OSEAS 1
1
Oseaspac huarmimantapish, huahuacunamantapish
1Judá llactataca jatun mandac Uzías, Jotam, Acaz, Ezequías mandacucpi, cutin Israel llactataca Joaspac churi jatun mandac Jeroboam mandacui punzhacunapimi, Mandac Dios Beripac churi Oseasman huillarca.
2Mandac Dios Oseasman huillai callarishpaca:
«Israel llactapi causaccunaca
huainayac huarmi shinami
ñucata saquishcacuna.
Chaimanta huainayac huarmihuan
cazarashpa, chai huarmipi
huahuacunata charigri» nirca.
3Shina nicpimi, Oseasca Diblaimpac ushi Gomerhuan cazararca. Chai huarmica huicsayuc tucushpami, shuc cari huahuata charirca. 4Chaimantami Mandac Diosca Oseastaca:
«Chai huahuataca Jezreelta shutichi.
Chaica, asha punzhacuna quipaca
Jezreel runacunata huañuchishcamantami
Jehupac huahua huahuacunataca
llaquichisha.
Shinallatac israelcunata
mandaccunatapish tucuchishami.
5Chai punzhallatacmi israelcunapac
flechacunata Jezreel pugru pambapi
paquisha» nirca.
6Chai huarmica cutin huicsayuc tucushpami, shuc huarmi huahuata charirca. Chaimantami Mandac Diosca Oseastaca:
«Chai huahuataca Lo-ruhamata shutichi.
Chaica, israelcunataca
mana ashtahuan llaquishachu,
shinallatac mana perdonashachu.
7Ashtahuanpish Judá llactapi causaccunataca Mandac Dios ñucallatacmi llaquishpa quishpichisha. Ashtahuanpish mana arcohuan, mana jatun macanacuihuan, mana caballopi ric soldadocunahuanchu quishpichisha» nirca.
8Gomerca paipac huahua Lo-ruhamata chuchumanta raquishpaca, cutin huicsayuc tucushpami shuc cari huahuata charirca. 9Chaimantami Mandac Diosca Oseastaca:
«Chai huahuataca Lo-ammita shutichi.
Chaica, cancunaca mana ñuca
acllashcacunachu canguichic.
Ñucapish mana cancunapac
Mandac Dioschu cani» nirca.
10Ashtahuanpish israelcunaca
mama cuchapi tiyac tiyu shinami,
pipish maita mana yupaipac cangacuna.
Maipimi cancunata:
«Cancunaca mana ñuca
acllashcacunachu canguichic»
nishca pamballapitacmi:
«Huiñaita causac Mandac Diospac
huahuacunami canguichic» ningacuna.
11Judapac huahua huahuacunapish,
israelcunapish tandanacushpami,
shuclla mandacta acllanga.
Chaica, Jezreelpac punzhaca
jatun punzhami canga.
Currently Selected:
OSEAS 1: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.