MATEO 22
22
Jesús bodahuan chimbapurashpa parlashcamanta
(Lc 14.15-24)
1Jesús cutinllatac yuyaita japina parlohuan parlashpaca: 2«Jahua pacha Dios mandacucman yaicunaca shuc jatun mandac paipac churita cazarachishpa, 3paipac serviccunata bodaman cayac cachacpi, mana shamusha nic shinami. 4Mana shamusha nicpi, cutinllatac shuctac serviccunata cachashpaca: “Jatun huagracunatapish, shuctac huira animalcunatapish huañuchishpami, jatun micuita ruhuashcani. Ñami tucui allichishca. Bodaman shamuichic nicunmi nigrichic” nishpa cacharca.
5Chashna cayacpipish, mana uyashpami maijancunaca trabajangapac, maijancunaca catungapac rircacuna. 6Maijancunacarin jatun mandac cachashca serviccunata macashpami huañuchirca. 7Chashna ruhuacpimi, jatun mandacca yallita piñarishpa, chai huañuchic runacunataca huañuchishpa, chai pueblotapish rupachichun soldadocunata mandarca. 8Chaimantami jatun mandacca serviccunataca: “Bodaca tucui allichishcami. Cayashcacuna mana shamusha nishcachu. 9Chaimanta cancuna mai ñancunaman llucshishpa, pipish ricuricta pushamuichic” nishpa cacharca.
10Chaimantami serviccunaca ñancunaman llucshishpa, pipish ricuricta alli cachun, mana alli cachun bodaman cayamurca. Chashnami boda huasipica jundachirca. 11Jatun mandac ucuman yaicushpaca, boda churanata mana churarishca runatami ricurca. 12Chaita ricushpaca: “Uyai, ¿ima nishpatac boda churanata mana churarishca caipica cangui?” nirca. Chashna nicpica, chai runaca upallami carca. 13Chaimantami jatun mandacca serviccunataca: “Cai runataca chaqui maquita huatashpa, canzha puraman shitaichic. Chaipica huacaihuan quiru canirinami tiyan” nirca. 14Achcami cayashcacunaca, cutin acllashcacunaca ashallami» nirca.
Impuestomanta tapushcamanta
(Mr 12.13-17; Lc 20.20-26)
15Chai quipami fariseocunaca, Jesusta ima shina pandachishpa juchanchinata yuyarinacurca. 16Chashna yuyarishpami, paicunapac yachacuccunatapish, mandac Herodespac runacunatapish tapuchun cacharca. Shina cachacpi, paicuna rishpaca:
—Yachachic, canca imapish cashcallatami yachachingui. Dios munashca shina causachunmi allita yachachingui. Canca mana manchashpa, mana piman tucushpami yachachingui. 17Canca, ¿imatatac ningui? ¿Roma llactata jatun mandac Cesarman impuestota paganachu canga? Mana cashpaca, ¿manachu pagana canga?— nishpa tapurca.
18Jesusca, paicuna mana alli yuyaihuan tapuc shamushcata yachashpami paicunataca:
—Mishqui shimi jayac shungu, ¿ima nishpatac ñucataca pandachishun nicunguichic? 19Impuestota pagana cullquita ricuchichic— nirca.
Shina nicpimi, shuc denariota ricuchirca.
20Chashna ricuchicpimi Jesusca:
—Cai cullquipica, ¿pipac ñahuitac, pipac shutitac tiyacun?— nishpa tapurca.
21Chashna tapucpimi paicunaca:
—Jatun mandac Cesarpacmi— nirca.
Shina nicpimi Jesusca:
—Shinashpaca jatun mandac Cesarpac cashcataca, jatun mandac Cesarllamantac cuichic, Diospac cashcataca, Diosllamantac cuichic— nirca.
22Chaita uyashpaca, mancharishpami upalla rircacuna.
Jesús huañushcacuna causarinamanta parlashcamanta
(Mr 12.18-27; Lc 20.27-40)
23Chai punzhapimi huañushcacuna causarinata mana cric maijan saduceocuna Jesuspacman shamushpa tapushpaca:
24—Yachachic, Moisesca: “Maijanpish manarac huahuata charishpa huañucpica, huauquimi chai viudahuan cazarana can. Chashnami huañushca huauquipac randi huahuata charina can” nishcami. 25Ñucanchicpurapimi canchis huauquicuna tiyarca. Chai huauquicunamanta punta huauquimi manarac huahuata charishpa huañurca. Saquiric viudahuanca huauquimi cazararca. 26Quipa huauquipish, ashtahuan quipa huauquipish cazararcami. Chashnami tucui canchis huauquicuna cazararca. 27Quipaca chai huarmipish huañurcami. 28Chashna canchis huauquicunahuan cazarashca cashcamantaca, huañushcacuna causarina punzhapica, ¿maijanpac huarmitac canga?— nirca.
29Chashna nicpimi Jesusca:
—Cancunaca, Dios quillcachishcatapish, Diospac podertapish mana yachashpami, yalli pandaricunguichic. 30Huañushcacuna causarina punzhapica, mana cazarangacunachu, mana cazarachingachu, ashtahuanpish jahua pacha angelcuna shinami cangacuna. 31Huañushcacuna causarinamantaca, ¿manachu Dios huillashcapica, ricushcanguichic? Diosca: 32“Ñucaca Abrahampac, Isaacpac, Jacobopac Diosmi cani” ninmi. Diosca mana huañushcacunapac Dioschu, ashtahuanpish causaccunapac Diosmi— nirca.
33Jesús yachachishcata gentecuna uyashpaca mancharircami.
Mandashcacunamanta tapushcamanta
(Mr 12.28-34)
34Saduceocunata Jesús upallachishcata yachashpami, fariseocunaca tandanacurca. 35Paicunapuramanta mandashcata shuc yachachic, Jesusta pandachisha nishpa tapushpaca:
36—Yachachiclla, mandashcacunamantaca, ¿maijantac ashtahuan yalli cazunaca?— nirca.
37Shina nicpimi Jesusca:
—“Canta Mandac Diosta tucui shunguhuan, tucui almahuan, tucui yuyaihuan cuyangui” ninmi. 38Cai mandashcami tucuimanta yalli ashtahuan cazunaca. 39Quipa mandashcapish, chai shinallatacmi: “Can ima shinami cuyaringui, chashnallatac shuccunatapish cuyangui” ninmi. 40Cai ishcai mandashcacunami tucui mandashcacunapac, Dios ima nishcata huillaccuna huillashcacunapac sapi shinaca— nirca.
Cristoca mandac Davidtapish Mandac cashcamanta
(Mr 12.35-37; Lc 20.41-44)
41Fariseocuna chaipi tandanacushca cacpimi Jesusca:
42—Cristomantaca, ¿imatatac yuyanguichic? ¿Pipac churi cashcatatac yuyanguichic?— nishpa tapurca.
Shina nicpimi, paicunaca:
—Mandac Davidpac aillupuramantami can— nircacuna.
43Chashna nicpimi Jesusca:
—Chashna cacpica, ¿ima nishpatac Davidllatac Diospac Espíritu yuyaita cucpica, Cristoca: “Ñucata Mandacmi” nirca? Davidca:
44“Mandac Diosca
ñucata Mandactaca:
Canta piñaccunata
cambac chaquipi
churangacaman,
canca ñuca alli maquiman
tiyacuilla” nishcami.
45Davidllatac “ñucata Mandac” nicpica, ¿ima shinatac Cristoca Davidpac aillupura cangayari?— nirca.
46Jesús chashna nicpica, pi imata mana cutichircachu. Chai punzhamanta pachami pi ashtahuan mana tapurca.
Currently Selected:
MATEO 22: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.