MATEO 5
5
Urcu jahuapi Jesús yachachishcamanta
(Lc 6.20-23)
1Jesusca achca gentecuna paita caticucta ricushpami, urcu jahuaman rirca. Chaipi tiyacucpimi, paipac yachacuccunaca cuchuyarca. 2Chaipimi Jesusca cashna nishpa yachachi callarirca:
Cushicuichic nishcamanta
(Lc 6.20-23)
3«Juchayuc cashcamanta
Diosta mashcaccuna, ¡cushicuichic!
Jahua pacha Dios
mandacucca cancunapacmi.
4Shungupi llaquilla caccuna,
¡cushicuichic!
Diosmi cancunataca cushichinga.
5Llaquilla shungucuna, ¡cushicuichic!
Cancunami Dios cusha nishca
llactataca japinguichic.
6Yarcaihuan yacunayaihuan shina,
cashcata ruhuanata munaccuna,
¡cushicuichic!
Diosmi chaita pactachichun saquinga.
7Llaquiccuna, ¡cushicuichic!
Cancunatapish Diosca llaquingami.
8Shungupi millai yuyaita
mana chariccuna, ¡cushicuichic!
Cancunami Diostaca ricunguichic.
9Piñanacushcata allichiccuna,
¡cushicuichic!
Cancunami Diospac
huahuacuna canguichic.
10Cashcata ruhuashcamanta
llaquita apaccuna, ¡cushicuichic!
Jahua pacha Dios mandacucca
cancunapacmi.
11Ñucata caticushcamanta piñashca, pipish llullashpa rimashca, llaquichishca caccuna, ¡cushicuichic! 12Chashna llaquichicpipish, ¡cushicuichiclla! Diosca jahua pachapimi, cancuna japina cashcata yallita cunga. Ñaupa punzhapipish Dios ima nishcata huillaccunataca llaquichircacunami.
Cachi shina, luz shina canamanta
(Mr 9.50; Lc 14.34-35)
13Cancunaca cai pachapi causaccunapacca, cachi shinami canguichic. Cachi gamuyashpaca, ¿imapactac valinga? Mana imapac valinchu. Canzhapi gentecuna saruchun shitangapacllami valin.
14Cancunaca cai pachapi causaccunapacca, luz shinami canguichic. Urcu jahuapi tiyac huasicunaca, mana pacallachu. 15Luzta japichishpaca mana cajón ucupi churanchu, ashtahuanpish ucupi caccunata achicyachichunmi, pata jahuapi churan. 16Cancunapish, cai pachapi causaccunapac ñaupapica, allita ruhuashpa causaichic. Chashnami luz shina canguichic. Cancuna chashna cacpimi, jahua pachapi tiyac cancunapac Diostaca ‘allimari cangui’ ningacuna.
Mandashcacunata yachachishcamanta
(Lc 12.57-59)
17Ñucataca ‘Mandashcacunata, Dios ima nishcata huillaccuna huillashcata anchuchingapacmi shamushca’ nishpaca, ama yuyanguichicchu, ashtahuanpish mandashcacunata pactachingapacmi shamurcani. 18Cai pacha, jahua pacha tucuringacaman, mandashcacunamantaca shuc rimaillapish, shuc puntollapish mana chingaringachu, tucui pactacungallami. Chaica chashnatacmi canga. 19Maijanpish cai mandashcacunamanta uchilla mandashcata mana cazushpa, gentecunaman yachachicca, jahua pacha Dios mandacucpica uchilla nishcami canga. Maijanpish cai mandashcacunata cazushpa shuccunamanpish yachachicca, jahua pacha Dios mandacucpica, alli nishcami canga. 20Yachachiccunatapish, fariseocunatapish atishpa mandashcacunata mana pactachishpaca, jahua pacha Dios mandacucmanca jaicapi mana yaicunguichicchu.
Pitapish mana piñanamanta
(Lc 12.57-59)
21Cancunapac ñaupa taitacunaman huillashpa: “Ama huañuchinguichu. Maijanpish huañuchictaca, juezpacman apashpa llaquichishcami canga” nishcatami uyarcanguichic. 22Ashtahuanpish ñucaca: Maijanpish piñactaca, juezpacman apashpa llaquichishcami canga. Maijanpish muspa nictaca, mandaccunapura tandanacushcapacman apashpa, llaquichishcami canga. Maijanpish imatapish rimactaca, ucu pacha ninaman shitana nishcami canga ninimi.
23Chaimanta ofrendata altarpi churangapacpish maijanhuan piñanacushca cashcata chaipi yuyarishpaca, 24ofrendata altar ñaupapi saquishpa, allichimugrichun. Chai quipaca, ofrendata cunguillami. 25Maijan canta juezpacman cayachigricpica, manarac juezpacman chayashpa, canta cayachic-huan alli tucungui. Mana cashpaca juezman cucpi, juezca soldadocunaman cushpa cantaca carcelpi churangami. 26Chaimantaca tucui cullquita cungacaman mana llucshinguichu. Chaica chashnatacmi canga.
Cazarashca jahua mana huainayanamanta
27Shinallatac ñaupaca: “Cazarashca jahua ama huainayanguichu” nishcatami uyarcanguichic. 28Ashtahuanpish ñucaca: Maijanpish shuc huarmita munashpaca, paipac shungupica ña huainayanmi.
29Chaimanta cambac alli lado ñahui juchapi urmachisha nicpica, surcushpa shitangui. Tucui cuerpo ucu pacha ninaman shitashca canapac randica, chulla ñahuillata chingachinami canmanca ashtahuan alli canga. 30Cambac alli lado maqui juchapi urmachisha nicpica, pitishpa shitangui. Tucui cuerpo ucu pacha ninapi shitashca canapac randica, cambac chulla maquillata chingachinami ashtahuan alli canga.
Cazarashcacuna mana raquirina cashcamanta
(Mt 19.9; Mr 10.11-12; Lc 16.18)
31Shinallatac ñaupaca: “Maijanpish cazarashca cashpa, paipac huarmimanta raquirisha nicca, firmata cushpa raquirichunlla” nishcatami uyashcanguichic. 32Ashtahuanpish ñucaca cashnami nini: Maijan caripish paipac huarmi manapish shuc-huan cacta yachashpa raquiricpica, chai huarmica paimantami shuc-huan huainayanacushpa juchallin. Shinallatac maijanpish chai raquirishca huarmihuan cazarashpaca, juchallinmi.
Diospac shutita mana yangalla rimana cashcamanta
33Shinallatac cancunapac ñaupa taitacunamanca: “Diospac shutipi imata ari nishpaca, pactachingui” nishcatami uyashcanguichic. 34Ashtahuanpish ñucaca cashnami nini: Diospac shutipica shinachari jahua pacha Dios mandashpa tiyarinamantapish, 35shinachari paipac chaqui saruna cai allpamantapish, shinachari Jerusalén Jatun Mandacpac pueblomantapish, 36shinachari quiquinllamantapish, pai Diospac shutipica ama rimaichicchu. Ashtahuanpish cancunaca cancunapac shuc acchallatapish yuractaca yanaman, yanataca yuracman mana tigrachi pudinguichicchu. 37Imatapish ari nina cacpica, ari nichic. Mana nina cacpica, mana nichic. Manapish cashcata nina yuyaicunaca, diablomantami shamun.
Maijan imata quichucpipish,macacpipish saquinalla cashcamanta
(Lc 6.27-36)
38Shinallatac ñaupaca: “Maijanpish ñahuita surcuctaca, paitapish ñahuita surcunami. Quiruta surcuctaca, paitapish quiruta surcunami” nishcatami uyarcanguichic. 39Ashtahuanpish ñucaca: Piñactaca ama piñanguichu, ashtahuanpish maijan canta alli lado jazhapi huactacpica, lluqui lado jazhapipish huactachun saquingui. 40Maijanpish camisata quichusha nishpa juezpacman cayachicpica, ashtahuan valishca jahualla churanatapish cungui. 41Maijan quipita shuc kilometrota apashpa cui nicpica, ishcai kilometrota apangui. 42Mañacmanca, cunguilla. Maijanpish imata mañacpica, ama misarishpa mañachinguichiclla.
Piñaccunata cuyana cashcamanta
(Lc 6.27-28,32-36)
43Ñaupaca: “Canta cuyactaca cuyangui, piñactaca piñangui” nishcatami uyarcanguichic. 44Ashtahuanpish ñucaca: Piñaccunata cuyaichic, shinallatac cancunata llaquichiccunamanta Diosta mañaichic ninimi 45Chashnami jahua pacha Diospac huahuacuna canguichic. Paica allicunaman, mana allicunaman, paita cazuccunaman, mana cazuccunamanmi intitapish, tamyatapish cachanlla. 46Cancuna maijan cuyaccunallata cuyashpaca, ¿ima allitatac Diosmantaca japinguichic? Chaitacarin Roma llactaman impuestota japiccunapish ruhuancunami. 47Shinallatac cancunapuralla alabadunacushpaca, ima allita mana ruhuanguichicchu. Diosta mana ricsiccunapish chashnaca ruhuancunami. 48Jahua pacha Dios ima shinami allita can, chashnallatac cancunapish allita caichic.
Currently Selected:
MATEO 5: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.