MARCOS 1
1
Bautizac Juan huillashcamanta
(Mt 3.1-12; Lc 3.1-9; Jn 1.19-28)
1Diospac Churi Jesucristomanta alli huillanaca, cashnami callarin. 2Dios ima nishcata huillac Isaías quillcashpaca:
«Ñuca huillactaca
Quishpichic shamuna ñanta
allichichunmi,
ñaupachishpa cachani.
3Shitashca pambapi
shuc runa caparishpaca:
“Quishpichic shamuna ñanta allichichic,
quingu ñancunatapish derechaichic”
nicunmi» nirca.
4Bautizac Juanca shitashca pambapimi bautizarinamanta, juchayuc cashcamanta llaquirishpa, Diosman cutirinamanta alli huillaita huillacurca.
5Chashna huillacucpimi, tucui Jerusalén pueblomantapish, Judea llactamantapish pai huillashcata uyangapac shamurca. Juanca paicuna llaquirishpa, juchacunata huillacpimi, Jordán yacupi bautizarca.
6Juanca camello millmamanta ruhuashca churanata churashca, cara chumbihuan chumbillishcami carca. Shinallatac langostacunata, abeja mishquitami micuc carca. 7Juanca huillashpaca: «Ñucapac quipata shamucmi ñucata yalli poderyuc. Ñucaca cumurishpa, paipac ushuta huatashcallatapish mana pascaipacmi cani. 8Ñucaca yacullahuanmi bautizani, ashtahuanpish ñucapac quipata shamucmi Diospac Espirituhuanmi bautizanga» nirca.
Jesusta bautizashcamanta
(Mt 3.13-17; Lc 3.21-22)
9Chai punzhacunapimi Jesusca Galilea llacta Nazaret pueblomanta Juanpacman shamurca. Chaimantami Juanca Jordán yacupi Jesustaca bautizarca. 10Yacumanta llucshicushpami, Jesusca jahua pacha pascarictapish, Diospac Espíritu paloma shina paipac jahuaman urai shamucuctapish ricurca. 11Shinallatac jahua pachamanta rimashpaca: «Canmi ñuca cuyashca Churica cangui. Canmi ñucataca yallita cushichingui» nirca.
Jesusta diablo pandachisha nishcamanta
(Mt 4.1-11; Lc 4.1-13)
12Bautizashca quipaca, Diospac Espiritumi Jesustaca shitashca pambaman pusharca. 13Jesusca chuscu chunga punzhatami shitashca pambapi carca. Chaipimi Satanaspish pandachisha nirca. Sacha animalcunapish tiyarcami. Chaipica angelcunami Jesustaca servicurca.
Jesús Galilea llactapi huillai callarishcamanta
(Mt 4.12-17; Lc 4.14-15)
14Bautizac Juan carcelpi cacpimi, Jesusca Galilea llactaman rirca. Chaipi Dios mandacucmanta alli huillaita, 15huillashpaca: «Alli huillai punzhaca chayamushcami. Diosca ñami mandagrin. ¡Chaimanta juchata saquishpa, Diosman cutirishpa, alli huillaita crichic!» nirca.
Challuata japic chuscu runacunata Jesús cayashcamanta
(Mt 4.18-22; Lc 5.1-11)
16Jesusca Galilea cucha patata puricushpami, Simontapish, Simonpac huauqui Andrestapish linchita yacupi shitacucta ricurca. Paicunaca challuata japiccuna carca. 17Jesusca paicunataca:
—Ñucata catichic. Cancunataca challuata japic shinallatac, gentecunata Diospacman pushamuctami ruhuasha— nirca.
18Paicunaca linchicunata saquishpa, Jesus-huan rircallami.
19Chaimanta ashtahuan chainicman rishpaca, Zebedeopac churicunatami Jacobotapish, Juantapish ricurca. Paicuna canoapi linchicuna lliquirishcata siracucpimi, 20Jesús paicunatapish cayarca. Chaimantami paicunapac taita Zebedeotapish caishuc challuata japic runacunatapish canoapi saquishpa, Jesusta catishpa rircacuna.
Jesús supai japishca runata alliyachishcamanta
(Lc 4.31-37)
21Chaimantaca Capernaúm puebloman chayashpami, samana punzhapi Jesusca israelcuna tandanacuna huasipi yachachi callarirca. 22Jesusca mandac cashpami, mandashcacunata yachachiccuna shinallaca mana yachachirca. Chaimantami tucui uyaccunaca mancharirca. 23Chai tandanacuna huasipica, supai japishca runami tiyacurca. Chai runa caparishpaca:
24—Nazaret pueblomanta Jesús, ¿ñucanchictaca imatatac ruhuagringuiyari? ¿Canca llaquichingapacchu shamungui? Canca Dios cachashca Jucha Illacmi cangui. Canta ricsinimi— nirca.
25Jesusca paitaca:
—¡Upallai, paimanta llucshi!— nishpami, sinchita rimarca.
26Chai supaica chai runata munai chucchuchishpa, sinchita caparishpami llucshi rirca. 27Chaimantami tucui gentecuna mancharinacushpa: “¿Caica imatac? ¿Mushuc yachachinatachu yachachicun? Millai supaita llucshi nicpica, cazushpa llucshinllami” nishpami tapunacurca. 28Jesusmantaca Galilea llacta muyundipi tucui causaccunami chayarcacuna.
Pedropac suegrata Jesús alliyachishcamanta
(Mt 8.14-15; Lc 4.38-39)
29Jesús tandanacuna huasimanta llucshishpaca, Jacobohuan, Juanhuanmi Simonpac, Andrespac huasiman rirca. 30Chai huasipica, Simonpac suegrami fiebrehuan ungushca carca. Chaitami Jesusmanca huillarca. 31Chaimantami Jesusca ungushcapacman cuchuyashpa, maquimanta japishpa jatarichirca. Fiebre paimanta anchuricpimi, paicunaman micunata carai callarirca.
Achca ungushcacunata Jesús alliyachishcamanta
(Mt 8.16-17; Lc 4.40-41)
32Inti tigrashpa tutayamucucpimi, tucui ungushcacunatapish, supai japishcacunatapish Jesuspacman pushamurca. 33Tucui pueblocunamantami Jesús tiyacuc huasi punguman tandanacumurca. 34Jesusca ima ungüihuan caccunatapish, taucatami alliyachirca. Runacunamantapish, supaicunata llucchishpa cacharcami. Supaicunaca Jesús pi cashcataca yacharcami. Chaimantami mana rimarichun saquirca.
Jesús Galilea llactapi huillashcamanta
(Lc 4.42-44)
35Jesusca tutamanta utca, manarac achicyamucpimi, shitashca pambapi Diosta mañangapac rirca. 36Chaimantami Simonca paihuan caccunahuan Jesustaca mashcangapac rirca. 37Jesusta tarishpaca:
—Tucui gentecunami cantaca mashcacun— nirca.
38Shina nicpimi Jesusca:
—Cuchulla llactacunamanpish jacuchic. Chaicunapipish huillangapacmi shamurcani— nirca.
39Jesusca tucui Galilea llacta israelcuna tandanacuna huasicunapimi huillarca. Runacunamantapish supaicunata llucchishpa cacharcami.
Lepra ungüihuan cac runata Jesús alliyachishcamanta
(Mt 8.1-4; Lc 5.12-16)
40Lepra ungüihuan ungushca runa Jesuspacman cuchuyashpa, cungurishpaca:
—Can ñucata alliyachisha nishpaca, alliyachinguimanllami— nishpa mañarca.
41Jesusca chai runata llaquishpami, maquihuan tuparishpaca:
—Ari, alliyachisha ninimi, alliyai— nirca.
42Rimarincami lepra ungüica chai runamanta anchurirca. 43Chai runata Jesús cachacushpaca:
44—Riqui, pi canta alliyachishcataca, pacta piman huillanguiman. Cunanca, Israel curaman ricuchigri. Can alliyashcata paicuna ricuchunca, Moisés mandashca shinallatac ofrendata cugringui— nishpami mandarca.
45Ashtahuanpish chai runaca, ima shina alliyashcataca tucuimanmi parlai callarirca. Chaimantami Jesusca mai pueblomanpish mana yaicui pudishpa, shitashca pambacunapi puricurca. Shina cacpipish, tucui llactacunamantami paipacman shamuc carca.
Currently Selected:
MARCOS 1: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.