworhẹ ọbara wẹn nu we oma, me da vwẹ ori ghworo uwe. 10Me da vwẹ amwa re rhuori vwo rhuo we mi de ku isabato phihọ owẹ awọ, me da vwẹ emwa efuanfon vwo rhuo we me da vwẹ esada vwo phopho uwe. 11Me da nabọ wene uwe oma djọghrọ, mi de ku ikoro phihọ owẹ abọ, mi de ku ojọrọn phihọ ohọre wẹn. 12Mi de phi isa phihọ unwe wẹn, mi de ji phi isa phihọ erhọn wẹn. Me da vwẹ erhu oyoyovwi vwo tughẹ uyovwi wẹn. 13Kẹ enẹ a vwẹ oro vẹ idọnọ vwọ rhuẹrẹ owẹ oma, ewun wẹn kẹ omamọ rẹ ukpoyibo, vẹ esada, kugbe emwa re rhuori, wọ da re omamọ rẹ eyagha rẹ ọka vẹ ọnyọn kugbe evwri. Wọ da rhe rho yoyovwi, wo de rhi te ẹdia rẹ uvie. 14Usi wẹn de rhi titi ro ohri rẹ ẹgborho na ejobi fiki rẹ erhuvwu wẹn, kidie ọ gbare fiki rẹ erhuvwu re me vwọ kẹ wẹ, eriyin Ọrovwohwo Ọghẹnẹ tare.
15Ẹkẹvuọvo wọ da vwẹ ẹro so erhuvwu wẹn, wo de gbe igberadja fiki rẹ usi wẹn, erhuvwu wẹn kọye wo vwo gbe igberadja kẹ ihwo re wanvrẹn. 16Wọ da reyọ iwun wẹn evo, wọ da vwẹ ayen hwa umukpe, enu rọye kọye wo de gbe igberadja, a je mrẹ oghẹre rọye dẹvo-o, eyẹ a cha mrẹ bẹdẹ-ẹ. 17Wọ da je reyọ evwarha vẹ iro mẹ kugbe idọnọ mẹ, re me vwọ kẹ wẹ, kẹ eye wo vwo gbe igberadja. 18Wọ da reyọ iwun wẹn ra nabọ rhuo na vwo phopho ayen, wo de mu ori mẹ vẹ ugboduma mẹ vwọ kẹ ayen. 19Ji kugbe ikara mẹ re me vwọ kẹ wẹ–Me vwẹ omamọ rẹ eyagha rẹ ọka vẹ evwri kugbe ọnyọn vwọ ghẹrẹ owẹ–Wo de mu ayen kẹ ayen ri gbo ọrhe ororo hwe ayen, eriyin Ọrovwohwo Ọghẹnẹ tare. 20Wo da reyọ emeshare vẹ emetẹ wẹn, ri wo vwiẹ kẹ vwẹ, enana keye wo vwo ze izobo kẹ ayen hwere. Wo rori nẹ igberadja wẹn na kẹ emu otete 21ru wo vwo hwe emọ mẹ wọ da vwẹ ayen ze Izobo rẹ ẹtorhẹ kẹ ayen? 22Vwẹ evun rẹ ẹgua wẹn ejobi kugbe igberadja wẹn wọ rha karohọ ọke emọ wẹ-ẹn, ọke rẹ wọ vwọ ban phihọ djoko, wo vwo gbunie vwẹ ọbara wẹn.
23Ọke wo de ru ogbeku na ejobi nu (ekan, ekan kẹ wẹ! eriyin Ọrovwohwo Ọghẹnẹ tare), 24wẹ ọvo re bọn asan ro kpenu kẹ oma wẹn vwẹ ọsuere kọsuere; 25vwẹ oba koba rẹ urhuvwu wọ da bọn asan ro kpenu kẹ oma wẹn ku wọ vwẹ erhuvwu wẹn gbe igberadja, wọ vwẹ oma wẹn ru ẹse kẹ ihwo re wanvrẹn, igberadja kegbe-egbe. 26Wọ vẹ ihwo rẹ Ijipt ri gbe gbe igberadja kuẹgbe, oko wẹn re wọ vẹ ọye ghwe gbe ọfanrhiẹ kuẹgbe, re wọ vwọ kpare ophu mẹ. 27Nighe, fiki rẹ ọtiọye na, ke me riẹn obọ mẹ kpahe owẹ, ki mi ru ẹkẹn ute wẹn hanvwe, ki mi siobọ nẹ uwe kẹ urhuru sivwe rẹ ivwighrẹ wẹn, emetẹ rẹ ihwo ri Filistia, rẹ oma voro fiki rẹ ẹban wẹn. 28Wọ vẹ ihwo rẹ Asiria ji gbe igberadja rhe, fikiridie evun vọn wẹ-ẹ uyota, wọ vẹ ayen gbe igberadja, dede na yẹ evun vọn wẹ-ẹ. 29Igberadja egbe wẹn rhe rho phihọ re wo vwo bru ineki re chua eki vwi Kaldia, vwẹ ọnana dede na evun je vọn wẹ-ẹ.
30Mavọ unuavwerhe rẹ ọfanrhiẹn vọn udu wẹn te, eriyin Ọrovwohwo Ọghẹnẹ tare, ru wo vwo ru imu nana, uruemu rẹ unuavwerhe rẹ igberadja na, 31re wọ vwọ bọn uwevwi ghwroro phihọ oba koba rẹ urhuvwu, re wọ da bọn asan ro kpenu phihọ ọsuere kọsuere je wọ họhọ igberadja-a, fikiridie wọ rhọvwere nẹ a hwa osa kẹ wẹ-ẹ 32Igberadja rẹ aye na, ro brẹ eshare erhorha ra jẹ ọshare rọye vwo na! 33Eshare vwẹ igho kẹ igberadja, ẹkẹvuọvo kẹ o wẹ rhoma vwẹ igho kẹ esen wẹ, wọ jẹ udi kẹ ayen rere ayen vwo bru we rhe nẹ kasan kasan rhe ri gbe igberadja. 34Ọtiọye na wọ da fẹnẹ eya ri chekọ ri gbe igberadja na ohwo ọvuọvo rẹ wẹ-ẹ, wọ rhoma hwa osa kẹ ihwo ri bru we, ye a hwa osa kẹ wẹ-ẹ, fiki rẹ ọtiọye na wọ fẹnẹ ayen. 35Ọtiọye na, E igberadja na, nyo ota rẹ Ọrovwohwo na. 36Enẹ Ọrovwohwo Ọghẹnẹ tare, Fikiridie a ban omaẹvuọ wẹn phihọ a da rha mrẹ ẹban wẹn vwẹ evun rẹ igberadja egbe wẹn vẹ esen wẹn, kugbe fiki rẹ ema wẹn ejobi, ji kugbe fiki rẹ ọbara rẹ emọ wẹn ru wọ kẹ ayen. 37Fiki rẹ otioye na, nighe, me cha ghwẹ esen wẹn ejobi koko, e re wọ vẹ ayen gbe gbe ọfanrhẹn na, ayen ejobi ri je we kugbe ayen ejobi ri tu we oma, ke me ghwẹ ayen ejobi koko rhe vwọ so owẹ nẹ asan kasan rhe, ke rhie ẹban wẹn phihọ kẹ ayen, rere ayen vwọ mrẹ ẹban wẹn ejobi. 38Ke me vwẹ owẹ guẹdjọ kirobo rẹ eya re chọ urhi rẹ orọvwe kugbe i ri sun ọbara te otọ epha, ke me cha vwẹ ọbara rẹ ophu vẹ omẹriọ vwo ghworo uwe. 39Ki mi phi we phihọ obọ rẹ esen wẹn, kẹ ayen guọghọ uwevwi wẹn ri ghwroro na te otọ ayen mi kporo asan ro kpenu na te otọ; ayen me ghwiẹ emwa wẹn nẹ uwe oma ayen me reyọ evwarha iyoyovwi wẹn, ayen me yan ju we vwo ẹbẹban djoko. 40Ayen cha ghwẹ urogho rhe vwọ so owẹ, ke ayen vwẹ ukpokpo phi we ayen me vwẹ ọlọkọ rayen nyavwe owẹ ibribro. 41Ayen ke torhẹ iwevwi wẹn ayen me vwẹ owẹ guẹdjọ vwẹ irharo rẹ eya na, ke me da obọ rẹ igberadja egbe wẹ na ji, wọ gbe hwa osa kẹ ihwo ri bru we rhe ọfa-a. 42Ọtiọye na ke me cha kpara ophu mẹ nu we, me gbe rioma kpahe owẹ-ẹ, ke me fọ gbiẹi, ivun gbi miovwo uwe ọfa-a. 43Fikiridie wọ gbe karohọ ọke-emọ wẹ-ẹn, ẹkẹvuọvo wọ da kpare ophu mẹ vwẹ oma rẹ imu nana ejobi, ọtiọye na, me cha reyọ osa rẹ uruemu wẹn ejobi vwẹ uyovwi wẹn, eriyin Ọrovwohwo Ọghẹnẹ tare.
Wọ rha vwẹ ẹbẹban djoko wẹ na vwọ ba ẹgua egbe wẹn na? 44Nighe kohwo kohwo ro kpe itẹ ejobi ko che kpẹ itẹ nana kpahe owẹ, Nighe obo rẹ oni epha ọtiọye ọmọtẹ rọye je he pha. 45Wẹ ọmọtẹ rẹ oni wẹn, ro tuoma rẹ ọshare rọye vẹ emọ rọye, wọwẹ ke rha oniọvọ ọmọtẹ rẹ iniọvo wẹn, ri tuoma rẹ eshare rayen vẹ emọ rayen. Oni wẹn ohwo ri Hẹt ọsẹ wẹn kẹ ohwo rẹ Amọr. 46Oniọvo wẹn rẹ ọmọtẹ ki Sameria, rọ vẹ emetẹ rọye dia ọbohwẹre-ọnre wẹn na, oniọvo wẹn rẹ ọmọtẹ rẹ otete rọ dia obọrhe ọnre wẹn, ọye Sodọm vẹ emetẹ rọye. 47Yẹ o te kẹ wẹ rere wọ yan phihọ idjerhe raye-en, eyẹ wọ ru kirobo rẹ ẹgua rayen epha-a, vwẹ ọmọke krẹ na wọ rhoma rhi miovwi nẹ obo rẹ ayen epha vwẹ idjerhe rayen. Kirobo re me herọ na, eriyin Ọrovwohwo Ọghẹnẹ tare, 48Kirobo re me herọ na, eriyin Ọrovwohwo Ọghẹnẹ tare, oniọvo wẹn rẹ ọmọtẹ Sọdọm vẹ emetẹ rọye ruru kirobo re wọ vẹ emetẹ wẹn ruru na-a. 49Nighe, Ọnana abe rẹ oniọvo wẹn rẹ ọmọtẹ Sodọm: te ọye vẹ emetẹ rọye muẹ oma kpenu, ayen vwo emuọre buebu, akpọ yovwẹ ayen, ẹkẹvuọvo yẹ ayen cha ivwiogbere rẹ akpọ bẹn uko-o. 50Ayen ihwo ọnko, ayen de gbe ẹgua buebu vwẹ obaro mẹ, fiki rẹ ọtiọye na mi de si ayen no vwọ ọke re me vwọ mrẹ. 51Sameria ji ru abọvo rẹ imwemwu wẹn na-a, wo gbe ẹgua nọ ayen ejobi, ọ da nẹrhẹ iniọvo rẹ emetẹ wẹn họhọ evwata vwẹ oma rẹ ẹgua ru wo gberi na. 52Gbe mu oghwa rẹ omavovwẹ wẹn, kidie wọwẹ rhe, re nẹrhẹ ẹdjọ yovwi kẹ oniọvo wẹn rẹ ọmọtẹ, fiki rẹ imwemwu wẹn ro me miovwi nẹ ayen ejobi, ayen re ma riẹn ru nọ wẹ. Gbe je oma vọ wẹ, re wọ ghwa oghwa rẹ omaẹvuọ wẹn, kidie wẹ re nẹrhẹ e ni iniọvo wẹn rẹ emetẹ kerẹ evwata.
53Me vwẹ ughwẹ rayen rhivwi rhe, te ughwẹ ri Sodọm vẹ emetẹ rọye, kugbe ughwẹ ri Sameria vẹ emetẹ rọye, ke me vwẹ ughwẹ wẹn rhivwi rhe vwẹ uherevie rẹ ayen. 54Wọ cha ghwa oghwa rẹ ophọphọvwẹ wẹn, rere oma vwọ vo wẹn fiki rẹ obo wo ruru ejobi rere ọ vwọ dia uchebrọ kẹ ayen. 55Vwọ kẹ iniọvo rẹ emetẹ wẹna Sodọm vẹ emetẹ rọye cha rhoma rhivwi kpo ẹdia rẹ ẹsosuọ, Sameria vẹ emetẹ rọye cha rhoma kpo ẹdia rẹ ẹsosuọ; te owẹ te emetẹ wẹn cha rhoma kpo ẹdia rẹ ẹsosuọ. 56Ọ dia o wẹ reyọ unu wẹn vwọ pata oniọvo rẹ ọmọte Sodọm vwẹ ọke wọ vọ vẹ oma ephuo na, 57tavwe ra ke rhe fa amwa nẹ umwemwu wẹ-ẹn? Asakiephana wọ rha rhe họhọ emu rẹ ehwẹjẹ kẹ emetẹ rẹ Edọm vẹ otu rọye ejobi, kugbe emetẹ rẹ ihwo ri Filistia, re riariẹ owẹ phihọ na re je we fia na. 58Wọ reyọ osa rẹ ọfanrhiẹn wẹn na kugbe ẹgua egbe na re, eriyin Ọrovwohwo tare.
59Uyota, enẹ Ọrovwohwo Ọghẹnẹ tare: mi nene uwe ru kirobo wo ruru na, wẹ rọ jẹ ivẹ na kufia wo de miovwi ọphọ na, 60ye me je karohọ ọphọ mẹ re me vẹ owẹ rere vwẹ ọke rẹ imitete wẹn, ke me vẹ owẹ rhoma re ọphọ re rara. 61Etiyin ku wọ karohọ idjerhe wẹn, oma kọ vo wẹ vwẹ ọke re me da reyọ iniọvo wẹn rẹ emetẹ, te re ekpako te rẹ imitete wẹn, me da vwẹ ayen ru emetẹ kẹ wẹ, ẹkẹvuọvo ọ dia fiki rẹ ọphọ re me vẹ owẹ rere-e. 62Ke me vẹ owẹ re ọphọ ọfa, ku wọ riẹn nẹ mẹvwẹ Ọrovwohwo na. 63Ọke ri mi de vwo ghovwo uwe emu ejobi ru wo ruru, kẹ wọ cha karo phihọ, oma kọ vo wẹ, wo rhe che rhiẹ unu wẹ ọfa fikirẹ omaẹvọ wẹ-ẹ, eriyin Ọrovwohwo Ọghẹnẹ tare.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Bible in Urhobo © United Bible Societies, 1977.